Ester 3:1-15
3 Rü yema ngupetüguwena rü nüma ga ãẽ̱xgacü ga Achuéru rü wüxi ga yatü ga Amáü̃xü̃ naxuneta nax norü ngü̃xẽẽruü̃gümaxã inacuáxü̃ca̱x. Rü yemaacü nawa nangu nax guxü̃ma ga yema naanemaxã inacuáxü̃ ga Amáü̃. Rü Achuéruxicatama nixĩ ga naétüwa yexmaxü̃. Rü nüma ga Amáü̃ rü Amedáta nane ga Agátanüxü̃ nixĩ.
2 Rü guxü̃ma ga yema ãẽ̱xgacüpatawaarü puracütanüxü̃ rü Amáü̃pe̱xegu nacaxã́pü̱xügü rü narümaachitanü ga yexguma Amáü̃ nape̱xewa üpetügu rüe̱xna nape̱xewa nayexmagügu. Yerü yemaacü nixĩ ga ãẽ̱xgacü ga naxunagüãxü̃. Natürü nüma ga Maduquéu rü tama naga naxĩnüchaü̃ ga yema mu, rü yemaca̱x tama narümaãchi ga yexguma Amáü̃ nape̱xewa üpetügu.
3 Rü yexguma yemaxü̃ nadaugügu ga ãẽ̱xgacüarü ngü̃xẽẽruü̃gü, rü Maduquéuna nacagüe rü ñanagürügü: —¿Tü̱xcüü̃ tama naga cuxĩnü i ngẽma ãẽ̱xgacü unagüxü̃? —ñanagürügü.
4 Rü guxü̃ma ga ngunexü̃gügu rü yemaacütama Maduquéuna nacagüxü̃, natürü nüma ga Maduquéu rü nanangãxü̃ nax nüma rü Yudíu yixĩxü̃ rü yemaca̱x tama Amáü̃pe̱xegu nayarümaxãchi. Rü yemaca̱x ga yema duü̃xü̃gü rü Amáü̃maxã nüxü̃ nayarüxugüe rü nüxna naca rü name nax yemamaxã nügü ínapoxü̃xü̃ ga Maduquéu.
5 Rü yexguma Amáü̃ Maduquéuxü̃ da̱u̱xgu nax tama inacaxã́pü̱xüxü̃ rüe̱xna yanamaxãchixü̃ ga yexguma yéma naxüpetüxgu, rü nüma ga Amáü̃ rü poraãcü nanu.
6 Natürü yema marü nüxü̃ nax nacuáxü̃ nax ta̱xacürü duü̃xü̃ yixĩxü̃ ga Maduquéu rü yemaca̱x tama nüxica nanapoxcuchaü̃. Rü nagu narüxĩnü nax ñuxãcü tá nadaiaxü̃ ga guxü̃ma ga yema Yudíugü ga yema naanegü ga Achuéru namaxã icuáxü̃wa yexmagüxü̃.
Mu ga Yudíugüarü daixchiga unagüxü̃
7 Rü yexguma 12 ga taunecü ãẽ̱xgacü yixĩxgu ga Achuéru, rü meama gumá nüxíraü̃cü ga tauemacü ga Misáü̃gu ãégacügu* rü Amáü̃pe̱xewa naxca̱x nadaugü nax ta̱xacürü ngunexü̃ tá yixĩxü̃ ga Yudíugüxü̃ nagu nada̱i̱xü̃. Rü nagu naxunetagü nax gumá nai ga 12 ga tauemacü ga Adágu ãégacüarü 13 ga ngunexü̃gu* tá yixĩxü̃ nax nadaiaxü̃.
8 Rü nüma ga Amáü̃ rü ãẽ̱xgacü ga Achuéruxü̃tawa naxũ nax namaxã nüxü̃ yanaxuxü̃ca̱x nachiga ga yema. Rü ñanagürü: —Pa Ãẽ̱xgacüx, rü natanüwa i guxü̃ma i ngẽma togü i nachixü̃anecüã̱xgü rü nangẽxma i wüxitücumü i tama togümaxã wüxiguchaü̃xü̃. Erü ngẽma nacümagü rü nanatoraxü̃ rü tama naga naxĩnüe i ngẽma curü mugü, Pa Ãẽ̱xgacüx. Rü ngẽmaca̱x, Pa Ãẽ̱xgacüx, rü tama name nax ñaa naane i namaxã icucuáxü̃wa namaxẽxü̃.
9 Rü ngẽmaca̱x Pa Ãẽ̱xgacüx, ega curü me yixĩxgu i ngẽma nüxü̃ chixuxü̃ ¡rü ẽcü naxunagü i wüxi i mu i nüxü̃ ixuxü̃ nax noxtacüma nada̱i̱xü̃ i ngẽma Yudíugü! Rü choma rü tá 330,000 quíru nagúxü̃ i diẽrumü ichaxã nax ngẽmamaxã naxütanüxü̃ca̱x nüxü̃́ i ngẽma nada̱i̱xü̃ —ñanagürü.
10 3:10-11 Rü yexguma ga nüma ga ãẽ̱xgacü rü ñanagürü nüxü̃: —¡Rü ngẽma diẽru rü cuxrütama yixĩ! ¡Rü ngẽma Yudíugü rü namaxã naxü i ta̱xacü i cuma cunaxwa̱xexü̃! —ñanagürü. Rü ñu̱xũchi nügüme̱xẽwa ngĩxü̃ nayaxu ga norü ãnera rü Amáü̃na ngĩxü̃ naxã nax yemaacü ãẽ̱xgacüéga nawa ngóxü̃ca̱x ga yema mu ga Amáü̃ unagüxü̃.
11 Nüü̃ nadau 3:10
12 Rü gumá taunecüarü nüxíraü̃cü ga tauemacüarü 13 ga ngunexü̃gu rü nüma ga Amáü̃ rü nanangutaque̱xexẽxẽ ga ãẽ̱xgacüarü poperaarü ümatüruü̃gü. Rü namaxã nüxü̃ nixu nax naxümatügüãxü̃ca̱x ga wüxi ga mu naxca̱x ga guxü̃ma ga ãẽ̱xgacügü ga namaxã icuáxü̃ ga yema 127 ga nachixü̃anegü ga Achuérume̱xẽwa yexmagüxü̃. Rü wüxichigü ga yema nachixü̃anecüã̱xgügawa naxümatü ga yema mu, rü ãẽ̱xgacüéga nagu naxü rü norü ãneraéga nawa nango̱x.
13 Rü yema ãẽ̱xgacüarü orearü ngeruü̃gü rü inayanuetanü ga yema popera nagu ga guxü̃ma ga yema nachixü̃anegü ga ãẽ̱xgacü namaxã icuáxü̃. Rü yema poperawa rü nüxü̃ nixu rü ñanagürü: —Meama nai ya 12 ya tauemacü ya Adágu ãégacüarü 13 ya ngunexü̃gu* rü tá nadai i guxü̃ma i Yudíugü i yatüxü̃ rü ngexü̃ rü ngextü̱xüxü̃gü rü paxü̃gü rü buxü̃gü. Rü guxü̃ma i ngẽma norü ngẽmaxü̃gü rü ngẽma nada̱i̱xü̃me̱xẽwa tá nachoü̃ —ñanagürü.
14 Rü yema mu rü muxü̃ma ínaxüxü̃ nax nagu yanuaxü̃ca̱x ga guxü̃ma ga naanegü rü ĩanegü nax yemaacü duü̃xü̃gü nüxü̃ cua̱xgüxü̃ca̱x rü nügü ínamexẽẽgüxü̃ca̱x naxca̱x ga yema ngunexü̃.
15 Rü yexgumatama inaxĩãchi ga yema poperaarü ngeruü̃gü ga ãẽ̱xgacü imuãchitanüxü̃. Rü guma ĩane ga Chúchawa rü ta duü̃xü̃güxü̃ nüxü̃ nacua̱xẽxẽ ga yema mu. Rü yoxni nüma ga ãẽ̱xgacü rü Amáü̃maxã mechawa narütogü rü naxaxegü. Rü yexgumayane ga duü̃xü̃gü ga ĩane ga Chúchacüã̱xgü rü nanaxĩ̱xãchiãẽgü.
