Ezequiel 17:1-24
17 17:1-2 Nüma ga Cori ya Tupana rü chomaxã nidexa rü ñanagürü: —Cumax, Pa Yatüx, ¡Iraétanüxü̃maxã idexa rü wüxi i ore i to i oregu ixuxü̃ namaxã ixu!
2 Nüü̃ nadau 17:1
3 17:3-4 ¡Rü Iraétanüxü̃maxã nüxü̃ ixu i ñaa chorü ore i ñaxü̃! “Wüxi ga ĩyü ga taxüchixü̃ rü Líbanunecüwa nangu. Rü guma naxpe̱xatügü rü nitaxüchi rü nanaguxü̃raü̃ ga namatüpe̱xatü. Rü inayacawe ga wüxi ga ocayiwaarü doxchacaxü̃. Rü ñu̱xũchi wüxi ga nachixü̃ane ga taxetanüxü̃ nagu ãpatagüxü̃gu nayato, nagu ga wüxi ga ĩane ga taxetanüxü̃ nawa muxü̃.
4 Nüü̃ nadau 17:3
5 Yemawena rü naanewa nanayaxu ga wüxi ga naxchire, rü ñu̱xũchi wüxi ga mexü̃ ga naanegu nayato ga wüxi ga natüpechinüwa ga taxü̃ ga dexá íyexmaxü̃wa.
6 Rü narüxü ga guma naxchire, rü wüxi ga úbane ga tatanüxü̃ nixĩ. Rü woo ga nax nanuxetaxü̃ rü yema ĩyü íyexmaxü̃guama narüma̱xgü ga yema nachacüxü. Rü yema naxchúma̱xãgü rü aixepewa nayadagü ga waixü̃müanewa. Rü wüxi ga úbane ga mexü̃ nixĩ, rü namuatüxüchi rü ñu̱xũchi namuchacüüxüchi.
7 Natürü nayexma ga to ga ĩyü ga taxüchixü̃ ga itaxpe̱xatüxüchixü̃ rü muxpachi̱xixüchixü̃. Rü yexguma ga yema úbachuma̱xãgü rü nawaama nadagü, rü ñu̱xũchi ga natanü rü yema ĩyü íyexmaxü̃guama narüma̱xnü nax yemaacü yexera dexá nüxna tanaxãxü̃ca̱x.
8 Natürü marüchire̱x mexü̃ ga naanegu nato ga dexá íyemaxü̃wa ga ngextá chi ínamuchacüüxü̃wa rü ínaxoxü̃wa, rü wüxi i baxcaxü̃ i úbane chi nixĩ”.
9 ¡Rü chauégagu Iraétanüxü̃maxã nüxü̃ ixu i ñaa ore i ñaxü̃! “Cori ya Tupana rü ñanagürü: ‘Ngẽma úbane rü taxũtáma naya. Rü ngẽma nüxíraxü̃xü̃ i ĩyü tá nanatuxü̃chuma̱xã, rü ñu̱xũchi tá nanayixẽxẽ i norü o. Rü tá narüñẽxẽxgü i ngẽma natanügü i ngexwaca rüxügüxü̃, rü tá nayu. Rü taxũtáma nanaxwa̱xe i muxü̃ i duü̃xü̃gü rüe̱xna wüxi i duü̃xü̃ i poraxü̃ nax nabéãxü̃.
10 Rü woo wena natogüã̱xgu rü taxũtáma wena narüxüatü. Rü ngẽxguma yimá buanecü ya éstewaama ne ũcü nawa nguxgu rü tá nipaama nawa i ngẽma naane i nagu natoxü̃’ ” —ñanagürü ga Cori ya Tupana.
11 17:11-12 Rü nüma ga Cori ya Tupana rü chomaxã nidexa rü choxü̃ ñanagürü: —¡Nüxna naca i ñaa duü̃xü̃gü i tama chauga ĩnüechaü̃xü̃ rü aixcüma nüxü̃ nacua̱xgü nax ta̱xacüchiga yixĩxü̃ i ñaa ore i tá cumaxã nüxü̃ chixuxü̃! ¡Rü namaxã nüxü̃ ixu i ñaa ore i ñaxü̃! “Yimá Babiróniaanearü ãẽ̱xgacü rü Yerucharéü̃wa naxũ rü Babiróniawa nanaga ga Yudáanearü ãẽ̱xgacü guxü̃ma ga norü ngü̃xẽẽruü̃gümaxã.
12 Nüü̃ nadau 17:11
13 17:13-14 Rü ñu̱xũchi nüxü̃ naxuneta ga wüxi ga nane ga guma Yudáanearü ãẽ̱xgacü nax Yudáanemaxã inacuáxü̃ca̱x. Rü gumamaxã wüxi ga uneta naxü nax aixcüma tá Babiróniaanearü ãẽ̱xgacüga naxĩnüxü̃ca̱x. Rü yemawena ínayagagü ga yema yatügü ga tachigagüxü̃ ga yema nachixü̃anewa nax yemaacü wüxi ga nachixü̃ane ga turaxü̃ yixĩxü̃ca̱x ga Yudáane, rü yemaacü nigu ga yema uneta ga Yudáanearü ãẽ̱xgacümaxã naxüxü̃.
14 Nüü̃ nadau 17:13
15 Natürü ga nane ga guma Yudáanearü ãẽ̱xgacü rü Babiróniaanearü ãẽ̱xgacümaxã nanu. Rü yemaca̱x Equítuanewa nanamugü ga orearü ngeruü̃gü nax yéma muxü̃ ga cowarugüca̱x rü churaragüca̱x íyacagüxü̃ca̱x. ¿Ẽ̱xna pema nagu perüxĩnüegu rü ngẽxguma ngẽma pexügügu rü ngẽmaãcü tá pemaxẽxü̃ rü taxũtáma peyuexü̃? ¿Ẽ̱xna nagu perüxĩnüegu rü maxü̃ãcü tá tiña ya yíxema tama naga ĩnüxe i ngẽma uneta?
16 Rü choma ya Cori ya Tupana rü chauégagu cumaxã nüxü̃ chixu rü Babiróniaanegu tá nayu i ngẽma unetaxü̃ cugüxü̃, rü tama yanguxẽẽxü̃ ga yema uneta ga naxüxü̃ namaxã ga guma ãẽ̱xgacü ga yangucuchixẽẽcü.
17 17:17-18 Rü ngẽxguma Babiróniaanearü ãẽ̱xgacü norü duü̃xü̃gümaxã Yerucharéü̃ca̱x íyaxüãchigu, rü yimá ĩanecüwawa tá nanagünagü i waixü̃mü rü tá toxṍõnegü naxügü nax ngẽmawa nachocuxü̃ca̱x. Rü tá nanadai i muxü̃ma i duü̃xü̃gü. Rü nüma i Faraóü̃ rü taxũtáma muxü̃ i norü churaragü rü duü̃xü̃gü ngéma namugü yerü nüma ga Yudáanearü ãẽ̱xgacü rü nüxü̃ nacugü ga yema uneta ga Babiróniaanearü ãẽ̱xgacümaxã naxüxü̃ rü tama nayanguxẽxẽ ga yema norü uneta. Rü ngẽmaca̱x taxũtáma maxü̃ãcü niña.
18 Nüü̃ nadau 17:17
19 Rü ngẽmaca̱x i choma ya Cori ya Tupana rü chauégagu cumaxã nüxü̃ chixu rü nüma ga Yudáanearü ãẽ̱xgacü rü nüxü̃ nacugü ga yema uneta ga chomaxã naxüxü̃. Rü ñu̱xũchi tama nayanguxẽxẽ ga yema uneta, rü ngẽmaca̱x i choma rü tá chanapoxcu.
20 Rü choma rü naétügu tá chanaña i ngẽma chorü pücha, rü ngẽmamaxã tá chayayaxu. Rü Babiróniawa tá chanaga, rü ngéma tá chapoxcu nagagu nax tama chauga naxĩnüxü̃.
21 Rü ngẽma rüporamaegüxü̃ i norü churaragü rü daigu tá nayue. Rü ngẽma maxẽxü̃ i íyaxügüxü̃ rü guxü̃ i ñoma i naanegu tá chanawoone. Rü ngẽxguma tá nixĩ i pemax rü nüxü̃ picua̱xãchitanüxü̃ nax choma ya Cori ya Tupana chixĩxü̃ i pemaxã nüxü̃ chixuxü̃ i ngẽma”.
22 Rü choma ya Cori ya Tupana rü ñachagürü: “Choma rü tá chayabüe i ngẽma rümáchanemaexü̃ i ocayiwaarü doxchacaxü̃, rü ñu̱xũchi chomatátama wüxi ya ma̱xpǘne ya rümáchanenegu tá chayato.
23 Rü yimá Iraéanewa ngẽxmane ya ma̱xpǘne ya rümáchanemaenewa tá narüxü rü tá namuchacüxü, rü tá namuarü oõ̱x, rü wüxi ya ocayiwa ya baxcane tá nixĩ. Rü naguxü̃raü̃xü̃ i naeü̃gü rü tá natüxü̃wa namaxẽ, rü ñu̱xũchi naguxü̃raü̃xü̃ i werigü tá natanütüxü̃gu nixüachiaxü̃.
24 Rü guxü̃ma i ngẽma naigü i naanewa rüxügüxü̃ rü tá nüxü̃ nacua̱xgü nax choma chixĩxü̃ ya Cori ya Tupana. Choma rü chayadaxüchi i ngẽma nai i nügü írütaxü̃, rü chanayaxẽxẽ i ngẽma nai i nügü írüxíxraxü̃. Choma rü chanagüatüxẽxẽ i ngẽma nai i nügü írümetanüxü̃, rü wena chanaxüatüxẽxẽ i ngẽma nai i igüatüxü̃. Rü choma ya Cori ya Tupana nixĩ i pemaxã nüxü̃ chixuxü̃ rü ñu̱xũchi chayanguxẽẽxü̃ i ngẽma” —ñanagürü ga Cori ya Tupana.
