Ezequiel 11:1-25
11 Rü nüma ga Tupanaãxẽ ya Üünecü rü choxü̃ nayachü̱xüxãchixẽxẽ rü Tupanapata ya taxü̃nearü ĩã̱x ya éstewaama üxü̃wa choxü̃ naga ga Yerucharéü̃wa. Rü yema ĩã̱xwa nayexmagü ga 24 ga yatügü. Rü yematanüwa nüxü̃ chacuáxü̃ nixĩ ga Yaachanía ga Achúx nane rü Peratía ga Benaía nane. Rü nümagü rü Yerucharéü̃cüã̱xarü ãẽ̱xgacügü nixĩgü.
2 Rü yexguma ga nüma ga Cori ya Tupana rü choxü̃ ñanagürü: —Pa Yatüx, ñaagü nixĩ i ngẽma yatügü i máetagu rüxĩnüexü̃ rü chixexü̃maxã duü̃xü̃güxü̃ ixucu̱xẽgüxü̃ i daa ĩanewa.
3 11:3-4 Rü nümagü ga yema yatügü rü ñanagürügü: “Tama name nax paxa wena namexẽẽãxü̃ ya Yerucharéü̃arü ĩpatagü. Rü ñoma buetare i namachi nawa ngẽxmaxü̃rüxü̃ nixĩ ya daa ĩane nax mea ípoxexü̃güxü̃. Rü yíxema rü ñoma namachirüxü̃ tixĩgü nax mea tüxü̃ ínapoxü̃xü̃ ya daa ĩane”, ñanagürügü. ¡Rü ngẽmaca̱x chauégagu namaxã idexa! —ñanagürü ga Tupana.
4 Nüü̃ nadau 11:3
5 Rü yexguma ga yema Cori ya Tupanaãxẽ ya Üünecü rü chowa nangu rü choxü̃ namu nax nüxü̃ chixuxü̃ca̱x i ñaa ore i ñaxü̃: —Nüma ya Cori ya Tupana rü ñanagürü: “Ngẽma nixĩ i pema nagu perüxĩnüexü̃, Pa Iraétanüxü̃x. Choma rü nüxü̃ chacua̱x i ngẽma perü ĩnügü.
6 Pemax rü muxẽma tüxü̃ pedai i daa ĩanewa, rü ñu̱xũchi yuexexü̃negümaxã peyapagüxẽxẽ ya daa ĩanearü namagü.
7 Rü ngẽmaca̱x i choma i Cori ya Tupana rü pexü̃ ñachagürü: Yerucharéü̃ rü ñoma wüxi ya buetarerüxü̃ tá nixĩ, natürü ngẽma buetarearü namachi rü taxũtáma pema pixĩxgü, rü yíxema pema tüxü̃ pedaixe tá tixĩgü. Rü choma rü tá pexü̃ nawa íchamuxü̃ ya Yerucharéü̃.
8 ¿Ẽ̱xna nüxü̃ pemuü̃e i dai? Rü choma i Cori ya Tupana rü pemaxã nüxü̃ chixu rü aixcüma tá dai pexca̱x íchanguxẽxẽ.
9 Rü pexü̃ tá íchamuxü̃ i nua Yerucharéü̃wa. Rü to i nachixü̃anecüã̱xgüna tá pexü̃ chamugü. Rü ngẽmaãcü tá perü chixexü̃gagu pexü̃ chapoxcu.
10 Rü perü uanügü rü taramaxã tá pexü̃ nadai. Rü ngẽma Iraéanearü üyeanewa tá nixĩ i perü chixexü̃ca̱x pexna chacaxü̃ nax pexü̃ chapoxcuexü̃ca̱x. Rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ ya Cori ya Tupana.
11 Rü yima ĩane ya Yerucharéü̃ rü taxũtáma ñoma buetarerüxü̃ pexü̃ ínapoxü̃, rü pema rü taxũtáma ngẽma namachirüxü̃ mexü̃wa pengẽxmagü. Choma rü ngẽma Iraéanearü üyeanewa tá nixĩ i aixcüma perü chixexü̃ca̱x pexna chacaxü̃ nax pexü̃ chapoxcuexü̃ca̱x.
12 Rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ ya Cori ya Tupana. Pema rü tama ngẽma chorü mugü nüxü̃ ixuxü̃ãcüma pemaxẽ, rü bai nagu pexĩxü̃ ga yema chorü mugü. Natürü nagu pexĩ ga yema pexna ngaicamagüxü̃ ga nachixü̃anecüã̱xgü nagu maxẽxü̃ ga chixexü̃gü” —ñanagürü ga Cori ya Tupana.
13 Rü yexguma choma rü Cori ya Tupanaégagu namaxã íchidexayane, rü yuxü̃ yexma nayangu ga Peratía ga Benaía nane. Rü yexguma ga choma rü ñatüanegu chanangücuchi. Rü tagaãcü aita chaxü rü ñachagürü nüxü̃: —¡Pa Corix! ¿Ẽ̱xna tá cunadai i ngẽma noxretama i Iraétanüxü̃ i íyaxügüxü̃? —ñachagürü nüxü̃.
Tupana rü Echequiémaxã nüxü̃ nixu nax wena táxarü nachixü̃aneca̱x nanawoeguxẽxẽãxü̃ i Iraétanüxü̃
14 Rü nüma ga Cori ya Tupana rü wenaxarü chomaxã nidexa rü ñanagürü choxü̃:
15 —Ngẽma duü̃xü̃gü i Yerucharéü̃wa íyaxügüxü̃ rü nidexagü nachiga i ngẽma natanüxü̃ i Iraéanecüã̱xgü i to i nachixü̃anegu woonexü̃ rü ñanagürügü: “Ngẽma tatanüxü̃ i to i nachixü̃anewa gagüxü̃ rü Tupana ngẽxma nanawoone yerü poraãcü chixexü̃gu namaxẽ. Rü ñu̱xma i ngẽma norü naane rü tóxrü nixĩ erü Cori ya Tupana tüxna nanaxã”, ñanagürügü.
16 Natürü i cumax, Pa Echequiéx, rü tá ngẽma Iraétanüxü̃ i to i nachixü̃anegüwa gagüxü̃maxã nüxü̃ quixu i chorü ore i ñaxü̃: “Woo ngẽma to i nachixü̃anegügu pexü̃ chawoone, natürü taxũtáma guxü̃guca̱x nixĩ. Erü ngẽma nachixü̃anegü i nagu pewoonexü̃wa rü chomatátama nixĩ i pemaxã changexmaxü̃” —ñachagürü.
17 ¡Rü ngẽxgumarüxü̃ ta namaxã nüxü̃ ixu i ñaa to i chorü ore i ñaxü̃: —Ngẽma nachixü̃anegü ga nagu nawoonexü̃wa rü tá chananutaque̱xe rü wena tá nüxna chanaxã i ngẽma Iraéane nax noxrü yixĩxü̃ca̱x!
18 Rü nümagü rü nachixü̃aneca̱x tá nawoegu rü tá nagu napogüe i guxü̃ma i ngẽma naxchicüna̱xãgü ga ü̃pa nüxü̃ yacua̱xüü̃güxü̃. Rü ngẽmaãcü tá nüxü̃ narüxoe ga yema nacümagü ga chixexü̃ ga nagu namaxẽxü̃.
19 Rü choma rü tá chanaxüchicüxü ya yima norü maxü̃ne ya taixü̃ne ñoma nutarüxü̃. Rü nüxna tá chanaxã ya wüxi ya maxü̃ne ya ngexwacaxü̃ne rü ngexwaca̱xü̃xü̃ i naãxẽ tá nüxna chaxã.
20 Rü ñu̱xũchi i nümagü rü tá naga naxĩnüe i chorü mugü rü tá nagu namaxẽ. Rü nümagü rü tá chorü duü̃xü̃gü nixĩgü, rü choma rü tá norü Tupana chixĩ.
21 Natürü ya yíxema nagu maxẽamáxẽ i ngẽma nacüma i chixexü̃ i naxchi chaxaixü̃, rü choma rü tá ngẽmaca̱x tüxna chaca. Rü choma ya Cori ya Tupana nixĩ i ngẽma ñachaxü̃ —ñanagürü.
Cori ya Tupanaarü üüne rü Yerucharéü̃na nixũgachi
22 11:22-23 Rü yema querubíü̃gü rü naxügü rü yema ibochicuxü̃ rü nawe nayachü̱xüxãchitanü. Rü yema Tupanaarü üüne ga naétügu chüxüxü̃ rü nüxna nixũgachi ga guma ĩane ga Yerucharéü̃. Rü norü éstewaama yexmane ya ma̱xpǘneétüwa nayachaxãchi.
23 Nüü̃ nadau 11:22
24 Rü ñu̱xũchi ga yema Tupanaãxẽ ya Üünecü rü choxü̃ niga rü Babiróniaaneca̱x choxü̃ nataeguxẽxẽ natanüwa ga yema chautanüxü̃ ga yéma gagüxü̃. Rü guxü̃ma i ngẽma ñu̱xma nüxü̃ chixuxü̃ rü yema nixĩ ga Tupanaãxẽ ya Üünecü choxü̃ nüxü̃ dauxẽẽxü̃ ga yexguma choxü̃ nango̱xetüxẽẽgu. Rü yemawena rü inayarütaxu ga yema nüxü̃ chadauxü̃.
25 Rü ñu̱xũchi ga choma rü yema chautanüxü̃ ga Babiróniaanewa gaguxü̃maxã nüxü̃ chixu ga guxü̃ma ga yema Tupana choxü̃ wéxü̃.
