Ezequiel 16:1-63
16 Rü nüma ga Cori ya Tupana rü chomaxã nidexa rü ñanagürü:
2 —Cumax, Pa Yatüx, chanaxwa̱xe ya yima ĩane ya Yerucharéü̃maxã quidexa nachiga i ngẽma taxü̃ i chixexü̃ i naxüxü̃.
3 Rü ñacurügü tá nüxü̃ ya yima ĩane ya Yerucharéü̃: “Ñaa nixĩ i ngẽma Cori ya Tupana cumaxã nüxü̃ ixuxü̃. Rü yexguma noxri cungo̱xgu, Pa Yerucharéü̃x, rü Canaáü̃arü naanewa nixĩ ga cungóxü̃. Rü cunatü rü Amoréutanüxü̃ tixĩ, rü cué rü Itítanüxü̃ tixĩ.
4 Rü yema ngunexü̃ ga nagu cungóxü̃gu rü taxúema cuxü̃ tiwíexü̃ rü taxúema cuxü̃ taxaiya, rü taxúema yucüramaxã cuxü̃ tachaxüne, rü taxúema cuxü̃ tina̱i̱xã́petüna̱xã.
5 Rü taxúeãxü̃ma cungechaü̃tümüxü̃, rü taxúema cuxca̱x taxoegaãxẽ ga mea cuxü̃ nax tamexẽẽgüxü̃ca̱x. Rü yema ngunexü̃ ga nagu cungóxü̃gu rü yea naanewa cuta̱xmare yerü ga duü̃xü̃gü rü cuwa naxã̱ũ̱xãxgü.
6 Natürü ga chomax rü cuxü̃tawa chaxüpetü rü cuxü̃ chadau ga cugüétü nax cuxüxü̃, rü yemaca̱x choxü̃́ cungechaü̃tümüxü̃ rü cuxü̃ chamaxẽxẽ.
7 Pa Yerucharéü̃x, cuxü̃ chayaxẽxẽ ñoma wüxi i nanetü i naanewa rüxüxü̃rüxü̃. Rü nawa cungu nax cuyaxü̃ rü wüxi ga nge ga mechametücü quixĩxü̃. Rü cuxãniixü̃, rü curüyigüta̱xa. Natürü cungexchirumare.
8 Rü wena cuxü̃tawa chaxüpetü rü cuxü̃ chadau ga marü nax cuyaxü̃ rü ãmücügu nax curüxĩnüxü̃. Rü ñu̱xũchi wüxi ga mámüxü̃ ga naxchirumaxã cuxü̃ chidüxü yerü cungexchiru. Rü ñu̱xũchi cumaxã chaxüga rü cumaxã nüxü̃ chixu nax choxrü quixĩxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma.
9 Rü yexguma cubuxgu cuxü̃ chaxaiya, rü cuxü̃ íchapixine ga nax cunagüxünexü̃, rü ñu̱xũchi cuxü̃ chapumaraxü̃ne.
10 Rü cuxü̃ nagu chicuxẽxẽ ga wüxi ga naxchiru ga mematüxü̃, rü ñu̱xũchi chinera ga mexü̃ ga naxcha̱xmünaxca̱x ixĩxü̃. Rü cuxü̃ namaxã chigoye ga wüxi ga goyexü̃ ga línuchinaxca̱x ixĩxü̃. Rü ñu̱xũchi wüxi ga naxchiru ga mexẽchixü̃gu cuxü̃ chicu̱xẽxẽ.
11 Rü mexẽchixü̃ ga ngã̱xãẽruü̃gümaxã cuxü̃ changa̱xãxẽ, rü napüme̱xẽgü cuchacüügüwa chanucu, rü ñu̱xũchi cunaxãwa chayaxǘcuchi ga wüxi ga nachagü.
12 Rü curaxü̃wa chayaxǘcuchi ga wüxi ga ãnera, rü cuchinüwa chananucu ga naxmachinügü, rü ñu̱xũchi cueruwa chayaxǘcuchi ga wüxi ga mexẽchixü̃ ga nga̱xcueruxü̃.
13 Rü yemaacü, Pa Yerucharéü̃x, rü cunga̱xãxẽ namaxã i úiru rü diẽrumü rü cuxchirugü ga chédanaxca̱x rü línuchi ga meama ixümatüxü̃naxca̱x. Rü yema õna ga cungṍxü̃ rü paũ ga mexü̃ ga triguwa üxü̃, rü ira, rü oribuarü chíxü̃ nixĩ. Rü yemaacü yexera cumexẽchi rü ãẽ̱xgacü naxma̱xwa cungu.
14 Rü guxü̃ i nachixü̃anewa rü cutachiga erü cumexẽchi. Rü taxuwama cunañuxraxü̃ erü chomatama nixĩ ga cuxü̃ changa̱xãẽxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma.
15 Natürü ga cumax, Pa Yerucharéü̃x, rü yema nax cumexẽchixü̃ rü cutachigaxü̃gagu nixĩ ga cuyoxniexü̃ nax wüxi ga ngexü̃ ga naxü̃nearü ngúchaü̃gu maxü̃xü̃ cugü quixĩxẽẽxü̃ rü guxü̃ma ga duü̃xü̃gü ga yéma chopetüxü̃na cugü cuxãxü̃.
16 Rü cuma rü yema cuxchirugümaxã ma̱xpǘnegügu cunaxü ga düxenügü nax yimawa nüxü̃ quicua̱xüü̃güxü̃ca̱x ga naxchicüna̱xãgü, rü nawa ngúchaü̃ cuxüxü̃ca̱x.
17 Rü cunade ga yema nachagügü ga cuxna chanaxãmarexü̃ ga úirunaxca̱x rü diẽrumünaxca̱x, rü yemawa cunaxü ga yatüchicüna̱xãgü nax yemaacü namaxã cungeãẽxü̃ca̱x.
18 Rü yema cuxchirugü ga imematüxü̃gu cuyacu̱xgüxẽxẽ ga yema naxchicüna̱xãgü, rü nüxna cunaxãmare ga yema chorü chíxü̃ rü chorü pumarate̱xe.
19 Rü yema paũ ga choma cuxna chaxãxü̃ ga rümemaexü̃ ga arínawa üxü̃, rü yema chíxü̃ rü ñu̱xũchi yema ira ga choma cuxü̃ namaxã chaxüwemüxü̃, rü cuma rü yema naxchicüna̱xãgüca̱x ícunagu ñoma norü ãmare i naxca̱x chi̱xemaxü̃rüxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma.
20 16:20-21 Rü cunadai ga yema cunegü rü cuxacügü ga chomaxã cuxü̃́ yexmaxü̃, rü yema tupananetachicüna̱xãgüca̱x ícunagu nax namaxã naxãwemügüxü̃ca̱x. Rü tama cuxü̃́ ningu nax wüxi ga ngexü̃ ga naxü̃nemaxã taxexü̃wa nax cunguxü̃. Rü yemaca̱x naétü cunadai rü ícunagu ga chauxacügü naxca̱x ga yema tupananetachicüna̱xãgü.
21 Nüü̃ nadau 16:20
22 Rü yema curü maxü̃ ga chixexü̃ ga namaxã cuxunearü ngúchaü̃gu cumaxü̃xü̃gagu nüxü̃ icurüngüma ga yexguma cuxíragu rü nax cungexchiruxü̃ rü cugüétüwa nax quicuaixnacüüxü̃.
23 16:23-24 Rü choma ya Cori ya Tupana nixĩ i cumaxã nüxü̃ chixuxü̃ i ñaa ore i ñaxü̃: Rü wüxi i taxü̃ i ngechaü̃ nixĩ cuxca̱x, Pa Yerucharéü̃x. Yerü naétüwa ga guxü̃ma ga yema chixexü̃ ga cuxüxü̃, rü cuma rü guxü̃ma ga ngẽãcuanexü̃gu cunaxü ga wüxi ga nachica ga nawa tupananetachicüna̱xãgüxü̃ yacua̱xüü̃güxü̃, rü ñu̱xũchi nawa cungeãẽxü̃.
24 Nüü̃ nadau 16:23
25 Rü guxü̃ma ga curü namagüarü gu̱xwa rü cunaxü ga nachicagü ga tupananetachicüna̱xãgüxü̃ nawa yacua̱xüü̃güxü̃. Rü yema nax cumexẽchixü̃gagu cunaxüecha ga curü ngúchaü̃ ga ãũãchixü̃, rü namaxã cumaxü̃ ga guxü̃ma ga duü̃xü̃gü ga yéma chopetüxü̃.
26 Rü yema cuchixü̃ane nangaicamagüxü̃ ga Equítuanecüã̱xgümaxã cungeãẽecha. Rü yema nax cungeãẽchaü̃xü̃gagu düxwa choxü̃ cunuxẽxẽ.
27 Rü yemaca̱x düxwa cuxü̃ chapoxcu, rü íchayaxíxraxãchixẽxẽ ga curü naane, rü naxme̱xwa cuxü̃ chayexmaxẽxẽ ga yema Firitéucüã̱x ga cuxchi aiexü̃ naxca̱x ga yema cucüma ga poraãcü chixexü̃.
28 Natürü tama cuxü̃́ ningu ga yema chixexü̃ ga cuxüxü̃, rü yemaca̱x namaxã cungeãxẽ ga yema Achíriaanecüã̱xgü. Rü woo nax yema cuxüxü̃ rü tama cutaãxẽ.
29 Rü yexgumarüxü̃ ta namaxã cungeãxẽ ga yema Babiróniacüã̱x ga tupananetachicüna̱xãgümaxã taxegüxü̃. Rü woo ga yexguma rü ta rü tama cutaãxẽ.
30 Rü choma ya Cori ya Tupana rü cumaxã nüxü̃ chixu nax cuma rü cuchixeãẽmarexü̃ rü wüxi i ngexü̃ i naxü̃nemaxã taxexü̃ i tama ãnexü̃ nacuáxü̃arü ĩnü cuxü̃́ ngẽxmaxü̃. Rü yemaca̱x cunaxü ga guxü̃ma ga yema chixexü̃gü.
31 Rü guxü̃ma ga namagüarü gu̱xwa rü guxü̃ma ga nachicagü ga ngeãcuxü̃gu rü cumax, Pa Yerucharéü̃x, rü cunaxü ga wüxi ga ãmarearü guruxü̃ nax yéma tupananetachicüna̱xãgüxü̃ quicua̱xüxü̃xü̃ca̱x, rü ñu̱xũchi yéma nax cungeãẽxü̃ca̱x. Natürü ga cuma rü tama wüxi ga ngexü̃ ga diẽruca̱x naxü̃nemaxã taxexü̃ãcüma cumaxü̃xü̃, yerü ga cuma, Pa Yerucharéü̃x, rü cunangetanümare ga yema chixexü̃ ga naxügüxü̃.
32 Rü cuma rü wüxi i ngexü̃ i natena ngeãẽxü̃ rü togümare i yatüxü̃ yaxuxü̃rüxü̃ quixĩ i cuma.
33 Rü guxü̃ma i ngẽma ngexü̃gü i naxü̃nemaxã taxexü̃ rü nüxü̃́ tanaxütanü. Natürü ga cuma rü ãmaregü nüxna cuxã ga guxü̃ma ga yema cumaxã ngeãẽgüxü̃. Rü nüxü̃́ cunaxütanügü nax cuxü̃tawa naxĩxü̃ca̱x ga yema togü ga nachixü̃anecüã̱xgü nax cumaxã yangeãẽgüxü̃ca̱x.
34 Rü yema nax cungeãẽxü̃ rü tama yema togü ga ngexü̃gü ga ngeãẽxü̃rüxü̃ cunaxãtanü. Rü taxuxü̃ma cuxca̱x nadaugü nax cumaxã nangeãẽxü̃ca̱x, rü bai ga nümagü ga cuxü̃́ nax naxütanügüãxü̃. Rü cuxchama nixĩ ga nüxü̃́ cunaxütanüxü̃. Rü yemawaxicatama nixĩ ga cunatoraxü̃xü̃.
35 16:35-36 Rü ngẽmaca̱x, Pa Nge i Ngeãẽcüx, ¡irüxĩnü i ñaa chorü ore! Rü choma ya Cori ya Tupana rü cumaxã nüxü̃ chixu rü ñachagürü: ‘Cuma, Pa Yerucharẽü̃x, rü tama ãneãcüma cugü ícucuxuchi nax cungeãẽxü̃ca̱x namaxã i curü yatügü rü curü tupananetachicüna̱xãgü ga ichixexü̃. Rü cunadai ga cuxacügü ga ãmarexü̃ icumugüxü̃.
36 Nüü̃ nadau 16:35
37 Rü ngẽmaca̱x i choma rü wüxigu tá chanangutaque̱xexẽxẽ ga guxü̃ma ga yema namaxã cungeãẽxü̃. Rü yema nixĩ ga guxü̃ma ga yema nüxü̃ cungechaxü̃güxü̃, rü ñu̱xũchi guxü̃ma ga yema naxchi cuxaixü̃. Rü guxü̃ma i ngẽmagü rü cuxü̃tagu tá chanangutaque̱xexẽxẽ. Rü guxü̃táma i ngẽmagüpe̱xewa tá nixĩ i cuxü̃ íchacuxuchixü̃ nax ngẽmaãcü báitücuãcüma cüxü̃ nadaugüxü̃ca̱x.
38 Rü yema nax choxna cungeãẽxü̃ca̱x rü nax cumáetaxü̃ca̱x tá cuxü̃ chapoxcu. Rü choxü̃́ cuchúxuxü̃gagu chorü numaxã tá curü uanügüna cuxü̃ chamu nax cuyuxü̃ca̱x.
39 Rü ngẽmagüme̱xẽwa tá cuxü̃ changexmaxẽxẽ nax ngẽmaãcü nagu napogüexü̃ca̱x i ngẽma nachicagü ga nawa cungeãẽxü̃ rü nawa ngẽma tupananetachicüna̱xãgüxü̃ quicua̱xüxü̃xü̃. Rü tá cuxna nanapuxü̃ i ngẽma cuxchiru i mexẽchixü̃ rü ngẽma mexẽchixü̃ i curü ngã̱xãẽruü̃gü. Rü tá nayana i guxü̃ma i curü ngẽmaxü̃gü rü ñoma cubáitücuxü̃rüxü̃ tá ngéma cuxü̃ nata̱xgü.
40 Rü curü uanügü rü cumaxã tá nananuexẽxẽ i ngẽma togü i duü̃xü̃gü, rü tá nutamaxã cuxü̃ ínamuxũchigü, rü ñu̱xũchi norü taramaxã tá nanadai i curü duü̃xü̃gü.
41 Rü tá ínanagugü ya cupatagü. Rü ñu̱xũchi muxü̃tama i ngexü̃güpe̱xewa tá cuxü̃ napoxcugü. Rü ngẽxma tá chayagu̱xẽxẽ nax cungeãẽxü̃. Rü marü taxũtáma nüxü̃́ cunaxütanügü ga yema namaxã cungeãẽgüxü̃.
42 Rü ngẽxguma tá nixĩ i cumaxã icharüngü̃xmüxü̃ nax cumaxã chanuxü̃ rü cuxü̃ chinuxuxü̃. Rü ngẽxguma tá nixĩ i choxü̃ nangupetüxü̃ nax cumaxã chanuxü̃.
43 Cumax, Pa Yerucharéü̃x, rü nüxü̃ curüngü̃ma ga yema cuxca̱x chaxüxü̃ ga yexguma cupaxgu. Rü choxü̃ cunuxẽxẽ namaxã ga guxü̃ma ga yema chixexü̃gü ga ãũãchixü̃ ga cuxüxü̃. Rü ngẽmaca̱x i chomax, rü tá cuxü̃ chapoxcu naxca̱x i ngẽma cucüma i chixexü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma’.
Ngẽma mamaxacü rü naérüü̃tama nixĩ
44 Rü guxü̃ma i duü̃xü̃gü i wüxi i duü̃xẽchigaxü̃ ixuxü̃ rü ñaa dexaxü̃ tá nixu i cuchiga: ‘Ngẽma mamaxacü rü naérüü̃tama nixĩ’, ñanagürügü tá.
45 Cumax, Pa Yerucharéü̃x, rü wüxi i mama i natechi rü naxacügüchi aixü̃ãcü quixĩ. Rü ñu̱xũchi ga yema cueya̱xgü rü nategüchi rü naxacügüchi naxai. Rü guxema peé rü Itíta tixĩ, rü guxema penatü rü Amoréu tixĩ.
46 Rü nórtewaama nixĩ ga nayexmaxü̃ ga yema cueya̱x ga ya̱xcü. Rü guma nixĩ ga guma ĩane ga Chamária namaxã ga norü ĩanexacügü. Rü súrwaama nixĩ ga nayexmaxü̃ ga cueya̱x ga rübumaecü. Rü guma nixĩ ga guma ĩane ga Chodóma namaxã ga norü ĩanexacügü.
47 Rü cumax, Pa Yerucharéü̃x, rü guma ĩanegücümagügu quixũ, rü cunaxü ga yematama nacümagü ga chixexü̃. Natürü tama cuxü̃́ ningu ga yema chixexü̃ ga cuxüxü̃, rü yemaca̱x guma ĩanegüarü yexera chixexü̃ cuxü.
48 Rü choma ya Cori ya Tupana rü chauégagu cumaxã nüxü̃ chixu, Pa Yerucharéü̃x, rü yema chixexü̃ ga naxüxü̃ ga cueya̱x ga Chodóma rü norü ĩanexacügüarü yexera nixĩ ga yema chixexü̃ ga cuma rü curü ĩanexacügü pexügüxü̃.
49 Rü ñaa nixĩ ga yema cueya̱x ga Chodómaarü chixexü̃: Rü guma ĩane rü ñu̱xũchi norü ĩanexacügü rü nügü ínarütagü yerü imuarü õnaã̱xgü rü taxuxü̃ma nüxü̃́ nataxu. Natürü taguma tüxü̃ narüngü̃xẽẽgü ga guxema ingearü diẽruã̱xgüxe, rü ñu̱xũchi guxema tüxü̃́ nataxúxe.
50 Rü guma ĩanegü rü nügü ínarütagü rü nanaxü ga yema chixexü̃ ga choma tama chanaxwa̱xexü̃ nax naxügüãxü̃. Rü yemaca̱x nixĩ ga choma ga ichayanaxoxẽxẽxü̃, yema nüxü̃ cudauxü̃ãcüma.
51 Natürü yema chixexü̃ ga naxüxü̃ ga Chamária rü norü ĩanexacügü rü tama curü chixexü̃güarü ngãxü̃wa nangu. Rü cumax, Pa Yerucharéü̃x, rü guma ĩanegüarü yexera cunaxü ga taxü̃ ga chixexü̃ ga ãũãchixü̃. Rü ngẽmaca̱x ega nagu nanguxgu i ngẽma cuma cuxüxü̃ i chixexü̃gü rü ngẽma chixexü̃gü ga yima ĩanegü üxü̃ rü ñoma taxuxü̃ma i chixexü̃ naxügüxü̃rüxü̃ nixĩ ya yima ĩanegü.
52 Rü cuma rü name nax namaxã cuporaxü̃ i ngẽma curü poxcu, erü ñu̱xma nax cueya̱xgüarü yexera chixexü̃ cuxüxü̃ rü ñoma taxuxü̃ma i chixexü̃ naxügüxü̃rüxü̃ cuyaxĩgüxẽxẽ. Rü ngẽmaca̱x name nax ãne quingexü̃ rü yáxna namaxã cuxĩnüxü̃ i curü poxcu, erü ñoma taxuxü̃ma i chixexü̃ naxügüxü̃rüxü̃ cuyaxĩgüxẽxẽ ya yima ĩanegü.
53 Natürü choma rü wena tá nüxü̃ charüngü̃xẽxẽxü̃ ya Chodóma, rü Chamária, rü ñu̱xũchi norü ĩanexacügü. Rü ngẽxgumarüxü̃ tá ta i cuma rü wena cuxü̃ charüngü̃xẽxẽxü̃.
54 Natürü i cumax, Pa Yerucharẽü̃x, rü tá cunaxwa̱xe nax namaxã cuporaxü̃ i ngẽma curü poxcu, rü naxcha̱xwa cuxãnexü̃ ga yema chixexü̃ ga cuxüxü̃. Rü ngẽmaãcü i cuma rü tá cuyanaxoxẽxẽ i ngẽma norü ngechaü̃ ya yima ĩanegü.
55 Rü ngẽxguma wena ü̃parüxü̃ namexgu ya Chodóma rü Chamária rü norü ĩanexacügü, rü ngẽxgumarüxü̃ tá ta i cuma rü curü ĩanexacügü rü wena ü̃parüxü̃ cume, Pa Yerucharéü̃x.
56 16:56-57 Cuma rü nüxü̃ cucugü ga yema cueya̱x ga Chodómaarü poxcu ga yexguma cugü ícurütaxgu rü taxũta nango̱xgu ga yema curü chixexü̃ ga cuxüxü̃. Natürü i ñu̱xma i ngẽma Edóü̃cüã̱xgüarü ĩanegü rü Firitéugüarü ĩanegü, rü guxü̃ma ya yima ĩanegü i cuxna ngaicamagüne rü cumaxã naguxchigagü. Rü ñu̱xma rü guxü̃ma i nachixü̃anecüã̱xgü rü cuxü̃ naxoe.
57 Nüü̃ nadau 16:56
58 Rü ñu̱xma rü name nax yáxna namaxã cuxĩnüxü̃ i ngẽma poxcu i curü chixexü̃ i ãũãchixü̃gagu cuxca̱x íchanguxẽẽxü̃. Rü Choma ya Cori ya Tupana nixĩ i cumaxã nüxü̃ chixuxü̃ i ngẽma.
59 Rü choma ya Cori ya Tupana rü cuxü̃ ñachagürü: Cuxü̃ tá chapoxcu, erü tama cuyanguxẽxẽ ga yema chomaxã cuxueguxü̃, rü ñu̱xũchi tama cuyanguxẽxẽ ga yema uneta ga chomaxã cuxüxü̃.
60 Natürü i choma rü tá nüxna chacua̱xãchi ga yema uneta ga cumaxã chaxueguxü̃ ga yexguma cupaxgu, Pa Yerucharéü̃x. Rü ñu̱xũchi cumaxã tá chanaxuegu i wüxi i uneta i guxü̃guca̱x ixĩxü̃.
61 Rü choma rü ngẽxguma tá cuxme̱xwa tüxü̃ changexmagüxẽẽgu cuxacügürüxü̃ ya yíxema cueya̱x ya yáxe ya Chamária, rü yíxema cueya̱x ya rübumaexe ya Chodóma, rü woo tama tümagüca̱x nax yixĩxü̃ ga yema uneta ga cumaxã chaxüxü̃, rü ngẽxguma i cumax, Pa Yerucharéü̃x, rü tá nüxna cucua̱xãchi ga yema chixexü̃ ga cuxüxü̃ rü na̱xcha̱xwa tá cuxãne.
62 Rü choma rü tá wena cumaxã chanaxü i ngẽma chorü uneta, rü ñu̱xũchi tá nüxü̃ quicua̱xãchi nax choma chixĩxü̃ ya Cori ya Tupana.
63 Rü ngẽxguma cuxü̃́ nüxü̃ charüngümagu i guxü̃ma i ngẽma chixexü̃ i cuxüxü̃ rü cuma rü tá cuxãnexü̃chi, rü tá cungechaxü̃, rü taxũtáma wena cugü quicua̱xüxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma” —ñanagürü.
