Ester 7:1-10
7 Rü nüma ga ãẽ̱xgacü rü Amáü̃ rü nawa naxĩ ga yema chibü ga Ité naxca̱x mexẽẽxü̃.
2 Rü yexguma norü bínu íyaxaxgüyane rü nüma ga ãẽ̱xgacü rü wena ngĩxna naca ga Ité, rü ñanagürü: —¿Ta̱xacü nixĩ i naxca̱x ícuca̱xchaü̃xü̃, Pa Cho̱xma̱x, Pa Itéx? ¡Rü choxna naxca̱x naca i ngẽma cunaxwa̱xexü̃ rü choma rü tá cuxna chanaxã woo chi naxca̱x ícuca̱xgu i ngãxü̃gu i chauchixü̃ane! —ñanagürü.
3 Rü ngĩma ga Ité rü inangãxü̃ rü ngĩgürügü: —Pa Chorü Ãẽ̱xgacüx, ngẽxguma chi aixcüma choxü̃ cungechaü̃gu, rü cuxca̱x namexgu i ngẽma cuxna naxca̱x chacaxaxü̃, rü ñaaxicatama nixĩ i chanaxwa̱xexü̃ nax cuxna naxca̱x chacaxaxü̃, Pa Ãẽ̱xgacüx: ¡Rü choxü̃́ nüxü̃ nangechaxü̃ i chorü maxü̃ rü nüxü̃́ nüxü̃ nangechaxü̃ i ngẽma chautanüxü̃arü maxü̃!
4 Erü choma rü chautanüxü̃ rü marü toxü̃ naxüpane nax ngẽmaãcü toxü̃ nada̱i̱xü̃ca̱x ya guxãma. Rü ngẽxguma chi tomaxã nataxegügu nax togüarü puracütanüxü̃ tixĩgüxü̃ca̱x, rü choma rü chi taxṹ ñachagürümare, woo i ngẽma rü ta rü wüxi i chixexü̃ i taxü̃ nixĩ i cuxca̱x, Pa Ãẽ̱xgacüx —ngĩgürügü.
5 Rü yexguma ga nüma ga Achuéru rü ngĩxna naca rü ñanagürü: —¿Texé tixĩ ya yíxema tügü írüporaxe nax ngẽma chixexü̃ cumaxã taxüxü̃? —ñanagürü.
6 Rü ngĩma rü inangãxü̃ rü ngĩgürügü: —Ngẽma torü uanü i chixexü̃ tomaxã üxchaü̃xü̃ rü ñaa chixecümaxü̃ i Amáü̃ nixĩ —ngĩgürügü. Rü yexguma yemaxü̃ naxĩnügu ga Amáü̃ rü poraãcü norü muü̃maxã nanaxi̱xãchiãxẽ nape̱xewa ga ãẽ̱xgacü rü naxma̱xpe̱xewa.
7 Rü nüma ga Achuéru rü norü numaxã nayuxnagü rü yéma nüxna niña ga yema ínachibüexü̃wa rü ãẽ̱xgacüpataa̱xtüwa naña. Rü nüma ga Amáü̃ ga marü nüxü̃ nax nacuáxü̃ nax ãẽ̱xgacü tá namaxã naxueguxü̃ nax yama̱xgüãxü̃, rü yoxni Itépe̱xegu nayangücuchi rü ngĩxü̃ naca̱a̱xü̃ nax naétüwa nachogüxü̃ nax tama ãẽ̱xgacü namaxã naxueguxü̃ca̱x nax yama̱xgüãxü̃.
8 Rü yexguma napataa̱xtüwa nataegu̱xgu ga ãẽ̱xgacü rü wena nixücu nawa ga yema ucapu ga nawa nachibüexü̃, rü nüxü̃ nadau ga Amáü̃ ga Itéxü̃tagu nangücuchixü̃ rü nugaãcü ñanagürü: —Chopexewatama ngĩmaxã cumáxchaü̃ i ñaa cho̱xma̱x nawa ya daa chopata —ñanagürü. Rü yexgumatama Amáü̃xü̃ nidüxchiwegü namaxã ga yema naxchiru ga duü̃xü̃ imáxchaü̃xü̃ namaxã natüchiwegüxü̃.
9 Rü yexguma ga Arboná ga ãẽ̱xgacüarü ngü̃xẽẽruxü̃ ixĩxü̃ rü ñanagürü: —Pa Cori, Pa Ãẽ̱xgacüx, ñaa Amáü̃ rü duü̃xü̃güxü̃ nanaxüxẽxẽ i wüxi i wẽxnaxãchica i 22 metruarü ngãxü̃ i norü máchane nax ngẽmagu nawẽxnaxãxü̃ca̱x ya Maduquéu ga cuxü̃ ípoxü̃cü ga yexguma Bigatá rü Tére cuxü̃ ima̱xgüchaü̃gu. Rü ngẽma wẽxnaxãchica rü Amáü̃pataa̱xtüwa nangẽxma —ñanagürü ga Arboná. Rü nüma ga ãẽ̱xgacü rü nanangãxü̃, rü ñanagürü: —¡Ngẽmagu peyawẽxnaxã i Amáü̃! —ñanagürü.
10 Rü nüma ga ãẽ̱xgacüarü duü̃xü̃gü rü yema nümatama ga Amáü̃ Maduquéuca̱x naxüxü̃ ga wẽxnaxãchicagu nanawẽxnaxãgü. Rü yexguma narüngüxmü ga ãẽ̱xgacü.
