Esdras 8:1-36
8 Rü ñaagü nixĩ ga naégagü ga yema duü̃xü̃gü ga natanüxü̃maxã icua̱xgüchigüxü̃ ga poperawa ngo̱xégagüxü̃ rü wüxigu chomaxã Babiróniaanewa íchoxü̃xü̃ ga yexguma Artayére ãẽ̱xgacü ixĩxgu:
2 8:2-3 Rü Fineéxtanüxü̃wa rü Guerchóü̃ nixĩ, rü Itamátanüxü̃wa rü Daniéru nixĩ, rü Dabítanüxü̃wa rü Checanía nane ga Atú nixĩ, rü Parótanüxü̃wa rü Chacaría nixĩ rü naétü ga yema 150 ga yatügü ga wüxigu Chacaríamaxã poperawa ngo̱xégagüxü̃.
3 Nüü̃ nadau 8:2
4 Rü Paxá-moátanüxü̃wa rü Cheraía nane ga Erioenái nixĩ rü naétü 200 ga yatügü nixĩ.
5 Rü Chatútanüxü̃wa rü Yaachié nane ga Checanía nixĩ rü naétü 300 ga yatügü nixĩ.
6 Rü Adíü̃tanüxü̃wa rü Yonatáü̃ nane ga Ébe nixĩ rü naétü 50 ga yatügü nixĩ.
7 Rü Eráü̃tanüxü̃wa rü Ataría nane ga Ichaía nixĩ rü naétü 70 ga yatügü nixĩ.
8 Rü Chepatiátanüxü̃wa rü Micaé nane ga Chebadía nixĩ rü naétü 80 ga yatügü nixĩ.
9 Rü Yoátanüxü̃wa rü Yeié nane ga Adía nixĩ rü naétü 218 ga yatügü nixĩ.
10 Rü Banítanüxü̃wa rü Yochipía nane ga Cheromíx nixĩ rü naétü 160 ga yatügü nixĩ.
11 Rü Bebáitanüxü̃wa rü Bebái nane ga Chacaría nixĩ rü naétü 28 ga yatügü nixĩ.
12 Rü Agáxtanüxü̃wa rü Acatáü̃ nane ga Yoanáü̃ nixĩ rü naétü ga 110 ga yatügü nixĩ.
13 Rü Adonicáü̃tanüxü̃wa rü yema nawa iyacuáxü̃ ga nataagü rü Eriférex rü Yeié rü Chemaía nixĩ rü naétü 60 ga yatügü ga yixcüamaxü̃ra woeguxü̃.
14 Rü Bixbáitanüxü̃wa rü Utái rü Chabúx nixĩ rü naétü 70 ga yatügü nixĩ.
Tupanapata ga taxü̃newaarü puracütanüxü̃
15 Rü choma ya Édra rü natü ga Aabácutügu chanangutaque̱xexẽxẽ ga yema duü̃xü̃gü ga chomaxã Yerucharéü̃ca̱x woeguchaü̃xü̃. Rü yexma tapegü ga tomaepü̱x ga ngunexü̃. Rü yéma yoxni tayawǘgüéga ga duü̃xü̃gü rü chacherdótegü ga yéma ngugüxü̃. Rü yemaacü nüxü̃ tacua̱x rü nataxuma ga Lebítanüxü̃ ga nüechamatama yéma ĩxü̃.
16 Rü yemaca̱x Eriécheca̱x, rü Ariéca̱x, rü Chemaíaca̱x, rü Erünatáü̃ca̱x, rü Yaríxca̱x, rü to i Erünatáü̃ca̱x, rü Natáü̃ca̱x, rü Chacaríaca̱x, rü Mechuráü̃ca̱x changema, yerü nümagü nixĩ ga Lebítanüxü̃arü ãẽ̱xgacügü yixĩxü̃. Rü yexgumarüxü̃ ta naxca̱x changema ga Yoiaríx rü Enatáü̃ ga ngu̱xẽẽtaeruü̃gü ixĩgüxü̃.
17 Rü Cachipíaarü ĩanewa chanamugü ga yema duü̃xü̃gü nax Lebítanüxü̃arü ãẽ̱xgacü ga Idómaxã yanadexagüxü̃ca̱x rü yema namücügü ga Lebítanüxü̃ ga yema ĩanearü Tupanapata ga taxü̃newa puracüexü̃maxã yanadexagüxü̃ca̱x rü namaxã nüxü̃ yaxugüxü̃ca̱x nax toxü̃tawa namugüãxü̃ca̱x i Lebítanüxü̃ nax yima Tupanapata ya taxü̃ne ya Yerucharéü̃wa ngẽxmanewa toxü̃ nangü̃xẽẽgüxü̃ca̱x.
18 Rü Tupana rü tomaxã namecüma, rü yemaca̱x toxü̃tawa nanamu ga Cherebía ga meama poperaxü̃ cuácü ga Lebítanüxü̃ ga Máritaxa ixĩcü. Rü nüma ga Cherebía rü toxü̃tawa nangu wüxigu namaxã ga nanegü rü naenexẽgü ga meama 18 ga duü̃xü̃gü ixĩgüxü̃.
19 Rü yexgumarüxü̃ ta Tupana yéma nanamugü ga Achabía namaxã ga namücü ga Ichaía ga Merarí nane ixĩcü. Rü namaxã ínangugü ga nanegü rü naenexẽgü ga meama 20 ga duü̃xü̃gü ixĩgüxü̃.
20 Rü naétüwa rü ínangugü ga 220 ga Tupanapatawaarü ngü̃xẽẽruü̃gü. Rü nũxcüma rü ãẽ̱xgacü ga Dabí nixĩ ga yemaacü inanucü naxca̱x ga Tupanapata ga taxü̃nearü puracü. Rü guxü̃ma ga yema 220 ga ngü̃xẽẽruü̃gü rü nayawǘgü ga naégagü.
21 Rü yemawena rü chanaxunagü nax aureãcü tayumüxẽgüxü̃ natü ga Aabácutüwa nax Tupanamaxã nüxü̃ tixugüxü̃ca̱x ga torü chixexü̃gü, rü Tupanana naxca̱x taca̱xaxü̃ca̱x nax mea toxü̃ naxüpetüxü̃ca̱x i namawa, rü toxna rü toxocügüna nadauxü̃ca̱x wüxigu namaxã i guxü̃ma i torü ngẽmaxü̃gü i namaxã itaxĩxü̃.
22 Yerü chorü ãne nixĩ ga ãẽ̱xgacüxü̃tawa naxca̱x íchaca̱xaxü̃ ga churaragü ga cowarugu ĩxü̃ nax torü uanügüna toxü̃ ínapoxü̃xü̃ca̱x ga namawa, yerü yexguma taxũta itaxĩãchigu rü marü ãẽ̱xgacümaxã nüxü̃ tixugü nax Tupana tüxü̃ rüngü̃xẽẽxü̃ ya yíxema naxca̱x daugüxe, natürü tüxü̃ napoxcu ya guxãma ya tama naga ĩnüexe.
23 Rü yemaca̱x aureãcüma tayumüxẽgü rü Tupanana tacagüe nax toxna nadauxü̃ca̱x. Rü nüma rü aixcüma toxü̃ nangãxü̃.
24 Rü yemawena rü natanüwa ga guxü̃ma ga yema chacherdótegü ga yéma yexmagüxü̃tanüwa rü 12 ga chacherdótegüxü̃ chaxuneta rü yemagü nixĩ ga Cherebía, rü Achabía rü ñu̱xũchi to ga 10 ga namücügü.
25 Rü nape̱xewa ichanaya ga yema diẽrumü, rü úiru, rü Tupanapata ga taxü̃nearü yemaxü̃gü ga ãẽ̱xgacü wüxigu norü ngü̃xẽẽruü̃gümaxã ixãgüxü̃, rü ãẽ̱xgacüarü churaragüerugü ixãgüxü̃, rü guxü̃ma ga duü̃xü̃gü ga yéma yexmagüxü̃ ga Iraétanüxü̃ ixãgüxü̃ nax Tupanapata ga taxü̃nearü yixĩgüxü̃ca̱x. Rü ñu̱xũchi chacherdótegüna chanana.
26 Rü yema ichayagüxü̃ rü ichanaxǘ ga diẽrumü rü 21,450 quíru nixĩ ga nayaxü̃. Rü yema Tupanapata ga taxü̃nearü yemaxü̃gü ga diẽrumünaxca̱x ichanaxǘ rü 100 nixĩ ga norü mu, rü yema úiru ga ichayaxü̃ rü 3,300 quíru nixĩ ga norü ya.
27 Rü naétü nayexma ga 20 ga tacháũgü ga úirunaxca̱x. Rü guma 20 ga tacháũgü rü 8 quíru naya. Rü naétü nayexma ga taxre ga bróũchenaxca̱x ga bachíagü ga meama íbaixatanücüüxü̃ ga ñoma úirurüxü̃ tatanüxü̃.
28 Rü yemawena rü chacherdótegümaxã chidexa rü ñachagürü: —Pemax rü Cori ya Tupana pexü̃ naxuneta nax nüxü̃́ pepuracüexü̃ca̱x. Rü ngẽxgumarüxü̃ ta i ngẽma diẽrumü rü úiru rü Cori ya tórü o̱xigüarü Tupanaarü nixĩgü.
29 Rü ngẽmaca̱x penaxwa̱xe nax mea nüxna pedaugüxü̃ rü ñu̱xmata Tupanapata ya taxü̃ne ya Yerucharéü̃wa ngẽxmanewa nangugü. Rü ngéma rü tá wena ipenayagü nape̱xewa i chacherdótegüarü ãẽ̱xgacügü, rü Lebítanüxü̃arü ãẽ̱xgacügü rü Iraétanüxü̃arü ãẽ̱xgacügü —ñachagürü.
30 Rü yexguma ga yema chacherdótegü rü nanade ga yema diẽrumü rü úiru rü yemaxü̃gü ga marü iyágüxü̃ nax Tupanapata ga taxü̃ne ga Yerucharéü̃wa yexmanewa nanaaxü̃ca̱x.
31 Rü natü ga Aabácutüwa itaxĩãchi meama nüxíraü̃cü ga tauemacüarü 12 arü ngunexü̃gu nax Yerucharéü̃wa taxĩxü̃ca̱x. Rü Tupana rü namawa toxna nadau rü toxü̃ ínapoxü̃ nüxna ga torü uanügü rü ngĩ́ta̱xagüxü̃.
32 Rü yexguma Yerucharéü̃wa tangugügu, rü tomaepü̱x ga ngunexü̃ tarüngü̃gü.
33 Rü yexguma norü ãgümücü ga ngunexü̃wa nanguxgu nixĩ ga Tupanapata ga taxü̃ne ga Yerucharéü̃wa yexmanewa itanayáxü̃ rü chacherdóte ga Meremóx ga Uría nanena tananaxü̃ ga yema diẽrumü rü úiru rü yemaxü̃gü. Rü yéma nayexmagü ta ga chacherdóte ga Meremóxmücügü ga Ereachá ga Fineéx nane, rü yema taxre ga Lebítanüxü̃ ga Yochabá ga Yochué nane rü Noadía ga Binuí nane.
34 Rü yema ngunexü̃gutama nixĩ ga inayagüxü̃ rü yaxugüxü̃ rü ñu̱xũchi poperagu yawǘgü ga guxü̃ma ga yema yemaxü̃gü.
35 Rü yemawena ga toma rü naxü̃na ítagu naxca̱x ga guma torü Tupana. Rü guxü̃ma ga Iraétanüxü̃égagu rü ítanagu ga 12 ga wocaxacügü rü 96 ga carnérugü rü 77 ga carnéruxacügü. Rü torü chixexü̃güarü ütanüruxü̃ rü ítanagu ga 12 ga chíbugü.
36 Rü toma rü yema nachixü̃anegü ga taxtü ga Eufrátearü oéstewaamaarü ãẽ̱xgacügüna tanaxã ga yema popera ga Pérchiaanearü ãẽ̱xgacü toxna ãxü̃. Rü nümagü rü paxa toxü̃ narüngü̃xẽxẽ nax wena tanaxüxü̃ca̱x ga guma Tupanapata ga taxü̃ne.
