Esdras 6:1-22
6 Rü yexguma nüma ga ãẽ̱xgacü ga Daríu rü norü duü̃xü̃güxü̃ namu nax yema nũxcümaü̃xü̃ ga poperagü ga Babiróniaanewa yexmagüxü̃tanügu naxca̱x nadaugüxü̃ca̱x ga yema mugüpane ga Chíru ümatüxü̃.
2 Rü yema popera ga nagu naxümatüxü̃ ga yema Chíruarü mugü rü nüxü̃ inayangaugü nagu ga guma ãẽ̱xgacüpata ga ĩane ga Ebatánawa yexmane ga Médiaanewa.
3 Rü yema mu ga yema poperagu ümatüxü̃ rü ñanagürü: —Gumá nüxíraü̃cü ga taunecü nagu ãẽ̱xgacü yixĩcü ga Chíru rü ñaxü̃ ga mu naxunagü: “Guma Tupanapata ga taxü̃ne ga Yerucharéü̃wa yexmane ga Yudíugü norü ãmare ga naxü̃na nawa ígugüxü̃ne, rü tanaxwa̱xe i wena name, rü yimá nutagü ya naxtapü̱xgü nawa ixügücü rü mea inata̱xgü. Rü ngẽma norü máchane rü 27 i metruarü ngãxü̃ tá nixĩ, rü ngẽma norü tachiü̃ rü 27 i metruarü ngãxü̃ tá nixĩ.
4 Rü naxtapü̱xarü ügü rü tomaepü̱xchimüü̃ ya nutagü ya itacü tá nixĩ. Rü yimáétüwa rü wüxichimüxü̃ i ngexwaca̱xü̃xü̃ i nai i yaxcüxü̃ tá nanucu. Rü chorü diẽruarü dauruxü̃ tá nixĩ i naxütanüxü̃ i guxü̃ma i ngẽma puracü.
5 Rü Tupanapata ga taxü̃nearü yemaxü̃gü i úirunaxca̱x rü diẽrumünaxca̱x ga Nabucudonochó Tupanapata ga taxü̃newa dexü̃, rü tanaxwa̱xe i Yerucharéü̃ca̱x tanawoeguxẽxẽ rü nagu tayanu ya yima Tupanapata ya taxü̃ne ya wena tá üxü̃ne, erü woetama ngẽma nixĩ i nachica” —ñanagürü ga yema Chíruarü poperawa.
6 Rü yexguma ga nüma ga Pérchiaanearü ãẽ̱xgacü ga Daríu rü nanaxümatü ga wüxi ga popera naxca̱x ga Tatenái ga taxtü ga Eufrátearü oéstewaamaarü ãẽ̱xgacü, rü Chétaru-bonái rü norü ngü̃xẽẽruü̃gü ga ãẽ̱xgacügü ixĩgüxü̃ ga yema naanewa. Rü norü poperawa rü ñanagürü: —¡Taxũtáma nüxü̃́ penaguxchaxẽxẽ i ngẽma Yudíugü nax wena naxügüãxü̃ ya yima Tupanapata ya taxü̃ne! Rü ngẽma noxrirüxü̃ i nachicagu tátama nanaxügü.
7 ¡Rü taxũtáma penachixewe ya yimá Yudíugüanecüã̱xarü ãẽ̱xgacü rü ngẽma togü i duü̃xü̃gü i ngẽma puracümaxã icua̱xgüxü̃!
8 Rü ñu̱xũchi pemaxã nüxü̃ chixu nax perü diẽrumaxã nüxü̃ perüngü̃xẽẽgüxü̃ i ngẽma Yudíugü i ngẽma puracümaxã icua̱xgüxü̃ nax naxügüã̱xü̃ca̱x ya yima Tupanapata ya taxü̃ne. Rü ngẽma diẽru i perü naanewachigütama perü duü̃xü̃gütanüwa ngĩxü̃ peyaxu̱xcümaxã tá nixĩ i paxa penaxütanüxü̃ ya yima Tupanapata ya taxü̃nearü mexẽxẽ nax ngẽmaãcü tama íyachaxãchixü̃ca̱x i ngẽma puracü.
9 Rü ngẽma chacherdótegü i Yerucharéü̃wa ngẽxmagüxü̃ rü chanaxwa̱xe i nüxna penamugü i ngẽma wocaxacügü rü carnérugü i nanaxwa̱xegüxü̃ nax naxca̱x yagugüãxü̃ ya yimá Tupana ya dauxü̃wa ngẽxmacü. ¡Rü naétü nüxna penaxã i trigute̱xe, rü bínu, rü yucüra, rü oribuarü chíxü̃ i wüxichigü i ngunexü̃gügu rü tagutáma nixüye!
10 Rü ngẽmaãcü tá nüxü̃́ natauxcha nax yimá daxũgucü ya Tupanaca̱x yagugüãxü̃ i ta̱xacü i namaxã nataãẽxü̃. Rü ñu̱xũchi chanaxwa̱xe i cha̱u̱xca̱x rü chauxacügüca̱x nayumüxẽgü.
11 Rü ngẽxguma chi texé tama naga ĩnügu i ñaa chorü mu, rü name nixĩ i wüxi ya tümapataarü omüta tayaxu rü yimamaxã tüxü̃ tapai nax ngẽxma tayuxü̃ca̱x ya yíxema tama naga ĩnüxe. Rü yima tümapata rü ngẽxma narüxo rü naachina̱xãgüxica ngéma nayaxǘ.
12 Rü yimá Tupana ya nügüca̱x nüxü̃ unetacü ya yima ĩane ya Yerucharéü̃ rü tá nayanaxoxẽxẽ i ngexü̃rüüxü̃mare i ãẽ̱xgacü rüe̱xna nachixü̃ane i tama yanguxẽẽxü̃ i ñaa chorü mu rü naguxchaxẽẽxü̃ ya yima Tupanapata ya taxü̃ne ya Yerucharéü̃wa ngẽxmane. Rü choma i Daríu nixĩ i chanaxunagüxü̃ i ñaa mu. Rü ngẽmaca̱x chanaxwa̱xe i aixcüma mea naga pexĩnüe —ñanagürü ga norü poperawa.
Ningu ga Tupanapata ga taxü̃ne
13 Rü nüma ga Tatenái ga taxtü ga Eufrátearü oéstewaamaarü ãẽ̱xgacü rü Chétaru-bonái rü norü ngü̃xẽẽruü̃gü rü paxãma naga naxĩnüe ga yema mu ga ãẽ̱xgacü ga Daríu unagüxü̃.
14 Rü yemaacü ga nüma ga yema Yudíugü ga yema puracümaxã icua̱xgüxü̃ rü nayadaxẽẽgü ga nax napuracüexü̃. Rü Tupanaarü orearü uruü̃gü ga Aguéu rü Chacaría ga Idú nane rü Tupanaarü oremaxã poraãcü nanataãẽxẽxẽgü ga yema Tupanapatawa puracüexü̃. Rü yemaacü ga guma Tupanapataarü mexẽxẽ rü ningu yema Tupana nüxü̃ ixuxü̃rüxü̃ rü yema Chíru rü Daríu rü Artayére ga Pérchiaanearü ãẽ̱xgacügü unagügüxü̃rüxü̃.
15 Rü yexguma 6 ga taunecü ãẽ̱xgacü yixĩxgu ga Daríu ga Pérchiaarü naanewa, rü yexguma nixĩ ga nax yanguxü̃ ga guma Tupanapata ga taxü̃ne, meama Adáarü tauemacüarü tomaepü̱xarü ngunexü̃gu.*
16 Rü yema Iraétanüxü̃ rü chacherdótegü rü Lebítanüxü̃, rü naétü ga yema togü ga Babiróniawa íchoxü̃xü̃ rü taãẽmaxã nanaxüchigagü ga guma Tupanapata ga taxü̃nearü ãxü̃chichiga.
17 Yema petaca̱x Tupanaca̱x ínanagu ga 100 ga wocagü ga iyatüxü̃, rü 200 ga carnérugü ga iyatüxü̃, rü 400 ga carnéruxacügü ga iyatüxü̃, rü ñu̱xũchi 12 ga chíbu ga iyatüxü̃ naxẽ̱xpü̱x ga yema 12 ga Iraétanüxü̃tücumügü. Rü guxü̃ma ga yema rü Tupanaca̱x ínanagu nax yemamaxã Iraétanüxü̃arü pecadugü naxütanügüxü̃ca̱x.
18 Rü yemawena ga chacherdótegü rü yema norü puracü ga nawa yayexmachigüxü̃wa nayamuchigü. Rü yexgumarüxü̃ ta Lebítanüxü̃ rü namu nax naxügüã̱xü̃ca̱x ga Tupanapataarü puracü ga Yerucharéü̃wa, yema Moichéarü poperawa naxümatüxü̃ãcüma.
19 Rü yema Babiróniawa íchoxü̃xü̃ ga Yerucharéü̃ca̱x woeguxü̃ rü meama guma nüxíraü̃cü ga tauemacüarü 14 gu nanaxüchigagü ga Üpetüchigaarü peta.
20 Rü yema chacherdótegü rü Lebítanüxü̃ rü marü Tupanape̱xewa nügü nimexẽẽgü, rü yemaacü guxü̃ma aixcüma nime. Rü yexguma ga yema chacherdótegü rü nayama̱xgü ga yema carnéruxacü ga Üpetüchigaarü ãmare naégagu ga guxü̃ma ga yema Yudíugü ga Babiróniawa ne ĩxü̃, rü naégagu ga namücügü ga chacherdótegü rü nügüégagu rü ta.
21 Rü guxü̃ma ga yema Iraétanüxü̃ ga Babiróniawa ne ĩxü̃ rü nachibüe nawa ga Üpetüchigaarü õna. Rü namaxã wüxigu nachibüe ga guxü̃ma ga yema Iraétanüxü̃ ga nüxü̃ rüxoexü̃ ga yema togü ga nachixü̃anecümagü nax Cori ya Iraétanüxü̃arü Tupanaca̱x nawoeguxü̃ca̱x.
22 Rü 7 ga ngunexü̃ taãẽãcüma nanaxüchigagü ga paũ ga ngearü pu̱xẽẽruü̃ã́xü̃arü petachiga. Rü nüma ga Cori ya Tupana rü taãẽmaxã nanapagüxẽxẽ ga yema duü̃xü̃gü yerü Pérchiaanearü ãẽ̱xgacüãẽwa nananguxẽxẽ nax nüxü̃ nangü̃xẽẽxü̃ca̱x ga yema Yudíugü nax wenaxarü naxügüã̱xü̃ca̱x ga guma Tupanapata ga taxü̃ne ga Iraétanüxü̃arü Tupana.
Notas
^ 6:15 18 febréru.
