Ezequiel 10:1-22
10 Yemawena rü yema querubíü̃güétüwa yexmaxü̃ ga naanetüweétüwa nüxü̃ chadau ga wüxi ga ta̱xacü ga natochicaxü̃raü̃xü̃ ga nuta ga nga̱xãẽruxü̃ ya chafírunaxca̱x ixĩxü̃.
2 Rü nüma ga Cori ya Tupana rü yema yatü ga línuchimaxã ãxchiruxü̃xü̃ ñanagürü: —¡Ngẽma querubíü̃tüxü̃wa ngẽxmagüxü̃ i caruchicuarü ngãxü̃tanügu naxücu, rü ñuxre ya ã́xwe nayaxu i ngẽma querubíü̃gütanüwa rü ñu̱xũchi yimá ĩanegu nawogü! —ñanagürü. Rü nüxü̃ chadau ga yema yatü nax yexma naxücuxü̃.
3 Rü yexguma yexma naxücugu ga yema yatü rü yema querubíü̃gü rü guma Tupanapata ga taxü̃nearü súrwaama nayexmagü. Rü wüxi ga caixanexü̃maxã nayapa ga yema Tupanapataã̱xtü ga aixepewaama yexmaxü̃.
4 Rü yexguma ga yema Tupanaarü üüne rü yema querubíü̃güétüwa nayachü̱xüxãchi rü guma Tupanapata ga taxü̃neca̱x íxücuxü̃waama naxũ. Rü yema caixanexü̃maxã nayapa ga guma Tupanapata. Rü yema naa̱xtü ga guma Tupanapata ga taxü̃ne rü Cori ya Tupanaarü üünemaxã nangóone.
5 Rü yema nagape̱xatügü ga yema querubíü̃gü rü natagaxüchi, rü nüxü̃ taxĩnü ñu̱xmata yema Tupanapataã̱xtü ga düxétüwaama yexmaxü̃wa nanguga. Rü ñoma Tupana ya Guxãétüwa Ngẽxmacü idexagurüxü̃ nixĩ.
6 Rü yexguma ga nüma ga Cori ya Tupana rü yema yatü ga línuchimaxã ãxchiruxü̃xü̃ namu nax yema querubíü̃güarü ngãxü̃tanüwa yexmagüxü̃ ga caruchicugüarü ngãxü̃wa naya̱u̱xãxü̃ca̱x ga üxü. Rü yexguma ga yema yatü rü yéma naxũ rü wüxi ga yema caruchicuxü̃tagu nayachi.
7 10:7-8 Rü naxpe̱xatügütüü̃wa ga yema querubíü̃gü rü nüxü̃ chadau ga wüxi ga naxme̱x ga naduü̃xü̃me̱xẽraxü̃ne. Rü wüxi ga yema querubíü̃gü rü naxme̱xmaxã nanayaxu ga ñuxre ga guma üxü rü ñu̱xũchi yema yatü ga línuchimaxã ãxchiruxü̃me̱xẽgu nanana. Rü nüma ga yema yatü rü nanade rü ínixũ.
8 Nüü̃ nadau 10:7
9 Rü yema querubíü̃gütüxü̃wa nüxü̃ chadau ga ãgümücü ga ibochicuxü̃. Rü wüxichigü ga yema ibochicuxü̃ rü wüxichigü ga yema querubíü̃gütüxü̃wa niyexmachigü. Rü yema ibochicuxü̃ rü ñoma nuta ga topáchiurüxü̃ niyauratanücüxü.
10 Rü yema ãgümücü ga ibochicuxü̃ rü nawüxigumare. Rü wüxichigü ga yema ibochicuxü̃ rü ñoma to ga bochicuxü̃ naxü̃mawa ixücuchixü̃rüxü̃ nixĩgü.
11 Rü yema ibochicuxü̃ rü nüxü̃́ natauxcha nax guxü̃cüwawa naxĩxü̃, natürü tama nügüweama naxĩ. Rü yema querubíü̃gü ixĩxü̃wa rü yema ibochicuxü̃ rü nawe narüxĩ, natürü tama nügüweama naxĩ.
12 Rü wüxichigü ga yema querubíü̃gü rü guxü̃wama naxü̃newa, rü naxca̱xwe̱xwa, rü naxme̱xgüwa rü naxpe̱xatügüwa nixãxetügü. Rü yexgumarüxü̃ ta nixĩ ga yema ãgümücü ga ibochicuxü̃.
13 Rü ñu̱xũchi chomatama nüxü̃ chaxĩnü ga yema ibochicuxü̃ rü “Ibochicuxü̃gu”, nanaxüéga.
14 Rü wüxichigü ga yema querubíü̃gü rü naxãgümücüchiwe: rü yema norü wüxi rü nanawoca i yatüxü̃chiweraxü̃, rü yema norü taxre rü nanaduü̃xü̃chiweraxü̃, rü yema norü tomaepü̱x rü nanaleóü̃chiweraxü̃, rü yema norü ãgümücü rü nanaxĩyüchiweraxü̃.
15 Rü yematama querubíü̃gü nixĩ ga choma natü ga Quebáxpechinüwa nüxü̃ chadauxü̃.
16 Rü yexguma naxĩã̱xãchitanügu ga yema querubíü̃gü rü yema ibochicuxü̃ rü ta naxĩã̱xãchitanü. Rü yexguma naxpe̱xatügümaxã yachü̱xüxãchitanügu ga yema querubíü̃gü, rü yema ibochicuxü̃ rü ta wüxigu namaxã nayachü̱xüxãchitanü.
17 Rü yexguma íyachaxãchitanügu ga yema querubíü̃gü, rü yema ibochicuxü̃ rü ta ínayachaxãchigü. Rü yexguma yachü̱xüxãchitanügu ga yema querubíü̃gü, rü yema ibochicuxü̃ rü ta wüxigu namaxã nayachü̱xüxãchitanü, yerü yema ibochicuxü̃ rü yema querubíü̃güarü maxü̃ nüxü̃́ nayexma.
18 Rü yexguma yema Cori ya Tupanaarü üüne rü guma Tupanapata ga taxü̃neétüna nayachü̱xüxãchi. Rü yema querubíü̃güétügu nayachü̱xüxü.
19 Rü yema querubíü̃gü rü niwexechipe̱xatügü rü nayachü̱xüxãchitanü ga waixü̃müanewa. Rü choma rü nüxü̃ chadau nax yema ibochicuxü̃maxã wüxigu yachü̱xüxãchitanüxü̃, rü guma Tupanapata ga taxü̃nearü ĩã̱x ga éstewaama yexmaxü̃wa yachaxãchitanüxü̃. Rü yema Iraétanüxü̃arü Tupanaarü üüne rü naétügu nayachü̱xüxü.
20 Rü yemagütama querubíü̃gü nixĩ ga Iraétanüxü̃arü Tupanatüxü̃wa nüxü̃ chadauxü̃ ga natü ga Quebáxwa. Rü yexguma nüxü̃ chicua̱xãchi nax yemagütama yaxĩgüxü̃.
21 Rü wüxichigü ga yema querubíü̃gü rü naxãgümücüchiwe rü naxãgümücüpe̱xatü. Rü guma naxpexatügütüü̃wa rü nanayatüme̱xẽgüraxü̃.
22 Rü yexguma natü ga Quebáxwa nüxü̃ chada̱u̱xgurüxü̃tama nixĩ ga nachiwegü ga yema querubíü̃gü. Rü wüxichigü rü nügüpe̱xewaama naxĩ.
