Ester 1:1-22
1 Rü nüma ga Achuéru rü ãẽ̱xgacü nixĩ ga Médiaanewa rü Pérchiaanewa. Rü yema norü naane rü 127 gu nixüye. Rü Índiaanewa inaxügü rü ñu̱xmata Etiopíaanewa nangu ga norü ta.
2 Rü guma ãẽ̱xgacüpata rü ĩane ga Chúchawa nixĩ ga nayexmaxü̃.
3 Rü yexguma marü tomaepü̱x ga taunecü ãẽ̱xgacü yixĩxgu ga Achuéru rü nanaxü ga wüxi ga taxü̃ma ga peta. Rü nüxna naxu ga guxü̃ma ga norü ngü̃xẽẽruü̃gü ga ãẽ̱xgacügü rü churaragüerugü ga Médiaanecüã̱x rü Pérchiaanecüã̱x, rü yema ãẽ̱xgacügü ga wüxichigü ga norü naanearü üyewa yexmagüxü̃.
4 Rü yemaacü nanaxü ga yema peta, yerü ga nüma rü nügü inawéxchaü̃ nax ñuxãcü naporaxü̃ rü ñuxãcü namuxũchixü̃ ga nachixü̃anearü yemaxü̃gü rü ñuxãcü namexẽchixü̃ ga norü ĩane. Rü yema peta rü natai ga ngãxü̃ ga taunecü.
5 Rü yema petawena rü nüma ga ãẽ̱xgacü rü to ga peta naxü ga ãẽ̱xgacüpataa̱xtüwa ga 7 ga ngunexü̃ taixü̃. Rü yema petawa rü nüxna naxu ga guxü̃ma ga yema duü̃xü̃gü ga Chúchacüã̱x ga ãẽ̱xgacüarü ngü̃xẽẽruü̃gü rü norü puracütanüxü̃ ixĩgüxü̃.
6 Rü yema nachiã ga nawa ixücuxü̃ ga guma ãẽ̱xgacüpata rü línuchi ga imetachinüxü̃ ga icómücharaxü̃maxã rü iyáuxcharaxü̃maxã nanga̱xãẽ. Rü yema línutachinügü rü nüxü̃́ nayexma ga norü iboxmaxetüxü̃gü ga diẽrumünaxca̱x. Rü yemawa nixĩ ga nawe̱xpetüxü̃ ga línuchi ga dauxranütaxü̃ nax guma norü caxtagü ga nuta ga mármonaxca̱xgu nachogüxü̃ca̱x. Rü naxma̱xwa̱xegü ga yexma nuxü̃ rü úirunaxca̱x rü diẽrumünaxca̱x nixĩgü. Rü naxmachiã rü nutagü ga imexẽchicü ga nácarmaxã rü mármo ga cómüxü̃maxã rü mármo ga waxüxü̃maxã nanaxüxmachiãgü.
7 Rü yema norü axepáxü̃gü rü úirunaxca̱x nixĩgü rü wüxichigü rü nanatoraxü̃gü. Rü yemagu nixĩ ga namaxã nabaegüxü̃ ga guma ãẽ̱xgacüarü bínu ga taxüchicü.
8 Natürü nüma ga ãẽ̱xgacü rü yema napataarü dauruü̃gümaxã nüxü̃ nixu nax taxúexü̃ma namaxã nachixewegüxü̃ca̱x nax taxaxegüxü̃, natürü name nax tüxna naxãgüãxü̃ ga yema tüma tanaxwa̱xexü̃ nax tayaxaxgüxü̃ ga wüxichigü ga guxema tüxna naxue.
9 Rü napatawa ga Achuéru naxma̱x ga Báti rü ta, wüxi ga õna ga taxü̃ ixü naxca̱x ga naxma̱xgü ga yema nüxna naxugüxü̃.
10 1:10-11 Rü yexguma 7 ga ngunexü̃ marü yangexgu ga yema peta, rü nüma ga ãẽ̱xgacü rü marü bínuarü ngu̱xmaxã nataãxẽ. Rü nanamu ga 7 ga norü ngü̃xẽẽruü̃gü ga Meumáü̃, rü Bichá, rü Arboná, rü Bixtá, rü Abáta, rü Chetáx, rü Cacá nax nape̱xewa ngĩxü̃ nagagüxü̃ca̱x ga yema naxma̱x ga Báti ga meama nga̱xãẽcü namaxã ga yema norü nga̱xcueruxü̃. Rü yemaacü nanamu nax guxü̃ma ga duü̃xü̃güxü̃ rü ãẽ̱xgacügüxü̃ ngĩxü̃ nawéxü̃ca̱x nax ñuxãcü namexẽchixü̃, yerü aixcüma imechametüxüchi.
11 Nüü̃ nadau 1:10
12 Natürü ngĩma ga naxma̱x rü tama naga ixĩnü ga yema ãẽ̱xgacüarü duü̃xü̃gü ngĩmaxã nüxü̃ ixuxü̃. Rü yemaca̱x ga nüma ga ãẽ̱xgacü rü poraãcü nanu.
13 Rü norü numaxã norü ucu̱xẽruü̃gü ga meama yema naanearü mugüxü̃ icuáxü̃na naca nax ta̱xacü tá naxüxü̃ ngĩmaxã ga naxma̱x. Yerü nüma ga ãẽ̱xgacü rü nacüma nixĩ nax norü ucu̱xẽruü̃gü ga meama mugüxü̃ icua̱xgüxü̃na nacaxíraxü̃ naxü̃pa nax ta̱xacürü mu naxunagüxü̃.
14 Rü yema ucu̱xẽruü̃gü ga ãẽ̱xgacümaxã ãmücügüxü̃ rü Cachená, rü Chéta, rü Amáta, rü Tárchix, rü Mére, rü Marchená rü Memucáü̃ nixĩgü. Rü nümagü ga yema 7 ga yatügü ga iporaexü̃ ga Pérchiaanewa rü Médiaanewa rü ãẽ̱xgacüarü ucu̱xẽruü̃tücumüwa naxügü. Rü taxü̃ ga ãẽ̱xgacügü nixĩgü ga yema nachixü̃anewa.
15 Rü nüma ga ãẽ̱xgacü ga Achuéru rü yema yatügüna naca rü ñanagürü: —¿Ta̱xacü tá chaxü i ñu̱xmax? ¿Rü ta̱xacürü poxcu nixĩ i ümatüxü̃ i mugüwa ngĩxca̱x i wüxi i ãẽ̱xgacüma̱x i tama ãẽ̱xgacüga ĩnücü ega norü ngü̃xẽẽruü̃güxü̃ namugügu nax ngĩxca̱x yacagüxü̃ca̱x? —ñanagürü.
16 Rü nüma ga Memucáü̃ rü namücügüégagu ãẽ̱xgacüxü̃ nangãxü̃ rü ñanagürü: —Pa Ãẽ̱xgacüx, rü ngẽma cuxma̱x rü tama cupe̱xewaxica chixexü̃ ixü, natürü guxü̃ma i ãẽ̱xgacügüpe̱xewa rü duü̃xü̃gü iyatüxü̃pe̱xewa inaxü i ngẽma chixexü̃.
17 Rü ngẽxguma ngẽma naigü i ngexü̃gü i curü naanewa ngẽxmagüxü̃ nüxü̃ cua̱xgügu i ngẽma naxüxü̃ i ngẽma cuxma̱x i Báti, rü nümagü rü ta rü taxũtáma natega naxĩnüe. Erü tá nüxü̃ nixugüe rü ãẽ̱xgacü ya Achuéru rü naxma̱x ga Bática̱x nangema rü ngĩma rü tama naga ixĩnü.
18 Rü guxü̃ma i ngẽma ãẽ̱xgacügü i Pérchiaanewa rü Médiaanewa ngẽxmagüxü̃ naxma̱xgü rü ngẽxguma nüxü̃ nacuáchigagügu i ngẽma naxüxü̃ i ngẽma cuxma̱x, rü ngẽma ngexü̃gü rü tá ta ngẽmaãcü natemaxã nanaxügüe nax tama natega naxĩnüexü̃.
19 Rü cumaxã nüxü̃ tixu, Pa Ãẽ̱xgacüx, rü ngẽxguma chi curü me yixĩxgu nax cunaxunagüxü̃ca̱x i wüxi i mu i tagutáma texé iyarüxoxẽẽxü̃ i Pérchiaanewa rü Médiaanewa. Rü ngẽma muwa rü tá nüxü̃ quixu nax tagutáma wena cupe̱xewa nax nanguxü̃ i cuxma̱x i Báti. Rü ñu̱xũchi, Pa Ãẽ̱xgacüx, rü name i nai i cuxma̱xca̱x cudau i ngẽmaarü yexera cuga ĩnücü.
20 Rü ngẽma mu rü name nixĩ i cunaxunagü i guxü̃ma i ngẽma naanegü i namaxã icucuáxü̃wa. Rü ngẽmaãcü i guxü̃ma i ngexü̃gü rü tá natega naxĩnüe rü woo ãẽ̱xgacü yixĩxgu rüe̱xna ngexü̃rüüxü̃mare i duü̃xü̃ yixĩxgu —ñanagürü.
21 Rü yema Memucáü̃arü ucu̱xẽ rü ãẽ̱xgacüca̱x rü norü ngü̃xẽẽruü̃güca̱x rü name. Rü yemaca̱x ga nüma ga ãẽ̱xgacü rü nanamu nax naxümatüxü̃ ga yema mu.
22 Rü wüxichigü ga nagawa naxümatü rü ñu̱xũchi guxü̃ma ga yema naanegü ga ãẽ̱xgacü namaxã icuáxü̃wa nanamupane nax guxü̃ma ga ngexü̃gü rü natega naxĩnüexü̃ca̱x.
