Ezequiel 19:1-14
19 Rü cumax, Pa Echequiéx, rü Iraétanüxü̃arü ãẽ̱xgacügüchiga nagu nawiyae i ñaa ngechaü̃arü wiyae:
2 Iraéchixü̃ane rü ñoma wüxi i ngexü̃ i leóü̃rüxü̃ nixĩ. Rü leóü̃gütanüwa namaxü̃ rü ngéma nanayaexẽxẽ ga naxacügü.
3 Rü wüxi i ngẽma naxacü rü guxü̃arü yexera meama nanayaxẽxẽ. Rü nüma rü naxca̱x nangu̱x nax yayauxãxü̃ ga naeü̃gü rü duü̃xü̃güxü̃ nax nangṍxü̃.
4 Rü yema togü ga nachixü̃anecüã̱xgü rü nachigaxü̃ naxĩnüe, rü wüxi i yauxruxü̃ naxca̱x inaxügü rü yexma nayayauxgü. Rü naraü̃wa nayachotagü rü ngẽmaãcü Equítuanewa nanagagü.
5 Rü yema ngexü̃ i leóü̃ rü yexguma yemaxü̃ nada̱u̱xgu rü nanaxĩ̱xãchiãxẽ. Rü yemaca̱x to ga nanexü̃ nangu̱xẽxẽ nax naporaxü̃ca̱x rü yadüraxü̃ca̱x.
6 Rü yema leóü̃ rü nügü nacua̱x nax naporaxü̃ rü yema togü ga leóü̃gütanügu narüxũũxü̃. Rü nüxü̃ nacua̱x nax ñuxãcü naeü̃gü tüxü̃ nangṍxü̃. Rü duü̃xü̃güxü̃ nangṍx.
7 Rü ãẽ̱xgacüpatagü rü nayachixexẽxẽ, rü ĩanegü rü nagu nipogügü. Rü yema nagamaxã rü nayadu̱xruxẽxẽ ga guxü̃ma ga nachixü̃anegü.
8 Rü yemaca̱x ga yema nachixü̃anegü ga nüxna ngaicamagüxü̃ rü naxca̱x inanaxügü ga wüxi ga norü yauxruxü̃. Rü yemagu nayayauxgü.
9 Rü wüxi ga chotaraü̃ruü̃maxã naraü̃wa nayachotagü rü wüxi ga naxpüxü̃gu Babiróniaanearü ãẽ̱xgacüpe̱xewa nanagagü. Rü nanapoxcugü rü marü taguma wena nüxü̃ taxĩnü ga naga ga Iraéanearü ma̱xpǘnegüwa.
10 Pa Iraétanüxü̃x, tachixü̃ane rü ñoma wüxi i úbane i natücutüwa rüxüxü̃rüxü̃ nixĩ. Rü nabaca rü nataeta erü taguma nüxü̃́ nataxu i dexá.
11 Rü ngẽma nachacüügü rü niporaxüchi, rü ngẽma nachacüügüwa nanaxügü ya ãẽ̱xgacügüarü naixmena̱xãgü. Rü poraãcü natatanü rü narümáchanexü̃chi. Rü guxü̃ma i togü i naigüxü̃ narümáchanemae, rü ngẽmaca̱x yáxü̃gu nüxü̃ tadau.
12 Natürü numaxã nanabe̱xgü, rü niwa̱x. Rü yimá buanecü ya éstewaama ne ũcü rü nayapaxẽxẽ, rü narüyi i norü o. Rü nachacüügü ga noxri poraexü̃ rü nipagü rü üxüxü̃ ínanagu.
13 Rü ñu̱xma rü ínachianexü̃gu i dexá ítaxuxü̃gu nato.
14 Rü ngẽma nachacüügüwa rü ninai ya wüxi ya üxü, rü ngẽma ngexwaca rüxügüxü̃ i nachacüügü rü nixae wüxigu norü omaxã. Rü marü nataxuma ga nachacüügü ga iporaxü̃ nax ãẽ̱xgacügüarü naixmena̱xãwa nangugüxü̃. Rü ngẽma nixĩ i wüxi i ngechaü̃arü wiyae, rü name nixĩ i nagu pewiyaegü i ngẽxguma ngechaü̃ ínguxgu.
