Daniel 7:1-28
7 Rü wüxi ga chütaxü̃ ga yexguma marü wüxi ga taunecü Babiróniaanewa ãẽ̱xgacü yixĩxgu ga Berchachá, rü Danié rü naxãnegü rü nango̱xetü. Rü yexguma naba̱i̱xãchigu rü nanaxümatü ga yema nagu naxãnegüxü̃. Rü ñaa nixĩ ga yema naxümatüxü̃:
2 —Chaunegüwa nüxü̃ chadau ga buanecügü ga súrwa rü nórtewa rü éstewa rü oéstewa ne ĩcü rü poraãcü nayuapexẽẽcü ga már ga taxü̃.
3 Rü ngürüãchi yema márwa ínachoõchi ga ãgümücü ga itaxüchixü̃ ga ngo̱xogü ga tama wüxiguxü̃.
4 Rü yema nüxíraxü̃xü̃ ga ngo̱xo rü nanaleóü̃raxü̃, natürü nanaxĩyüpe̱xatüraxü̃. Rü yexguma nüxü̃ íchadawenüyane rü nanatúxü̃pe̱xatü. Rü waixü̃müanewa ínanadaxẽẽgü. Rü guma naweama yexmagüne ga naparamaxã inanachixẽẽgü ñoma wüxi i yatü ichixü̃rüxü̃. Rü guma norü maxü̃ne rü naxüchicüxü rü duü̃xẽarü maxü̃ne nüxna naxãgü.
5 Rü yema norü taxre ga ngo̱xo rü nanaxósoraxü̃, natürü yema norü wüxicüwawa rü narümáchanemae. Yema rü naã̱xwa rü nüxü̃ naxüxü̃ ga tomaepü̱x ga naga. Rü ñu̱xũchi nüxü̃ chaxĩnü ga wüxi ga ore ga nüxü̃ ñaxü̃: “¡Ngéma naxũ rü yangõ̱xcu i guxü̃ma i namachi i cuxü̃́ tauxchaxü̃ nax cunangṍxü̃!” ñaxü̃.
6 Rü yema norü tomaepü̱x ga ngo̱xo rü nanayowarunaraxü̃. Natürü nüxü̃́ nayexma ga ãgümücü ga naerugü rü naca̱xwe̱xwa rü nüxü̃́ nayexma ga ãgümücü ga naxpe̱xatü. Rü yema ngo̱xo rü nüxna nanaxãgü ga pora nax ãẽ̱xgacü yixĩxü̃ca̱x.
7 Rü yema norü ãgümücü ga ngo̱xo ga chorü ngo̱xetüwa nüxü̃ chadauxü̃ rü naxãũcümaxü̃chi, rü muü̃ tüxna naxã yerü naporaxüchi. Rü napüta rü nita rü fierunaxca̱x nixĩgü. Rü guxü̃ma ga yema nangṍxü̃ rü íxraxü̃gu nanawaü̃gü. Rü yema íyaxüxü̃ rü nagu napúgü. Yema ngo̱xo rü nanatoraxü̃ natanüwa ga yema togü ga ngo̱xogü ga chaunegüwa nüxü̃ chadauxü̃. Rü 10 ga naxchata̱xcure nüxü̃́ nayexma ga naeruwa.
8 Rü yexguma yema naxchata̱xcurexü̃ chadawenügu, rü nüxü̃ chadau ga natanüwa nax iyanagoxü̃ ga to ga rüxíxramaexü̃ ga naxchata̱xcure. Rü nanapuxü̃gü ga tomaepü̱x ga naxchata̱xcuregü nax yemaacü naxãchicaxü̃ca̱x ga yema nawa iyacuáxü̃ ga iyarügoxü̃ ga naxchata̱xcure. Rü nüxü̃ chadau nax naxãxẽtüxü̃ ga yema naxchata̱xcure rü guma naxetügü rü duü̃xü̃xetürüxü̃ nixĩgü. Rü nüxü̃́ nayexma ta ga wüxi ga naã̱x ga namaxã poraãcü nügü yacua̱xüüxü̃.
Tupana ueguxü̃ i poxcuchiga
9 7:9-10 Rü chaunegüwa nüxü̃ chadawenü rü nüxü̃ chadau ga ñuxre ga tochicaxü̃ yexma nuxü̃ rü ñu̱xũchi nüma ya Ãẽ̱xgacü ya Tupana nawa nayarüto. Yema naxchiru rü ñoma gáuxü̃te̱xe i cómüxü̃chixü̃rüxü̃ nixĩ. Rü yema nayae rü nachoxochi ñoma carnérua̱xmü i cho̱xochixü̃rüxü̃. Rü yema toruxü̃ rü nachicugü rü niyauratanücüxü. Rü wüxi ga üxüema ga taxü̃ ga iya̱u̱xraxü̃ nape̱xewa ínaxũxũ. Rü muxü̃ma nixĩ ga yema nüxü̃́ puracuexü̃. Rü muxũchixü̃ma nixĩ ga yema nape̱xegu chigüxü̃. Rü yema poperagü rü nayange̱xgü.
10 Nüü̃ nadau 7:9
11 Choma rü nüxü̃ chadawenü ga yexguma nüxü̃ chaxĩnügu ga yema ore ga namaxã nügü yacua̱xüüxü̃ ga yema naxchata̱xcure ga íxraxü̃ Rü yexguma nüxü̃ chadawenüyane rü nayama̱xgü ga yema ngo̱xo, rü ñu̱xũchi íraxü̃gu inanachexü̃gü. Rü yemawena rü üxüétüwa nayawocu ga naxchipe̱xegü nax yemaacü yaxaxü̃ca̱x.
12 Rü yema togü ga tomaepü̱x ga ngo̱xogü rü nüxna nanayaxu ga norü pora. Natürü nanamaxẽxẽxẽ ñu̱xmata nawa nangu ga norü ora ga nagu tá nayuexü̃.
13 Choma rü yexguma chütacü chingo̱xetüchigü rü nüxü̃ chadau ga wüxi ga naduü̃xü̃raxü̃xü̃ ga caixanexü̃wa ne ũxü̃ rü Ãẽ̱xgacü ya Guxü̃guma Maxü̃cü íyexmaxü̃waama ũxü̃. Rü ñu̱xũchi guma Ãẽ̱xgacüxü̃tawa nanagagü.
14 Rü nüma ga guma Ãẽ̱xgacü rü namaxã nataãxẽ rü pora nüxna naxã nax ñoma i naanemaxã inacuáxü̃ca̱x. Rü guxü̃ma i ñoma i naanecüã̱x i duü̃xü̃gü i to i nagawa idexagüchigüxü̃ rü tá nüxü̃ nicua̱xü̃gü. Rü nüma rü guxü̃guma Ãẽ̱xgacü nixĩ rü tagutáma inayacua̱x nax Ãẽ̱xgacü yixĩxü̃.
15 Rü choma i Danié rü poraãcü muü̃ choxna nangu. Rü poraãcü chaxoegaãxẽ naxca̱x ga guxü̃ma ga yema nüxü̃ chadauxü̃.
16 Rü naxca̱x chixũ ga wüxi ga yexma chíxü̃ rü nüxna chaca nax chomaxã nüxü̃ yaxuxü̃ca̱x nax ta̱xacüchiga yixĩxü̃ ga guxü̃ma ga yema nüxü̃ chadauxü̃. Rü nüma rü nanayaxu nax chomaxã nüxü̃ yaxuxü̃ca̱x, rü ñanagürü choxü̃:
17 Ngẽma ãgümücü i ngo̱xogü, rü ngẽmagü nixĩ i ngẽma ãgümücü i ãẽ̱xgacügü i ñoma i naanemaxã tá icua̱xgüxü̃.
18 Natürü ngẽmawena rü Cori ya Tupana ya Guxü̃étüwa Ngẽxmacü rü tá norü duü̃xü̃güna nanaxã i pora nax norü naanemaxã inacua̱xgüxü̃ca̱x. Rü guxü̃gutáma norü nixĩ.
19 Choma rü yexeraãcü nüxü̃ chacuáxchaü̃ nachiga ga yema norü ãgümücüwa üxü̃ ga ngo̱xo ga tama yema togü ga ngo̱xogümaxã nawüxigu. Yerü naxãũcümaxü̃chi rü guma napütagü rü fierunaxca̱x nixĩgü, rü napatügü rü bróũchenaxca̱x nixĩgü. Rü guxü̃ma ga yema nangṍxü̃ rü íxraxü̃gu nanawaü̃gü. Rü yema íyaxüxü̃ rü nagu napúgü.
20 Rü yexgumarüxü̃ ta meama nüxü̃ chacuáxchaü̃ nachiga ga yema 10 ga naxchata̱xcure, rü ñu̱xũchi yema naxchata̱xcure ga ixíxraxü̃ ga ãxetügüxü̃ rü naã̱xmaxã poraãcü nügü nicua̱xüxü̃. Rü yemaacü yema naxchata̱xcure ga ixíxraxü̃ rü yema togü ga naxchata̱xcurexü̃ nügü narüyexeragüchaü̃.
21 Rü yema naxchata̱xcure rü nüxü̃ chadau nax Tupanaarü duü̃xü̃gümaxã nügü nada̱i̱xü̃ rü naporamaexü̃ ga yema naxchata̱xcure.
22 Rü yexguma yéma nangu ga guma Ãẽ̱xgacü ya Guxü̃guma Maxü̃cü rü Guxãétüwa Ngẽxmacü nax norü duü̃xü̃güxü̃ iyapoxü̃xü̃ca̱x. Yerü marü nawa nangu ga ngunexü̃ nax norü duü̃xü̃gü yapugüãxü̃ca̱x ga norü naane.
23 Rü yemaca̱x yema nüxna chacaxü̃ rü ñanagürü: “Rü ngẽma norü ãgümücü i ngo̱xo, rü ngẽma tá nixĩ i ngẽma norü ãgümücü i ãẽ̱xgacü i ñoma i naanemaxã icuáxü̃. Rü ngẽma tá nixĩ i ngẽma tomaepü̱xarü yexera chixecümaxüchixü̃. Rü tá namaxã inacua̱x i guxü̃ma i ñoma i naane, rü tá nügüme̱xẽwa nanangexmagüxẽxẽ i guxü̃ma i duü̃xü̃gü rü tá nanadai i ngẽma tama naga ĩnüexü̃.
24 Rü ngẽma 10 i naxchata̱xcure, rü 10 i ãẽ̱xgacügü i ñoma i naanemaxã icua̱xgüxü̃chiga nixĩ. Rü ngẽmagüwena rü to i ãẽ̱xgacü tá ningucuchi. Rü ngẽma rü taxũtáma ngẽma nüxíraü̃güxü̃maxã nawüxigu. Rü ngẽma 10 i ãẽ̱xgacügütanüwa rü tá ínanawoxü̃ i tomaepü̱x.
25 Ngẽma ãẽ̱xgacü rü tá Tupana ya Guxãétüwa Ngẽxmacümaxã naguxchiga. Rü tá chixri tümamaxã inacua̱x ya yíxema Tupanaarü duü̃xẽgü. Rü tá naxca̱x nadau nax ñuxãcü nanatoraxü̃xẽẽxü̃ i Tupanaarü mugü, rü tá nüxü̃ naxoo̱x i ngẽma Tupana ueguxü̃ i petagü. Rü yíxema Tupanaarü duü̃xẽgü rü tomaepü̱x ya taunecüarü ngãxü̃ tá naxme̱xwa tangexmagü.
26 Natürü poxcu tá naxca̱x ínangu i ngẽma ãẽ̱xgacü. Rü tá nüxna nanayaxu i norü pora, rü wüxicana tá inayanaxoxẽxẽ.
27 Rü nüma ya Tupana ya Guxãétüwa Ngẽxmacü rü tá norü duü̃xü̃güna nanaxã i pora nax guxü̃ma i ñoma i naanemaxã inacua̱xgüxü̃ca̱x. Rü ñoma i naanecüã̱x i duü̃xü̃gü rü norü ãẽ̱xgacügü rü tá nüxü̃ nicua̱xüü̃gü. Rü guxü̃ma i duü̃xü̃gü i ñoma i naanewa maxẽxü̃ rü guxü̃gutáma Tupanaarü duü̃xü̃güme̱xẽwa tá nangẽxmagü rü tá naga naxĩnüxẽ”, ñanagürü.
28 Rü yexma nixĩ ga yacuáxü̃ ga guxü̃ma ga yema chaunegüwa nüxü̃ chadauxü̃. Rü choma i Danié rü poraãcü naxca̱x chaxoegaãxẽ rü chanachoxõchi. Natürü taxúemaxãma nüxü̃ chixu nachiga ga yema chaunegüwa Tupana choxü̃ wéxü̃ —ñanagürü ga Danié.
