Ezequiel 24:1-27
24 Rü yexguma 9 ga taunecü ínguxgu nax toxü̃ yagagüxü̃ ga Babiróniaanearü ãẽ̱xgacü, rü norü 10 ga tauemacüarü 10 ga ngunexü̃gu rü Tupana rü chomaxã nidexa rü ñanagürü:
2 —¡Naxümatü i ñaa ngunexü̃! Erü ñaa ngunexü̃gu nixĩ i Babiróniaanearü ãẽ̱xgacü rü Yerucharéü̃ca̱x íyagoõchixü̃.
3 ¡Rü ngẽma Iraétanüxü̃ i tama chauga ĩnüechaü̃xü̃maxã nüxü̃ ixu i chorü ore i wüxi ya panerachigagu ixuxü̃! “¡Üxüwa naxü̃nagü ya wüxi ya panera, rü dexámaxã naxüãcu!
4 24:4-5 ¡Rü yayaxu i wüxi i carnéru i rümemaexü̃! ¡Rü ngẽma panerawa nawoü̃ i ngẽma namachi i rümemaexü̃ i naperemawa rü nawemüxü̃wa üxü̃! ¡Rü ngéma nawoü̃ ta ya naxchina̱xãgü ya rümemaegüne! ¡Rü nangĩxtatüxü̃, rü poraãcü yadocaxẽxẽ ñu̱xmata meama nangẽ́xẽx ya naxchina̱xãgü!” —ñanagürü.
5 Nüü̃ nadau 24:4
6 Rü nüma ya Cori ya Tupana rü ñanagürü: —¡Wüxi i taxü̃ i ngechaü̃ nixĩ i cuxca̱x, Pa Máetatanüxü̃arü Ĩanex ya Yerucharéü̃x! Erü ngẽma curü chixexü̃ rü ñoma wüxi ya panera ya ãü̃cürüxü̃ nixĩ rü tama inayi i ngẽma curü ãũãchixü̃. ¡Rü ñu̱xmax i cumax, Pa Echequiéx, rü ínacuixü̃ i wüxichigü i ngẽma namachi ñu̱xmata nangeãcu ya yima panera!
7 Rü cumax, Pa Yerucharéü̃x, rü nagümaxã cunapa. Rü ngẽma duü̃xü̃gü i cuda̱i̱xü̃ rü tama waixü̃müanegu cunaba ya yimá nagü nax ngẽmaãcü waixü̃müte̱xe iyanaxoxẽẽxü̃ca̱x. Natürü nutaétügu cunaba nax ngẽmaãcü mea nangóxü̃ca̱x ya yimá nagü.
8 Natürü i choma rü taxũtáma yimá nuta ya ba̱i̱xpütacüwa íchanapi ya yimá nagü nax ngẽmaãcü tama yanaxoxü̃ca̱x rü tama pemaxã charüngüxmüxü̃ca̱x ñu̱xmatáta pexü̃ chapoxcue.
9 24:9-10 Rü ngẽmaca̱x chanaxuegu rü wüxi i taxü̃ i ngechaü̃ tá nixĩ i cuxca̱x, Pa Yerucharéü̃x ya Máetawa̱xenex. Rü chomatátama nua chananutaque̱xe i üxü. Rü cumax, Pa Echequiéx, ¡rü wüxigu nanutaque̱xe i ngẽma üxü rü nawa nangĩxichi nax ngẽmaãcü namuxraxü̃ca̱x i ngẽma namachi rü ñu̱xmata yachextüü̃xü̃ca̱x rü yaxaexü̃ca̱x ya yima naxchina̱xãgü!
10 Nüü̃ nadau 24:9
11 Rü ngẽxguma marü nangeãcugu ya yimá panera rü üxüxétügu naxǘ ñu̱xmatáta nadau ya yimá panera ya cobrenaxca̱x. Rü ngẽmaãcü i ngẽma namata rü tá ínayi.
12 Natürü woo nax üxüétüwa yaguxü̃ rü tama ínayiéga i ngẽma namata.
13 Rü cumax, Pa Yerucharéü̃x, rü ñoma panera ya aüxǘchicürüxü̃ quixĩ. Rü choma rü nüxü̃ chadau nax poraãcü curü ngúchaü̃ cuxüxü̃. Rü ngẽma nixĩ i cuwa íchapixchaü̃xü̃ nax cumexü̃ca̱x. Natürü i cuma rü tama cunaxwa̱xe. Rü ngẽxguma chorü numaxã cuxü̃ chapoxcuguxicatama tá cume.
14 Rü ngẽma nagu charüxĩnüxü̃ rü taxũtáma chanaxüchicüxü, rü chomatátama chayanguxẽxẽ. Rü cuxü̃ tá chapoxcu nagagu ga cucüma ga nagu cumaxü̃xü̃ rü nagagu ga guxü̃ma ga yema chixexü̃ ga cuxüxü̃. Rü taxũtáma choxü̃́ cuxauxãchitümüxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma chorü ore, rü ngẽmaãcü tá chanaxü —ñanagürü ga Cori ya Tupana.
Tayu ga Echequié naxma̱x
15 Rü nüma ga Cori ya Tupana rü chomaxã nidexa rü ñanagürü choxü̃:
16 24:16-17 —Pa Yatüx, cuma rü tüxü̃ cungechaü̃xüchi ya cuxma̱x, natürü i choma rü ngürüãchimare tá tüxna chanayaxu i tümaarü maxü̃. Rü tama chanaxwa̱xe nax tümaca̱x cuxaxuxü̃ rü cungechaü̃xü̃ naxrüxü̃ i ngẽma togü i duü̃xü̃gü ega nayutanügu. Rü bexma tá ngúxü̃ quinge. Rü tama chanaxwa̱xe nax ngepatexeãcü rü ngearü chapatuãcü quixũxü̃. Rü tama chanaxwa̱xe i cunangṍxü̃ i ngẽma paũ i ngẽma togü i duü̃xü̃gü ngṍxü̃ i ngẽxguma nayutanügu —ñanagürü choxü̃ ga Tupana.
17 Nüü̃ nadau 24:16
18 Rü pa̱xmama rü namaxã chidexa ga duü̃xü̃gü, natürü yexguma nayáuanegu rü tayu ga cho̱xma̱x. Rü moxü̃ãcü rü chanaxü ga yema Tupana chomaxã nüxü̃ ixuxü̃.
19 Rü yexguma ga yema duü̃xü̃gü rü choxna nacagü rü ñanagürügü: —¿Ta̱xacüchiga nixĩ i ngẽma cuxüxü̃? ¡Rü tomaxã nüxü̃ ixu! —ñanagürügü.
20 Rü yexguma ga choma rü chanangãxü̃ rü ñacharügü: —Cori ya Tupana rü chomaxã nidexa.
21 Rü choxü̃ namu nax pemaxã nüxü̃ chixuxü̃ca̱x i norü ore i ñaxü̃: “Pa Iraétanüxü̃x, pema rü namaxã pegü picua̱xüü̃gü ya yima chopata ya taxü̃ne ya namaxã pegü íperüporaene. Natürü woo nax nüxü̃ pingechaü̃xü̃chixü̃ rü perü meruxü̃ nax yixĩxü̃ rü choma rü tá nagu chapogü. Rü ngẽma Yerucharéü̃wa yaxǘgüxü̃ ga penegü rü pexacügü rü taramaxã tá nayue.
22 Rü ngẽxguma yanguxgu i ngẽma guxchaxü̃gü rü chauxrüxü̃ taxũtáma pexauxe rü taxũtáma perü ngechaü̃maxã pegü pidüchiwe rü taxũtáma penangṍxü̃ i ngẽma paũ i ngẽma togü i duü̃xü̃gü ngṍxü̃ i ngẽxguma nayutanügu.
23 Rü taxũtáma ngepatexeãcü rü ngearü chapatuãcü ipexĩ. Rü taxũtáma pengechaxü̃gü rü tümaca̱x pexauxe. Rü ngẽma perü pecadugügagu rü tá pengearü poraã̱x. Rü pegümaxãxicatama tá pexauxe.
24 Rü Echequié tá nixĩ ya perü cua̱xruxü̃ ixĩcü. Rü guxü̃ma ga yema nüma naxüxü̃ rü pema rü tá ta penaxü. Rü ngẽxguma yanguxgu i ngẽma guxchaxü̃gü rü pema rü tá ngẽmawa nüxü̃ picua̱xãchitanü nax choma yixĩxü̃ i Iraétanüxü̃arü Cori ya Tupana chixĩxü̃.
25 Rü ñu̱xma, Pa Echequiéx, rü choma rü tá Iraétanüxü̃na chanayaxu ya chopata ya taxü̃ne ya namaxã nügü ínapoxü̃güne. Rü ñu̱xma rü norü meruxü̃ nixĩ rü namaxã nataãẽgü rü nüxü̃ nangechaxü̃gü, rü poraãcü nüxü̃́ nangúchaü̃ nax nüxü̃ nadaunüechaxü̃. Natürü i choma rü tá nagu chapogü ya yima chopata rü tá Yerucharéü̃na chanade i nanegü rü naxacügü.
26 Rü ngẽma ngunexü̃ i nagu yanguxgu i ngẽma poxcu rü wüxi i duü̃xü̃ i íñaxü̃ tá nixĩ i cumaxã nüxü̃ yarüxuxü̃ i ngẽma ngupetüxü̃.
27 Rü cumax, Pa Echequiéx, rü ngẽma ngunexü̃gu rü tá namaxã quidexa i ngẽma duü̃xü̃ i cumaxã nüxü̃ ixuxü̃ i ngẽma ngupetüxü̃. Rü cumatátama nixĩ i cua̱xruxü̃ quixĩxü̃ naxca̱x i ngẽma duü̃xü̃gü. Rü ngẽmaãcü tá nüxü̃ nicua̱xãchitanü nax choma yixĩxü̃ i Iraétanüxü̃arü Cori ya Tupana” —ñanagürü choxü̃ ga Tupana.
