Ezequiel 27:1-36
27 27:1-3 Nüma ga Cori ya Tupana rü chomaxã nidexa rü ñanagürü: —Pa Yatüx, ¡nagu nawiyae i ñaa yuetaarü wiyae ya ĩane ya Tírugu ixuxü̃ i ñaxü̃! “Cuma, Pa Ĩane ya Tírux, rü cugügu curüxĩnügu rü cumexẽchi rü taxuwama cuchixe. Rü cuma rü márcutüwa cungexma nax muxü̃ma i márcutüwa ngẽxmagüxü̃ i nachixü̃anegüxü̃ namaxã cutaxexü̃ca̱x i curü ngẽmaxü̃gü.
2 Nüü̃ nadau 27:1
3 Nüü̃ nadau 27:1
4 Cuma rü namaxã icucua̱x i ngẽma már. Rü cuma rü ñoma wüxi ya wapuru ya mexẽchine rü mea üxü̃nerüxü̃ quixĩ.
5 Rü ngẽma curü mürapewagü rü pinu i ma̱xpǘne ya Cheníwaü̃güxü̃ nixĩ. Rü ngẽma cuxü̃ ixũxẽẽxü̃ i naxchirupaweru rü Líbanucüã̱x ya ocayiwanaxca̱x nixĩ.
6 Rü yima cuxẽ̱xmügü rü Bacháü̃wáü̃güxü̃ ga roblenaxca̱x nixĩgü. Rü ngẽma mürapewagü i namaxã cutüétüxü̃ rü Chíprewaü̃güxü̃ i nainaxca̱x nixĩ. Rü guxü̃ma i ngẽma rü marfíxmaxã nanga̱xãẽgü.
7 Rü ngẽma cuxü̃ ixũxẽẽxü̃ i línutachinü i meama nga̱xãẽxü̃ rü Equítuwaü̃xü̃ nixĩ. Rü ngẽma línutachinü rü curü wonera nixĩ. Rü ngẽma curü tüétüruxü̃ rü naxchiru i daucharaxü̃ rü wẽxracharaxü̃ i Ericháarü capaxũwa ne naxü̃ nixĩ.
8 Rü ngẽma curü ãruü̃gü rü Chidóü̃cüã̱x rü Arbáxcüã̱x nixĩgü. Rü ngẽma curü tope̱xeruü̃gü rü curü duü̃xü̃gü i tope̱xexü̃ icua̱xüchixü̃ nixĩgü.
9 Rü yexguma cuchixexgu rü duü̃xü̃gü ga Guebácüã̱x ga nüxü̃ icua̱xüchixü̃ nixĩ ga cuxü̃ mexẽẽgüxü̃. Rü yema curü türewa rü namaxã nayapa ga wapuruarü ũxẽẽruü̃gü ga guxü̃ ga naanewa ne ĩxü̃ rü naxca̱x taxegüxü̃ ga curü yemaxü̃gü.
10 Rü yema curü churaragü rü Pérchiaanecüã̱x rü Lídiaanecüã̱x rü Líbiaanecüã̱x nixĩgü. Rü nümagü rü norü poxü̃ruxü̃gümaxã rü napate̱xegümaxã cuxü̃ nanga̱xãẽgü, rü yemaacü ga cuma rü cumexẽchi.
11 Rü yema churaragü ga Arbáxcüã̱x rü curü churaragümaxã nüxna nadaugü ga curü poxeguxü̃tápü̱xgü. Rü yema churaragü ga Gamáxcüã̱x rü nüxna nadaugü ga curü dauxü̃taechicagü. Rü curü poxeguxü̃tapü̱xgüarü guxü̃cüwagu nanachogü ga norü poxü̃ruü̃gü. Rü yemaacü yexera cuxü̃ namexẽchixẽẽgü.
12 Rü cumax, Pa Ĩane ya Tírux, rü namuxũchi ga curü yemaxü̃gü. Rü yemaca̱x muxü̃ma ga duü̃xü̃gü ga Tárchixwa ne ĩxü̃ rü cuxü̃tawa naxĩ nax naxca̱x yataxegüxü̃ca̱x ga curü yemaxü̃gü. Rü yema curü yemaxü̃gü rü cuxü̃́ nanaxütanügü namaxã ga diẽru rü fieru rü estáñu rü plomu.
13 Rü yexgumarüxü̃ ta ga yema taxetanüxü̃ ga Gréchiawa rü Tubáxwa rü Méchewa ne ĩxü̃ rü cuxü̃tawa naxca̱x nayataxegü ga curü yemaxü̃gü. Rü nümagü rü duü̃xẽgü ga mugüruü̃maxã rü yemaxü̃gü ga bróũchenaxca̱xmaxã cuxü̃́ nanaxütanügü.
14 Rü yexgumarüxü̃ ta ga yema duü̃xü̃gü ga Bex-togamácüã̱xgü, rü cowarugü ga puracüruü̃maxã rü cowarugü ga nagu ixũxü̃maxã rü mulagümaxã cuxü̃́ nanaxütanügü ga curü yemaxü̃gü.
15 Rü yexgumarüxü̃ ta ga yema taxetanüxü̃ ga capaxũ ga Ródaxwa ne ĩxü̃ rü cuxü̃tawa nayataxegü. Rü muxü̃ma ga nachixü̃anegü ga márpechinüwa yexmagüxü̃ rü cuxü̃tawa nayataxegü. Rü nümagü rü marfíxmaxã rü mürapewagü ga ébanunaxca̱xmaxã cuxü̃́ nanaxütanügü ga curü yemaxü̃gü.
16 Rü yema Edóü̃cüã̱xgü rü cuxü̃tawa nayataxegü yerü namuxũchi ga curü yemaxü̃gü. Rü nümagü rü ngã̱xãẽruü̃gü ga granatemaxã rü naxchirugü ga idauxracharaü̃ ga ãmatüxü̃maxã rü naxpü ga línuchinaxca̱xmaxã rü ngã̱xãẽruü̃gü ga corálmaxã rü rubímaxã cuxü̃́ nanaxütanügü ga curü yemaxü̃gü.
17 Rü yexgumarüxü̃ ta ga Yudáanecüã̱xgü rü Iraéanecüã̱gü rü cuxü̃tawa nayataxegü. Rü Miníxcüã̱x ga trigumaxã, rü paũ i maixcuraxü̃maxã, rü iramaxã, rü chíxü̃maxã rü pumara ga bálsamumaxã cuxü̃́ nanaxütanügü ga curü yemaxü̃gü.
18 Rü yema Damácucüã̱xgü rü cuxü̃tawa naxca̱x nayataxegü ga muxü̃ma ga curü yemaxü̃gü ga itatanüxü̃. Rü nümagü rü Ebóü̃cüã̱x ga bínumaxã rü Chaáxcüã̱x ga carnéruta̱xamaxã cuxü̃́ nanaxütanügü.
19 Rü yema Dáü̃tanüxü̃ rü Griégugü rü Ucháxwa cuxca̱x ne nanana ga fieru ga ipomüxü̃, rü canela, rü dexne ga iyixixü̃. Rü yemamaxã cuxü̃́ nanaxütanügü ga curü yemaxü̃gü.
20 Rü yema Dedáü̃tanüxü̃ rü cuxü̃ namaxã nataxegü ga naxma̱xwe̱xegü ga cowaruétügu üxü̃.
21 Rü yema Arábiaanecüã̱x rü guxü̃ma ga Quedáxtanüxü̃arü ãẽ̱xgacügü rü cuxü̃tawa nayataxegü. Rü carnéruxacügümaxã rü carnérugümaxã rü chíbugümaxã cuxü̃́ nanaxütanügü.
22 Rü yema taxetanüxü̃ ga Chabácüã̱xgü rü Raamácüã̱xgü rü cuxü̃tawa nayataxegü. Rü pumaragü ga iyixichixü̃maxã rü úirugümaxã rü nutaxacügü ga ngã̱xãẽruü̃gümaxã cuxü̃́ nanaxütanügü.
23 Rü yema duü̃xü̃gü ga cuxü̃tawa yataxegüxü̃ rü Aráü̃cüã̱x rü Canécüã̱xgü rü Edéü̃cüã̱xgü nixĩgü. Rü Chabáanewa rü Achíriaanewa rü Médiaanewa ne naxĩ ga taxetanüxü̃ nax cuxü̃tawa yataxegüxü̃ca̱x.
24 Rü nümagü rü cuxü̃ namaxã nataxegü ga naxchirugü ga imexẽchixü̃, rü gáuxü̃chirugü ga daucharaxü̃ ga naxümatügüxü̃. Rü cuxü̃ namaxã nataxegü ga ĩpatachiãarü ngã̱xãẽruü̃gü ga nagu ümatügüraü̃xü̃ rü napana̱xãgü ga munütagüxü̃.
25 Rü guma Tárchixarü wapurugü rü nügüwe naxãgü nax ínangugüxü̃. Rü cuxü̃tawa nanana ga curü yemaxü̃gü. Rü cumax, Pa Ĩane ya Tírux, rü ñoma wüxi ga wapuru ga yemaxü̃gümaxã ããcune ga márgu iñaxü̃nerüxü̃ quixĩ.
26 Rü yema cuxü̃ ixũxẽẽgüxü̃ rü már arü ngãxü̃tüwa cumaxã naxãgü. Natürü gumá taxüchicü ga buanecü ga éstewaama ne ũcü rü yexma cugu napogü.
27 Rü ngẽxma mártamagu tá nayi i ngẽma curü ngẽmaxü̃gü. Rü ngẽma ngunexü̃gu rü guxü̃ma i curü yemaxü̃gü rü curü wapuruarü duü̃xü̃gü rü curü ũxẽẽruü̃gü, rü curü waxmachate̱xeruü̃gü, rü ngẽma curü taxetanüxü̃, rü curü churaragü, rü guxü̃ma i ngẽma duü̃xü̃gü i cuwa puracüexü̃ rü ngẽxma mártamagu tá nayi.
28 ‘Rü ngẽxguma curü duü̃xü̃gü aixta üegu, rü ngẽma duü̃xü̃gü i márpechinüwa ngẽxmagüxü̃ rü muü̃maxã tá nidu̱xruxe.
29 Rü yimá naigü ya wapurugüarü ãgütanüxü̃ rü tá nüxna ínachoü̃ i norü wapurugü. Rü yima wapurugüarü puracütanüxü̃ rü guxü̃ma i norü tope̱xeruü̃gü rü dauxchitagu tá nüxna ínachoü̃.
30 Rü nümagü rü tá tagaãcü norü ngechaü̃maxã cuxca̱x naxauxe rü waixü̃müte̱xemaxã tá nügü nagüerugü. Rü tanimacate̱xegu tá nidixgü.
31 Rü norü ngechaü̃maxã tá nügü nidüpü̱xüerugü. Rü tá ngechaü̃chirugu nicu̱xgü. Rü norü ngechaü̃maxã tá poraãcü cuxca̱x naxauxe.
32 Rü yuetaarü wiyaegu tá cuxca̱x nawiyaegü rü ngechaxü̃ãcüma ñanagürügü tá: ¿Ta̱xacü rü ĩane namaxã nawüxigu ya yima ĩane ya Tíru ga márcutüwa yexmane?
33 Rü yexguma cuxü̃tawa taxewa naxĩxgu ga yema togü ga nachixü̃anegü rü cuxü̃tawa nayexma ga guxü̃ma ga nanaxwa̱xegüxü̃. Rü yema muxũchixü̃ ga curü yemaxü̃gümaxã poraãcü cuyadiẽruã̱xẽxẽ ga guxü̃ma ga nachixü̃anegüarü ãẽ̱xgacügü.
34 Natürü i ñu̱xmax rü ngẽma már arü yuape rü cugu napogü rü marü mártamagu cungu namaxã i guxü̃ma i curü duü̃xü̃gü rü curü ngẽmaxü̃gü.
35 Rü ngẽma cuxü̃ ngupetüxü̃gagu rü ngẽma nachixü̃anegü i márpechinüwa ngẽxmagüxü̃arü duü̃xü̃gü rü poraãcü namuü̃e. Rü ngẽma norü ãẽ̱xgacügü rü muü̃maxã nidu̱xruxe. Rü nachametüwa nango̱x nax poraãcü namuü̃exü̃.
36 Rü ngẽma togü i nachixü̃anecüã̱xgü i taxetanüxü̃ rü ngẽxguma cuxü̃ nadaugügu rü poraãcü naba̱i̱xãchie. Rü marü nawa nangu nax cuyarüxoxü̃. Rü tagutáma wena cungo̱x’ ” —ñanagürü.
