Ezequiel 1:1-28
1 1:1-3 Rü yexguma marü 5 ga taunecü Babiróniaanewa nayexmagu ga ãẽ̱xgacü ga Yoaquíü̃ ga yéma nax nagagüãxü̃, rü choma i chacherdóte i Echequié ya Buchí nane rü yema Yudíugü ga Babiróniaanewa nagagüxü̃tanüwa chayexma ga natü ga Quebáxcutüwa. Rü yexguma ga choma rü 30 ga taunecü choxü̃́ nayexmagu rü wüxi ga ngunexü̃ meama norü ãgümücü ga tauemacü* arü 5 ga ngunexü̃gu rü ngürüãchi cha̱u̱xca̱x ningena ga daxũguxü̃ ga naane rü Tupanaxü̃ chadau.
2 Nüü̃ nadau 1:1
3 Nüü̃ nadau 1:1
4 Rü to ga nüxü̃ chadauxü̃ nixĩ ga wüxi ga buanecü ga íxãũxẽmacü ga nórtewaama ne ũcü. Rü wüxi ga taxü̃ ga caixanexü̃wa nango̱x ga wüxi ga üxüema ga ãẽmacürüxü̃ ixĩxü̃. Rü norü guxü̃cüwawa rü poraãcü nangóone. Rü yema üxüemaarü ngãxü̃wa rü yéma nayexma ga wüxi ga ta̱xacü ga ñoma bróũcherüxü̃ iya̱u̱xracüüxü̃.
5 Rü yemaarü ngãxü̃wa rü nayexma ga ãgümücü ga ta̱xacü ga naduü̃xü̃güraxü̃xü̃ ga querubíü̃gü
6 Rü wüxichigü ga yema rü naxãgümücüpe̱xatü rü naxãgümücüchametü.
7 Rü guma naparagü rü niwe̱xgümare rü nayawocaxacüpatügüraxü̃, rü ñu̱xũchi ñoma bróũche i meama ípixü̃rüxü̃ niyauratanücüxü.
8 1:8-9 Rü ñu̱xũchi yema norü ãgümücüchametüwa rü norü ãgümücüpe̱xatüwa ga yema querubíü̃gü rü nanaduü̃xü̃güme̱xẽraxü̃ ga yema norü ãgümücücüwawa ga naxpe̱xatügütüü̃wa. Rü guma naxpe̱xatügü rü nügümaxã nayarüxüüxü̃. Rü yexguma inaxĩxgu rü nügüpe̱xewaama naxĩ, rü tama nügüweama naxĩ.
9 Nüü̃ nadau 1:8
10 Rü nachiwegü ga yema ãgümücü ga querubíü̃gü rü ñaãcü nixĩ: Rü yema nachametü ga nape̱xewa üxü̃ rü nanaduü̃xü̃chiweraxü̃. Rü yema norü tügünecüwawa üxü̃ rü nanaleóü̃chiweraxü̃. Rü yema norü to̱xwecüwawa üxü̃ rü nanawoca i yatüxü̃chiweraxü̃. Rü yema naxca̱xwe̱xwa üxü̃ rü nanaxĩyüchiweraxü̃.
11 Rü yema ãgümücü ga querubíü̃gü rü wüxichigü nanangenagü ga taxre ga naxpe̱xatü rü namücüpe̱xatüpe̱xewa nayaxũ̱xgüchigü. Rü guma nai ga taxre ga naxpe̱xatügü rü naxü̃nearü düxruxü̃ nixĩgü.
12 Rü yexguma inaxĩxgu rü nügüpe̱xewaama naxĩ yema Tupanaãxẽ ya Üünecü ínamugüxü̃waama. Rü tama nügüweama naxĩ.
13 Rü yema ãgümücü ga querubíü̃gü rü ñoma ã́xwe ya ina̱i̱xgücürüxü̃ nixĩgü rü ñoma omügü i ínaixgüxü̃rüxü̃ nixĩgü. Rü yéma nayexma ga üxüemagü ga norü ngãxü̃tanüwa nu ne naxĩxü̃ rü yexma nayarübaxixü̃tanü. Rü yemaca̱x nangóonexüchi rü yema ínangóonexü̃wa ne naxũ nax yaba̱i̱xbeanexü̃.
14 Rü yema querubíü̃gü rü paxãma nu ne nanaxĩ ñoma ba̱i̱xbeanexü̃rüxü̃.
15 Rü yexguma nüxü̃ chadawenügu ga yema querubíü̃gü, rü nüxü̃ chadau nax wüxichigüxü̃tagu naxüxü̃ ga wüxi ga bochicuxü̃.
16 Rü yema ãgümücü ga ibochicuxü̃ rü nawüxigumare, yerü woetama yemaacü naxügü. Rü ñoma nuta ya nga̱xãẽruxü̃ ya topáchiurüxü̃ niyauracüxü. Rü wüxichigü ga yema ibochicuxü̃ rü ñoma to ga bochicuxü̃ naxü̃mawa ixücuchixü̃rüxü̃ nixĩ.
17 Rü nüxü̃́ natauxcha nax guxü̃cüwawa naxĩxü̃, natürü tama nügüweama naxĩ.
18 Rü nüxü̃ chadau nax wüxichigü ga yema ãgümücü ga ibochicuxü̃ rü nüxü̃́ nayexmaxü̃ ga norü ãnera. Rü yema ãneragü rü namuxmaxetü.
19 Rü yexguma inaxĩxgu ga yema querubíü̃gü rü yema ibochicuxü̃ rü ta nawe nixĩxü̃tanü. Rü yexguma yachü̱xüxãchitanügu ga yema querubíü̃gü rü yema ibochicuxü̃ rü ta nayachü̱xüxãchitanü.
20 Rü yema querubíü̃gü rü yexguma Tupanaãxẽ i Üünexü̃ ngexta ínamugüxü̃wa naxĩxgu rü yexguma yachü̱xüxãchitanügu, rü yema ibochicuxü̃ rü wüxigu namaxã nayachü̱xüxãchitanü. Yerü yema ibochicuxü̃ rü yema querubíü̃güarü maxü̃ nüxü̃́ nayexma.
21 Rü yexguma naxĩã̱xãchitanügu ga yema querubíü̃gü rü yema ibochicuxü̃ rü ta naxĩã̱xãchitanü. Rü yexguma íyachaxãchitanügu ga yema querubíü̃gü, rü yema ibochicuxü̃ rü ta ínayachaxãchigü. Rü yexguma yachü̱xüxãchitanügu ga yema querubíü̃gü, rü yema ibochicuxü̃ rü ta wüxigu namaxã nayachü̱xüxãchitanü, yerü yema ibochicuxü̃ rü yema querubíü̃güarü maxü̃ nüxü̃́ nayexma.
22 Rü naeruétüwa ga yema ãgümücü ga querubíü̃gü rü nüxü̃ chadau ga ñoma naanetüwerüxü̃ ixĩxü̃. Rü yema rü ñoma nuta ya nga̱xãẽruxü̃ i cristalrüxü̃ nichipetü.
23 Rü yematüxü̃wa nixĩ ga yatexechipe̱xatügüxü̃ ga yema querubíü̃gü. Rü guma naxpe̱xatügü rü namücüpe̱xatüpe̱xewa nayaxũ̱xgüchigü. Rü guma nai ga taxre ga naxpe̱xatügü rü naxü̃nearü düxruxü̃ nixĩgü.
24 Rü yexguma inaxĩãchigu rü nüxü̃ chaxĩnü ga naga ga guma naxpe̱xatügü. Rü ñoma natü i nagoxü̃chíüxü̃rüxü̃ nixĩ ga nax natagaxü̃. Rü yimá Cori ya Tupana ya Guxãétüwa Ngẽxmacügarüxü̃ nixĩ ga naga. Rü ñoma muxũchixü̃ i churaragügarüxü̃ nixĩ. Rü yexguma íyachaxãchitanügu rü narüweü̃ ga guma naxpe̱xatügü.
25 Rü yema naerugüétüwa yexmaxü̃ ga naanetüwewa inanaxũ ga wüxi ga naga ga taxü̃.
26 Rü yema naanetüweétüwa nüxü̃ chadau ga wüxi ga ta̱xacü ga natochicaxü̃raü̃xü̃ ga nuta ga chafírunaxca̱x ixĩxü̃. Rü yema tochicaxü̃wa narüto ga wüxi ga naduü̃xü̃raxü̃xü̃.
27 Rü yema naayearü daxũwaama rü niyauxra ñoma wüxi i bróũche i meama báixü̃rüxü̃. Rü üxüemamaxã ínanumaegu. Rü naayetüü̃waama rü ñoma wüxi i üxüemarüxü̃ nixĩ. Rü guxü̃cüwawa rü poraãcü nangóone.
28 Rü yema norü ya̱u̱xracüü ga caixanexü̃wa nango̱xgu rü ñoma chirapaema i pucügu nüxü̃ idauxü̃rüxü̃ nixĩ. Rü yemaacü nixĩ ga cha̱u̱xca̱x nangóxü̃ ga Cori ya Tupanaarü üüne. Rü yemaxü̃ chada̱u̱xgu rü ñaxtüanegu chanangücuchi.
Notas
^ 1:1 Yúniu.
