Ezequiel 25:1-17
25 Rü nüma ga Cori ya Tupana rü chomaxã nidexa rü ñanagürü:
2 25:2-3 —Pa Yatüx, ¡Amóü̃tanüxü̃guama nadawenü rü chauégagu namaxã nüxü̃ ixu i norü poxcuchiga! ¡Rü namaxã nüxü̃ ixu nax nüxü̃ naxĩnüexü̃ i ñaa ore i choma ya Cori ya Tupana namaxã nüxü̃ chixuxü̃! Rü ñachagürü: “Pema rü taãẽãcüma aixta pexüe ga yexguma nagu napogüegu ga chopata rü guxchawa nayexmagu ga Iraéane. Rü pema rü nüxü̃ pecugüeama ga Yudátanüxü̃ ga yexguma ínayauxü̃güãgu nax to ga nachicawa nagagüãxü̃ca̱x.
3 Nüü̃ nadau 25:2
4 Rü yemagagu rü choma rü tá éstewaama ngẽxmagüxü̃ i nachixü̃anegüme̱xẽwa pexü̃ changexmagüxẽxẽ, nax nümagü noxrüxü̃ nayauxgüãxü̃ca̱x i perü naane. Rü nümagü rü tá pechixü̃anewa naxĩ rü ngẽxma tá naxüpatagü rü ngéma tá namaxẽ. Rü guxü̃ma i penetügü i peanewa ngẽxmagüxü̃ rü tá namaxã naxãwemügü. Rü tá nayaxaxgü i perü lechi.
5 Rü yima perü ĩane ya Rabá rü tá maxẽnecüxü̃ chayaxĩxẽxẽ nax caméyugü nawa chibüexü̃ca̱x. Rü choma rü tá carnérugüarü pegüchicaxü̃ chayaxĩxẽxẽ i ngẽma pechixü̃ane, Pa Amóü̃tanüxü̃. Rü ngẽmaãcü tá nüxü̃ picua̱xãchitanü nax choma yixĩxü̃ i Iraétanüxü̃arü Cori ya Tupana”.
6 Rü choma ya Cori ya Tupana rü pemaxã nüxü̃ chixu rü ñachagürü pexü̃: “Pema, Pa Amóü̃tanüxü̃x, rü yexguma guxchawa nayexmagügu ga Iraétanüxü̃ rü pema rü perü taãẽmaxã pepéxme̱xgü rü piyuxnetanücüü rü yemaacü nüxü̃ pecugüe ga yema Iraétanüxü̃.
7 Rü ngẽmagagu rü tá pexü̃ chapoxcue. Rü choma rü ngẽma togü i nachixü̃anegüna tá pexü̃ chamugü nax pexna napuxü̃ãxü̃ca̱x i guxü̃ma i perü ngẽmaxü̃gü. Rü tá pexü̃ ichayarüxoxẽxẽ natanüwa i ngẽma togü i nachixü̃anegü. Rü ngẽmaãcü tá nüxü̃ picua̱xãchitanü nax choma yixĩxü̃ i Iraétanüxü̃arü Cori ya Tupana” —ñanagürü.
Ore i Moátanüxü̃güarü poxcuchiga ixĩxü̃
8 Rü choma ya Cori ya Tupana rü ñacharügü: —Pemax i Moátanüxü̃ rü Cheícüã̱xgü rü nagu perüxĩnüegu nax ngẽma Yudátanüxü̃ rü chope̱xewa rü guxü̃ma i ngẽma togü i nachixü̃anegüarü duü̃xü̃gürüxü̃ nixĩgü.
9 25:9-10 Rü ngẽmagagu i choma rü tá norü uanügüna chanaxã i Moáarü naane. Rü tá nüxna nanapuxü̃gü ya yima ĩanegü ya Bex-yechimóx, rü Baá-meóü̃ rü Quiriataíü̃ ya namaxã nügü ínatagüne. Rü ngẽma éstewaama ngẽxmagüxü̃ i nachixü̃anegüme̱xẽwa tá chanangexmaxẽxẽ i ngẽma Moátanüxü̃arü naane yema Amóü̃tanüxü̃arü naanerüxü̃. Rü natanüwa i ngẽma togü i nachixü̃anegü rü taxuxü̃táma nüxna nacua̱xãchixe i ngẽma Amóü̃tanüxü̃.
10 Nüü̃ nadau 25:9
11 Rü ngẽxgumarüxü̃ tá ta chanapoxcue i ngẽma Moátanüxü̃. Rü ngẽxguma rü tá nüxü̃ nicua̱xãchitanü nax choma yixĩxü̃ i Iraétanüxü̃arü Cori ya Tupana —ñanagürü.
Ore i Edóü̃tanüxü̃güarü poxcuchiga ixĩxü̃
12 Rü choma ya Iraétanüxü̃arü Cori ya Tupana rü ñacharügü: —Ngẽma Edóü̃tanüxü̃ rü tama nüxü̃́ taxãũxãchitümüü̃güãcü tüxü̃ nadai ga Yudátanüxü̃. Rü ngẽmaãcü yexeraãcü chixexü̃ naxügü.
13 Rü ngẽmaca̱x i choma ya Cori ya Tupana rü ñachagürü: Choma rü tá chanapoxcue i ngẽma Edóü̃tanüxü̃ rü tá chanadai i norü yatügü rü naxü̃nagü. Rü tá nagu chapogü i norü ĩanegü. Rü ĩane ya Temáü̃wa tá inaxügü rü ñu̱xmatáta ĩane ya Dedáü̃gu yacuá nax taramaxã nayuexü̃ i norü duü̃xü̃gü
14 Rü ngẽmaãcü i choma rü tá chaxütanü. Rü tá chanamu i chorü duü̃xü̃gü i Iraétanüxü̃ nax nadaiaxü̃ca̱x i ngẽma Edóü̃tanüxü̃. Rü ngẽma chorü duü̃xü̃gü i Iraétanüxü̃wa tá chayanguxẽxẽ i ngẽma chorü nu. Rü ngẽma chanaxwaxexü̃ãcü tá namaxã nanaxügü. Rü ngẽmaãcü i ngẽma Edóü̃tanüxü̃ rü tá nüxü̃ nacua̱xgü nax choma yixĩxü̃ nax chaxütanüxü̃. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
Ore i Firitéugüarü poxcuchiga ixĩxü̃
15 Rü choma ya Cori ya Tupana rü ñacharügü: —Ngẽma Firitéugü rü mucüma ga taunecü chorü duü̃xü̃gü ya Yudátanüxü̃maxã narüxuanügü. Rü poraãcü chixeacü yema Yudátanüxü̃xü̃ nadai nax yanaxoxẽẽgüãxü̃ca̱x.
16 Rü ngẽmagagu i choma ya Cori ya Tupana rü tá chanapoxcue i ngẽma Firitéugü. Rü tá chanadaixichi i ngẽma Queretéugü. Rü ngẽma íyaxügüxü̃ i márpechinüwa ngẽxmagüxü̃ rü tá chayanaxoxẽxẽ.
17 Rü ngẽmaãcü i choma rü tá poraãcü chaxütanü naxca̱x i chorü duü̃xü̃gü i Yudátanüxü̃. Rü chorü numaxã tá chanapoxcue i ngẽma Firitéugü. Rü ngẽxguma yanguxgu i ngẽma poxcu, rü tá nüxü̃ nicua̱xãchitanü nax choma yixĩxü̃ i Iraétanüxü̃arü Cori ya Tupana —ñanagürü.
