Esdras 1:1-11
1 Rü gumá taunecü ga nagu yangucuchicü ga Chíru nax Pérchiaanearü ãẽ̱xgacü yixĩxü̃ca̱x, rü Cori ya Tupana nayanguxẽxẽ ga norü ore ga Yeremíaa̱xwa nüxü̃ yaxuxü̃. Rü yemaca̱x ga nüma ga Tupana rü ãẽ̱xgacü ga Chíruãẽwa ínanangu̱xẽxẽ nax guxü̃ ga nachixü̃anegü ga nüma namaxã inacuáxü̃maxã naxunagüãxü̃ca̱x ga wüxi ga mu ga ümatüxü̃ ga ñaxü̃:
2 —Choma i Chíru i Pérchiaanearü ãẽ̱xgacü rü chanaxunagü i ñaa mu i ñaxü̃: “Nüma ya daxũcüã̱x ya Cori ya Tupana rü marü cho̱xme̱xwa nanangexmagüxẽxẽ i guxü̃ma i nachixü̃anegü i ñoma i naanewa ngẽxmagüxü̃. Rü nüma ya Cori ya Tupana choxü̃ namu nax naxca̱x chanaxüxü̃ca̱x ya wüxi ya napata ya taxü̃ne nawa ya yima ĩane ya Yerucharéü̃ i Yudáanewa ngẽxmane.
3 Rü ngẽmaca̱x i guxãma i pema ya Iraéanecüã̱xgü ixĩgüxe, rü name nixĩ nax Yudáanewa ngẽxmane ya ĩane ya Yerucharéü̃ca̱x pewoeguxü̃ nax wena penaxügüxü̃ca̱x ya napata ya taxü̃ne ya yimá perü Tupana. Rü nüma tá pexü̃́ nanatauxchaxẽxẽ nawa i ngẽma puracü.
4 Rü yíxema petanüxü̃ ya tama woeguchaü̃xe, rü name nixĩ i diẽrumaxã, rü úirumaxã, rü õnamaxã rü wocagümaxã nüxü̃ tarüngü̃xẽxẽ i ngẽma woeguxü̃. Rü naétü rü name nixĩ i nüxna tanaxã i tümaarü ãmare naxca̱x ya Tupanapata ya taxü̃ne ya Yerucharéü̃wa wena tá naxügüne” —ñanagürü ga ãẽ̱xgacü ga Chíru.
Iraéanecüã̱xgü rü wena Yerucharéü̃ca̱x nawoegu
5 Rü nüma ga Tupana rü yema Yudátanüxü̃arü ãẽ̱xgacügüãẽwa rü Bẽyamíü̃tanüxü̃arü ãẽ̱xgacügüãẽwa rü chacherdótegüãẽwa nananguxẽxẽ ga wüxi ga ngúchaü̃ nax Yerucharéü̃ca̱x nawoeguxü̃ca̱x nax wena naxügüã̱xü̃ca̱x ga Tupanapata ga taxü̃ne.
6 Rü yema Iraétanüxü̃ ga tama Yerucharéü̃ca̱x woeguchaü̃xü̃, rü yema woeguxü̃xü̃ narüngü̃xẽẽgü diẽrumaxã, rü úirumaxã, rü wocagümaxã rü norü yemaxü̃gü ga tatanüxü̃maxã. Rü naétü nüxna nanaxãgü ga ãmaregü Tupanapata ga taxü̃neca̱x.
7 Rü nümatama ga ãẽ̱xgacü ga Chíru rü nanawoeguxẽxẽ ga yema naxpáü̃gü ga úirunaxca̱x rü guxü̃ma ga togüamachigü ga Tupanapata ga taxü̃nearü yemaxü̃gü ga ãẽ̱xgacü ga Nabucudonochó Yerucharéü̃wa ne naxü̃ rü norü tupanapatagu yanuxü̃.
8 Rü nüma ga Chíru ga Pérchiaanearü ãẽ̱xgacü rü norü diẽruarü dauruxü̃ ga Miridátexü̃ namu nax Yudátanüxü̃arü ãẽ̱xgacü ga Chebachárana nanaãxü̃ca̱x ga yema Tupanapataarü yemaxü̃gü.
9 1:9-10 Rü yema yemaxü̃gü ga Chíru woeguxẽẽxü̃ nixĩ ga 30 ga tacháũgü ga ítáxü̃ ga úirunaxca̱xgü, rü 1,000 ga tacháũgü ga ítáxü̃ ga diẽrumünaxca̱xgü, rü 29 ga cüxchigü, rü 30 ga tacháũgü ga ixíxraxü̃gü ga úirunaxca̱x, rü 410 ga togü ga tacháũgü ga diẽrumünaxca̱x, rü ñu̱xũchi 1,000 ga togü ga yemaxü̃gü.
10 Nüü̃ nadau 1:9
11 Rü yema Tupanapataarü yemaxü̃gü ga úirunaxca̱x rü diẽrumünaxca̱x rü 5,400 nixĩ ga norü mu. Rü guxü̃ma ga yema yemaxü̃gü rü Chebachára nayana ga yexguma Babiróniaanewa nataegu̱xgu namaxã ga yema duü̃xü̃gü ga Yerucharéü̃ca̱x woeguxü̃.
