Ezequiel 13:1-23
13 13:1-3 Rü nüma ga Cori ya Tupana rü choxü̃ ñanagürü: —¡Chauégagu poxcu namaxã naxuegu i ngẽma Iraétanüxü̃arü orearü uruü̃güneta i nügüãẽwa nayauxgüxü̃ i orexü̃ ixugüxü̃! ¡Rü namaxã nüxü̃ ixu i ñaa ore i ñaxü̃: “Nüxü̃ pexĩnüe i ñaa Cori ya Tupanaarü ore i ñaxü̃: ‘Wüxi i ngechaü̃ nixĩ naxca̱x i ngẽma orearü uruü̃güneta i nüxü̃ ixuxü̃ i ore i nügüãẽwa nayauxgüxü̃ rü tama aixcüma choma naxca̱x chango̱xetüxẽxẽxü̃ nixĩ!
2 Nüü̃ nadau 13:1
3 Nüü̃ nadau 13:1
4 Pa Iraétanüxü̃x, ngẽma perü orearü uruü̃güneta rü ñoma ngowagü ya ĩpatagü ya iwa̱xgünearü nutagütanüwa maxẽxü̃rüxü̃ nixĩgü.
5 Rü ngẽma orearü uruü̃güneta rü taxuxü̃ma naxügü nax Iraétanüxü̃xü̃ ínapoxü̃güxü̃ i ngẽxguma nawa nanguxgu i ngẽma ngunexü̃ i nüxü̃ chaxunetaxü̃ nax naxca̱x íyaxüãchixü̃ i norü uanügü.
6 Rü ngẽma norü ngo̱xetügü rü doramare nixĩ. Rü ngẽma nüxü̃ yaxugüxü̃ i tá ngupetüxü̃ rü doramare nixĩ. Rü nüxü̃ nixugüe nax choma namaxã nüxü̃ chixuxü̃ i ore natürü tama choma nixĩ i chayadexaxẽẽxü̃. Rü nümagü rü ínanangu̱xẽxẽ nax yanguxü̃ca̱x i ngẽma ore i nüxü̃ yaxugüxü̃.
7 Rü pemax, Pa Orearü Uruü̃günetax, rü ngẽma nüxü̃ pedaugüxü̃ rü doramare nixĩ. Rü ngẽma nüxü̃ pixugüxü̃ i tá ngupetüxü̃ rü tama aixcüma nixĩ. Rü nüxü̃ pixugü nax choma yixĩxü̃ i pexü̃ chamuxü̃ nax pidexagüxü̃, natürü i choma rü taxuxü̃ma pemaxã chixu’.
8 Rü ngẽmaca̱x i choma i Cori ya Tupana rü ñachagürü pexü̃: ‘Rü ñu̱xma nax doraxü̃ pixugüxü̃, rü ñu̱xũchi ngẽma nüxü̃ pidaugüxü̃ rü tama aixcüma nax yixĩxü̃, rü ngẽmaca̱x i choma rü pemaxã chanu. Rü choma ya Cori ya Tupana nixĩ i nüxü̃ chixuxü̃ i ngẽma’.
9 Rü choma rü tá chanapoxcue i ngẽma orearü uruü̃güneta i doramarexü̃ daugüxü̃ rü doramarexü̃ ixugüxü̃. Rü nümagü rü taxũtáma Iraétanüxü̃arü ãẽ̱xgacügütücumüwa naxügü. Rü taxũtáma ngẽma Iraétanüxü̃ nagu iwǘgüxü̃ i poperagu tá niwügü. Rü ngẽxguma to i nachixü̃anewa nagagügu rü taxũtáma wena Iraéaneca̱x nawoegu. Rü ngẽxguma tá nixĩ i nüxü̃ picua̱xãchitanüxü̃ nax choma chixĩxü̃ ya Cori ya Tupana.
10 Rü nümagü rü chorü duü̃xü̃güxü̃ nawomüxẽẽgü, rü namaxã nüxü̃ nixugü nax guxü̃ma mea ixũxü̃. Natürü tama aixcüma ngẽmaãcü nixĩ. Rü nümagü rü ñoma wüxi i naxtapü̱x i chixri üxü̃ i yixcama calmaxã chauxetüxü̃rüxü̃ nixĩgü.
11 Rü ngẽma cómüxü̃maxã nachagüxü̃ i ngẽma naxtapü̱x, rü namaxã nüxü̃ ixu rü tá niwa̱x i ngẽma naxtapü̱x. Erü pucü ya tacü tá ínangu, rü gáuxü̃ i ñoma nutapütagürüxü̃ ixĩxü̃ tá narüyi. Rü wüxi ya buanecü ya tacü ya íxãũxẽmacü tá ínangu, rü tá niwa̱x i ngẽma naxtapü̱x.
12 Rü ngẽxguma yawa̱xgu i ngẽma naxtapü̱x rü duü̃xü̃gü rü tá nüxna nacagü, rü ñanagürügü tá: ‘¿Ta̱xacü namaxã nangupetü i ngẽma naxtapü̱x i meama calmaxã pechaxü̃?’ ñanagürügü tá.
13 Rü ngẽmaca̱x i choma i Cori ya Tupana rü nüxü̃ chixu rü chorü numaxã tá íchananguxẽxẽ i wüxi ya buanecü ya íxã̱ũ̱xẽmacü. Rü chorü numaxã tá tacü ya pucü íchananguxẽxẽ. Rü gáuxü̃ i tapütaxü̃ tá charüyi̱xẽxẽ nax ngẽmaãcü chorü numaxã chanaxoxẽxẽ i guxü̃ma.
14 Rü tá chayawa̱xẽxẽ i ngẽma naxtapü̱x i cómüxü̃maxã pechaxü̃. Rü ngẽxguma yawa̱xgu rü tá nango̱x ya yimá nutagü ya namaxã penaxügücü, rü pemax rü ngẽma naxtapü̱xtüü̃gu tá peyue. Rü ngẽxguma tá nixĩ i nüxü̃ picua̱xãchigüxü̃ nax choma chixĩxü̃ ya Cori ya Tupana.
15 Rü ngẽma naxtapü̱xgu rü ñu̱xũchi guxü̃ma i ngẽma cómüxü̃maxã nachagüxü̃gu tá chanaña i chorü nu. Rü ngẽxguma i duü̃xü̃gü rü ñanagürügü tá: ‘Taxuxü̃ma i naxtapü̱x ínayaxü, rü woo ngẽma cómüxü̃maxã nachagüxü̃ rü taxuxü̃ma ínayaxü’, ñanagürügü tá.
16 Rü ngẽxgumarüxü̃ ta nixĩ i ngẽma Iraétanüxü̃ i orearü uruü̃gü i doramarexü̃ daugüxü̃ rü doramarexü̃ ixugüxü̃ rü Yerucharéü̃cüã̱xgümaxã nüxü̃ ixugüxü̃ nax guxü̃ma mea ixũxü̃, natürü tama aixcüma ngẽmaãcü nixĩ. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
Cori ya Tupana rü nanapoxcue i ngẽma ngexü̃gü i orearü uruü̃güneta ixĩgüxü̃
17 Rü nüma ga Cori ya Tupana rü ñanagürü choxü̃: —Rü ñu̱xma, Pa Yatüx, ¡natanüwa naxũ i ngẽma curü ĩanecüã̱x i ngexü̃gü i chauégagu nüxü̃ ixugüxü̃ i ore i nügüxãẽwatama nayauxgüxü̃ nax ta̱xacü tá ngupetüxü̃!
18 ¡Rü namaxã nüxü̃ ixu i chorü ore i ñaxü̃: “Pa Ngexü̃güx, wüxi i taxü̃ i ngechaü̃ nixĩ i pexca̱x nax duü̃xü̃güxü̃tawa pixĩẽtanüxü̃ nax namaxã petaxexü̃ca̱x i ngẽma ngaxcupüxme̱xẽxü̃ rü nga̱xcueruxü̃gü i pema pexüxü̃ rü nüxü̃ pixuxü̃ nax pora nawa ngẽxmaxü̃! Rü ngẽmaãcü penawomüxẽxẽ i chorü duü̃xü̃gü nax pexü̃́ nangẽxmaxü̃ca̱x nax ta̱xacümaxã pechibüexü̃ca̱x.
19 Pemax rü ñuxretama i chebádaca̱x, rü ñuxretama i paũca̱x nixĩ i choxü̃ pechixechigaxẽẽxü̃ nape̱xewa i chorü duü̃xü̃gü. Rü yu namaxã pexuegu i ngẽma duü̃xü̃gü i mexü̃ ügüxü̃, rü penamaxẽxẽ i ngẽma duü̃xü̃gü i chixexü̃ ügüxü̃. Rü ngẽmaãcü penawomüxẽxẽ i chorü duü̃xü̃gü i naga ĩnüexü̃ i ngẽma perü doragü.
20 Rü ngẽmaca̱x i choma i Cori ya Tupana rü ñachagürü: ‘Choma rü namaxã charüxuanü i ngẽma ngaxcupüxme̱xẽxü̃ rü nga̱xcueruxü̃gü i pema ípexüxü̃xü̃ rü nüxü̃ pixuxü̃ pora nawa ngẽxmaxü̃. Rü ngẽmamaxã nixĩ i ípenayauxü̃xü̃ i duü̃xü̃gü ñoma werigü íyauxü̃xü̃rüxü̃. Natürü i choma rü tá pexme̱xwa íchananguxü̃xẽxẽ i ngẽma duü̃xü̃gü nax tama pema namaxã ipecuáxü̃ca̱x.
21 Rü choma rü aixcüma pexme̱xwa tá íchananguxü̃xẽxẽ i chorü duü̃xü̃gü nax nümagü rü tama yaxõgüãxü̃ca̱x i ngéma nga̱xcueruxü̃arü pora i namaxã penatütachiwegüxü̃ i chorü duü̃xü̃gü. Rü taxũtáma marü wena pexme̱xgu nayi. Rü ngẽxguma i pemax rü tá nüxü̃ picua̱xãchitanü nax choma chixĩxü̃ ya Cori ya Tupana.
22 Pema rü penaxü i ngẽma tama chanaxwa̱xexü̃ rü perü doramaxã penamuü̃xẽxẽ i ngẽma duü̃xü̃gü i mecümaxü̃. Rü yexera chixexü̃ pexü yerü nüxü̃ perüngü̃xẽxẽ ga yema chixexü̃gu maxẽxü̃ nax tama nüxna yaxĩgachixü̃ca̱x i norü chixexü̃ nax ngẽmaãcü taxucürüwama nüxna chanaxãxü̃ca̱x i maxü̃.
23 Rü ngẽmaca̱x i pema rü taxũtáma wena doraxü̃ pedaugü rü doraxü̃ pixugü. Choma rü tá pexme̱xwa íchananguxü̃xẽxẽ i ngẽma chorü duü̃xü̃gü. Rü ngẽxguma i pema rü tá nüxü̃ picua̱xãchitanü nax choma chixĩxü̃ ya Cori ya Tupana’ ” —ñanagürü.
