Ezequiel 12:1-28
12 12:1-2 Nüma ga Cori ya Tupana rü choxü̃ ñanagürü: —Cuma, Pa Yatüx, rü duü̃xü̃gü i tama chauga ĩnüexü̃tanüwa cumaxü̃. Nümagü rü naxãxetügü nax nüxü̃ nadaugüxü̃ca̱x, natürü tama nüxü̃ nadaugü, rü naxãchixẽgü nax nüxü̃ naxĩnüexü̃ca̱x, natürü tama nüxü̃ naxĩnüe, erü duü̃xü̃gü i tama chauga ĩnüexü̃ nixĩgü.
2 Nüü̃ nadau 12:1
3 ¡Rü ngẽmaca̱x namexẽxẽ i ngẽma quingexchaü̃xü̃ ñoma to i nachicawa cuxũxü̃rüxü̃! ¡Rü ngunecütama rü guxü̃ma i duü̃xü̃güpe̱xewa ínaxũxũ i cupatawa rü to i nachicawa naxũ! Rü bexmana ngẽmawa tá nügü nicua̱xãchitanü nax duü̃xü̃gü i tama chauga ĩnüechaü̃xü̃ nax yixĩgüxü̃.
4 ¡Rü ngunecütama rü nade i curü ngẽmaxü̃gü rü guxü̃ma i duü̃xü̃güpe̱xewa ínaxũxũ ñoma to i nachicawa cuxũxü̃rüxü̃! ¡Rü ñu̱xũchi yáuanecü rü ta guxü̃ma i duü̃xü̃güpe̱xewa ínaxũxũ ñoma to i nachicawa cuxũxü̃rüxü̃!
5 Rü ngẽmawena rü guxü̃ma i duü̃xü̃güpe̱xewa tá cuyacapetü i ngẽma ĩanearü poxeguxü̃. ¡Rü ñu̱xũchi ngẽmawa tá namaxã ínaxũxũ i curü ngẽmaxü̃gü!
6 Rü ngẽxguma nachütagu rü tá cugüatügu cunanugü i curü ngẽmaxü̃gü. ¡Rü ñu̱xũchi guxü̃ma i duü̃xü̃güpe̱xewa namaxã ínaxũxũ! ¡Rü tá cugü quidüxchiwe nax ngẽmaãcü tama nüxü̃ cudauxü̃ca̱x i ngẽma waixü̃mü! Rü guxü̃ma i ngẽma cuxü̃ chamuxü̃ nax cunaxüxü̃ca̱x rü wüxi i cua̱xruxü̃ tá nixĩ naxca̱x i ngẽma Iraétanüxü̃ i Yerucharéü̃wa ngẽxmagüxü̃ —ñanagürü choxü̃.
7 Rü choma rü chanamexẽxẽ ga yema chorü yemaxü̃gü yema Cori ya Tupana chomaxã nüxü̃ yaxuxü̃ãcü. Rü ngunecütama namaxã íchaxũxũ ñoma texé to i nachicawa ũxgurüxü̃. Rü yexguma nayáuanegu rü chayacapetü ga yema norü poxeguxü̃tápü̱xwa. Rü yexguma nachütagu rü chaugüãtügu chananugü ga guxü̃ma ga chorü yemaxü̃gü, rü ñu̱xũchi guxü̃ma ga duü̃xü̃güpe̱xewa yéma namaxã íchaxũxũ.
8 12:8-9 Rü moxü̃ãcü ẽxü̃wa rü Cori ya Tupana rü choxü̃ ñanagürü: —Ngẽma Iraétanüxü̃ i duü̃xü̃gü i tama chauga ĩnüechaü̃xü̃ rü tá cuxna nacagü nax ta̱xacü yixĩxü̃ ga yema cuxüxü̃.
9 Nüü̃ nadau 12:8
10 ¡Rü chauégagu namaxã nüxü̃ ixu nax ngẽma rü wüxi i cua̱xruxü̃ yixĩxü̃ naxca̱x i ngẽma Yerucharéü̃arü ãẽ̱xgacü, rü ñu̱xũchi guxü̃ma i ngẽma Iraétanüxü̃ i ngéma maxẽxü̃!
11 ¡Rü namaxã nüxü̃ ixu nax cuma rü wüxi i norü cua̱xruxü̃ quixĩxü̃ nax naxca̱x naxuãẽgüxü̃ca̱x i ngẽma guxchaxü̃ i naxca̱x tá ínguxü̃ yema cuxca̱x ínguxü̃rüxü̃! Erü norü uanügü rü to i nachixü̃anewa tá nanagagü i ngẽma duü̃xü̃gü.
12 Rü ngẽma norü ãẽ̱xgacü rü ta nügüãtügu nananugü i norü ngẽmaxü̃gü. Rü ngẽxguma nachütagu rü ngẽma poxeguxü̃ icapetügüxü̃wa norü ngẽmaxü̃gümaxã tá ínaxũxũ. Rü nügü yadüxchiweãcü tá ngéma inayago nax ngẽmaãcü taxúxema nüxü̃ dauxü̃ca̱x, rü ñu̱xũchi nüma rü tama nüxü̃ nadauxü̃ca̱x i ngẽma waixü̃mü.
13 Natürü i choma rü ngẽma ãẽ̱xgacüétügu tá chanaña i chorü tarapa, rü ngẽmamaxã tá chayayaxu. Rü Cadéugüane i Babiróniawa tá chanaga. Rü ngẽmaãcü tagutáma wena nüxü̃ nadau i norü naane. Rü Babiróniagu tá nixĩ i nayuxü̃.
14 Rü guxü̃ i naanegu tá chanawoone i ngẽma norü dauruü̃gü i ínachomaegugüxü̃ nax ínapoxü̃güãxü̃ca̱x. Rü ngẽxgumarüxü̃ tá ta chanawoone i ngẽma togü i norü churaragü. Rü ngẽma cho̱xme̱xgu chingexü̃ i taramaxã tá nawe change.
15 Rü ngẽxguma marü to i nachixü̃anegügu chanawoonegu tá nixĩ i nüxü̃ yacua̱xãchitanüxü̃ nax choma chixĩxü̃ ya Cori ya Tupana.
16 Natürü tá íchayaxüxẽxẽ i ñuxre i Yerucharéü̃arü duü̃xü̃gü nax tama daigu nayuexü̃ca̱x, rü tama taiyamaxã, rü tama da̱xaweanegümaxã nayuexü̃ca̱x nax ngẽmaãcü ngẽma nachixü̃anegü i nawa nagagüxü̃wa nüxü̃ yacua̱xãchiexü̃ca̱x nax ngẽma norü chixexü̃gügagu yixĩxü̃ i napoxcuexü̃ rü ngẽmaãcü nüxü̃ nacua̱xgüxü̃ca̱x nax choma chixĩxü̃ ya Cori ya Tupana —ñanagürü.
Cori ya Tupana rü wena nanaxunagü i ngẽma poxcu i Iraétanüxü̃ca̱x tá ínguxü̃
17 12:17-18 Rü nüma ga Cori ya Tupana rü wena chomaxã nidexa rü ñanagürü choxü̃: —Cuma, Pa Yatüx, ¡rü muü̃maxã quidu̱xrux ega ngẽxguma cuchibüxgu, rü baixãchiãẽmaxã rü muü̃maxã naxaxe i curü dexá!
18 Nüü̃ nadau 12:17
19 ¡Rü ñaa nachixü̃anecüã̱xmaxã, rü Yerucharéü̃cüã̱xmaxã, rü ñu̱xũchi guxü̃ma i Iraétanüxü̃maxã nüxü̃ ixu i ñaa ore i ñaxü̃: “Cori ya Tupana rü ñanagürü: ‘Oegaãẽacüma tá penangõ̱x i pewemü, rü muü̃ãcüma tá peyaxaxü i perü dexá! Rü ñaa nachixü̃ane rü tá inayarüxo rü tá nangeãcu nagagu i ngẽma máeta i naxügüxü̃ i norü duü̃xü̃gü.
20 Rü guxü̃nema ya daa ĩanegü i nawa namaxẽne i ngẽma duü̃xü̃gü rü tá inayarüxogü. Rü ñaa nachixü̃ane rü tá chianexü̃xü̃ nayanguxuchi. Rü ngẽxguma tá nixĩ i pemax rü nüxü̃ picua̱xãchitanüxü̃ nax choma chixĩxü̃ ya Cori ya Tupana’ ” —ñanagürü.
21 12:21-22 Rü nüma ga Cori ya Tupana rü wena chomaxã nidexa rü ñanagürü: —¿Ta̱xacüchiga nixĩ i ngẽma Iraétanüxü̃arü dexa i nügümaxã ñagüxü̃: “Nangupetü i ngunexü̃gü natürü yema nax nango̱xetüxü̃ i Tupanaarü orearü uruxü̃ rü tama ningu”, ñagüxü̃?
22 Nüü̃ nadau 12:21
23 ¡Rü namaxã nüxü̃ ixu i ñaa ore i ñaxü̃: “Cori ya Tupana rü ñanagürü: ‘Choma rü tá chayanaxoxẽxẽ i ngẽma dexa nax tama marü Iraéanewa nüxü̃ yaxugüxü̃ca̱x i ngẽma dexa’, ñanagürü! ¡Rü ñu̱xũchi namaxã nüxü̃ ixu nax marü yangaicaxü̃ i ngẽma ngunexü̃ i nagu tá yanguxü̃ i guxü̃ma i ngẽma chorü orearü uruxü̃xü̃ naxca̱x chango̱xetüxẽxẽxü̃!
24 Rü Iraétanüxü̃tanüwa rü marü nataxutama i ngo̱xetügü i doramare ixĩxü̃, rü marü taxúetama nüxü̃ tixu i ngẽma tá ngupetüxü̃ i doramare ixĩxü̃.
25 Erü choma i Cori ya Tupana rü tá chidexa, rü ngẽma nüxü̃ chixuxü̃ rü paxatáma ningu. Rü pema, Pa Duü̃xü̃gü i Tama Chauga Ĩnuexü̃x, rü aixcüma tá nüxü̃ pedaugü. Choma rü tá chidexa, rü tá chayanguxẽxẽ i ngẽma nüxü̃ chixuxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ya Cori ya Tupana.
26 12:26-27 Rü yemawena ga Cori ya Tupana rü choxü̃ ñanagürü: —Ngẽma Iraétanüxü̃ rü nüxü̃ nixuchigagü nax ngẽma cuxü̃ chawéxü̃ rü taxũtáma paxa ningu.
27 Nüü̃ nadau 12:26
28 Rü ngẽmaca̱x namaxã nüxü̃ ixu i ñaa ore i ñaxü̃: “Cori ya Tupana rü ñanagürü: ‘Rü ngẽma chorü ore i nüxü̃ chixuxü̃ rü paxatáma ningu, rü aixcüma ngẽma nüxü̃ chixuxü̃ rü ningu tá’. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ga Cori ya Tupana.
