Ezequiel 2:1-10
2 Rü ñu̱xũchi nüxü̃ chaxĩnü ga wüxi ga naga ga ñaxü̃ choxü̃: —Pa Yatüx ¡inachi erü tá cumaxã chidexa! —ñaxü̃.
2 Rü yexguma chomaxã íyadexayane ga Tupana rü choxna nangu ga Naãxẽ, rü choxü̃ inachixẽxẽ. Rü yexguma mea nüxü̃ chaxĩnü ga naga ga yema chomaxã idexaxü̃.
3 Rü nüma ga Tupana rü ñanagürü choxü̃: —Cumax, Pa Yatüx, rü tá natanüwa cuxü̃ chamu i ngẽma Iraétanüxü̃ i tama chauga ĩnüexü̃ rü chomaxã nueamaxü̃. Rü nümagü rü ñu̱xma rü ta chomaxã nanueama yema norü o̱xigürüxü̃.
4 Rü nümagü i ngẽma duü̃xü̃gü rü tama chauga naxĩnüechaü̃ rü tama choxü̃ nacua̱xgüchaü̃. Rü ngẽmatanüwa tá nixĩ i cuxü̃ chamuxü̃ nax namaxã nüxü̃ cuyarüxuxü̃ca̱x i ñaa chorü ore —ñanagürü ga Cori ya Tupana.
5 Rü ñanagürü ta: —Ngẽma duü̃xü̃gü i tama irüxĩnüechaü̃xü̃ rü ngẽxguma woo cuxü̃́ inaxĩnüegu rüe̱xna tama cuxü̃́ inaxĩnüegu, natürü tá nüxna nacua̱xãchie nax natanüwa marü nangẽxmaxü̃ i chorü orearü uruxü̃.
6 Rü cumax, Pa Yatüx ¡rü taxṹ i nüxü̃ cumuü̃xü̃! ¡Rü taxṹ i naxca̱x cumuü̃xü̃ ega cuxü̃ naxãxũnegügu rü ñoma tuxumaxã ícunumaeguãchigurüxü̃ cumaxã yixĩxgu rüe̱xna ñoma tuxchinawetanüwa cungexmagurüxü̃! ¡Rü taxṹ i curümaãchixü̃ ega chixri cuchiga yadexagügu! ¡Rü taxṹ i cubaixãchixü̃ ega numaxã cuxna nadaugügu i ngẽma duü̃xü̃gü i tama irüxĩnüechaü̃xü̃!
7 ¡Rü cumax rü namaxã nüxü̃ ixuama i ngẽma chorü ore rü woo tama cuxü̃́ inaxĩnüegu! Erü nüma rü tama irüxĩnüechaü̃xü̃ nixĩgü.
8 ¡Mea irüxĩnü i ngẽma cumaxã nüxü̃ chixuxü̃! ¡Rü taxṹ i nümagürüxü̃ tama icurüxĩnüchaü̃xü̃! ¡Rü icho, rü nangõ̱x i ngẽma tá cuxna chaxãxü̃! —ñanagürü choxü̃.
9 Rü ñu̱xũchi nüxü̃ chadau ga wüxi ga naxme̱x ga wüxi ga popera ga ãmatüxü̃ ga rübuxü̃ ngexü̃ne nax choxna naxããxü̃ca̱x.
10 Rü guma naxme̱x rü chope̱xewa ínayawẽ ga yema popera. Rü yema popera rü taxrecüwawa naxãmatü. Rü ngechaü̃gü̃, rü ngúxü̃gü, rü ãxũnegü nagu naxümatü.
