Esdras 4:1-24
4 4:1-2 Rü yexguma yema norü uanügü nüxü̃ cua̱xgügu nax wena namexẽẽgüãxü̃ ga guma Tupanapata ga taxü̃ne ga yema duü̃xü̃gü ga Yudátanüxü̃ rü Bẽyamíü̃tanüxü̃ ga Babiróniaanewa ne ĩxü̃ ga Yerucharéü̃ca̱x woeguxü̃, rü nüma ga norü uanügü rü Chorobabéxü̃tawa rü Yochuéxü̃tawa rü yema togü ga ãẽ̱xgacügüxü̃tawa ínayadaugü. Rü ñanagürügü nüxü̃: —¡Taxṹ i toxna penachu̱xuxü̃ nax pexü̃ tarüngü̃xẽẽgüxü̃ nawa i ñaa puracü! Erü toma rü ta pexrüxü̃ nüxü̃́ tayaxõgü ya yimá perü Tupana. Rü naxca̱x ítanaguuxü̃ ga torü ãmaregü ga yexguma Achíriaanearü ãẽ̱xgacü ga Echaradóü̃ nua toxü̃ gagügumama —ñanagürügü.
2 Nüü̃ nadau 4:1
3 Natürü nüma ga Chorobabé rü Yochué rü yema togü ga ãẽ̱xgacügü ga iyaxü̃, rü nanangãxü̃gü rü ñanagürügü: —Taxucürüwama pemaxã wüxigu tanaxü ya daa torü Tupanapata ya taxü̃ne. Rü marü toxicatatama tanaxü ya napata ya taxü̃ne ya Cori ya torü Tupana, yerü yemaacü nixĩ ga tomaxã nüxü̃ yaxuxü̃ ga Chíru ya Pérchiaanearü ãẽ̱xgacü —ñanagürügü.
4 Rü yexguma ga nüma ga yema uanügü ga yema naanegu ãxchiü̃güxü̃ rü inanaxügüe nax chixri yema Yudátanüxü̃chiga yadexagüxü̃ nax íyachaxãchigüxü̃ca̱x ga yema puracü.
5 Rü yema uanügü rü nümaxü̃ ga ãẽ̱xgacüarü ngü̃xẽẽruü̃güaxü̃́ nanaxütanügü nax yemaacü nüxü̃́ naguxchaxẽẽãxü̃ca̱x nax Tupanapata namexẽẽgüxü̃. Rü yema ãẽ̱xgacüarü duü̃xü̃gü rü guxcüma ga gumá taunecügü ga Chíru nagu ãẽ̱xgacü ixĩcügu ga Pérchiaanewa rü ñu̱xmata gumá taunecü ga Daríu nagu ãẽ̱xgacü ixĩcügu rü Iraétanüxü̃axü̃́ nanaguxchaxẽẽgü nax namexẽẽgüãxü̃ ga Tupanapata.
6 Rü yexguma gumá taunecü ga Achuéru nagu inaxügücü nax ãẽ̱xgacü yixĩxü̃ ga Pérchiaanewa rü yema uanügü rü wüxi ga popera ga chixri Yudáanecüã̱xgüchiga rü Yerucharéü̃cüã̱xgüchiga idexaxü̃ naxümatügü. Rü ñu̱xũchi yema popera rü ãẽ̱xgacü ga Achuéruxü̃tawa nanamugü.
7 Rü gumá taunecü ga Artayére ãẽ̱xgacü ixĩxgu ga Pérchiaanewa rü Biráü̃, rü Miridáte rü Tabeé rü naétü togü ga namücügümaxã ãẽ̱xgacü ga Artayéreca̱x nanaxümatügü ga wüxi ga popera. Rü yema popera ga chixri Yudáanecüã̱xgüchiga rü Yerucharéü̃cüã̱xgüchiga idexaxü̃ rü Araméugawa nanaxümatügü rü ñu̱xũchi yema naga ga ãẽ̱xgacü ga Artayére nawa idexaxü̃wa nanaxümatügü.
8 Rü ãẽ̱xgacü ga Reúü̃ ga Pérchiaanecüã̱x ga Yudáanewa Yudíugümaxã icuáxü̃ rü norü poperaarü ümatüruxü̃ ga Chimcháimaxã nanaxümatü ga to ga popera nachiga ga Yerucharéü̃cüã̱xgü nax Artayérexü̃tawa namuaxü̃ca̱x.
9 Rü yema popera ga ãẽ̱xgacü ga Reúü̃ rü poperaarü ümatüruxü̃ ga Chimchái ümatüxü̃ rü nagu nügü naxüégagü wüxigu namaxã ga namücügü ga Pérchiaanecüã̱x ga guxchaxü̃arü mexẽẽruü̃gü, rü churaragüerugü, rü yema togü ga ãẽ̱xgacügü ga Pérchiaanecüã̱xgü. Rü nümagü nixĩ ga yema Yudíugü ga Eréawa rü Babiróniawa rü Eráü̃anearü ĩane ga Chúchawa ne ĩxü̃maxã inacua̱xgüxü̃.
10 Rü yema popera rü nagu nügü naxüégagü ga norü ãẽ̱xgacügü ga yema togü ga nachixü̃anecüã̱x ga ü̃pa Achíriaanearü ãẽ̱xgacü ga Anapá íyauxü̃xü̃ rü ĩane ga Chamáriawa namugüxü̃. Rü yexgumarüxü̃ ta nagu nügü naxüégagü ga norü ãẽ̱xgacügü ga yema togü ga nachixü̃anegü ga natü ga Eufrátearü oéstewaama yexmagüxü̃.
11 Rü yema popera ga Artayéreca̱x yamugüxü̃ rü ñanagürü: —Pa Ãẽ̱xgacüx Pa Artayére, toma nax curü duü̃xü̃gü tixĩgüxü̃ i naanegü i natü i Eufrátearü oéstewaama nax tangexmagüxü̃, rü cuxü̃ tarümoxẽgü.
12 Rü cuxü̃ nüxü̃ tacua̱xẽxẽ, Pa Ãẽ̱xgacüx, rü ngẽma Yudíugü ga Iraétanüxü̃ ga Yerucharéü̃ca̱x woeguxü̃ ga Babiróniaanewa ne ĩxü̃, rü ñu̱xma rü wena nanamexẽẽgü ya yima norü ĩane i ngẽma duü̃xü̃gü i taxúega ĩnüexü̃ rü chixexü̃ ügüxü̃. Rü marü inanaxügüe nax namexẽẽgüãxü̃ i norü ĩanearü poxeguxü̃tápü̱x. Rü nananucu ga norü nutagü ya naxtapü̱xgü nawa ixügücü.
13 Rü cuxü̃ nüxü̃ tacua̱xẽxẽ, Pa Ãẽ̱xgacüx, ega ngẽxguma tá norü ĩane rü ñu̱xũchi ngẽma norü ĩanearü poxeguxü̃tápü̱x namexẽẽgügu rü taxũtáma cuga naxĩnüe, rü taxũtáma cuxü̃́ nanaxütanügüchaü̃ i ngẽma diẽru i cuma namaxã cuxueguxü̃ nax cuxü̃́ naxütanügüãxü̃ca̱x. Rü ngẽxguma i ngẽma diẽru i ãẽ̱xgacüca̱x ixĩxü̃ rü tá ínarüxĩ.
14 Rü toma nax curü duü̃xü̃ tixĩgüxü̃, rü cuxü̃́ nax tapuracüexü̃ rü tama tanaxwa̱xe i ngẽma duü̃xü̃gü nax nüxchiama cuétügu nachigüxü̃. Rü ngẽmaca̱x nixĩ, Pa Ãẽ̱xgacüx, i cuxca̱x tayamuxü̃ i ñaa popera nax nüxü̃ cucuáxü̃ca̱x.
15 Rü name i nüxü̃ quidaugü i ngẽma poperagü ga nüxíraxü̃güxü̃ ga ãẽ̱xgacügü namaxã nguxü̃güxü̃. Rü ngẽma poperagüwa rü tá namaxã icuyarüxũ i ngẽma duü̃xü̃güchiga. Rü ngẽxguma tá nixĩ i nüxü̃ cucuáxü̃, Pa Ãẽ̱xgacüx, nax ñaa duü̃xü̃gü rü daixü̃ nacuáxü̃, rü wüxi ga ãũcümaxü̃ nax yixĩxü̃ naxca̱x ga yema togü ga nachixü̃anegüarü ãẽ̱xgacügü. Yerü ü̃paacü ga ñaa duü̃xü̃gü rü yema ãẽ̱xgacügümaxã nanue rü guma norü ĩanegu namaxã nügü nadai rü yemaca̱x nixĩ ga nagu napogüexü̃ ga norü ĩane.
16 Rü ngẽmaca̱x cuxü̃ nüxü̃ tacua̱xẽxẽ, Pa Ãẽ̱xgacüx, rü ngẽxguma tá namexẽxẽgüãgu ya yima norü ĩane rü ñu̱xũchi ngẽma norü ĩanearü poxeguxü̃tápü̱xgü, rü ngẽma duü̃xü̃gü tá cuxna nanapuxü̃ i ngẽma naanegü i natü i Eufrátearü oéstewaama ngẽxmagüxü̃ rü marü taxũtáma cuxrü nixĩgü —ñanagürü ga yema popera.
17 Rü yexguma ãẽ̱xgacü ga Artayére nayaxugu ga yema popera, rü nanangãxü̃ rü ñanagürü: —Pa Ãẽ̱xgacüx, Pa Reúü̃x, rü Pa Poperaarü Ümatüruxü̃ ya Chimchái, rü pexü̃ charümoxẽ. Rü ngẽxgumarüxü̃ ta nüxü̃ charümoxẽ i pemücügü i Chamáriawa ngẽxmagüxü̃ rü guxü̃ma i pemücügü i taxtü i Eufrátearü oéstewa ngẽxmagüxü̃.
18 Rü ngẽma perü popera i cha̱u̱xca̱x nua pemuxü̃ rü marü chauxü̃tawa nangu. Rü chope̱xewa chaugawa cha̱u̱xca̱x nüxü̃ nadaumatü rü ngẽmaca̱x nüxü̃ chacua̱x i perü ore i chomaxã nüxü̃ pixuxü̃.
19 Rü marü chanamu i chorü ngü̃xẽẽruü̃gü nax poperatanügu naxca̱x nadaugüxü̃ca̱x i nachiga i ngẽma duü̃xü̃gü i Yerucharéü̃cüã̱x. Rü yema poperawa rü nüxü̃ nayangaugü nax ngéma nüxü̃ yaxuxü̃ nax aixcüma yixĩxü̃ nax ngẽma duü̃xü̃gü rü yema nüxíraxü̃güxü̃ ga Pérchiaanearü ãẽ̱xgacügüca̱x nügü nanutaque̱xegüxü̃ nax nügü namaxã nada̱i̱xü̃ca̱x, yerü tama yema ãẽ̱xgacügüga naxĩnüechaü̃.
20 Rü ngẽxgumarüxü̃ ta nüxü̃ itayangau rü nũxcümaxü̃chima rü nayexmagü ga guma ĩanearü ãẽ̱xgacügü ga iporaxüchixü̃ ga namaxã icuáxü̃ ga guxü̃ma ga naanegü ga taxtü ga Eufrátearü oéstewaama yexmagüxü̃. Rü yema naanegücüã̱x ga naxme̱xwa yexmagüxü̃ rü nüxü̃́ nanaxütanügü ga taxü̃ ga diẽru.
21 Rü ngẽmaca̱x chanaxwa̱xe nax ípeyachaxãchitanüxẽẽxü̃ i ngẽma duü̃xü̃gü i norü ĩanearü mexẽẽwa puracüexü̃, ñu̱xmatata wena nüxna chaxãga nax ngẽma puracü naxügüxü̃ca̱x.
22 Rü tama name nax ngéma nüxü̃ perüdaunümarexü̃ erü taxü̃ i guxchaxü̃ tá cha̱u̱xca̱x ínanguxẽẽgü i ngẽma duü̃xü̃gü ega tama nüxna peda̱u̱xgu —ñanagürü ga norü poperawa.
23 Rü yexguma naxü̃tawa nanguxgu ga yema ãẽ̱xgacü ga Artayérearü popera, rü Reúü̃ rü Chimchái ga poperaarü ümatüruxü̃ rü namücügü rü nüxü̃ nadaumatügü. Rü yexgumatama ga guxü̃ma ga nümagü rü Yerucharéü̃wa naxĩ, rü nuãcü Yudíugüxü̃ namu nax íyachaxãchigüxü̃ca̱x nax napuracüexü̃.
24 Rü yemaacü nixĩ ga íyachaxãchixü̃ ga Tupanapata ga taxü̃nearü mexẽxẽ ga Yerucharéü̃wa. Rü tama nawa napuracüe ñu̱xmata Daríu taxre ga taunecü inguxẽxẽ nax ãẽ̱xgacü yixĩxü̃ ga Pérchiaanewa.
