Esdras 3:1-13
3 Rü yexguma 7 ga tauemacüwa nanguxgu nax Babiróniaanewa ne naxĩxü̃ rü nüma ga Iraétanüxü̃gü ga norü ĩanewachigü ngugüxü̃ rü Yerucharéü̃wa naxĩ nax yéma yangutaque̱xegüxü̃ca̱x.
2 Rü yemaca̱x ga Yochué ga Yochadáx nane rü namücügü ga chacherdótegümaxã rü Chorobabé ga Charatié nane rü natanüxü̃maxã wenaxarü nanaxügü ga Tupanaarü ãmarearü guruxü̃ nax yéma ínaguaxü̃ca̱x ga Tupanaarü ãmaregü, yema mugü ga Moiché ümatüxü̃ nüxü̃ ixuxü̃rüxü̃.
3 Rü yema Tupanaarü ãmarearü guruxü̃ rü nüxíraxü̃xü̃ ga nachicagutama nanaxǘgü rü meama natai. Rü yema nax naxca̱x namuü̃exü̃ ga yema duü̃xü̃gü ga yema naanewa yexmagüxü̃, rü yemaca̱x guxü̃guma ga pa̱xmama rü yáuanecü rü Cori ga Tupanaca̱x ínanagugüxü̃ ga norü ãmaregü.
4 Rü yema Moiché ümatüxü̃ ga mugü nüxü̃ ixuxü̃rüxü̃ rü nanaxüchigagüxü̃ ga yema naixatümaxã nügü nax yaxüpataxü̃. Rü guxü̃ma ga ngunexü̃gu rü ínanaguuxü̃ ga ãmaregü aixrügumarüü̃tama yema Moiché ümatüxü̃ ga mugü nüxü̃ ixuxü̃rüxü̃.
5 Rü yexgumarüxü̃ ta ínanagu ga ãmaregü ga ngü̃chigaarü ngunexü̃gu íguxü̃, rü yema ãmaregü ga yexwacax ixücucü ga tauemacügu íguxü̃, rü yema ãmaregü ga togü ga petagu Tupanaca̱x íguxü̃. Rü yexgumarüxü̃ ta ínanagu ga yema ãmaregü ga texé tümaarü ngúchaü̃maxã Tupanaca̱x ixãmaregüxü̃.
6 Rü yema nax Tupanaca̱x ínaguaxü̃ ga ãmaregü, rü inanaxügüe meama norü 7 ga tauemacüarü ügügu naxü̃pa nax ínachixẽẽgüãxü̃ ga yema naxtapü̱x ga guma Tupanapata ga taxü̃ne.
7 Rü ñu̱xũchi naxca̱x nadaugü ga ĩpataarü üruü̃gü ga nutaarü ñaxcuruü̃gü rü corapinagü, rü diẽrumaxã nüxü̃́ nanaxütanü. Rü Líbanuanewa ga Tíruwa rü Chidóü̃wa naxca̱x nataxegü ga mürapewa ga ocayiwagü. Rü yema mürapewa rü õnamaxã, rü bínumaxã, rü oribuarü chíxü̃maxã nanaxütanügü. Rü yema mürapewagü rü Líbanuanewa nixĩ ga ne nanaaxü̃. Rü márpechinügu nayana ñu̱xmata Yópearü türewa nangugü, yerü yemaacü nixĩ ga nüxna naxãgaxü̃ ga Pérchiaanearü ãẽ̱xgacü ga Chíru.
Inanaxügüe ga wena nax naxügüãxü̃ ga Tupanapata ga taxü̃ne
8 Rü nüma ga Chorobabé ga Charatié nane rü Yochué ga Yochadáx nane rü nüma ga chacherdótegü rü Lebítanüxü̃ rü guxü̃ma ga yema Iraétanüxü̃ ga Yerucharéü̃ca̱x woeguxü̃, rü guxü̃ma ga yemagü wüxigu inanaxügüe ga yema puracü nax wena namexẽẽgüãxü̃ ga Tupanapata ga taxü̃ne. Rü yema puracü rü inaxügü ga yexguma marü taxre ga taunecü ínguxgu rü naétü taxre ga tauemacü yixĩxgu ga Yerucharéü̃wa nax nayexmagüxü̃. Rü yema puracümaxã inacua̱xgü ga yema Lebítanüxü̃ ga 20 ga taunecü rüe̱xna yexera nüxü̃́ yexmagüxü̃.
9 Rü nüma ga Yochué rü nanegü rü naenexẽgü rü nügü nade, rü wüxitücumü nügümaxã naxü namaxã ga Caxmié rü nanegü ga Yudátaagü ixĩgüxü̃. Rü yexgumarüxü̃ ta nügütanüwa nanaxügüxẽxẽ ga Enadáx nanegü rü naenexẽgü rü natanüxü̃ ga Lebítaagü ixĩgüxü̃. Rü nümagü nixĩ ga namaxã inacuáxü̃ ga yema Tupanapata ga taxü̃nearü mexẽẽruü̃gü.
10 Rü yexguma yema Tupanapata ga taxü̃nearü mexẽẽruü̃gü nanucugu ga nüxíraü̃cü ga nutagü ga naxtapü̱xparagü nawa rütogüne, rü nüma ga chacherdótegü rü mea nügü nangaxãẽãcüma yexma nachigü rü nayacue ga norü cornétagü. Rü yema Lebítanüxü̃ ga Achátaagü rü yéma nanana ga norü paxetaruü̃gü ga namaxã Tupanaxü̃ yacua̱xüü̃güxü̃, yema ãẽ̱xgacü ga Dabí unagüxü̃rüxü̃.
11 Rü ñuxre ga nümagü rü nawiyaegü rü Tupanaxü̃ nicua̱xüü̃gü. Rü yema togü rü nanangãxü̃gü rü ñanagürügü: —¡Nüxna moxẽ pexã ya Cori ya Tupana erü nüma rü tamaxã namecüma rü ngẽma norü ngechaü̃ i taxca̱x rü taguma nagu̱x! —ñanagürügü. Rü guxü̃ma ga duü̃xü̃gü rü nataãẽgü, rü tagaãcü Cori ya Tupanaxü̃ nicua̱xüü̃gü, yerü marü inaxügü nax wena namexẽẽxü̃ ga Cori ya Tupanapata ga taxü̃ne.
12 Rü muxü̃ma ga yema chacherdótegü rü Lebítanüxü̃ rü ãẽ̱xgacügü ga iyaxü̃ ga marü nüxü̃ daugüxü̃ ga guma nüxíraxü̃ne ga Tupanapata ga taxü̃ne, rü yemagü rü tagaãcü naxauxe, yerü nüxü̃ nadaugü ga wena nax inaxügüxü̃ ga guma yexwaca̱xü̃ne ga Tupanapata ga taxü̃ne. Rü yexgumarüxü̃ ta ga togü rü norü taãẽmaxã tagaãcü aita naxüe.
13 Rü yemaacü taxúema nüxü̃ tacua̱x rü nataãẽgü rüe̱xna nangechaü̃gü yerü yema auxexü̃ rü yema taãẽgüxü̃ rü wüxigu aita naxüe rü yáxü̃guma nüxü̃ naxĩnüe.
