Daniel 9:1-27
9 Rü nüma ga Daríu ga Achuéru nane ga Médiaanecüã̱x ixĩxü̃, rü ãẽ̱xgacü nixĩ ga Babiróniaanewa.
2 Rü gumá taunecü ga nagu yangucuchicügu ga Daríu rü choma ga Danié rü nawa íchangu̱x ga yema popera ga Tupanaarü orearü uruxü̃ ga Yeremía ümatüxü̃. Rü yema ore ga nawa changúxü̃ rü nüxü̃ nixu nax 70 ya taunecü tá ninge nax chixexü̃wa nangẽxmaechaxü̃ ya Yerucharéü̃, yerü yemaacü nixĩ ga Cori ya Tupana Yeremíamaxã nüxü̃ yaxuxü̃.
3 Rü yemaca̱x chayumüxẽ rü Cori ya Tupanana chaca nax toxü̃ ínanguxü̃xẽẽxü̃ca̱x naxme̱xwa i torü uanügü rü wena torü naanewa toxü̃ nawoeguxẽẽxü̃ca̱x. Rü yemaacü tama chachibüãcüma chayumüxẽ rü témüxü̃ ga naxchirugu chicu̱x rü tanimacate̱xewa charüto.
4 Rü yema chorü yumüxẽwa rü Tupanamaxã nüxü̃ chixu ga chorü pecadugü rü chautanüxü̃arü pecadugü rü ñachagürü: —Pa Cori Pa Tupanax, cuma rü guxãétüwa cungexma rü cuporaxüchi rü guxü̃guma cuyanguxẽxẽ i curü unetagü. Rü ngẽmawa tüxü̃ cunawe̱x nax tüxü̃ cungechaü̃xü̃ ya yíxema aixcüma cuga ĩnüexe rü nagu maxẽxe i curü mugü.
5 Rü toma rü poraãcü pecadu cupe̱xewa taxüe rü chixexü̃ taxüe. Rü tamaxẽmare rü tama cugu tarüxĩnüe. Rü nüxü̃ tarüxoe i curü mugü rü curü ucu̱xẽgü.
6 Rü guma curü orearü uruü̃gü ga nawa quidexacü namaxã ga torü ãẽ̱xgacügü rü torü o̱xigü, rü guxü̃ma i tomax i Iraétanüxü̃, rü toma rü tama naga taxĩnüechaü̃ ga yexguma tomaxã nüxü̃ yaxugüegu ga curü ore.
7 Rü cumax, Pa Cori Pa Tupanax, rü aixcümacü quixĩ. Rü ngẽmaca̱x poraãcü cupe̱xewa taxãnee i toma i Yerucharéü̃cüã̱xgü, rü ngẽma togü i totanüxü̃ i Iraétanüxü̃ i ngaicamawa rü yáxü̃wa to i nachixü̃anegu cuwoonexü̃ nagagu nax tama cuga naxĩnüexü̃.
8 Rü ñu̱xma i tomax, Pa Cori Pa Tupanax, rü naxrüü̃tama i ngẽma torü ãẽ̱xgacügü rü torü o̱xigü rü taxãnee erü cupe̱xewa chixexü̃ taxügü.
9 Natürü i cumax, Pa Torü Tupanax, rü woetama cucüma nixĩ nax cumecümaxü̃ rü toxü̃́ nüxü̃ curüngü̃maxü̃ i torü chixexü̃. Rü ngẽmaca̱x cupe̱xewa tangugü erü toma rü poraãcü chixexü̃ taxü.
10 Rü tama cuga taxĩnüe rü nüxü̃ tacugüe ga curü mugü ga curü duü̃xü̃gü ga orearü uruü̃güwa tomaxã nüxü̃ quixuxü̃.
11 Rü guxü̃ma i chautanüxü̃ i Iraétanüxü̃ rü tama naga naxĩnüe i curü mugü. Rü cuxna nixĩgachi rü tama naga naxĩnüe i curü ucu̱xẽgü. Rü yemaca̱x ga yema poxcu ga curü duü̃ ga Moichéwa nüxü̃ quixuxü̃ rü togu nangu.
12 Rü yema nax toxca̱x núma cunamuxü̃ ga yema taxü̃ ga guxchaxü̃ rü yemamaxã cuyanguxẽxẽ ga yema poxcu ga tomaxã rü torü ãẽ̱xgacügümaxã cuxueguxü̃. Rü yema poxcu ga Yerucharéü̃na cunguxẽẽxü̃, rü taguma yemaacü cunapoxcu ga to ga ĩane.
13 Rü guxü̃ma ga yema chixexü̃ rü toxna nangu yematama Moiché ümatüxü̃ ga mugüwa nüxü̃ ixuxü̃rüxü̃. Natürü ga toma rü tama cuxca̱x tadaugü, Pa Cori Pa Torü Tupanax. Rü tama nüxü̃ tarüxoe ga yema torü chixexü̃gü, rü tama nagu tamaxẽ ga curü ore i aixcüma ixĩxü̃.
14 Rü yemaca̱x, Pa Cori Pa Tupanax, rü toxca̱x ícunangu̱xẽxẽ ga yema taxü̃ ga guxchaxü̃ ga cumatama tomaxã cuxueguxü̃. Erü cuma rü aixcüma cuyanguxẽxẽ i ngẽma nüxü̃ quixuxü̃. Natürü i toma rü tama cuxü̃́ itarüxĩnüechaü̃.
15 Natürü ga cumax, Pa Cori Pa Torü Tupanax, rü nũxcüma icunawe̱x ga yema taxü̃ ga curü pora ga yexguma Equítuanewa ícunguxü̃xẽẽgu ga curü duü̃xü̃gü. Rü yemaacü cugü cutachigaxẽxẽ ñu̱xmata ñoma i ngunexü̃wa nangu. Natürü ga toma rü poraãcü cupe̱xewa chixexü̃ taxü.
16 Pa Cori Pa Tupanax, nüxü̃ tacua̱x rü cuma rü cumecümaxü̃chi. Rü ngẽmaca̱x cuxna taca nax namaxã icurüngüxmüxü̃ca̱x ya yima ĩane ya Yerucharéü̃cüã̱xgü. Erü yima ĩane rü cuxrü nixĩ, rü ngéma nangẽxma ya curü ma̱xpǘne ya üünene. Rü ñu̱xma rü guxü̃ma i ngẽma togü i nachixü̃anecüã̱xgü i duü̃xü̃gü rü nüxü̃ nacugüe i ngẽma curü duü̃xü̃gü rü nüxü̃ nacugüe ya yima Yerucharéü̃ nagagu i ngẽma chixexü̃gü i toma taxügüxü̃ rü torü o̱xigü ügüxü̃.
17 Pa Torü Tupanax, choma rü curü duü̃xü̃ chixĩ. ¡Rü nüxü̃ naxĩnü i chorü yumüxẽ i nawa cuxü̃ chaca̱a̱xü̃xü̃! Rü cugüégagu cuxna chaca nax nüxü̃ cungechaü̃ãcüma nüxü̃ cudauxü̃ nax ñuxãcü poraãcü nachixexü̃ ya yima cupata ya taxü̃ne.
18 Pa Chorü Tupanax ¡choxü̃ naxĩnü i ñaa chorü yumüxẽ erü curü duü̃xü̃ chixĩ! ¡Rü mea nangugü nax ñuxãcü poraãcü nachixexü̃ ya yima ĩane ya Yerucharéü̃ ya nawa cuégagu cuxna taca̱xaxü̃ne! Rü tama ta̱xacürü mexü̃ i cupe̱xewa taxüxü̃gagu nixĩ i cuxü̃ taca̱xaxü̃xü̃, natürü cuxna taca erü cuma rü cuxü̃́ tangechaxü̃tümüü̃gü woo taxü̃ ga chixexü̃ nax taxügüchiréxü̃.
19 Pa Corix, Pa Corix ¡toxü̃ naxĩnü rü toxü̃́ nüxü̃ irüngüma i torü chixexü̃ rü toxü̃ rüngü̃xẽxẽ! ¡Rü paxa toxü̃ nangãxü̃, Pa Corix! Rü cugüégagutama, rü yima curü ĩaneégagu rü curü duü̃xü̃gü i cuégagu yumü̃xẽgüxü̃égagu cuxna chaca nax paxa toxü̃ curüngü̃xẽẽxü̃ —ñachagürü.
Daniémaxã nüxü̃ nixu ga 70 ga yüxügüchiga
20 Rü choma rü íchayadaxẽxẽ ga nax chayumüxẽxü̃ rü Tupanamaxã nüxü̃ chixuxü̃ ga chorü chixexü̃gü rü chautanüxü̃ ya Iraétanüxü̃arü chixexü̃gü. Rü Cori ya Tupanaxü̃ chaca̱a̱xü̃ naxca̱x ya yima norü ma̱xpǘne ya üünene.
21 Rü yexguma íchayumüxẽyane rü cha̱u̱xca̱x nango̱x ga Tupanaarü orearü ngeruxü̃ ga dauxü̃cüã̱x ga Gábi ga ü̃pa cha̱u̱xca̱x ngócü ga yexguma Tupana choxü̃ ngo̱xetüxẽẽgu. Rü yagoeãcü yema íchayexmaxü̃wa nangu. Rü yema ora ga Tupanaca̱x ãmaregü yagugüxü̃ ga yáuanecü nixĩ ga chauxü̃tawa nanguxü̃.
22 Rü ñanagürü choxü̃: —Pa Daniéx, nua chaxũ i ñu̱xmax nax cuxü̃ nuxü̃ chayacua̱xẽẽxü̃ca̱x ga yema Tupana cuxü̃ wéxü̃.
23 Rü yexguma noxritama icunaxügügu nax cuyumüxẽxü̃ rü Tupana rü marü cuxü̃ nangãxü̃. Rü ngẽmaca̱x i chomax rü nua chaxũ nax cumaxã nüxü̃ chayarüxuxü̃ca̱x nax marü cuxü̃ nangãxü̃xü̃, erü nüma ya Tupana rü poraãcü cuxü̃ nangechaü̃. ¡Rü ñu̱xma rü mea irüxĩnü i ngẽma tá cumaxã nüxü̃ chixuxü̃ nachiga ga yema nüxü̃ cudauxü̃ ga yexguma cungo̱xetügu!
24 Rü 70 i yüxügü ngupetüguwena rü yima curü ĩane ya üünene ya Yerucharéü̃ rü ngẽma curü duü̃xü̃gü i Iraétanüxü̃ rü düxwa tá inayarüxo i norü chixexü̃ i naxügüxü̃ rü tá Tupanaga naxĩnüe. Rü Tupana tá nüxü̃́ inanaxoxẽxẽ i ngẽma norü chixexü̃gü, rü tá nüxü̃́ nüxü̃ inarüngüma i ngẽma norü chixexü̃. Rü tá ningucuchi ya yimá aixcüma mecü nax guxü̃guma norü duü̃xü̃gümaxã mea inacuáxü̃ca̱x. Rü ngẽmaãcü tá ningu ga yema Tupana cuxü̃ wéxü̃. Rü wena tá nanamexẽxẽ ya yima napata ya üünene.
25 Rü name i nüxü̃ cucua̱x nax ta̱xacüchiga yixĩxü̃ i ngẽma tá cumaxã nüxü̃ chixuxü̃: Rü ngẽma ngunexü̃ i nagu naxunagüxü̃ nax wena namexẽẽgüãxü̃ca̱x ya Yerucharéü̃ rü ñu̱xmata ngẽma ngunexü̃ ya yima ãẽ̱xgacü ya mecü nagu ínguxü̃gu rü 7 i yüxü tá ningu i ngẽxguma. Rü ngẽma nax namexẽẽgüãxü̃ca̱x i Yerucharéü̃arü namagü rü norü poxeguxü̃tápü̱x rü 62 ya yüxü tá ningu. Natürü ngẽma ngunexü̃gügu rü tá taxü̃ i guxchaxü̃ nangẽxma.
26 Rü ngẽma 62 i yüxüwena rü tá nayama̱xgü ya yima ãẽ̱xgacü ya mecü. Rü ngẽmawena rü tá ningucuchi i wüxi i ãẽ̱xgacü. Rü ngẽma norü duü̃xü̃gü rü tá nagu napogüe ya Yerucharéü̃ rü yima Tupanapata ya taxü̃ne. Rü ngẽma Yerucharéü̃gu nax napogüexü̃ rü ñoma wüxi ya mucü ya ngürüãchi guxü̃wama inanguanexẽẽcürüxü̃ tá nixĩ. Rü ngẽma dai rü taxũtáma ínayachaxãchi rü ñu̱xmatáta mea nagu napogüe ya yima ĩane, yerü yemaacü nanaxuegu ga Tupana.
27 Rü wüxi i yüxügu i ngẽma ãẽ̱xgacü rü muxü̃ma i duü̃xü̃gümaxã tá wüxi i uneta naxü. Natürü yima yüxüarü ngãxü̃gu rü nüma i ngẽma ãẽ̱xgacü rü tá nayanuxũ nax Tupanaca̱x ãmare tigugüxü̃ rü itanaxãgüxü̃ i ãmaregü. Rü ngẽma ãmarearü guruü̃pe̱xewa tá taxü̃ i chixexü̃ naxü rü ñu̱xmatáta Tupana nayama̱x i ngẽma ãẽ̱xgacü i chixexü̃ üxü̃ —ñanagürü.
