Ezequiel 21:1-32
21 Rü nüma ga Cori ya Tupana rü chomaxã nidexa rü ñanagürü:
2 —Pa Yatüx, ¡Yerucharéü̃guama nadawenü rü naxunagü i chopataarü poxcu! ¡Rü chauégagu naxunagü i Iraéanearü poxcu!
3 ¡Rü Iraéanemaxã nüxü̃ ixu i ñaa chorü ore! “Choma rü curü uanü chaugü chixĩxẽxẽ. Rü tá chanayaxu i chorü tara rü tá chanadai i ngẽma chixexü̃arü üruü̃gü rü woo ngẽma mexü̃ ügüxü̃.
4 Rü aixcüma tá chanayaxu i chorü tara nax chanadaixü̃ca̱x i ngẽma chixexü̃ ügüxü̃ rü woo ngẽma mexü̃ ügüxü̃. Rü nórtewaama tá ichanaxügü rü ñu̱xmata súrwa nangu.
5 Rü guxü̃ma i duü̃xü̃gü i ñoma i naanewa maxẽxü̃ rü tá nüxü̃ nicua̱xãchitanü nax choma rü nachiü̃wa chayatuxuchixü̃ i chorü tara rü taxũtáma wena nachixü̃gu chayaxǘcuchixü̃.
6 Rü cumax, Pa Yatüx, ¡curü ngechaü̃maxã poraãcü naxaxu nape̱xewa i guxü̃ma i Iraétanüxü̃ nax ngẽmaãcü nüxü̃ nacua̱xgüxü̃ca̱x nax ngúxü̃ quingexü̃ i curü maxü̃newa!
7 Rü ngẽxguma cuxna nacagügu nax ta̱xacüca̱x cuxaxuxü̃, ¡rü namaxã nüxü̃ ixu nax cuxaxuxü̃ erü paxa tá ínangu i wüxi i ãũcümaxü̃chixü̃! Rü guxü̃ i duü̃xü̃gü tá naxca̱x rümaachigüxü̃ rü tá naxca̱x yanguãẽgüxü̃. Rü norü muü̃maxã tá nidu̱xruxe. Rü marü ningaicaxüchi nax ínanguxü̃ i ngẽma tá ngupetüxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
8 Rü nüma ga Cori ya Tupana rü chomaxã nidexa rü ñanagürü:
9 —Cuma, Pa Yatüx, ¡chauégagu nüxü̃ ixu i ñaa chorü ore rü duü̃xü̃gümaxã nüxü̃ ixu nax choma yixĩxü̃ i cuxü̃ chamuxü̃ nax nüxü̃ quixuxü̃ca̱x i ñaa ore i ñaxü̃: “Ngẽma chorü tara rü marü mea chanawaixmagu rü marü niyauratachinücüü!
10 Rü ngẽma chorü tara rü chanawaixmagu nax ngẽmamaxã chanadaixü̃ca̱x, rü chananaitachinüxẽxẽ nax yaba̱i̱xbexü̃ca̱x.
11 Rü marü nawaixmagu rü marü nanaitachinü rü marü ínamemare nax ngẽma máetawa̱xexü̃na ngĩxü̃ chaxãxü̃ca̱x.
12 Rü cumax, Pa Yatüx, ¡aixta naxü rü curü ngechaü̃maxã naxaxu! Erü ñaa chorü tara rü tá nanadai i guxü̃ma i chorü duü̃xü̃gü rü guxü̃ma i Iraétanüxü̃arü ãẽ̱xgacügü. ¡Rü ñu̱xma nax yu namaxã chaxueguxü̃ i chorü duü̃xü̃gü rü curü ngechaü̃maxã cugüremügu napogü!
13 Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
14 Rü ñanagürü ta: —Cumax, Pa Yatüx, ¡chauégagu nüxü̃ ixu i ngẽma tá ngupetüxü̃, rü curü péxme̱xmaxã nüxü̃́ nangúchaü̃xẽxẽ i ngẽma tara! Rü ngẽma tara rü tá poraãcü nanapi̱xẽxẽ i duü̃xü̃gü. Erü wüxi i tara i dairuxü̃ nixĩ rü guxü̃wama tá duü̃xü̃güxü̃ naxãũxunexẽxẽ.
15 Rü ngẽma tara rü tá poraãcü nanamuü̃xẽxẽ i duü̃xü̃gü. Rü tá nangẽxma i muxü̃ma i yuexü̃. Rü guxü̃nema ya ĩpatawa tá nangu i ngẽma tara i dairuxü̃. Rü ngẽma nixĩ i ngẽma tara i ya̱u̱xracüüxü̃ rü yaba̱i̱xbeanexẽẽxü̃ rü meama waixmaguxü̃ nax duü̃xü̃güxü̃ nada̱i̱xü̃ca̱x.
16 Rü cumax, Pa Tarax i Mea Waixmaguxü̃x, ¡curü tügünecüwawa ngẽxmagüxü̃ i duü̃xü̃gü rü curü to̱xwecüwawa ngẽxmagüxü̃ i duü̃xü̃gü rü nadai!
17 Rü choma ya Cori ya Tupana rü tá chanapépüne i ngẽma tara. Rü tá namáeta ñu̱xmatáta nangupetü i chorü nu. Rü choma nixĩ i nüxü̃ chixuxü̃ i ngẽma —ñanagürü choxü̃ ya Tupana.
18 Rü nüma ga Cori ya Tupana rü chomaxã nidexa rü ñanagürü:
19 —Cumax, Pa Yatüx, ¡naxüxchicüna̱xã i taxre i nama i Babiróniawa ne daxü̃ i nagu tá yaxũxü̃ i Babiróniaanearü ãẽ̱xgacü norü taramaxã! ¡Rü ngẽma íyataxrepü̱xü̃wa ngẽxma naxümatü i cua̱xruxü̃ nax ngexnerüxüne ya ĩanewa nadaxü̃ i wüxichigü i ngẽma nama!
20 ¡Rü naxüxchicüna̱xã i ngẽma nama i nagu tá yaxũxü̃ i Babiróniaanearü ãẽ̱xgacü norü taramaxã! ¡Rü naxümatü i naéga i ngẽma nama i Amóü̃tanüxü̃arü ĩane ya Rabáwaama nadaxü̃! ¡Rü ngẽxgumarüxü̃ ta naxümatü i naéga i ngẽma to i nama i Yudáanearü ĩane ya ípoxegune ya Yerucharéü̃waama nadaxü̃!
21 Rü nüma i Babiróniaanearü ãẽ̱xgacü rü marü ngẽma nama i íyataxrepü̱xü̃wa nangu rü ngéma nayachaxãchi. Rü nagu narüxĩnü nax ngexü̃rüüxü̃ i namawa tá naxũxü̃. Rü nüma rü tá nanawonagütanü ya naxnegü, rü tá norü tupananetachicüna̱xãgüarü ucu̱xẽca̱x ínaca, rü tá nanangugü i nacagü i naeü̃gü nax ngẽmaãcü nüxü̃ nacuáxü̃ca̱x nax ngexnerüxüne ya ĩaneca̱x tá íyaxü̃ãchixü̃.
22 Rü yexguma nawonagütanügu ga naxnegü rü ãẽ̱xgacüarü tügünecüwagu nangu ga guma naxne ga Yerucharéü̃gu ãégane. Rü ngẽmawa nüxü̃ nacua̱x nax Yerucharéü̃cax tá íyachoõchixü̃ namaxã ga naxnegü. Rü ngẽmaãcü tá tagaãcü daica̱x nügüca̱x nacagü, rü yima ĩanearü ĩã̱xgügu tá napogüe, rü tá waixü̃mü nügüca̱x nagünagügü nax yima ĩanegu nachocuxü̃ca̱x, rü tá nüxü̃ ínachomaeguãchi ya yima ĩane.
23 Natürü nüma i ngẽma Yerucharéü̃cüã̱xgü rü tá nagu narüxĩnüe nax wüxi i doramare yixĩxü̃ i ngẽma nüxü̃ quixuxü̃. Erü nümagü rü tá nagu nayaxõgü i ngẽma uneta ga Babiróniaanearü ãẽ̱xgacümaxã naxügüxü̃. Natürü ngẽma Yerucharéü̃cüã̱xgü rü tama nayanguxẽxẽ i ngẽma uneta rü ngẽmaca̱x i nüma i Babiróniaanearü ãẽ̱xgacü rü tá ínanayauxü̃.
24 Rü ngẽmaca̱x i choma ya Cori ya Tupana rü ñacharügü: “Chope̱xewa rü meama nango̱x i ngẽma perü chixexü̃gü rü ngẽma perü máetagü. Rü guxü̃ma ga yema pecadugü ga pexügüxü̃ rü meama nango̱x. Rü ngẽmaca̱x i perü uanügü rü tá pexü̃ ínayauxü̃.
25 Rü cumax, Pa Iraéanearü Ãẽ̱xgacüx, rü wüxi i máetaxü̃ quixĩ rü chixexü̃arü üruxü̃ quixĩ. Natürü marü nawa nangu i ngunexü̃ nax cupoxcuxü̃.
26 Rü choma ya Cori ya Tupana rü ñachagürü: ‘Curü uanügü rü tá cuxna nanayaxu i ngẽma curü tüeruxü̃ rü tá cuxna nanapu i ngẽma curü nga̱xcueruxü̃. Rü guxü̃táma naxüchicüü. Rü ngẽma ñu̱xma ãẽ̱xgacügü ixĩgüxü̃ rü tá ínawoxü̃. Rü ngẽma ñu̱xma taxúema nüxü̃ cuáxchaü̃güxü̃ rü tá nüxí natachigagü. Rü choma ya Cori ya Tupana nixĩ i nüxü̃ chixuxü̃ i ngẽma.
27 Rü choma rü tá nagu chapogü ya daa ĩane. Rü norü nutagüxica tá nügüétü nayi. Rü guxü̃ma i ngẽma rü tá ningu i ngẽxguma nua nanguxgu i Babiróniaanearü ãẽ̱xgacü. Erü choma nixĩ i chanamuxü̃ nax nagu napogüxü̃ca̱x ya daa ĩane’ ” —ñanagürü ga Tupana.
Tupana rü Amóü̃cüã̱xü̃ napoxcu
28 Rü ñanagürü ta: —Ngẽma Amóü̃cüã̱x rü chorü duü̃xü̃güchiga chixri nidexagü. Rü ngẽmaca̱x, Pa Yatüx, ¡namaxã nüxü̃ ixu i ñaa chorü ore i ñaxü̃!: “Marü ínamemare i ngẽma tara, rü marü nawaixmagu nax pexü̃ nada̱i̱xü̃ca̱x. Rü marü nanaitachinü nax yabáixacüüxü̃ca̱x.
29 Rü ngẽma norü ngo̱xetügü i ngẽma perü ẽxü̃guxü̃arü cua̱xruü̃gü rü doramare nixĩ. Rü ngẽma nüxü̃ yaxugüxü̃ i tá ngupetüxü̃ rü doramare nixĩ. Natürü ngẽma tara rü tá nanadaü̃eru i ngẽma ngo̱xetünetagüxü̃ i dorata̱xgüxü̃. Rü marü ningaica nax napoxcuexü̃.
30 Rü name nixĩ nax nachiü̃ca̱x nataeguxü̃ i ngẽma tara. Erü cumax, Pa Amóü̃x, rü cuchixü̃ane i nagu cubuxü̃wa tátama cuxna chaca nax cuxü̃ chapoxcuxü̃ca̱x.
31 Rü ngẽma chorü nu rü tá cugu chananguxẽxẽ ñoma wüxi i üxüema i ãũcümaxü̃rüxü̃. Rü ngẽma duü̃xü̃gü i taxúema ngechaü̃güxü̃ rü máxwa̱xegüxü̃me̱xẽgu tá cuxü̃ changuxẽxẽ.
32 Rü cumax, Pa Amóü̃x, rü tá quixa rü tá icuyarüxo. Rü yima cugü rü curü naanegu tá niya̱x. Rü taxúetama wena cuxna tacua̱xãchi. Rü choma ya Tupana nixĩ i nüxü̃ chixuxü̃ i ngẽma” —ñanagürü.
