Ezequiel 18:1-32
18 Rü nüma ga Cori ya Tupana chomaxã nidexa rü ñanagürü:
2 —¿Tü̱xcüü̃ i Iraéanewa rü nagu naxãgaeecha i ngẽma dexa i ñaxü̃: “Ngẽma papagü rü úba i ngu̱xchi̱a̱xü̃ nangõ̱xgü, rü ngẽma nanegü rü nawa naxãũãpütagü”? ñaxü̃.
3 Rü choma ya Cori ya Tupana rü chauégagu pemaxã nüxü̃ chixu nax taxũtáma wena Iraéanewa nagu pexãgaexü̃ i ngẽma dexa.
4 Rü guxü̃ma i duü̃xü̃güarü maxü̃ rü cho̱xme̱xwa nangẽxma woo papagü rü woo nanegü. Rü yíxema chixexü̃ ǘxe rü tümaarü chixexü̃gagu tátama tayu.
5 Rü yíxema aixcüma mexẽ tixĩ ya yíxema nagu maxü̃́xẽ i ngẽma aixcüma we̱xguxü̃.
6 Rü yíxema rü tama natanügu taxã i ngẽxguma togü ma̱xpǘnegüwa taxü̃ i õna naxügügu nax norü tupananetachicüna̱xãgüxü̃ yacua̱xüü̃güxü̃ca̱x. Rü tama nüxü̃́ tayaxõ i ngẽma Iraétanüxü̃arü tupananetagü. Rü yíxema rü tama tümamücüxü̃ tayapu̱xma̱x, rü tama tümama̱xmaxã tamaxü̃ ega ngẽxguma tümaarü da̱xawexü̃newa tangexmagu.
7 Rü tama tanachu̱xu ega texé tümaxü̃tawa diẽruca̱x ícaxgu rü aixcüma tanatáeguxẽxẽ i ngẽma naxchiru i tümaarü diẽruca̱x tüxna naxãgüxü̃. Rü taxúeãxü̃ma tangĩ̱x. Rü yíxema taiyaemaxã tangau i tümawemü, rü ñu̱xũchi tüxü̃ taxüchiru ya yíxema ngexchiruxe.
8 Rü yima yatü ya mecümacü rü ngẽxguma texé diẽruca̱x nüxna caxgu nax ngĩxü̃ tatáeguxẽẽxü̃ca̱x rü yima yatü tama nanaxwa̱xe nax üétüãcü ngĩxü̃ tatáeguxẽẽxü̃ i ngẽma diẽru. Rü yimá yatü ya mecümacü rü tama texémaxã guxchaxü̃ naxü. Rü yimá yatü rü ngẽxguma namexẽẽãgu i taxre i duü̃xü̃güarü guxchaxü̃ rü taxueétüwama naxǘ.
9 Rü nagu tamaxü̃ i chorü mugü rü aixcüma tayanguxẽxẽ. Rü yíxema tixĩ ya aixcüma mexẽ, rü ngẽmaca̱x taxũtáma tüxü̃ chapoxcu. Rü choma ya Cori ya Tupana nixĩ i nüxü̃ chixuxü̃ i ngẽma.
10 18:10-13 Natürü ngẽxguma chi yimá yatü ya mecü nüxü̃́ nangẽxmagu i wüxi ya nane ya tama nanatürüxü̃ mea namaxü̃gu, rü chi nanuxwa̱xegu rü namáetawa̱xegu, rü yima nane rü norü chixexü̃gagu tátama napoxcu. Rü yima nane rü ngẽxguma chi natanügu naxãxgu i ngẽma ma̱xpǘnegüwa taxü̃ ga õna ügüxü̃ nax ngẽmaãcü norü tupanachicüna̱xãxgüxü̃ icua̱xüü̃güxü̃,rü chi toguxexü̃ yapu̱xmaxgu,rü chi yíxema ngearü diẽruã̱xgüxe rü tüxü̃́ nataxúxemaxã chixri inacua̱xgu,rü chi toguxeaxü̃́ nangĩ̱xgu,rü chi tama tüxü̃́ natáeguxẽẽxã̱xgu i tümaarü ngẽmaxü̃ i ngẽma tümaarü ngetanüca̱x nüxna taxãgüxü̃,rü chi tupananetagügu yaxõõxgu,rü chi naxüãxgu i ngẽma chixexü̃ i naxchi chaxaixü̃,rü chi norü diẽru toguena ngĩxü̃ naxãxgu nax ngẽmaãcü tüxü̃́ nangĩ́xü̃ca̱x rü tacü i ngĩrü üétüca̱x ínacagurü yima nane ya ngẽmaãcü chixri maxü̃cü rü ngẽmaca̱x aixcüma tá nayu rü nagagu tátama nixĩ i ngẽma.
11 Nüü̃ nadau 18:10
12 Nüü̃ nadau 18:10
13 Nüü̃ nadau 18:10
14 Natürü ngẽxguma chi yimatama yatü ya chixri maxü̃cü nüxü̃́ ngẽxmagu i wüxi ya nane ya nüxü̃ daucü i guxü̃ma i nanatüarü chixexü̃gü, natürü tama nagu yaxũxgu i ngẽma nanatücüma rü taxucürüwa nanatüarü chixexü̃gügagu nayu.
15 18:15-17 Rü yimá nane rü ngẽxguma chi tama nanatürüxü̃ natanügu naxãxgu i ngẽma ma̱xpǘnegüwa taxü̃ ga õna ügüxü̃ nax ngẽmaãcü norü tupanachicüna̱xãxgüxü̃ icua̱xüü̃güxü̃,rü chi tama nüxü̃́ yaxõõxgu i ngẽma Iraétanüxü̃arü tupanagüneta,rü chi tama toguxexü̃ yapu̱xmaxgu,rü chi taxúemaxã nachixecümagu,rü ngẽxguma chi texé diẽruca̱x nüxna caxgux rü nüma rü tama norü diẽruchicüxü tümaarü ngẽmaxü̃ca̱x ínaca̱xgu,rü chi tama texéaxü̃́ nangĩ̱xgu,rü chi tüxü̃ nachibüxẽẽgu ya yíxema taiyaxe,rü chi tüxü̃ naxüxchirugu ya yíxema ngexchiruxe,rü chi taxúemaxã guxchaxü̃ naxü̱xgu,rü chi ngearü üétüãcüma diẽru ngĩxü̃ inaxãxgu,rü chi chorü mugüga naxĩnügu rü nagu namaxü̃gu,
rü nüma rü taxũtáma nanatüarü chixexü̃gagu nayu. Rü aixcüma tá namaxü̃.
16 Nüü̃ nadau 18:15
17 Nüü̃ nadau 18:15
18 Natürü ya yima nanatü rü norü chixexü̃gügagu tátama nayu erü nachixecüma rü nangĩ̱x rü chixexü̃ naxü i natanüxü̃tanüwa.
19 Rü pema rü tá choxna peca rü ñaperügügü tá: “¿Tü̱xcüü̃ ya yimá nane rü tama nanatüarü chixexü̃gagu napoxcu?” ñapegürügü tá. Dücax, nüma rü taxũtáma nanatüarü chixexü̃gagu napoxcu erü yimá nane rü aixcüma mexü̃ naxü, rü nayanguxẽxẽ ga chorü mugü rü nagu namaxü̃. Rü ngẽmaca̱x taxucürüwama nanatüarü chixexü̃gagu nayu.
20 Rü yíxema chixexü̃ üxexicatama tá tixĩ ya tümaarü chixexü̃gagu poxcuexe. Rü nüma ya yimá nane ya mecü rü taxũtáma nanatüarü chixexü̃ naxütanü. Rü wüxi i papa i mexü̃ rü taxũtáma nanearü chixexü̃ naxütanü. Rü yíxema mexü̃ ǘxe rü tá tanayaxu i tümaarü ãmare naxca̱x i ngẽma mexü̃ i taxüxü̃. Rü yíxema chixexü̃ ǘxe rü tá tanayaxu i tümaarü poxcu naxca̱x i ngẽma chixexü̃ i taxüxü̃.
Tupana rü we̱xgu duü̃xü̃gümaxã inacua̱x
21 Natürü ngẽxguma wüxi ya yatü ya noxri chixri maxü̃cü rü nüxü̃ naxoxgu i nacüma i chixexü̃, rü naga naxĩnügu i ngẽma chorü mugü, rü aixcüma mexü̃ naxü̱xgu rü tá namaxü̃ rü taxũtáma nayu.
22 Rü guxü̃ma i norü chixexü̃gü rü choma rü tá nüxü̃́ nüxü̃ icharüngüma. Rü nüma rü tá namaxü̃ erü nayanguxẽxẽ i chorü mugü.
23 Rü pema rü bexmana nagu perüxĩnüegu nax choma rü chataãẽxü̃ i ngẽxguma nayu̱xgu i wüxi i duü̃xü̃ i chixexü̃gu maxü̃xü̃. Pemaxã nüxü̃ chixu rü tama chataãxẽ. Rü ngẽma choma chanaxwa̱xexü̃ nixĩ nax nüxü̃ naxoxü̃ i ngẽma nacüma i chixexü̃ nax nüxü̃́ nangẽxmaxü̃ca̱x i maxü̃.
24 Natürü ngẽxguma chi wüxi i duü̃xü̃ i mea maxchiréxü̃ nüxü̃ rüxoxgu nax mea namaxü̃xü̃, rü naxüãxgu i guxü̃ma i chixexü̃ i tama namaxã chataãẽxü̃ ¿rü namexü̃ yixĩxü̃ nax tama napoxcuxü̃? Rü pemaxã nüxü̃ chixu rü tá napoxcu. Rü guxü̃ma ga yema mexü̃ ga noxri naxüxü̃ rü choma rü tá nüxü̃ icharüngüma. Rü nüma rü tá nayu nagagu i ngẽma norü chixexü̃gü. Rü choma ya Cori ya Tupana nixĩ i ngẽma ñachaxü̃.
25 Rü pema rü nüxü̃ pixu nax choma ya Cori ya Tupana yixĩxü̃ nax tama aixcüma mea pemaxã ichacuáxü̃. ¡Natürü iperüxĩnü i pema, Pa Iraétanüxü̃x! ¿Rü ta̱xacüwa nixĩ i tama aixcüma mea pemaxã ichacuáxü̃? Rü pemaxã nüxü̃ chixu rü pema waxi nixĩ i tama aixcüma mea chauga pexĩnüexü̃.
26 Rü ngẽxguma wüxi i duü̃xü̃ i mea maxchiréxü̃ nüxü̃ rüxoxgu nax mea namaxü̃xü̃, rü naxüãxgu i ngẽma chixexü̃, rü tá nayu nagagu i ngẽma chixexü̃ i naxüxü̃.
27 Natürü ngẽxguma wüxi ya yatü ya noxri chixri maxü̃cü rü nüxü̃ naxoxgu i nacüma i chixexü̃, rü aixcüma mexü̃ naxü̱xgu rü tá namaxü̃ rü taxũtáma nayu.
28 Rü ngẽxguma aixcüma naãẽxü̃ yacua̱xãchigu rü nüxü̃ naxoxgu i nacüma i chixexü̃ ga naxüxü̃ rü tá aixcümaxü̃chi namaxü̃ rü taxũtáma nayu.
29 Natürü ngẽma Iraétanüxü̃ i duü̃xü̃gü rü tá nüxü̃ nixugü nax choma rü tama mea namaxã ichacuáxü̃ rü tama nawe̱xguxü̃ i ngẽma chaxüxü̃. ¿Rü ta̱xacüwa nixĩ i tama aixcüma mea pemaxã ichacuáxü̃? Rü pemaxã nüxü̃ chixu rü pema waxi nixĩ i tama aixcüma mea chauga pexĩnüexü̃.
30 Rü dücax, Pa Iraétanüxü̃, rü choma rü wüxíechigüna tá chaca naxca̱x i ngẽma chixexü̃ i pexügüxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma. ¡Rü wüxicana nüxna pixĩgachitanü i ngẽma perü chixexü̃gü nax ngẽmaãcü tama ngẽma perü chixexü̃gagu pepoxcuexü̃ca̱x!
31 ¡Rü noxtacüma nüxna pixĩgachitanü i guxü̃ma i ngẽma chixexü̃gü ga chope̱xewa pexüxü̃! ¡Rü penangexwaca̱xü̃xẽxẽ i ngẽma perü maxü̃, rü ñu̱xũchi ngẽma peãxẽ! ¿Tü̱xcüü̃ penaxwa̱xe nax peyuexü̃, Pa Iraétanüxü̃x?
32 Erü choma rü tama chanaxwa̱xe nax texé yuxü̃. Rü narümemae nixĩ nax nüxna pixĩgachixü̃ i ngẽma chixexü̃ nax pemaxẽxü̃ca̱x. Rü choma ya Cori ya Tupana ya Guxãétüwa Ngẽxmaxe nixĩ i pemaxã nüxü̃ chixuxü̃ i ngẽma —ñanagürü.
