Daniel 6:1-28
6 Nüma ga ãẽ̱xgacü ga Daríu rü nüxü̃ naxuneta ga 120 ga ãẽ̱xgacügü nax norü ngü̃xẽẽruü̃gü yixĩgüxü̃ca̱x, rü wüxichigü ga yema nachixü̃anearü probínchiaarü üyemaxã inacua̱xgüxü̃ca̱x.
2 Rü yema 120 ga ãẽ̱xgacügüétüwa nüxü̃ naxuneta ga tomaepü̱x ga naerugü nax nüxü̃ yadaugüxü̃ca̱x ga yema probínchiaarü üyearü ãẽ̱xgacügüarü puracü, rü yemaacü ga nüma ga Daríu rü taxuxü̃ma ga guxchaxü̃ nüxü̃́ yexmaxü̃ca̱x. Rü wüxi ga yema tomaepü̱x ga naerugü rü Danié nixĩ.
3 Rü nüma ga Danié rü guxü̃ma ga yema togü ga ãẽ̱xgacügüarü yexera nüxü̃ nacua̱xüchi. Rü yemaca̱x ga nüma ga ãẽ̱xgacü rü nagu narüxĩnü nax namücüxü̃ nüxü̃ naxunetaxü̃ nax yema Babiróniaanemaxã inacuáxü̃ca̱x.
4 Rü yemaca̱x ga yema togü ga ãẽ̱xgacügü rü naxca̱x nadaugü ga wüxi ga guxchaxü̃ nax yemaacü Daríupe̱xewa Daniéxü̃ ínaxuaxü̃güxü̃ca̱x. Natürü nüma ga Danié rü wüxi ga yatü ga aixcüma mecü nixĩ, rü taxuxü̃ma ga chixexü̃ nawa inayangaugü.
5 Natürü nümagü ga yema ãẽ̱xgacügü rü nagu narüxĩnüe nax ñuxãcü Daniéxü̃ chixexü̃gu nangu̱xẽẽgüxü̃ rü yemaca̱x düxwa nügümaxã ñanagürügü: —Nataxuma i ta̱xacürü chixexü̃ i naxüxü̃ i Danié nax ngẽmaca̱x ínaxuaxü̃xü̃. Natürü ngẽma naxca̱x ínaxuaxü̃xü̃ tá nixĩ nax noxrütama Tupanaguama naxĩnüxü̃ rü ngexicatama nixĩ i tüxü̃́ natauxchaxẽẽxü̃ nax ínaxuaxü̃xü̃ —ñanagürügü.
6 Rü yemaacü ga yema 120 ga ãẽ̱xgacügü rü naétü ga yema taxre ga Daniémücügü rü nügümaxã inaxügagü ga ãẽ̱xgacü ga Daríumaxã nax yanadexagüxü̃ca̱x. Rü yexguma marü nape̱xewa nangugügu rü ñanagürügü nüxü̃: —¡Guxü̃guma namaxü̃, Pa Ãẽ̱xgacüx!
7 Rü guxü̃ma i toma i ãẽ̱xgacügü i cutüü̃wa namaxã icua̱xgüe i ñaa nachixü̃ane rü tangutaque̱xegü. Rü ngẽma ngutaque̱xewa nagu tarüxĩnüe nax cumax, Pa Ãẽ̱xgacüx, rü cunaxunagüxü̃ i wüxi i mu nax ngẽmaãcü 30 i ngunexü̃gu nachu̱xuxü̃ nax texé ta̱xacürü tupanana rüe̱xna yatüna ngü̃xẽẽca̱x taca̱xaxü̃, rü cuxnaxicatama name nax taca̱xaxü̃. Rü texé ya tama naga ĩnüxe i ngẽma mu rü tá leóü̃tanügu tita̱xcuchi.
8 Rü ngẽmaca̱x, Pa Ãẽ̱xgacüx, ega cuxü̃́ namexgu i ngẽma mu rü ¡nagu cugü nawǘéga nax ngẽmaãcü taxúema naxüchicüüxü̃ca̱x! Erü ngẽxguma cumax, Pa Ãẽ̱xgacüx, cuxunagügu rü taxucürüwa texé itayanaxoxẽxẽ erü ngẽmaãcü nixĩ i nüxü̃ yaxuxü̃ i tórü mugü i yixema i Médiaanecüã̱xgü rü Pérchiaanecüã̱xgü —ñanagürügü.
9 Rü nüma ga ãẽ̱xgacü ga Daríu rü nagu nügü nawǘéga ga yema mugüpane.
10 Rü yexguma Danié nüxü̃ cua̱xgu nax nüma ga ãẽ̱xgacü rü marü nügü nagu nawǘégaxü̃ ga yema mu, rü napatawa naxũ rü nayawãxna ga norü ucapuarü beü̃tánagü ga Yerucharéü̃ íyexmaxü̃waama ügüxü̃. Rü wüxichigü ga ngunexü̃gu rü tomaepü̱xcüna inacaxã́pü̱xü nax Tupanana moxẽ naxãxü̃ca̱x rü namaxã yadexaxü̃ca̱x aixrügumarüü̃tama.
11 Rü yexguma yema yatügü ga ínaxuaxü̃güxü̃ nüxü̃ cua̱xgügu rü Daniéchiü̃gu nachocu rü yexma nüxü̃ inayangaugü ga nax ínayumüxẽ́xü̃ rü Tupanaxü̃ íyacua̱xüxü̃xü̃.
12 Rü yexgumatama norü ãẽ̱xgacü ga Daríuxü̃tawa naxĩ nax namaxã yanadexagüxü̃ca̱x nachiga ga yema mu. Rü ñanagürügü nüxü̃: —Pa Ãẽ̱xgacüx, cuma rü marü cunaxunagü i wüxi i mu i nawa nüxü̃ quixuxü̃ rü texé ya ñaa 30 i ngunexü̃gügu naxüamáxe nax tümaarü tupanaarü ngü̃xẽẽca̱x ítaca̱a̱xü̃maxã, rüe̱xna ngexü̃rüüxü̃mare i yatüna taca̱xaxü̃ rü tama i cuxna, Pa Ãẽ̱xgacüx, rü tá leóü̃tanügu tita̱xcuchi. ¿Rü tama ẽ̱xna i ngẽma ñaxü̃ yixĩxü̃ i ngẽma mu? —ñanagürügü. Rü nüma ga ãẽ̱xgacü rü nanangãxü̃ rü ñanagürü: —Ngẽmáacü ngẽma ñaxü̃ nixĩ. Rü ngẽma mu rü nanaxwa̱xe nax yanguxü̃ erü yixema i Médiaanecüã̱xgü rü Pérchiaanecüã̱xgü rü taxuacüma texé tayanaxoxẽxẽ i tórü mugü —ñanagürü.
13 Rü yexguma ga nümagü rü ñanagürügü: —Ngẽma Danié i Yudíu ga ãẽ̱xgacü ga Nabucudonochó nua gaxü̃ rü tama cuga naxĩnü, Pa Ãẽ̱xgacüx, rü tama naga naxĩnü i ngẽma mu i cuxunagüxü̃. Rü toma rü marü nüxü̃ tadau nax tomaepü̱xcüna norü Tupanamaxã nayumüxẽxü̃ i wüxichigü i ngunexü̃gu —ñanagürügü.
14 Rü yemaxü̃ naxĩnügu ga ãẽ̱xgacü rü poraãcü nangechaü̃ rü naguxü̃raxü̃ãcü naxca̱x nadau nax ñuxãcü Daniéxü̃ ínanguxuchixẽẽxü̃ rü ñu̱xmata yanaxücumare ga üa̱xcü.
15 Natürü ga yema yatügü ga Daniéxü̃ íxuaxü̃güxü̃ rü wenaxarü ãẽ̱xgacüxü̃tawa naxĩ rü ñanagürügü nüxü̃: —Pa Ãẽ̱xgacüx, cuma nüxü̃ cucua̱x nax ñuxãcü nax yixĩxü̃ i tórü mugü i yixema Médiaanecüã̱xgü rü Pérchiaanecüã̱xgü rü guxü̃ma i mugü i ãẽ̱xgacü nagu nügü wǘégaxü̃ rü marü taxucürüwama texé itayanaxoxẽxẽ —ñanagürügü.
16 Rü yexguma ga nüma ga ãẽ̱xgacü rü norü duü̃xü̃güxü̃ namu nax Daniéxü̃ yagagüxü̃ca̱x rü leóü̃tanügu yata̱xcuchigüãxü̃ca̱x. Rü nüma ga ãẽ̱xgacü rü ñanagürü Daniéxü̃: —¡Yimá curü Tupana ya aixcümama naxca̱x cumaxü̃cü cuxü̃ ípoxü̃! —ñanagürü.
17 Rü nüma ga Danié rü leóü̃tanügu nayata̱xcuchigü rü wüxi ga nutamaxã nanangũxtaü̃gü. Rü nüma ga ãẽ̱xgacü rü norü ãnera yexma ngĩxü̃ naxü cua̱xruxü̃ nax aixcüma marü yanguxü̃ ga yema mu.
18 Rü yemawena rü nüma ga ãẽ̱xgacü rü napatawa naxũ rü tama nachibüãcüma nayape. Rü yema aixrügumaãcü naxüxü̃ ga norü taãxẽ rü marü tama nanaxü. Rü naétü ga yema chütaxü̃ rü tama yéma napexchaü̃.
19 Rü yexguma noxritama yangunegu ga moxü̃ãcü rü ínarüda rü paxa yema leóü̃gü ímugüxü̃wa naxũ.
20 Rü yexguma nüma ga ãẽ̱xgacü marü ngaicamana nanguxgu rü nangechaü̃gaãcü Daniéna naca rü ñanagürü: —¿Pa Danié ya Tupana ya Maxü̃cüarü Duü̃xü̃x, rü yimá curü Tupana ya aixcümama naxca̱x cumaxü̃cü rü marü cuxü̃ ínapoxü̃xü̃ natanüwa i ngẽma leóü̃gü? —ñanagürü.
21 Rü nüma ga Danié nanangãxü̃ rü ñanagürü: —¡Guxü̃guma namaxü̃, Pa Ãẽ̱xgacüx!
22 Rü yimá chorü Tupana rü nua nanamu i wüxi i norü orearü ngeruxü̃ i dauxü̃cüã̱x. Rü ngẽma nixĩ i yachotaa̱xgüxü̃ i ñaa leóü̃gü nax tama choxü̃ nangõ̱xgüxü̃ca̱x. Erü nüma ya Tupana rü nüxü̃ nacua̱x nax taxuxü̃ma i chixexü̃ cumaxã chaxüxü̃, Pa Ãẽ̱xgacüx —ñanagürü.
23 Rü yexguma ga nüma ga ãẽ̱xgacü rü poraãcü nataãxẽ rü norü duü̃xü̃güxü̃ namu nax Daniéxü̃ ínamuxũchigüxü̃ca̱x leóü̃tanüwa. Rü yexguma marü ínanguxuchigu ga Danié, rü nüxü̃ nadaugü ga taxuwama nax napíxü̃ yerü aixcümama norü Tupanaaxü̃́ nayaxõ.
24 Rü yemawena ga nüma ga ãẽ̱xgacü rü norü duü̃xü̃güxü̃ namu nax yéma nagagüãxü̃ca̱x ga yema yatügü ga Daniéxü̃ íxuaxü̃güxü̃. Rü wüxigu naxma̱xgümaxã rü naxacügümaxã leóü̃tanügu nanawocu. Rü taxũtáma mea nangucuyane rü nüma ga leóü̃gü rü marü naxca̱x nibuxmü, rü nüxna nayu̱xgu rü nagu nawagüe.
25 Rü yexguma ga nüma ga ãẽ̱xgacü ga Daríu rü wüxi ga popera naxümatü naxca̱x ga guxü̃ma ga nachixü̃anecüã̱xgü rü ngẽma to ga nagawa idexagüxü̃ ga duü̃xü̃gü. Rü yema poperawa rü nüma ga ãẽ̱xgacü rü ñanagürü: —Chanaxwa̱xe nax petaãẽgüxü̃ rü mea pexü̃ nangupetüxü̃.
26 Rü pemaxã nüxü̃ chixu rü pexü̃ chamu rü guxü̃ma i ñaa naane i chomax namaxã ichacuáxü̃wa rü chanaxwa̱xe i nüxü̃ pengechaü̃ rü nüxü̃ picua̱xüü̃gü ya yimá Daniéarü Tupana. Erü yimá Tupana rü maxü̃cü nixĩ, rü guxü̃guma nangẽxmaecha. Rü ngẽma nüma nax ãẽ̱xgacü yixĩxü̃ rü taguma inarüxo, rü ngẽma norü pora rü taguma inayagu̱x.
27 Nüma rü tórü poxü̃ruxü̃ nixĩ, rü tórü nguxü̃xẽẽruxü̃ nixĩ. Rü nüma inanawe̱x i cua̱xruü̃gü i mexü̃ i dauxü̃guxü̃ i naanewa rü ñoma i naanewa. Rü nüma nixĩ ga Daniéxü̃ ínapoxü̃xü̃ natanüwa ga leóü̃gü —ñanagürü.
28 Rü nüma ga Danié rü ãẽ̱xgacü ga Daríuarü ngü̃xẽẽruxü̃ nixĩ rü yexgumarüxü̃ ta Pérchiaanearü ãẽ̱xgacü ga Chíruarü ngü̃xẽẽruxü̃ nixĩ.
