Ezequiel 28:1-26
28 Nüma ya Cori ya Tupana rü chomaxã nidexa rü ñanagürü choxü̃:
2 —Cumax, Pa Yatüx, ¡Yima Tíruarü ãẽ̱xgacümaxã nüxü̃ ixu i ñaa ore! Cori ya Tupana rü ñanagürü cuxü̃: “Cumax, Pa Tírucüã̱xgüarü Ãẽ̱xgacüx, cugü quicua̱xüxü̃ rü cugügu curüxĩnügu rü wüxi i tupana quixĩ rü Tupanaarü toruü̃wa curüto. Rü cuxca̱x rü taxucürüwa curü uanügü cuxü̃ narüporamae erü márcutüwa cungexma. Natürü i cumax rü tama wüxi i tupana quixĩ. Rü wüxi i duü̃xü̃mare quixĩ woo nagu curüxĩnügu nax wüxi i tupanaarü cua̱x cuxü̃́ ngẽxmaxü̃.
3 ¿Rü cumax, Pa Tíruarü Ãẽ̱xgacüx, nagu curüxĩnügu rü Tupanaarü orearü uruxü̃ i Daniéarü yexera nüxü̃ curücua̱xmae? ¿Ẽ̱xna nagu curüxĩnügu rü nataxuma i ta̱xacü i cuxca̱x ẽxü̃guxü̃?
4 Rü cuma rü ngẽma curü cua̱xmaxã rü curü puracümaxã cuxü̃́ natauxcha nax cunanutaque̱xexü̃ i muxü̃ma i curü ngẽmaxü̃gü. Rü ngẽmaãcü úirumaxã rü diẽrumaxã cunapagüxẽxẽ i curü diẽruchixü̃gü.
5 Rü ngẽma nüxü̃ nax cucuáxü̃ nax ñuxãcü cutaxexü̃ rü ngẽmagagu nimu i curü ngẽmaxü̃gü. Rü ñu̱xma rü ngẽma curü ngẽmaxü̃gümaxã cugü quicua̱xüxü̃.
6 28:6-7 Rü ngẽmaca̱x i choma ya Cori ya Tupana nax chixĩxü̃ rü ñachagürü cuxü̃: ‘Ñu̱xma nax cugügu curüxĩnüxü̃ rü wüxi i tupanaarü cua̱x nax cuxü̃́ ngẽxmaxü̃, rü ngẽmaca̱x to i nachixü̃anecüã̱x i duü̃xü̃gü i máxwa̱xegüxü̃ tá cuxca̱x nua chamugü. Rü norü taramaxã tá cuxca̱x ínayaxüãchi. Rü tá inayanaxoxẽxẽ nax cumexẽchixü̃ rü nüxü̃ cucuáxü̃. Rü ngẽmaãcü tá nagu̱x nax cumexü̃.
7 Nüü̃ nadau 28:6
8 Rü tá cuxü̃ nima̱xgü rü ngẽma ínawaanexü̃wa tá cuxü̃ nata̱xgü i mártamawa.
9 Rü ngẽxguma ngẽma tá cuxü̃ yama̱xgüxü̃pe̱xegüwa cungexmagu rü marü taxũtáma cugügu curüxĩnügu rü wüxi i tupana quixĩ. Rü ngẽxguma ngẽma tá cuxü̃ ima̱xgüme̱xẽxü̃wa cungexmagu rü tá nüxü̃ quicua̱xãchi nax wüxi i duü̃xü̃mare quixĩxü̃ rü tama wüxi i tupana.
10 Rü to i nachixü̃anecüã̱xgü tá cuxü̃ nima̱xgü. Rü tá cuyu naxrüxü̃ i ngẽma duü̃xü̃gü i tama choxü̃ cua̱xgüxü̃. Rü choma ya Cori ya Tupana nixĩ i nüxü̃ chixuxü̃ i ngẽma ore, rü choma tá chayanguxẽxẽ’ ” —ñanagürü ga Cori ya Tupana.
Nagu nawiyae i yuetaarü wiyae i Tíruarü ãẽ̱xgacügü ixuxü̃
11 Nüma ga Cori ya Tupana rü chomaxã nidexa rü ñanagürü choxü̃:
12 —Cumax, Pa Yatüx, ¡Tíruarü ãẽ̱xgacüca̱x nagu nawiyae i ñaa yuetaarü wiyae, rü ñacuxü̃ tá nüxü̃! “Rü ñanagürü ya Cori ya Tupana cuxü̃: ‘Cumax, Pa Ãẽ̱xgacüx, rü duü̃xü̃güpe̱xewa rü cumexẽchi, rü nüxü̃ cucua̱xüchi, rü meama cungã̱xãxẽ.
13 Rü yexguma noxri cungo̱xgu, rü cuma rü wüxi ga nachica ga choma cuxca̱x chamexẽẽxü̃wa cuyexmachire̱x, ñoma Edéü̃rüxü̃. Rü cuma cungã̱xãxẽ namaxã ga naguxü̃raxü̃cü ga nuta ga ngã̱xãẽruü̃gü ga rubí rü crichólitu, rü yáde rü topáchiu, rü cornalina rü yáspe, rü chafíru rü granate rü esmeráda. Rü yema curü ngã̱xãẽruü̃gü rü cuxmachinügü rü úirunaxca̱x nixĩgü. Rü guxü̃ma ga yema curü ngã̱xãẽruü̃xü̃gü rü marü cuxca̱x ínamemare ga yexguma noxritama cungo̱xgu.
14 Rü choma rü wüxi ga chorü orearü ngeruxü̃ ga dauxü̃cüã̱xme̱xẽwa cuxü̃ chayexmaxẽxẽ nax cuxna nadauxü̃ca̱x. Rü wüxi ga ma̱xpǘne ga choma chaxüünexẽẽnewa cuyexma. Rü nutagü i naicüarü ngãxü̃tanügu cuyarüxũũxü̃.
15 Rü yexguma noxri cungo̱xgu rü yema cucüma rü meama iniwe̱xchire̱x ñu̱xmata yema ngunexü̃ nax cuwa nangóxü̃ ga chixexü̃.
16 Natürü yema nax cumuarü ngẽmaxü̃ã́xü̃gagu rü poraãcü cumáeta rü ngẽmaãcü chixexü̃gu cungu. Rü yemagagu chaugüxü̃tawa cuxü̃ íchata̱xüchi nawa ya yima chorü ma̱xpǘne. Rü yema chorü orearü ngeruxü̃ i daxũcüã̱x ga cuxna dauchiréxü̃ rü cuxü̃ ínamuxũchi nawa ga yema nachica ga mexẽchixü̃ ga nawa cuyexmaxü̃.
17 Rü yema nax cumexẽchixü̃gagu cugü quicua̱xüxü̃ rü nüxü̃ curüngü̃ma i curü cua̱x. Rü yemaca̱x ga choma rü cuxü̃ chiwa̱xẽxẽ nax wüxi ga cugüruxü̃ quixĩxü̃ca̱x nape̱xewa ga yema togü ga nachixü̃anegüarü ãẽ̱xgacügü.
18 Rü yema curü pecadugügagu rü yema nax cunangupetüxẽẽxü̃ ga natanü ga curü yemaxü̃gügagu, rü düxwa curü tupaucagüwa cunanguxẽxẽ ga curü chixexü̃. Rü yemaca̱x curü ngãxü̃wa chanangixta ga wüxi ga üxü nax cuxü̃ yaguxü̃ca̱x. Rü ñu̱xma rü guxü̃ma cuxü̃ nadaugü nax waixü̃müanegu tanimacaxü̃ quixĩxü̃.
19 Rü ñu̱xmax rü guxü̃ma i ngẽma togü i nachixü̃anegü i cuxü̃ cua̱xgüxü̃ rü ngẽxguma cuxü̃ nadaugügu rü naba̱i̱xãchie. Erü wüxi i ãũcümaxü̃gu cuyarüxo. Rü tagutáma wena cungo̱x’ ” —ñanagürü ga Cori ya Tupana.
Chidóü̃arü poxcuchiga
20 Nüma ga Cori ya Tupana rü chomaxã nidexa rü ñanagürü:
21 —Cuma, Pa Yatüx, ¡ĩane ya Chidóü̃guama cudawenüãcüma chauégagu nüxü̃ ixu i ñaa chorü ore i norü poxcuchiga ixĩxü̃!
22 ¡Rü namaxã nüxü̃ ixu i ñaa ore rü ñacurügü! “Cori ya Tupana rü ñanagürü cuxü̃: ‘Pa Chidóü̃, choma rü cumaxã nüxü̃ chixu nax curü uanü chixĩxü̃. Rü ngẽxguma cuxü̃ chapoxcugu rü cuwa ichanawe̱xgu i chorü pora, rü ngẽma duü̃xü̃gü rü tá choxü̃ nicua̱xüü̃gü rü tá nüxü̃ nicua̱xãchitanü nax choma yixĩxü̃ i Iraétanüxü̃arü Cori ya Tupana
23 Rü cuxca̱x tá íchananguxẽxẽ i da̱xaweanegü. Rü curü uanügü rü tá cuxca̱x ínayachoõchi. Rü guxü̃cüwawa tá taramaxã nanadai i curü duü̃xü̃gü, rü muxü̃ma tá nayue. Rü ngẽmaca̱x curü namagüwa rü tá niya̱x ya nagü. Rü ngẽmaãcü tá nüxü̃ quicua̱xãchi nax choma yixĩxü̃ ya Cori ya Tupana’ ”, ñanagürü.
24 Rü ngẽxguma i ngẽma Iraétanüxü̃ rü marü taxũtáma wena ngúxü̃ ningegü nagagu i ngẽma nachixü̃anegü i nüxna ngaicamagüxü. Rü nümagü rü taxũtáma naxchi naxaie. Rü ngẽmaãcü tá nüxü̃ quicua̱xãchi nax choma yixĩxü̃ ya Cori ya Tupana.
25 Rü ngẽmaca̱x i choma ya Cori ya Tupana rü ñacharügü: “Ngẽma Iraétanüxü̃ i togü i nachixü̃anegu woonexü̃ rü choma rü tá wüxiwa chanagagü. Rü ngẽma nachixü̃anegüpe̱xewa tá ichanawe̱x i chorü pora. Rü ngẽma Iraétanüxü̃ rü wena táxarü naxca̱x nawoegu ga yema naane ga chorü duü̃ ga Acóbuna chaxãxü̃. Rü ngẽmaãcü noxrütama naanewa tá nangẽxmagü.
26 Rü ngéma rü tá taãẽãcüma namaxẽ rü taxúetama tanachixewegü. Rü tá naxüpatagü rü úbamaxã tá natoegü. Rü choma rü tá chanapoxcue i guxü̃ma i ngẽma nachixü̃anegü i nüxna ngaicamagüxü̃ i guxchaxü̃ naxca̱x ínguxẽẽxü̃. Rü ngẽmaãcü i ngẽma duü̃xü̃gü rü tá nüxü̃ nacua̱xgü nax choma yixĩxü̃ i Iraétanüxü̃arü Cori ya Tupana chixĩxü̃” —ñanagürü ga Tupana.
