Ezequiel 29:1-21
29 Rü yexguma 10 ga taunecü ínguxgu nax Babiróniawa tayexmagüxü̃, rü gumá norü 10 ga tauemacüarü 12 ga ngunexü̃gu rü Tupana rü chomaxã nidexa rü ñanagürü choxü̃:
2 —Cumax, Pa Yatüx, ¡ñu̱xmax rü Equítuanearü ãẽ̱xgacü i Faraóü̃ nuxama nadauenüãcüma chauégagu nüxü̃ ixu i ñaa chorü ore i Equítuanearü poxcuchiga ixĩxü̃!
3 ¡Rü namaxã nüxü̃ ixu rü ñacurügü! “Cori ya Tupana rü ñanagürü cuxü̃: ‘Pa Faraóü̃ i Equítuanearü Ãẽ̱xgacüx, choma rü cumaxã nüxü̃ chixu nax curü uanü chixĩxü̃. Rü cuma rü ñoma wüxi i coyaarü ãũxü̃ i taxtü i Nílugu caxü̃rüxü̃ quixĩ. Rü cuma rü ñacurügü: Ngẽma taxtü i Níru rü choxrü nixĩ rü chomatama chanango̱xẽxẽ, ñacurügü.
4 Natürü i choma rü tá cuxü̃ chichotamaraü̃. Rü tá chanamu i ngẽma curü taxtüarü choxnigü nax cuchipa̱xgu natuxgüxü̃ca̱x. Rü tá cuxü̃ íchata̱xüchi nawa i ngẽma curü taxtü namaxã i guxü̃ma i ngẽma choxnigü i cuchipa̱xgu tuxgüxü̃.
5 Rü ngẽmawena rü tá chianexü̃wa cuxü̃ chayata̱x namaxã i guxü̃ma i ngẽma choxnigü i curü taxtüwa maxẽxü̃. Rü ngéma tá cungexma rü taxúetama cuxü̃ tayayauxgü nax cuxü̃ yata̱xgüxü̃ca̱x. Rü tá chanamu i ngẽma naeü̃gü i düraexü̃ rü ngẽma ngurucugü nax cuxü̃ nangõ̱xgüxü̃ca̱x.
6 Rü ngẽxguma i guxü̃ma i Equítuanecüã̱xgü rü tá nüxü̃ nicua̱xãchitanü nax choma yixĩxü̃ ya Cori ya Tupana. Rü ngẽma Iraétanüxü̃ rü curü ngü̃xẽẽca̱x ínacagü, natürü i cumax rü ñoma wüxi i dexnemena̱xã i büyewa̱xexü̃rüxü̃ quixĩ nax taxuwama cumexü̃.
7 Rü yexguma chorü duü̃xü̃gü curü ngü̃xẽẽca̱x cuxna cagügu, rü cuma rü cutura rü taxuwama nüxü̃ curüngü̃xẽxẽ.
8 Rü ngẽmaca̱x i choma ya Cori ya Tupana rü ñachagürü cuxü̃: Pa Equítuanex, choma rü tá chanamu i curü uanügü nax taramaxã cuxca̱x íyaxü̃ãchixü̃ca̱x. Rü tá nanadai i curü duü̃xü̃gü rü cuxü̃nagü.
9 Rü ngẽxguma Equítuane rü wüxi i chianemarexü̃ tá nixĩ, rü ngẽmaãcü i ngẽma duü̃xü̃gü rü tá nüxü̃ nicua̱xãchitanü nax choma yixĩxü̃ i Iraéanearü Tupana. Rü cumax, Pa Equítuanearü Ãẽ̱xgacüx, rü ñacurügü: Ngẽma taxtü i Níru rü choxrü nixĩ rü choma nixĩ i chanango̱xẽẽxü̃, ñacurügü
10 Rü ngẽmaca̱x i chomax, rü cumaxã nüxü̃ chixu nax curü uanü chixĩxü̃ rü ngẽma curü taxtüarü uanü chixĩxü̃. Rü guxü̃ma i Equítuane rü tá ãũcümaxü̃ i chianexü̃xü̃ chayaxĩxẽxẽ. Rü Midóxwa tá inaxügü rü ñu̱xmatáta Achuáü̃wa nangu rü Etiopíaanearü üyeanewa nangu rü tá nachianemare.
11 Rü 40 ya taunecü rü taxúetama nawa tamaxü̃. Rü taxúetama nawa taxüpetü. Rü woo duü̃xü̃gü rü woo naeü̃gü rü taxũtáma nawa nachopetü.
12 Rü choma rü guxü̃ma i togü i nachixü̃anegüarü yexera tá chanangeãcuxẽxẽ i Equítuane. Rü 40 ya taunecü rü yimá norü ĩanegü rü tá ngéma nawogümare guxü̃nema ya naigü ya ĩanegüarü yexera. Rü taxúetama nawa tamaxü̃. Rü ngẽma togü i nachixü̃anegügu tá chanawoonemare i ngẽma Equítuanecüã̱xgü.
13 Rü choma ya Cori ya Tupana rü ñacharügü: Rü 40 ya taunecüwena rü tá wena chananutaque̱xe i ngẽma Equítuanecüã̱xgü. Rü ngẽma nachixü̃anegü i nagu nawoonexü̃wa tá íchanagaxü̃.
14 Rü choma rü tá íchananguxü̃xẽxẽ i ngẽma Equítuanecüã̱xgü i poxcuexü̃. Rü yema naane ga nagu nabuexü̃ i Equítuanearü súrwaama ngẽxmaxü̃wa tá nangugü. Rü ngéma rü wüxi i íxramarexü̃ i nachixü̃ane tá naxügü.
15 Rü wüxi i nachixü̃ane i guxü̃ i nachixü̃anegüarü yexera tama poraxü̃ tá nixĩ. Rü marü taxũtáma wena togü i nachixü̃anegüétüwa nangẽxma. Rü choma rü tá chanaxíxraxẽxẽ nax ngẽmaãcü taxuacüma togü i nachixü̃anegümaxã inacuáxü̃ca̱x.
16 Rü ngẽma Iraétanüxü̃ rü marü taxũtáma wena Equítuanecüã̱xgügu narüxĩnüe. Erü marü tá nüxü̃ nicua̱xãchitanü nax poraãcü ínatüexü̃ ga yexguma Equítuanearü ngü̃xẽẽca̱x nadaugügu. Rü ngẽmaãcü tá nüxü̃ nicua̱xãchitanü nax choma yixĩxü̃ i Iraétanüxü̃arü Cori ya Tupana’ ” —ñanagürü.
17 Rü yexguma 27 ga taunecü ínguxgu nax Babiróniawa tayexmagüxü̃, rü gumá norü nüxíraxü̃xü̃ ga tauemacüarü nüxíraxü̃xü̃ ga ngunexü̃gu* rü Tupana rü chomaxã nidexa rü ñanagürü choxü̃:
18 —Cumax, Pa Yatüx, rü marü nüxü̃ cucua̱x nax Babiróniaanearü ãẽ̱xgacü ga Nabucudonochó rü guxü̃ma ga norü churaragümaxã ĩane ga Tíruca̱x íyagoõchixü̃ nax yapuãxü̃ca̱x. Rü yema norü churaragü rü yéma nanana ga naxwetagü ga iyáxüchixü̃. Rü yemaca̱x düxwa ínañoxerugü rü ínañootügü, natürü woo nax yemaacü yaxĩgüxü̃ rü tama nüxü̃ nanguxü̃ nax yapugüãxü̃ ga guma ĩane.
19 Rü ngẽmaca̱x i choma rü cumaxã nüxü̃ chixu rü ñachagürü: “Choma rü tá Nabucudonochóme̱xẽwa chanangexmaxẽxẽ i Equítuane nax ngẽmaãcü napuxü̃güãxü̃ca̱x i Equítuanecüã̱xgüarü ngẽmaxü̃gü rü guxü̃ma i nüxü̃́ ngẽxmagüxü̃ nax ngẽmaãcü norü churaragüaxü̃́ naxütanüãxü̃ca̱x.
20 Rü ngẽmaãcü tá Nabucudonochóme̱xẽwa chanangexmaxẽxẽ i Equítuane nax ngẽmaãcü nüxü̃́ chanaxütanüxü̃ca̱x naxca̱x ga yema Tíruca̱x nax íyagoõchixü̃, yerü choxü̃́ nixĩ i napuracüxü̃. Rü choma ya Cori ya Tupana nixĩ i nüxü̃ chixuxü̃ i ngẽma.
21 Rü ngẽma ngunexü̃gu rü wena tá chanaporaexẽxẽ i Iraétanüxü̃ noxrirüxü̃. Rü ngẽxguma i cumax, Pa Echequiéx, rü tá tauxchaãcü namaxã quidexa. Rü ngẽxguma i nümagü rü tá nüxü̃ nacua̱xgü nax choma yixĩxü̃ i Iraétanüxü̃arü Cori ya Tupana” —ñanagürü choxü̃.
Notas
^ 29:17 Abril.
