Daniel 8:1-27
8 Rü yexguma marü tomaepü̱x ga taunecü Babiróniawa ãẽ̱xgacü yaxĩxgu ga Berchachá rü choma ga Danié rü wenaxarü chaxãnegü.
2 Rü yema chaunegüwa rü Chúchaarü ĩanewa chayexma ga Eráü̃anewa ga natü ga Uráipechinüwa.
3 Rü yexguma yáxü̃gu chadawenü rü nüxü̃ chadau ga wüxi ga carnéru ga yema natüpechinügu rüxã́ũxü̃. Yema carnéru rü nataxrechata̱xcure rü guma naxchata̱xcure rü nima̱x. Natürü wüxi ga naxchata̱xcure rü narüma̱xmae. Rü yema rüma̱xmaexü̃ nixĩ ga wixwena rügoxü̃.
4 Rü nüxü̃ chadau ga yema carnéru nax guma naxchata̱xcuregümaxã oésteguama, rü nórteguama, rü súrguama nacua̱i̱xgüxü̃, rü taxúema tiña naxcha̱xwa ga norü pora. Yema carnéru rü nüma nanawa̱xexü̃ naxümare, rü yemaacü yexera niporachigü.
5 Rü yexguma nagu ícharüxĩnügu ga yema nüxü̃ chadauxü̃ rü ngürüãchi nüxü̃ chadau ga wüxi ga chíbu ga oéstewaama ne ñaxü̃ ga poraãcü iñaxü̃ rü íchü̱xcüraxü̃xü̃. Yema chíbu rü wüxi ga taxü̃ne ga naxchata̱xcure nüxü̃́ nayexma ga naxetügüarü ngãxü̃wa.
6 Rü yexguma yema carnéru ga taxrechata̱xcurexü̃ ga natüpechinügu nüxü̃ chadauxü̃arü ngaicamawa nanguxgu ga yema chíbu rü guxü̃ma ga norü numaxã rü norü poramaxã yema carnéruxü̃ nacaxi.
7 Rü nüxü̃ chadau nax ñuxãcü yema carnéruxü̃ nacaxixü̃ rü nanabüü̃ ga guma taxre ga naxchata̱xcuregü. Rü nüma ga yema carnéru rü taxucürüwa nügü ínapoxü̃ yerü narüturamae. Rü yemawena ga yema chíbu rü waixü̃müanegu carnéruxü̃ nayanguxẽxẽ rü yexma nagu napúgü. Rü taxucürüwa texé ítanapoxü̃ nüxna ga chíbu.
8 Rü yema chíbu rü yexeraãcü niporachigü. Natürü yema ngunexü̃ ga yexera nagu naporaxü̃gu rü nibüye ga guma naxchata̱xcure ga taxü̃ne ga namaxã naporane. Rü gumachicawa inarüyi ga ãgümücü ga naxchata̱xcuregü. Rü wüxi rü nórteguama natoenü, rü nai i súrgu, rü nai i éstegu rü nai i oéstegu.
9 Rü guma wüxi ga naxchata̱xcurewa rü wüxi ga íxrane ga naxchata̱xcure nayarügo. Rü guma naxchata̱xcurearü pora rü súrwa, rü éstewa, rü ñu̱xũchi yema mexü̃ ga naane ga Iraéanewa nangu.
10 Rü yexera nitachigü ga guma naxchata̱xcurearü pora rü ñu̱xmata Tupanaarü churaragütanüwa nangu. Rü muxü̃ma ga yema churaragüxü̃ narüyixẽxẽ rü nagu nipúgügü.
11 Rü nüma ga yema íxraxü̃ ga naxchata̱xcure rü yema Tupanaarü churaragüeruxü̃ nügü narüyexeraxẽẽchaxü̃. Rü inayanaxoxẽxẽ nax Tupanaca̱x yagugüãxü̃ ga ãmaregü ga wüxichigü ga ngunexü̃gu. Rü nanaxãũãchixẽxẽ ga guma Tupanapata.
12 Rü norü numaxã norü churaragü nagu namugü ga yema nachica ga Tupanaca̱x ãmare nawa yagugüxü̃. Rü yemaacü ga yema íxraxü̃ ga naxchata̱xcure rü nüxü̃ naxoo̱x ga yema ore i aixcüma ixĩxü̃, rü nanaxü ga guxü̃ma ga yema nüma nanaxwa̱xexü̃. Rü guxü̃ma mea nüxü̃́ ínanguxuchi.
13 Yemawena rü nüxü̃ chaxĩnü nax wüxi ga orearü ngeruxü̃ i daxũcüã̱x rü to ga orearü ngeruxü̃na naca̱xaxü̃ rü ñanagürü: —¿Ñuxgu tá iyacuáxü̃ i ñaa chixexü̃ i ñu̱xma ãmarechicawa nüxü̃ idauxü̃ ga noxri wüxichigü ga ngunexü̃gu Tupanaca̱x ãmare ígugüxü̃wa? ¿Rü ñuxgu tá nagúxü̃ i ngẽma? ¿Rü ñuxgu tá Tupana inayacua̱xẽxẽ nax pecadu nawa naxügüxü̃ ya napata? ¿Rü ñuxguratáta Tupana inayacua̱xẽxẽ nax ngẽma uanü chixri tümamaxã inacuáxü̃ ya yíxema nüxü̃́ yaxõgüxe? —ñanagürü.
14 Rü yema to ga orearü ngeruxü̃ ga dauxü̃cüã̱x rü nanangãxü̃ rü ñanagürü: —Ngẽma guxchaxü̃gü rü 2,300 i ngunexü̃ tá natai. Rü ngẽmawena tá nixĩ i Tupanaca̱x namexẽẽxü̃ i ngẽma nachica i üünexü̃ —ñanagürü.
Tupanaarü orearü ngeruxü̃ ga Gábi Daniémaxã nüxü̃ nixu nax ta̱xacüchiga yixĩxü̃ ga yema nüxü̃ nadauxü̃
15 Rü yexguma choma i Danié rü nüxü̃ íchadawenüyane ga yema Tupana chaunegüwa choxü̃ wéxü̃, rü nagu ícharüxĩnüyane nax ta̱xacüchiga yixĩxü̃ ga yema chaunegü. Rü ngürüãchi chope̱xewa nango̱x ga wüxi ga naduü̃xü̃raxü̃xü̃.
16 Rü nüxü̃ chaxĩnü ga wüxi ga naga ga naduü̃xü̃garaxü̃xü̃ ga natü ga Uráiwa inaxũxü̃ ga ñaxü̃: —¡Pa Gábix, yimá yatümaxã nüxü̃ ixu nax ta̱xacüchiga yixĩxü̃ i ngẽma nüxü̃ nadauxü̃! —ñaxü̃.
17 Rü yexguma ga nüma ga Gábi rü cha̱u̱xca̱x nixũ. Choma rü chaba̱i̱xãchi rü nape̱xegu chanangücuchi waixü̃müanegu. Natürü ga nüma rü ñanagürü choxü̃: —Pa Yatüx, name i nüxü̃ cucua̱x i ngẽma nüxü̃ cudauxü̃ rü nachiga nixĩ i ngẽma ngunexü̃gü i nagu yacuáxü̃ i ngẽma ñu̱xma ngupetüxü̃ —ñanagürü.
18 8:18-19 Rü yexguma chomaxã yadexayane rü chiyuãchi rü yexma waixü̃müanegu chayangu. Natürü ga nüma rü choxü̃ ningõgü rü choxü̃ inachixẽxẽ. Rü ñu̱xũchi choxü̃ ñanagürü: —Cumaxã tá nüxü̃ chixu nax ñuxãcü tá yixĩxü̃ i ngẽxguma nagu̱xgu nax Tupana napoxcuexü̃ i norü duü̃xü̃gü i tama naga ĩnüexü̃. Erü ngẽma cunegüwa nüxü̃ cudauxü̃ rü nachiga nixĩ i ngẽma ngunexü̃gü i nagu yacuáxü̃ i ngẽma ñu̱xma ngupetüxü̃.
19 Nüü̃ nadau 8:18
20 Rü ngẽma carnéru i taxrechata̱xcurexü̃ i nüxü̃ cudauxü̃ rü ngẽma rü Médiaanearü ãẽ̱xgacüchiga rü Pérchiaanearü ãẽ̱xgacüchiga nixĩ.
21 Rü ngẽma chíbu rü Gréchiaanearü ãẽ̱xgacüchiga nixĩ. Rü ngẽma naxchata̱xcure i naxetügüarü ngãxü̃wa ngẽxmaxü̃ rü ngẽma nixĩ i ngẽma nüxíraxü̃xü̃ i Gréchiaanearü ãẽ̱xgacü.
22 Rü yema ãgümücü ga naxchata̱xcuregü ga irüxügüxü̃ ga yexguma ínabüegu ga yema nüxíra yexmaxü̃, rü nachiga nixĩ i ngẽma ãgümücü i ãẽ̱xgacügü i tá ngẽma nüxíraxü̃xü̃ i ãẽ̱xgacüwena ngẽxmagüxü̃, natürü taxũtáma ngẽma nüxíraxü̃xü̃ i ãẽ̱xgacüarü poramaxã nawüxigu.
23 Rü ngẽxguma tá norü gu̱xwa nangu̱xgu nax nachixü̃anegümaxã inacua̱xgüxü̃ i ngẽma ãgümücü i ãẽ̱xgacügü, rü ngẽxguma norü gu̱xwa nanguxgu i ngẽma taxü̃ i chixexü̃, rü ñu̱xũchi wüxi i ãẽ̱xgacü i chixecümaxü̃ rü womüxẽẽwa̱xexü̃ tá ningucuchi.
24 Rü tá nawa nangu nax naporaxüchixü̃, natürü taxũtáma noxrütama poramaxã nixĩ. Rü nüma rü tá poraãcü togü i nachixü̃anegüxü̃ nachixexẽxẽ. Rü guxü̃ma i ngẽma naxüxü̃ rü tá mea nüxü̃́ ínanguxuchi. Rü tá nanadai i muxü̃ma i ãẽ̱xgacügü i poraexü̃, rü muxü̃ma i Tupanaarü duü̃xü̃gü.
25 Rü ngẽma nax womüxẽẽxü̃ nacuáxü̃ rü tá nanawomüxẽxẽ i muxü̃ma i duü̃xü̃gü. Rü nügü tá nicua̱xüxü̃. Rü yíxema duü̃xẽgü ga nagu yaxõgüchiréxe rü tüxü̃ tá nadai. Rü yimá ãẽ̱xgacügüarü Ãẽ̱xgacümaxã tá nügü nadai. Rü yimá Ãẽ̱xgacü rü tá nayama̱x i ngẽma womüxẽẽwa̱xexü̃ i ãẽ̱xgacü.
26 Rü ngẽma curü ngo̱xetügüwa cuxü̃ nüxü̃ chadauxẽẽxü̃ nachiga i ngẽma yáuanecügü rü paxmamagü, rü aixcüma tá ningu. Natürü cuxicatatama nüxü̃ cucua̱x i ngẽma, erü ngẽma rü mucüma ya taunecüguwena tá nixĩ nax yanguxü̃ —ñanagürü ga Tupanaarü orearü ngeruxü̃ ga Gábi.
27 Rü choma i Danié rü chaugüca̱x changearü poraã̱x ga yexguma. Rü ñuxre ga ngunexü̃ chida̱xawe. Rü yemawena ícharüda rü wenaxarü chanaxü ga guma nachixü̃anearü ãẽ̱xgacü nagu choxü̃ muxü̃ ga puracü. Natürü ga choma rü poraãcü naxca̱x chaxoegaãxẽ ga yema chaunegüwa nüxü̃ chadauxü̃, yerü tama nüxü̃ chacua̱xéga nax ta̱xacüchiga yixĩxü̃.
