Ezequiel 20:1-49
20 Rü yexguma 7 ga taunecü ngupetüguwena ga nax Babiróniawa tayexmagüxü̃, rü guma taunecüarü 5 ga tauemacüarü 10 ga ngunexü̃gu rü ñuxre ga Iraétanüxü̃arü ãẽ̱xgacügü rü chaxũtawa naxĩ nax Tupanana yacagüxü̃ca̱x. Rü chope̱xewa nayarütogü.
2 Rü yexguma ga Cori ya Tupana rü chomaxã nidexa rü choxü̃ ñanagürü:
3 —Cuma, Pa Yatüx, ¡namaxã idexa i ngẽma Iraétanüxü̃arü ãẽ̱xgacügü rü namaxã nüxü̃ ixu i chorü ore i ñaxü̃! “¿Ẽ̱xna pema rü nua pexĩ nax choxna peyacagüxü̃ca̱x? Natürü i choma ya Cori ya Tupana rü chauégagu pemaxã nüxü̃ chixu nax tama chanaxwa̱xexü̃ nax choxna peyacagüxü̃”.
4 Rü narümemae, Pa Yatüx, nax cumatama nüxna cucaxü̃ rü namaxã nüxü̃ quixuxü̃ ga yema chixexü̃gü ga ãũãchixü̃ ga nanatügü rü norü o̱xigü ügüxü̃.
5 ¡Rü namaxã nüxü̃ ixu i chorü ore i ñaxü̃! “Rü yexguma choma ya Cori ya Tupana nüxü̃ chaxunetagu ga Iraétanüxü̃ nax chorü duü̃xü̃gü yixĩgüxü̃ca̱x rü namaxã chanaxuegu nax choma tá chixĩxü̃ i Acóbutanüxü̃ nanegüarü rü nataagüarü Tupana. Rü Equítuanewa namaxã chidexa rü chauégagu wena namaxã chanaxuegu nax choma chixĩxü̃ i norü Tupana.
6 Rü yematama ngunexü̃gu rü namaxã nüxü̃ chixu nax Equítuanewa tá íchanagaxü̃xü̃ rü ngẽma naane ga chomatama nüxü̃ chaxunetaxü̃wa tá chanagagü. Rü ngẽma nachixü̃anearü naane rü guxü̃ma i ngẽma togü i nachianexü̃ narümemae. Rü ngéma rü yima lechi rü berure rü ñoma dexárüxü̃ taguma nataxu.
7 Rü yexguma ga choma rü guxãxü̃ma chamu nax nüxü̃ naxoexü̃ca̱x rü ínawogüãxü̃ca̱x ga yema norü tupananetagü ga naxchi chaxaixü̃. Rü namaxã nüxü̃ chixu nax tama íyanaãxü̃ca̱x ga yema Equítucüã̱xgüarü tupananetachicüna̱xãgü. Erü choma nixĩ i norü Tupana chixĩxü̃ i Iraétanüxü̃.
8 Natürü ga nümagü rü chomaxã nanueama rü tama chauga naxĩnüechaü̃. Rü tama ínanawogü ga norü tupananetachicüna̱xãgü rü tama nüxü̃ narüxoechaü̃ nax nüxü̃ yacua̱xüü̃güxü̃ ga yema Equítuanecüã̱xgüarü tupananetachicüna̱xãgü. Rü yexguma ga choma rü poraãcü namaxã chanu, rü nagu charüxĩnü chi nax Equítuanegu chanapoxcuexü̃ ñu̱xmata naxüpetü i chorü nu.
9 Natürü chaugünatama chachogü nax tama chanachixexẽẽxü̃ca̱x i chauéga rü ñu̱xũchi tama chixri chauchiga yadexagüxü̃ca̱x ga yema nachixü̃anegü ga Iraétanüxü̃ natanüwa maxẽxü̃. Erü nape̱xewa ga yema nachixü̃anegü rü Iraétanüxü̃maxã chaugü chixu rü chanaxuegu nax Equítuanewa tá íchanagaxü̃xü̃.
10 Rü choma rü Equítuanewa íchanagaxü̃ rü ínachianexü̃gu chayagagü.
11 Rü yéma nüxna chanaxã ga chorü mugü i maxü̃ tüxna ãxü̃ ya yíxema naga ĩnüexe.
12 Rü yexgumarüxü̃ ta nüxü̃ nüxü̃ chacua̱xẽxẽ ga chorü ngü̃chigaarü ngunexü̃ nax nagu choxü̃ yacua̱xüü̃güxü̃ca̱x rü nüxna nacua̱xãchigüxü̃ca̱x nax choma ya Cori ya Tupana yixĩxü̃ ga chaugüca̱x nüxü̃ chaxunetaxü̃ ga yema duü̃xü̃gü.
13 Natürü yexguma chianexü̃wa nayexmagügu rü chomaxã nanue rü tama chauga naxĩnüechaü̃ rü tama naga naxĩnüechaü̃ ga yema chorü mugü ga maxü̃ chi tüxna ãxü̃ ya guxãma ya naga ĩnüe. Rü woo ga chorü ngü̃chigaarü ngunexü̃gü rü tama nanaxauregü rü tama nagu choxü̃ nicua̱xüü̃gü. Rü yemaca̱x ga choma rü poraãcü namaxã chanu rü nagu charüxĩnü nax wüxicana chi yexma chianexü̃gu chanadaixü̃.
14 Natürü chaugünatama chachogü nax tama chanachixexẽẽxü̃ca̱x i chauéga, rü tama chixri chauchiga yadexagüxü̃ca̱x ga yema togü ga nachixü̃anegü ga nüxü̃ daugüxü̃ nax ñuxãcü Equítuanewa íchanagaxü̃xü̃ ga yema Iraétanüxü̃.
15 Rü yéma ínachianexü̃wa rü namaxã chanaxuegu nax taxũtáma nagu chanachocuxẽẽxü̃ ga yema naane ga nüxna chaxãxü̃. Rü yema nachixü̃anearü naane rü guxü̃ma ga yema togü ga nachianexü̃ narümemae. Rü yéma rü guma lechi rü berure rü ñoma dexárüxü̃ taguma nataxu.
16 Natürü ga nümagü rü nüxü̃ naxoe ga yema chorü mugü rü tama naga naxĩnüe. Rü yexguma ngü̃chigaarü ngunexü̃güwa nanguxgu rü tama choxü̃ nicua̱xüü̃gü, yerü yema norü tupananetagüxü̃ nicua̱xüü̃gü.
17 Natürü naétüwa ga yema rü choxü̃́ naxauxãchitümüü̃gü, rü yemaca̱x tama yexma chianexü̃gu chanadai.
18 Rü yéma chianexü̃wa rü yema duü̃xü̃gü nanegümaxã nüxü̃ chixu nax tama nagu naxĩxü̃ca̱x ga yema chixexü̃ ga nacümagü ga nanatügü nagu ĩxü̃. Rü namaxã nüxü̃ chixu nax tama yema tupananetagüxü̃mare yacua̱xüü̃güxü̃ca̱x” —ñaxü̃ i chorü ore.
19 Rü ñachagürü nüxü̃: —Choma nixĩ i perü Tupana chixĩxü̃ rü ngẽmaca̱x chanaxwa̱xe nax naga pexĩnüexü̃ rü peyanguxẽẽgüxü̃ i chorü mugü.
20 Rü ngẽxguma chorü ngü̃chigaarü ngunexü̃güwa nanguxgu rü chanaxwa̱xe nax penaxaurexü̃. Rü ngẽma rü wüxi i chorü uneta nixĩ i pemaxã chaxüxü̃. Rü ngẽmaãcü tá nüxü̃ pecua̱x nax choma ya Cori rü perü Tupana chixĩxü̃ —ñachagürü.
21 —Natürü woo i ngẽma nanegü rü naxacügü rü chomaxã nanueama. Rü tama naga naxĩnüe rü tama nayanguxẽẽgü rü tama nagu namaxẽ i ngẽma chorü mugü i maxü̃ tüxna ãxü̃ ya yíxema nagu maxü̃́xẽ. Rü woo chorü ngü̃chigaarü ngunexü̃gü rü tama nanaxauregü. Rü yexguma ga choma rü chorü numaxã nagu charüxĩnü nax wüxicana chi yexma chianexü̃gu chanadaixü̃.
22 Natürü chaugünatama chachogü nax tama chanachixexẽẽxü̃ca̱x i chauéga, rü tama chixri chauchiga yadexagüxü̃ca̱x ga yema togü ga nachixü̃anegü ga nüxü̃ daugüxü̃ nax ñuxãcü Equítuanewa íchanagaxü̃xü̃ ga yema Iraétanüxü̃.
23 Rü yema ínachianexü̃wa rü namaxã chanaxuegu nax guxü̃ma i nachixü̃anegü i ñoma i naanewa ngẽxmagüxü̃gu tá chanawoonexü̃.
24 Yerü nümagü rü tama nagu namaxẽ ga yema chorü mugü rü nüxü̃ naxoe. Rü yexguma ngü̃xchigaarü ngunexü̃wa nanguxgu rü tama choxü̃ nicua̱xüü̃gü. Rü yema naxchicüna̱xãgü ga nanatügü nüxü̃ icua̱xüü̃güxü̃ama nicua̱xüü̃gü.
25 Rü düxwa chanayexrü nax nagu naxĩxü̃ca̱x ga yema tupananetagüarü mugü ga tama imexü̃ rü tama maxü̃ nüxna ãxü̃.
26 Rü choma rü chanayexrü nax norü tupananetagüca̱x tüxü̃ ínagugüxü̃ca̱x ga guxema nanegü ga rüyamaegüxe. Rü yemaacü chanayexrü nax nügünatama ngechaü̃ naxãgüxü̃ca̱x rü nüxna nacua̱xãchiexü̃ca̱x nax choma yixĩxü̃ ya Cori ya norü Tupana —ñanagürü.
27 —Rü cumax, Pa Yatüx, ¡rü namaxã idexa i ngẽma Iraétanüxü̃ rü namaxã nüxü̃ ixu i ñaa chorü ore! “Yema perü o̱xigü rü ta rü pexrüü̃tama choxü̃ nanuxẽẽgü rü tama chomaxã nixaixcümagü.
28 Rü yexguma nagu chanachocuxẽẽgu ga yema naane ga namaxã chaxueguxü̃ nax nüxna chanaxãxü̃ca̱x, rü nümagü ga perü o̱xigü rü yexguma nüxü̃ nadaugügu ga wüxi ga ma̱xpǘne rüe̱xna wüxi ga nai ga taetane rü guma ma̱xpǘnewa rü guma naixtüü̃wa norü tupananetagüca̱x nanadai rü ínanagu ga norü ãmaregü ga poraãcü naxchi chaxaixü̃. Rü yema norü ãmareétügu nanabagü ga norü bínugü rü norü tupananetagüca̱x ínanagu ga norü pumarate̱xe.
29 Rü choma rü yema duü̃xü̃güna chaca rü ñacharügü: ‘¿Ta̱xacüwa name nax nawa pexĩxü̃ i ngẽma nachicagü i nawa ngẽma duü̃xü̃gü i tama choxü̃ cua̱xgüxü̃ ngutaque̱xegüxü̃ i ma̱xpǘnegüwa? Rü ñu̱xma rü ta rü Duü̃xü̃gü i Tama Tupanaxü̃ Cua̱xgüxü̃arü Ngutaque̱xechicamaxã, nanaxugü’ ” —ñachagürü.
30 —¡Rü Iraétanüxü̃maxã nüxü̃ ixu i ñaa chorü ore i ñaxü̃! “¿Tü̱xcüü̃ nagu pexĩchaü̃ i ngẽma nacümagü i ãũãchixü̃ ga perü o̱xigü nagu ĩxü̃? ¿Rü tü̱xcüü̃ choxna pixĩgachi nax nüxü̃ picua̱xüü̃güxü̃ca̱x i ngẽma tupananetagü i ãũãchixü̃?
31 Rü pemax rü ñu̱xma rü ta ngẽma tupananetachicüna̱xãgüca̱x peyagu i perü ãmaregü rü peyagu i penegü. Rü ngẽmaãcü ngẽma naxchicüna̱xãgümaxã pegü pixãũãchiama. ¿Rü ngẽmaãcü chitama, Pa Iraétanüxü̃x, i penaxwaxexü̃ nax choxna peyacagüxü̃? Rü choma ya Cori ya Tupana rü chauégagu pemaxã nüxü̃ chixu rü tama chanaxwa̱xe nax choxna peyacagüxü̃.
32 Rü pema rü naxca̱x pedauxü̃taechaü̃ i nacüma i ngẽma togü i nachixü̃anegü i ñoma i naanewa ngẽxmagüxü̃. Nümagü rü namaxã natupanaã̱xgü rü nüxü̃ nicua̱xüü̃gü i naxchicüna̱xãgü i nainaxca̱x rü nutanaxca̱x, natürü i pema rü taxũtáma ngẽmaãcü penaxü.
33 Natürü i choma ya Cori ya Tupana rü chauégagu chanaxuegu rü chorü poramaxã rü chorü numaxã tá pexü̃ chapoxcu rü ngẽmaãcü tá pemaxã ichacua̱x.
34 Rü choma rü tá pexü̃ chade natanüwa i ngẽma duü̃xü̃gü rü nachixü̃anegü i ñu̱xma nagu pewoonexü̃. Rü chorü poramaxã rü chorü numaxã tá pexü̃ chapoxcu rü ngẽmaãcü tá pemaxã ichacua̱x.
35 20:35-36 Rü choma rü ngẽma chianexü̃ i guxü̃ma i ĩanegüarü yáxü̃wa ngẽxmaxü̃wa tá pexü̃ chagagü. Rü yema Equítuanearü chianexü̃gu perü o̱xigüxü̃ chapoxcuegurüxü̃ tá pexü̃ chapoxcue. Rü choma ya Cori ya Tupana nixĩ i nüxü̃ chixuxü̃ i ngẽma” —ñachagürü.
36 Nüü̃ nadau 20:35
37 Rü ñachagürü: —Rü ñoma wüxi i carnéruarü dauruxü̃ i norü carnéru tüxü̃ ngugüxü̃rüxü̃ tá pexü̃ changugü. Rü wüxíechigü rü tá tüxü̃ chacua̱x nax texégü tá tixĩxü̃ ya yíxema chorü duü̃xü̃gü ixĩgüxe. Rü yíxemagümaxã tá chorü uneta chaxü.
38 Rü ngẽma nachixü̃ane i ñu̱xma nawa pemaxẽxü̃wa tá pexü̃ íchagaxü̃, natürü ngẽma tama chauga ĩnüexü̃ rü tá íchananuxü̃ rü taxũtáma Iraéarü naaneca̱x nawoegu. Rü ngẽxguma i pema rü tá nüxü̃ picua̱xãchie nax choma ya Cori chixĩxü̃ i perü Tupana —ñachagürü.
39 Pa Iraétanüxü̃x, choma ya Cori ya Tupana rü ñachagürü pexü̃: —Ngẽxguma tama chauga pexĩnüechaü̃gu, ¡rü ẽcü nüxü̃ picua̱xüü̃gü i ngẽma perü naxchicüna̱xãgü i naxchi chaxaixü̃! Natürü nawa tá nangu i ngunexü̃ nax chauga tá pexĩnüexü̃. Rü ngẽxguma rü taxũtáma wena chope̱xewa chixexü̃ pexü namaxã i ngẽma ãmaregü i naxchicüna̱xãgüca̱x ípeguxü̃ nax ngẽmaãcü nüxü̃ picua̱xüü̃güxü̃ca̱x.
40 Rü guxü̃ma i Iraétanüxü̃ rü yima Iraéanewa ngẽxmane ya chorü ma̱xpǘne ya máchanenewa tá choxü̃ nicua̱xüü̃gü. Rü choma ya Cori ya Tupana nixĩ i nüxü̃ chixuxü̃ i ngẽma. Rü ngéma rü taãẽãcüma tá pexü̃ chayaxu. Rü ngéma rü tá chanaxwa̱xe nax choxna penaxãgüxü̃ i perü ãmaregü. Rü tá chanaxwa̱xe nax ngéma cha̱u̱xca̱x penanaxü̃ i ngẽma nüxíraxü̃xü̃ i penetügüarü o rü guxü̃ma i ngẽma togü i ãmaregü i choxna pexãxü̃.
41 Rü ngẽxguma pexü̃ íchagaxü̃gu nawa i ngẽma nachixü̃anegü rü yima ĩanegü i ñu̱xma nagu pewoonene, rü tá pexü̃ chayaxu ñoma ãmare i chi̱xemaxü̃rüxü̃. Rü ngẽmaãcü guxü̃ i togü i nachixü̃anecüã̱xpe̱xewa tá ichanawe̱x i chorü üüne i petanüwa tá chango̱xẽxẽxü̃.
42 Rü ngẽxguma wena tá perü naane ga perü o̱xigümaxã chaxueguxü̃wa pexü̃ chagagügu rü pema rü tá nüxü̃ picua̱xãchie nax choma ya Cori yixĩxü̃ i Iraétanüxü̃arü Tupana.
43 Rü ngéma rü tá nüxü̃ picua̱xãchie ga yema chixexü̃gü ga ãũãchixü̃ ga chope̱xewa pexüxü̃. Rü pegüwa tátama pexãũxã̱xgü nagagu ga yema chixexü̃gü ga pexügüxü̃.
44 Pa Iraétanüxü̃x, rü ngẽxguma choma chaugagutama pexü̃ charüngü̃xẽẽgu rü pexü̃́ nüxü̃ charüngümagu ga yima pecüma ga chixexü̃gü rü yema chixexü̃ ga pexügüxü̃, rü ngẽxguma i pema rü tá nüxü̃ picua̱xãchie nax choma ya Cori yixĩxü̃ i perü Tupana. Rü choma ya Cori ya Tupana ya Guxãétüwa changexmacü nixĩ i nüxü̃ chixuxü̃ i ngẽma —ñanagürü ya Tupana.
Tupana rü nanapoxcu ga yema súrwaama üxü̃ ga naane
45 Rü nüma ga Cori ya Tupana rü chomaxã nidexa rü ñanagürü:
46 —Cuma, Pa Yatüx, ¡súrguama nadawenü rü ngẽma naanemaxã nüxü̃ ixu i curü ore! ¡Rü chauégagu poxcu namaxã naxuegu i ngẽma Négueanearü naixnecü i súrwaama ngẽxmaxü̃!
47 ¡Rü namaxã nüxü̃ ixu i ñaa chorü ore i ñaxü̃! Pa Naixnecü i Súrwaama Ngẽxmaxü̃x, choma rü cuwa tá chayanaixẽxẽ ya wüxi ya üxü ya tá ínaguxü̃ne ya guxü̃nema ya curü naigü ya maxẽne rü yuene. Rü yima üxü rü tá niyaura rü taxũtáma nixo. Rü nórtewa rü ñu̱xmata súrwa tá nangu nax yaxãxü̃ i ngẽma naane.
48 Rü guxü̃ma i duü̃xü̃gü i ñoma i naanewa maxẽxü̃ rü tá nüxü̃ nadaugü nax choma ya Cori ya Tupana yixĩxü̃ i chorü poramaxã chayanaixẽxẽxü̃ i ngẽma naixnecü namaxã i ngẽma üxü i tama ixoxü̃ —ñanagürü choxü̃ ya Tupana.
49 Rü yexguma ga choma rü Tupanaxü̃ ñacharügü: —¡Pa Chorü Tupanax, ngẽma duü̃xü̃gü rü nüxü̃ nixugüe nax choma rü ore i taxúema nüxü̃ cuáxü̃maxã chidexaxü̃! —ñacharügü.
