Ester 8:1-17
8 Rü yematama ngunexü̃gu rü nüma ga ãẽ̱xgacü ga Achuéru rü naxma̱x ga Iténa nanaxãmare ga guma Amáü̃pata ga Yudíugümaxã rüxuanüxü̃. Rü nüma ga ãẽ̱xgacü rü Maduquéuca̱x nangema, rü yemaca̱x ãẽ̱xgacüxü̃tawa naxũ yerü ngĩma ga Ité rü nüxü̃ iyaxu nax ngĩnepü nane yixĩxü̃.
2 Rü yexguma ga nüma ga ãẽ̱xgacü rü ngĩxü̃ ínangoxochi ga norü ãnera ga Amáü̃na ngĩxü̃ nayaxu̱xcü. Rü Maduquéuna ngĩxü̃ naxã. Rü ngĩma ga Ité rü Maduquéuxü̃ ixuneta nax namaxã inacuáxü̃ca̱x ga yema yemaxü̃gü ga Amáü̃arüchire̱x ixĩxü̃.
3 Rü ñu̱xũchi ngĩma ga Ité rü wenaxarü ãẽ̱xgacüxü̃tawa ixũ. Rü nape̱xegu iyangücuchi rü ixaxu. Rü nüxü̃ íca̱xaxü̃ nax ínapiãxü̃ca̱x ga yema mu ga Amáü̃ unagüxü̃ ga Yudíugüarü daixchiga nax yemaacü yanaxomarexü̃ca̱x.
4 Rü nüma ga ãẽ̱xgacü rü Itéétüguama nanawe̱xnagü ga norü úirumena̱xã. Rü yexguma ga ngĩma ga Ité rü nape̱xewa ichi, rü ngĩgürügü nüxü̃:
5 —Pa Ãẽ̱xgacüx, ngẽxguma chi aixcüma choxü̃ cungechaü̃gu, rü aixcüma cuxca̱x namexgu i ngẽma cuxna naxca̱x chacaxaxü̃, rü chanaxwa̱xe i cunaxümatü i to i mu i nüxü̃ ixuxü̃ nax marü yanaxoxü̃ i ngẽma mu ga Amáü̃ unagüxü̃ nax chautanüxü̃ i Yudíugüxü̃ nada̱i̱xü̃ca̱x i guxü̃ma i cuchixü̃anewa.
6 Rü ngẽmaca̱x taxucürüwa yáxna namaxã chaxĩnü i ngẽma chixexü̃ i chautanüxü̃maxã naxueguxü̃ nax nadaixchaü̃ãxü̃ —ngĩgürügü.
7 Rü yexguma ga nüma ga ãẽ̱xgacü ga Achuéru rü naxma̱x ga Itémaxã rü Yudíu ga Maduquéumaxã nüxü̃ nixu rü ñanagürü: —Choma rü marü cuxna chanaxã, Pa Itéx, ya yima Amáü̃pata. Rü nüma ga Amáü̃ rü marü chanamu nax nawẽxnaxãgüaxü̃ca̱x yerü nanaxunagü nax guxãma i pemax i Yudíugü pexü̃ nadaixchaü̃xü̃.
8 Rü ñu̱xma rü pexü̃ chamu nax chauégagu penaxümatüxü̃ rü penaxunagüxü̃ i wüxi i to i mu i pexca̱x mexü̃ nax peétüwa nachogüxü̃. ¡Rü chorü ãnera i chauéga ngĩwa ngẽxmacümaxã penaxüéga! Erü wüxi i mupane i chauégagu unagüxü̃ rü chorü ãneraéga nawa ngóxü̃ rü taxucürüwama texé itayanaxoxẽxẽ —ñanagürü.
9 Rü yexgumatama naxca̱x nangema ga ãẽ̱xgacüarü poperaarü ümatüruü̃gü. Rü yema ngunexü̃ ga nagu naxümatüxü̃ rü meama norü tomaepü̱x ga tauemacü ga Sibáü̃gu ãégacüarü 23 ga ngunexü̃gu nixĩ.* Rü Maduquéu rü yema poperaarü ümatüruü̃gümaxã nüxü̃ nixu nax ñuxãcü tá naxümatügüãxü̃ naxca̱x ga Yudíugü, rü naxca̱x ga wüxichigü ga ãẽ̱xgacü ga namaxã icua̱xgüxü̃ ga yema 127 ga Achuéruchixü̃anegü ga Índiaanewa ixügüxü̃ rü ñu̱xmata Etiopíaanewa nangu. Rü yema mupane rü wüxichigü ga nagawachigü naxümatü. Rü Yudíugügawa rü ta naxümatü.
10 Rü yema poperawa nango̱x ga naéga ga gumá ãẽ̱xgacü ga Achuéru rü norü ãneraéga rü ta nawa nango̱x. Rü ñu̱xũchi poperaarü nuruxü̃gü ga ãẽ̱xgacüarü cowarugü ga iporaxüchixü̃gu ĩxü̃ namaxã nanuegü.
11 Rü yema poperawa rü nüma ga ãẽ̱xgacü rü guxü̃ma ga Yudíugüna naxãga nax nügü nanutaque̱xegüxü̃ca̱x nax nügütama ínapoxü̃güxü̃ca̱x rü nadaiaxü̃ca̱x ga guxü̃ma ga duü̃xü̃gü ga guxchaxü̃ namaxã üxü̃ rü noxrüxü̃ yaxĩxẽẽgüãxü̃ca̱x ga yema naxca̱x íyaxüãchiü̃arü naanegü rü norü yemaxü̃gü.
12 Rü yematama ga ngunexü̃ ga Amáü̃ Yudíugüxü̃ nagu daixchaü̃xü̃gu rü yematama ngunexü̃gu nixĩ ga naxunetaxü̃ ga Maduquéuarü mu nax guxü̃wama Achuéruchixü̃anegüwa nügü nanutaque̱xegüxü̃ca̱x ga Yudíugü nax nügütama ínapoxü̃güxü̃ca̱x. Rü yema ngunexü̃ rü meama norü 12 ga tauemacü ga Adágu ãégacüarü 13 ga ngunexü̃gu nangu.*
13 Rü yema muwa rü nüxü̃ nixu ta nax guxü̃anewa naxunagüxü̃ca̱x nax guxü̃ma ga duü̃xü̃gü nüxü̃ nacua̱xgüxü̃ca̱x rü nümagü ga Yudíugü rü ínamemaregüxü̃ca̱x nax norü uanügümaxã nügü nada̱i̱xü̃ca̱x rü nüxü̃ naporamaegüxü̃ca̱x.
14 Rü yema poperaarü nuruxü̃gü rü paxãma inaxĩãchi nagu ga yema ãẽ̱xgacüarü cowarugü ga iporaxüchixü̃ yerü yemaacü nanamu ga ãẽ̱xgacü. Rü yema mu rü Chúchaarü ĩanewa rü ta duü̃xü̃güxü̃ nüxü̃ nacua̱xẽxẽ.
15 Rü yema ngunexü̃ ga nagu naxunagüxü̃ ga yema mu, rü nüma ga Maduquéu rü nagu nicu̱x ga ãẽ̱xgacüchiru ga cómüxü̃ rü yáuxü̃. Rü nügü natüãtü namaxã ga wüxi ga tüãtüruxü̃ ga línuchinaxca̱x ga dauxracharaxü̃. Rü nügüeruwa nayanga̱xcuchi ga wüxi ga nga̱xcueruxü̃ ga úirunaxca̱x. Rü yemaacü ínaxũxü̃ ga ãẽ̱xgacüpatawa. Rü guxü̃ma ga duü̃xü̃gü ga Chúchacüã̱x rü tagaãcü nüxü̃ nicua̱xüü̃gü.
16 Rü nüma ga Yudíugü rü poraãcü nataãẽgü, rü guxü̃wama ga duü̃xü̃gü rü yema Yudíugüxü̃ nicua̱xüü̃gü.
17 Rü guxü̃ma ga Achuéruchixü̃anegüwa rü ĩanegüwa ga ngextá ínanguxü̃wa ga yema mu ga ãẽ̱xgacü unagüxü̃, rü nüma ga Yudíugü rü poraãcü nataãẽgü, rü nanaxüchigagü ga yema ngunexü̃. Rü muxü̃ma ga yema togü ga duü̃xü̃gü rü nügü nixugüe nax Yudíugü yixĩgüxü̃, yerü poraãcü yema Yudíugüxü̃ namuü̃e.
