Ester 6:1-14
6 Rü yema chütaxü̃gu ga ãẽ̱xgacü rü tama nape rü inadauecha. Rü yemaca̱x naxca̱x nangema ga yema napane ga nagu naxümatüxü̃ ga guxü̃ma ga yema ãẽ̱xgacü üxü̃ nax naxca̱x nüxü̃ nadaumatügüxü̃ca̱x.
2 Rü yexguma nüxü̃ nadaumatügügu ga yema popera rü yexma nüxü̃ nayangaugü ga ore ga Maduquéuchiga ga ñuxãcü ãẽ̱xgacü ga Achuéruxü̃ ínapoxü̃xü̃ ga yexguma yema ãẽ̱xgacüpataarü dauruü̃gü ga Bigatáü̃ rü Tére nügü ucu̱xẽgügu nax ãẽ̱xgacüxü̃ yama̱xgüchaxü̃xü̃.
3 Rü yemaxü̃ naxĩnügu ga ãẽ̱xgacü rü ínaca rü ñanagürü: —¿Ta̱xacürü ãmare rü cua̱xüxü̃ nixĩ ga nayaxuxü̃ ga Maduquéu naxca̱x ga yema mexü̃ ga cha̱u̱xca̱x naxüxü̃? —ñanagürü. Rü nüma ga norü ngü̃xẽẽruü̃gü rü nanangãxü̃gü rü ñanagürügü: —Taxuxü̃ma noxtacüma, Pa Ãẽ̱xgacüx —ñanagürügü.
4 Rü yexguma íyadexagüyane rü yoxni ga nüma ga Amáü̃ rü yéma nangu rü yemaca̱x ĩã̱xtüwa nayexma nax ãẽ̱xgacüna yacaxü̃ca̱x nax Maduquéuxü̃ yema wẽxnaxãchica ga naxüxü̃gu nawẽxnaxãxü̃ca̱x. Rü yexguma ga nüma ga ãẽ̱xgacü rü ínaca rü ñanagürü: —¿Texé tixĩ ya ĩã̱xtüwa ngẽxmaxe? —ñanagürü.
5 Rü yema norü ngü̃xẽẽruü̃gü rü nanangãxü̃ rü ñanagürügü: —Amáü̃ nixĩ i ngéma ngẽxmaxü̃ —ñanagürügü. Rü nüma ga ãẽ̱xgacü rü ñanagürü: —¡Namaxã nüxü̃ pixu rü nua naxũ! —ñanagürü.
6 Rü yexguma ga nüma ga Amáü̃ rü nixücu rü ãẽ̱xgacüpe̱xegu nayachi. Rü nüma ga ãẽ̱xgacü rü nüxna naca rü ñanagürü: —¿Ñuxãcü chi i nüxü̃ quicua̱xüxü̃xü̃ i wüxi i yatü i cuma cunaxwa̱xexü̃ nax nüxü̃ quicua̱xüxü̃xü̃? —ñanagürü. Rü nüma ga Amáü̃ rü nügüãẽwa nagu narüxĩnü: —¿Texéxü̃ tá nicua̱xüxü̃ ya ãẽ̱xgacü? ¿Rü taux ẽ̱xna i choxü̃ tátama yixĩxü̃? —ñaxü̃gu narüxĩnü.
7 6:7-8 Rü yemaca̱x ga nüma ga Amáü̃ rü ãẽ̱xgacüxü̃ nangãxü̃ rü ñanagürü: —Ngẽxguma chi nüxü̃ chicua̱xüxü̃chaü̃gu i wüxi i yatü rü naxchiru i ãẽ̱xgacü nagu icúxü̃gu chi chayacu̱xẽxẽ, rü ñu̱xũchi norü cowaru i ãẽ̱xgacü nagu ixũxü̃gu chi chayaxũxẽxẽ rü nga̱xcueruxü̃ i ãẽ̱xgacü namaxã nga̱xcueruü̃maxã chi chananga̱xcueru.
8 Nüü̃ nadau 6:7
9 Rü chi chorü ngü̃xẽẽruü̃güeruxü̃ chamu nax nagu yacu̱xẽẽãxü̃ca̱x i ngẽma naxchiru rü chi cowaruétügu chanaxaunagüxẽxẽ nax ngẽmaãcü ĩanemaü̃gu namaxã chicaechigüxü̃ca̱x: “Ñaãcü nixĩ ya ãẽ̱xgacü i nüxü̃ yacua̱xüü̃xü̃ i wüxi i duü̃xü̃ i namaxã nataãẽxü̃”, ñachagürü chi —ñanagürü ga Amáü̃.
10 Rü yexguma ga nüma ga ãẽ̱xgacü rü ñanagürü: —Namexẽchi nixĩ i ngẽma. ¡Ẽcü ñu̱xma rü nayaxu i ngẽma naxchiru rü ngẽma cowaru rü guxü̃ma i ngẽma nüxü̃ quixuxü̃ãcü naxü namaxã ya Maduquéu ya Yudíu ya chopataarü ĩã̱xarü dauruxü̃! Rü guxü̃ma i ngẽma nüxü̃ quixuxü̃ãcü tátama cuyanguxẽxẽ —ñanagürü.
11 Rü yexguma ga Amáü̃ rü nanayaxu ga yema ãẽ̱xgacüchiru rü ga cowaru ga ãẽ̱xgacü natagu tonagüxü̃, rü Maduquéuxü̃ nicu̱xcuchi rü yema cowarutagu nayaga. Rü ĩanemaü̃gu namaxã nanaxũane rü namaxã nicaechigü rü ñanagürü: —Rü ñaãcü nixĩ i namaxã naxüaxü̃ i ngẽma yatü i ãẽ̱xgacü nüxü̃ icua̱xüü̃xü̃ —ñanagürü.
12 Rü yemawena rü nüma ga Maduquéu rü nataegu nax ãẽ̱xgacüpataarü ĩã̱xna yadauxü̃ca̱x. Natürü nüma ga Amáü̃ rü nügü nidüxchiwe rü nangechaü̃ãcüma paxa nachiü̃wa naxũ.
13 Rü yexguma nachiü̃wa nanguxgu rü naxma̱xmaxã rü namücügümaxã nüxü̃ nixu ga yema ngupetüxü̃. Rü nümagü nanangãxü̃gü rü ñanagürügü: —Ngẽma Yudíu i Maduquéu rü taxucürüwa nüxü̃ curüyexera, erü ngẽxguma chi ngẽmaãcü namaxã cunaxüxgux rü tá cuxchama chixexü̃ cuxca̱x ínangu —ñanagürügü.
14 Rü yexguma íyadexayane rü ínangugü ga ãẽ̱xgacü ga Achuéruarü duü̃xü̃gü nax Amáü̃ca̱x yacagüxü̃ca̱x nax Itéarü õnawa nagagüãxü̃ca̱x.
