Ezequiel 26:1-21
26 26:1-2 Rü yexguma 11 ga taunecü ínguxgu nax toxü̃ yagagüxü̃ ga Babiróniaanearü ãẽ̱xgacü, rü gumá nüxíraü̃cü ga tauemacüarü nüxíraxü̃ ga ngunexü̃gu rü Tupana rü chomaxã nidexa rü ñanagürü choxü̃: —Pa Yatüx, ngẽma Tírucüã̱xgü rü Yerucharéü̃cüã̱xgüxü̃ nacugüe rü ñanagürügü: “Yima ĩane ya taxü̃ne ya Yerucharéü̃ ya guxü̃ma nawa taxegüne rü guxchawa nangẽxma. Rü ngẽmaca̱x i ñu̱xmax i yixema rü tá yoxniẽgü nax idiẽruã̱xgüxü̃!” ñanagürügü.
2 Nüü̃ nadau 26:1
3 Rü ngẽmaca̱x i choma ya Iraétanüxü̃arü Cori ya Tupana rü ñacharügü: “Pa Ĩane ya Tírux, choma rü tá cumaxã charüxuanü. Rü muxü̃tama i nachixü̃anegü rü tá cumaxã narüxuanügü. Rü ñoma már arü yuapegürüxü̃ tá cuxca̱x ínayaxüãchi.
4 Rü ngẽma nachixü̃anegü rü tá nayawa̱xẽxẽgü i ngẽma curü poxeguxü̃tápü̱xgü. Rü ngẽxgumarüxü̃ tá ta nayawa̱xgüxẽxẽ i ngẽma curü dauxü̃taechicagü i poxü̃ruü̃gü. Rü yima curü ĩane rü tá nabáianemare rü nutaxica tá ínayaxü.
5 26:5-6 Rü curü ĩane ya márgu iyanacuixü̃wa rü tá nabáianemare rü ngẽxma tá norü püchagü nipagü. Rü choma ya Cori ya Tupana nixĩ i nüxü̃ chixuxü̃ i ngẽma. Rü cumax, Pa Tírux, rü ngẽma togü i nachixü̃anegü rü tá cuxna nanapuxü̃ i curü ngẽmaxü̃gü. Rü curü ĩanexacügüwa ngẽxmagüxü̃ i duü̃xü̃gü rü taramaxã tá nanadai. Rü ngẽxguma i curü duü̃xü̃gü rü tá nüxü̃ nicua̱xãchitanü nax choma yixĩxü̃ i Iraétanüxü̃arü ãẽ̱xgacü.
6 Nüü̃ nadau 26:5
7 Rü choma ya Cori ya Tupana rü nórtewaama tá cuxca̱x íchanaxũxẽxẽ ya Babiróniaanearü ãẽ̱xgacü i Nabucudonochó i guxü̃ i ãẽ̱xgacügüxü̃ rüporamaexü̃. Rü nüma rü tá cuxca̱x ínayagoõchi, Pa Tírux, namaxã i muxü̃ma i norü churaragü i cowarugu ĩxü̃ rü carugu ĩxü̃ rü nacutügu ĩxü̃.
8 Rü ngẽma duü̃xü̃gü i curü ĩanexacügüwa ngẽxmagüxü̃ rü tá taramaxã nanadai. Rü curü guxü̃cüwawa tá nanachixẽxẽgü i norü poxü̃ruü̃gü. Rü tá curü poxeguxü̃tápü̱xwa nanagünagü i waixü̃mü nax ngẽmawa cugu nachocuxü̃ca̱x i norü churaragü i poxü̃ruxü̃ã́xü̃.
9 Rü naxnegümaxã tá cuxca̱x ínayaxüãchi nax yawa̱xẽẽgüãxü̃ca̱x i curü poxeguxü̃tápü̱xgü rü curü dauxü̃taechicagü i curü poxü̃ruxü̃gü ixĩgüxü̃.
10 Rü ngẽxguma Babiróniaanearü ãẽ̱xgacü curü ĩã̱xwa yaxücuxgu nax cuxü̃ yapuxü̃ca̱x, rü ngẽma norü muxü̃ i cowarugü rü tá poraãcüma nanacaixanexẽxẽgü rü ngẽma waixü̃müte̱xe tá guxü̃wama cuétü nangu. Rü ngẽma nax natagatanüxü̃ i norü cowarugü rü carugü rü curü poxeguxü̃tápü̱xgü rü tá niyoyo.
11 Rü ngẽma norü cowarugü rü norü tüpatüruü̃maxã tá guxü̃ma i curü namagü napúma. Rü ngẽma norü churaragü rü taramaxã tá nanadai i curü duü̃xü̃gü. Rü yima nutagü ya itacü i curü ĩpatagüarü caxtagü ixĩgücü rü tá nayawa̱xgüxẽxẽ.
12 Rü ngẽma norü churaragü rü tá nanadegü rü naxca̱x nangĩ̱xgü i curü ngẽmaxü̃gü i namaxã cutaxexü̃. Rü tá nayawa̱xgüxẽxẽ i ngẽma curü poxeguxü̃tápü̱xgü. Rü ngẽxgumarüxü̃ tá ta nayawa̱xgüxẽxẽ ya yima cupatagü ya imexẽchine. Rü ngẽmawena rü tá márwa nanawoü̃gü ya yima nutagü rü norü omütagü rü woo ngẽma natüchigü.
13 Rü ngẽmaãcü tá nixĩ i chayanaxoxẽxẽxü̃ i curü wiyaegü i namaxã cutaãxẽ, rü tagutáma nüxü̃ taxĩnüe i naga i curü árpagü.
14 Pa Ĩane ya Tírux, ngẽma cuchica rü tá chianexü̃xü̃ chayaxĩxẽxẽ rü wüxi ya nuta ya püchagü nagu ipagüxü̃ruxü̃ tá chayaxĩxẽxẽ. Rü taxúetama wena tanaxü. Rü choma ya Iraétanüxü̃arü Cori ya Tupana nixĩ i nüxü̃ chixuxü̃ i ngẽma” —ñanagürü.
15 Pa Tírux, choma ya Cori ya Tupana rü ñacharügü cuxü̃: —Ngẽxguma ngẽma togü i nachixü̃anegü i márpechinüwa ngẽxmagüxü̃ nüxü̃ cuáchigagügu nax guxchawa cungexmaxü̃ rü nadaiaxü̃ i curü duü̃xü̃gü rü ngúxü̃ yangegüxü̃ i ngẽma yapiexü̃, rü nümagü i ngẽma nachixü̃anegü rü tá muü̃maxã nidu̱xruxe.
16 Rü guxü̃ma i norü ãẽ̱xgacügü i ngẽma nachixü̃anegü i már arü ngaicamawa ngẽxmagüxü̃, rü ngẽxguma tá nüxü̃ naxĩnüegu i ngẽma pexü̃ ngupetüxü̃, rü tá inachigü i norü tochicaxü̃wa rü tá ínacuxü̃ i norü ãẽ̱xgacüchirugü rü muü̃maxã tá waixü̃müwa narütogü. Rü poraãcü tá namuü̃e, rü taxũtáma ínayachaxãchi nax yadu̱xruxexü̃.
17 Rü ngẽxguma rü tá ñaa yuetaarü wiyaegu cuchiga nawiyaegü: “Pa Ĩane ya Tírux, cuma rü curü duü̃xü̃gümaxã wüxi ya ĩane ya poraxüchichiréne quixĩ. Rü guxü̃ma i ñaa naanewa rü cuxü̃ nacua̱xgü rü curü duü̃xü̃gümaxã cunamuü̃xẽxẽ i nachixü̃anegü. ¿Natürü i ñu̱xmax rü ta̱xacü cuxü̃ nangupetü nax ñaa márcutüwa cutauxchicaxü̃?
18 Rü ñu̱xma nax marü icuyarüxoxü̃ rü ngẽma togü i nachixü̃anegü i már arü ngaicamawa ngẽxmagüxü̃ rü nidu̱xruxe. Rü ngẽma nax marü cutauxchicaxü̃ rü ngẽma capaxũgü i márwa ngẽxmagüxü̃ rü muü̃maxã nanapagü”.
19 Rü choma ya Cori ya Tupana rü ñachagürü cuxü̃: “Pa Ĩane ya Tírux, choma rü ñoma wüxi ya ĩane ya nagu pogüne tá cuxü̃ chixĩxẽxẽ. Rü ñoma ĩanegü ya taxúema nawa maxẽnerüxü̃ tá quixĩ. Rü choma rü tá már arü dexágu cuxü̃ changuxẽxẽ.
20 Rü ngẽma waixü̃mütüü̃wa tá cuxü̃ chamu, ngẽma nüxíra yuexü̃ íngẽxmagüxü̃wa. Rü waixü̃müarü aixepewaxüchi tá cuxü̃ changexmaxẽxẽ. Rü ngẽma rütauxexüchixü̃ nawa ngẽxmagüxü̃wa tá cuxü̃ changexmaxẽxẽ. Rü tagutáma wena cuwa namaxẽ i duü̃xü̃gü, rü tagutáma texé wena cuxü̃ ítarüdaxẽxẽ i ñoma i naanewa.
21 Rü choma rü wüxi i nachica i ãũcümaxü̃xü̃ tá cuxü̃ chixĩxẽxẽ rü ngẽmaãcü tá icuyarüxo. Rü tá cuxca̱x nadaugü i duü̃xü̃gü natürü tagutáma cuxü̃ nayangaugü. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
