Esdras 9:1-15
9 Rü yemawena ga yema Iraétanüxü̃arü ãẽ̱xgacügü ga marü nüxíra Yerucharéü̃wa ngugüxü̃ rü cha̱u̱xca̱x naxĩ rü chomaxã nüxü̃ nayarüxugüe rü ñanagürügü: —Muxü̃ma i ngẽma tatanüxü̃ i Iraétanüxü̃ ga nüxíra tomaxã woeguxü̃, rü woo chacherdótegü rü Lebítanüxü̃ rü tama nügüxü̃́ nüxü̃ naxoo̱xgü i nacümagü i chixexü̃gü i nagu naxĩxü̃ i ngẽma togü i duü̃xü̃gü i nua tórü naanegu yaxãchiü̃güxü̃. Rü ngẽma tatanüxü̃ rü woo poraãcü Tupanape̱xewa nachixe nax ngẽma togücümagu naxĩxü̃, natürü nagu naxĩãma i nacümagü i ngẽma Canaáü̃tanüxü̃ rü Itítanüxü̃, rü Ferechéutanüxü̃, rü Yebuchéutanüxü̃, rü Amóü̃tanüxü̃, rü Moátanüxü̃, rü Equítuanecüã̱xgü, rü Amoréutanüxü̃.
2 Yerü nüma i tatanüxü̃ rü nanegü rü marü nixãxma̱xgü namaxã i ngẽma togü i duü̃xü̃güxacügü i nua tórü naanegu yaxãchiü̃güxü̃ i tama Tupanaaxü̃́ yaxõgüxü̃. Rü yemaacü ga Tupanaarü duü̃xü̃gü rü yema tama yaxõgüxü̃ ga duü̃xü̃gümaxã nügü narüxücutanü. Rü tatanüxü̃ i ãẽ̱xgacügü nixĩ ga nüxíra inaxügüxü̃ nax nagu naxĩxü̃ ga yema chixexü̃ —ñanagürügü choxü̃.
3 Rü yexguma yema orexü̃ chaxĩnügu rü chorü ngechaü̃maxã chaugü charügáutechiru rü chaugü chapuxü̃yae rü chaugü chapuxü̃chinagu, yerü poraãcü chauãẽwa nangu̱x ga yema.
4 Rü guxü̃ma ga yema Iraétanüxü̃ ga torü Tupanaarü poxcuca̱x muü̃exü̃ nagagu ga natanüxü̃arü chixexü̃gü rü chauxü̃tawa nayarütogü. Rü choma rü chorü ngechaü̃maxã yematama chauchicawa charüto ñu̱xmata nawa nangu ga yema yáuanecüarü ora ga nagu Tupanaca̱x yagugüãxü̃ ga ãmaregü.
5 Rü yexguma yema orawa nanguxgu rü marü choxü̃ nangupetüxüra ga nax changechaü̃xü̃. Rü charügáuxchiruãcüma ichanaxügü nax chayumüxẽxü̃. Rü Cori ya Tupanamaxã chidexa.
6 Rü ñachagürü nüxü̃: —Pa Chorü Tupanax, Pa Chorü Tupanax, rü poraãcü chaxãnexü̃chi i cupe̱xewa. Rü tama nüxü̃ chacua̱x nax ta̱xacü chaxüxü̃ rü ñuxãcü cumaxã chidexaxü̃. Erü ngẽma torü chixexü̃ rü marü nangupetüxüchiama rü ngẽma torü pecadugü rü marü ñoma i naane namaxã nanapá.
7 Rü nũxcümacürüwa ga torü o̱xigü rü chixexü̃gu namaxẽx rü ñomaxü̃cüxü i toma rü ta nagu ítamaxẽ. Rü ngẽma torü chixexü̃gagu rü toma rü torü ãẽ̱xgacügü rü torü chacherdótegü rü naxme̱xgu tayi i ngẽma to i nachixü̃anecüã̱xgüarü ãẽ̱xgacügü i tama cuxü̃́ yaxõgüxü̃. Rü nümagü rü toxü̃ ínayauxü̃ rü toxca̱x nangĩ̱xgü rü duü̃xü̃güpe̱xewa toxü̃ nacugüe. Rü ngẽmatama nixĩ i ñu̱xma toxü̃ ngupetüxü̃.
8 Natürü i ñu̱xmax, Pa Corix, Pa Torü Tupanax, rü ngẽma nax tomaxã cumecümaxü̃gagu rü toxü̃́ cunatauxchaxẽxẽ nax ñuxre i toma rü wena ñaa naane i cuma cuxüünexẽẽxü̃ca̱x tawoeguxü̃ nax nagu taxãchiü̃güxü̃ca̱x. Rü cuma rü wüxi i ngexwaca̱xü̃xü̃ i ĩnü toxna cuxã, rü ngẽmaãcü paxaãchi toxü̃ cutaãẽxẽxẽ naétüwa i torü guxchaxü̃gü.
9 Rü woo to ga ãẽ̱xgacüme̱xẽwa nax tayexmagüxü̃ natürü i cumax rü tama toxü̃ ícuwogü. Rü ngẽma Pérchiaanearü ãẽ̱xgacügüãẽwa ícunanguxẽxẽ nax tomaxã namecümagüxü̃ca̱x. Rü toxna cudau nax ñu̱xma rü ta tamaxẽxü̃ca̱x, rü ngẽmaãcü tawoeguxü̃ca̱x, rü wena noxrirüxü̃ ga nachicagutama tanaxüxü̃ca̱x ya yima cupata ya taxü̃ne. Rü cumax, Pa Tupanax, rü toxna cudau i guxü̃ma i ñaa naane i Yudáanewa rü daa ĩane ya Yerucharéü̃wa.
10 Natürü i ñu̱xmax, Pa Tupanax ¿rü ta̱xacüxü̃ tá cumaxã tixu nawena i guxü̃ma i ngẽma chixexü̃ i taxüxü̃? Erü aixcüma nixĩ nax tama naga taxĩnüexü̃ i curü mugü.
11 Rü gumá curü orearü uruü̃gü ga curü ngü̃xẽẽruü̃gü ixĩgücüwa rü nũxcüma tomaxã nüxü̃ quixu nax yema nachixü̃ane ga nagu tachocuxü̃ rü tayapuxü̃, rü yémacüã̱x ga duü̃xü̃güarü chixexü̃maxã nayapa, rü yema chixexü̃ ga nacümagu nawa namaxẽ.
12 Rü yexgumarüxü̃ ta tomaxã nüxü̃ quixu nax tama toxü̃́ cunaxwa̱xexü̃ nax toxocügü rü nanegümaxã yaxãtegüxü̃, rü woo i naxacügü rü tama cunaxwa̱xe nax tonegümaxã yaxãtegüxü̃. Rü nüxü̃ quixu nax tagutáma namaxã tarüngüxmüexü̃ rü tagutáma taãẽwa tanayexmagüxẽẽxü̃ ga yema duü̃xü̃gü nax yemaacü togü itarüporaexü̃ca̱x rü yemaacü tanangṍxü̃ca̱x ga yema naanewa yexmaxü̃ rü ñu̱xũchi towena rü guxü̃guma totaagüna naxüxü̃ca̱x ga yema naane.
13 Rü nawena ga guxü̃ma ga yema guxchaxü̃gü ga toxü̃ ngupetüxü̃ nagagu ga yema torü chixexü̃gü ga cupe̱xewa taxüxü̃, Pa Torü Tupanax, rü tama yema torü chixexü̃ca̱x toxna üxü̃ i poxcuãcü toxü̃ cupoxcue rü yemaca̱x ñuxre toxü̃ ícuyaxüxẽxẽ.
14 ¿Rü ñuxãcü chi i wena ngẽmaãcü tama naga taxĩnüexü̃ i ngẽma curü mugü rü tayaxügümáxü̃ i tonegü namaxã i ngẽma duü̃xü̃gü i chixexü̃ i nacümagu imaxẽxü̃? Rü taxucürüwa erü ngẽxguma chi tanaxüamagu i ngẽma chixexü̃ rü cuma rü tá tomaxã cunu rü tá toxü̃ cudai ñu̱xmata taxúema íyaxü.
15 Pa Cori ya Iraétanüxü̃arü Tupanax, cuma rü tomaxã cumecüma rü ngẽmaca̱x ícuyaxüxẽxẽ i ñuxre i totanüxü̃ i ñu̱xma maxẽxü̃. Tomagü rü aixcüma cupe̱xewa chixexü̃ taxügü, rü ngẽmaca̱x taxucürüwa cuxna tangaicamagü —ñachagürü nüxü̃.
