Ezequiel 22:1-31
22 Rü nüma ga Cori ya Tupana rü chomaxã nidexa rü ñanagürü:
2 —Cumax, Pa Yatüx, ¡namaxã naxuegu i norü poxcu ya yima ĩane ya máxwa̱xéne ya Yerucharéü̃! ¡Rü guxü̃ma i ngẽma chixexü̃gü i ãũãchixü̃ i naxügüxü̃gagu rü ínaxuãü̃gü!
3 Rü namaxã idexa ya yima ĩane rü namaxã nüxü̃ ixu rü choma ya Cori ya Tupana rü ñachagürü: “Pa Ĩane ya Yerucharéü̃x, paxa tá cuxca̱x ínangu i curü poxcu erü cuma rü cunadai i curü duü̃xü̃gü rü nüxü̃ quicua̱xüxü̃gü i ngẽma naxchicüna̱xãgü i cumatama cuxüxü̃.
4 Rü ngẽma curü máetagügagu rü tá cupoxcu. Erü ngẽma naxchicüna̱xãgü ga cumatama cuxüxü̃gagu cugütama cuxãũãchi. Rü ngẽmaca̱x paxa tá ínangu i curü poxcu rü paxa tá cugu napogügü i curü uanügü. Rü tá chanamu i ngẽma togü i duü̃xü̃gü nax cumaxã naguxchigagüxü̃ca̱x. Rü guxü̃ma i ngẽma togü i nachixü̃anegü rü tá cuxü̃ nacugüe.
5 Rü ngẽma nachixü̃anegü i ngaixcamagüxü̃ rü yáxü̃gugüxü̃ rü tá cuxü̃ nacugüe, erü cutachiga namaxã nax naxchicüna̱xãgü quicua̱xüxü̃xü̃ rü guxü̃ma i ngẽma togü i chixexü̃ i cuxüxü̃.
6 Rü ngẽma Iraétanüxü̃arü ãẽ̱xgacügü i cuwa maxẽxü̃ rü namáxwa̱xegü rü guxü̃ma i togü i chixexü̃ naxügü.
7 Rü ngẽma duü̃xü̃gü i cuwa maxẽxü̃ rü tama nanatüxü̃ rü tama naéxü̃ nangechaü̃gü. Rü chixri tümamaxã inacua̱x ya yíxema yutegüxe rü yíxema taxcuexe rü yíxema to i nachixü̃anewa ne ĩxẽ.
8 Rü tama nüxü̃ nangechaxü̃gü ya yima chorü ngutaque̱xepataxü̃gü ya üünene. Rü tama nanaxaure i chorü ngü̃chigaarü ngunexü̃.
9 Rü cuwa nangẽxma i ñuxre i chixexü̃ i duü̃xü̃gü i ãẽ̱xgacügüpe̱xewa idorata̱xagüxü̃ rü ngẽmagagu nayue i ngẽma taxuxü̃ma i chixexü̃ ügüchiréxü̃. Rü ngẽma duü̃xü̃gü i chixexü̃gu maxẽxü̃ rü ma̱xpǘnegüwa nanaxüchiga i norü naxchicüna̱xãgü, rü ngẽmaãcü nanaxügü i taxü̃ i chixexü̃gü i ãũãchixü̃.
10 Rü nangẽxma i duü̃xü̃gü i nanatüma̱xmaxã maxẽxü̃ rüe̱xna naxma̱x ya tümaarü da̱xawexü̃ne tüxü̃́ ngẽxmaxẽmaxã maxü̃xü̃.
11 Rü nangẽxma i duü̃xü̃gü i namücüma̱xmaxã maxü̃xü̃, rüe̱xna naneã̱xmaxã maxü̃xü̃, rüe̱xna naeya̱xmaxã maxü̃xü̃.
12 Rü curü duü̃xü̃gütanüwa nangẽxma i duü̃xü̃gü i diẽruca̱x máetagüxü̃. Rü cuwa nangẽxma i duü̃xü̃gü i taxü̃ i üétüca̱x tüxna cagüxü̃ ya yíxema diẽruca̱x nüxna cagüxe. Rü ngẽmaãcü taxü̃ i chixexü̃ naxügü erü tüxü̃́ nangĩ̱x ya yíxema namücügü rü ngẽmagagu choxü̃ inarüngüma. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
13 Rü ñanagürü ta: —Pa Yerucharéü̃x, rü ngẽma nax nangĩ́xü̃ rü namáetaxü̃ i curü duü̃xü̃gü, rü poraãcü cumaxã chanu.
14 Rü ngẽxguma tá cuxü̃ chapoxcugu, Pa Yerucharéü̃x, rü taxuacütáma cho̱xme̱xwa cugü ícupoxü̃. Rü choma ya Cori ya Tupana nixĩ i nüxü̃ chixuxü̃ i ngẽma. Rü choma rü tá chayanguxẽxẽ.
15 Rü guxü̃ i nachixü̃anegügu tá chanawoone i curü duü̃xü̃gü nax ngéma nangẽxmagüxü̃ca̱x. Rü ngẽmaãcü tá meama íchanapigü i ngẽma curü pecadugü.
16 Rü cugagu rü guxü̃ma i nachixü̃anegü rü tá chixri cuchiga nidexagü. Natürü ngẽmagagu rü cumax, Pa Yerucharéü̃x, rü tá nüxü̃ quicua̱xãchi nax choma yixĩxü̃ i Iraétanüxü̃arü Tupana —ñanagürü.
17 Rü nüma ga Cori ya Tupana rü chomaxã nidexa rü ñanagürü:
18 —Ngẽma Iraétanüxü̃ rü cha̱u̱xca̱x rü taxuwama name, ñoma cóbretüchi, rüe̱xna estañutüchi, rüe̱xna fierutüchi, rüe̱xna plomutüchi, rüe̱xna diẽrumütüchi ega yapunawa nadexẽẽgurüxü̃ nax taxuwama namexü̃ i ngẽma Iraétanüxü̃.
19 Rü ngẽmaca̱x i choma ya Cori ya Tupana rü ñacharügü pexü̃: “Ñu̱xmax i pemax nax ñoma natüchigü i taxuwama mexü̃rüxü̃ pixĩgüxü̃ rü tá Yerucharéü̃arü ngãxü̃gu pexü̃ changutaque̱xexẽxẽ.
20 22:20-21 Rü ngẽma nax wüxigu wüxi ya yapunagu iwocuxü̃ nax nadexẽẽxü̃ca̱x i ngẽma diẽrumü, rü cobre, rü fieru, rü plomu, rü estáñu rü ngẽxgumarüxü̃ ta i choma rü chorü numaxã tá pexü̃ changutaque̱xexẽxẽ nax pexü̃ íchaguxü̃ca̱x. Rü ngẽmaãcü chorü numaxã tá chanangixta ya üxü rü daa ĩanearü ngãxü̃gu tá pexü̃ changutaque̱xexẽxẽ. Rü ngéma tá pexü̃ íchagu.
21 Nüü̃ nadau 22:20
22 Rü ngẽxgumarüxü̃ nax wüxi ya yapunawa nadexẽẽxü̃ i diẽrumü, rü ngẽxgumarüxü̃ ta i pemax rü ĩanearü ngãxü̃wa tá pexü̃ íchagu. Rü ngẽmaãcü tá nüxü̃ picua̱xãchitanü nax choma ya Cori ya Tupana yixĩxü̃ i chorü numaxã pexü̃ chapoxcuxü̃” —ñanagürü.
23 Rü nüma ga Cori ya Tupana rü chomaxã nidexa rü ñanagürü:
24 —¡Cumax, Pa Yatüx, ¡rü Iraéanemaxã nüxü̃ ixu i ñaa chorü ore i ñaxü̃! “Pa Iraéanex, cuma nixĩ i wüxi i naane i taguma quiwaixü̃ erü taguma cugu napu, erü choma rü cumaxã chanu.
25 Rü ngẽma curü orearü uruü̃güneta rü ñoma leóü̃gü i norü taiyamaxã aixta üexü̃ rü naeü̃gü wagüexü̃rüxü̃ nixĩgü. Rü wüxigu nügümaxã nagu narüxĩnüe nax duü̃xẽgüaxü̃́ napuxü̃güãxü̃ i tümaarü ngẽmaxü̃gü i tatanügüxü̃. Rü muxẽma ya ngexe tüxü̃ yamáxtegüxü̃.
26 Rü ngẽma curü chacherdótegü rü ínayatoxẽẽgü i ngẽma chorü ngu̱xẽẽtaegü rü nanaxãũãchigü i ngẽma chorü ngẽmaxü̃gü i üünegüxü̃. Rü naxca̱x nawüxigu i ngẽma tama mexü̃ rü ngẽma üünexü̃. Rü tama toguxexü̃ nangúexẽxẽ i ta̱xacü nixĩ i chope̱xewa mexü̃ rü ta̱xacü nixĩ i chope̱xewa ãũãchixü̃. Rü tama nanaxaure i chorü ngü̃chigarü ngunexü̃gü. Rü tama choxü̃ nicua̱xüü̃gü.
27 Rü ñaa nachixü̃anearü ãẽ̱xgacügü rü ñoma dauxchitacüã̱x i airugü i naeü̃gü wagüexü̃rüxü̃ nixĩgü. Rü guxü̃guma ínamegümare nax tümaarü diẽruca̱x duü̃xẽ tüxü̃ yama̱xgüxü̃ nax ngẽmaãcü yadiẽruã́xü̃ca̱x.
28 Rü ngẽma orearü uruxü̃netagü rü nayacu̱xgü i ngẽma ore i aixcüma ixĩxü̃ ñoma wüxi i ĩxtapü̱x i cómüxẽẽxü̃rüxü̃. Rü nümagü rü nüxü̃ nixugüe nax nango̱xetügüxü̃, rü ngẽmaãcü nanaxunagü i ngẽma tama aixcüma ixĩxü̃. Rü nüxü̃ nixugüe nax chauégagu yadexagüxü̃, natürü i ngẽma rü tama aixcüma nixĩ erü choma rü taguma namaxã chidexa.
29 Rü ngẽma duü̃xü̃gü i taarü naaneã̱xgüxü̃ rü chixexü̃gu namaxẽ rü nangĩ̱xgü. Rü tama aixcüma mea tüxü̃́ nanaxütanü ya yíxema nüxü̃́ puracüexe ya ngearü diẽruã̱xgüxe. Rü chixri tümamaxã inacua̱xgü ya yíxema to i nachixü̃anecüã̱xgü ixĩgüxe.
30 Rü choma rü ngẽma duü̃xü̃gütanügu naxca̱x chadau i wüxi i duü̃xü̃ i chope̱xewa ñaa nachixü̃aneétüwa chogüxü̃ nax tama chanapoxcuexü̃ca̱x i ngẽma duü̃xü̃gü, natürü taxuxü̃ma ichayangau.
31 Rü ngẽmaca̱x tá chanapoxcue i ngẽma duü̃xü̃gü. Rü chorü numaxã tá chanadai nax ngẽmaãcü ngẽma íyaxügüxü̃ nüxü̃ yacua̱xãchiexü̃ca̱x i ngẽma chixexü̃ i naxügüxü̃. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü ya Tupana.
