Ezequiel 3:1-27
3 Yexguma rü choxü̃ ñanagürü: —Cuma Pa Yatüx, ¡nangõ̱x i ñaa popera i ãmatüxü̃, rü ñu̱xũchi Iraétanüxü̃maxã nüxü̃ yarüxu i chorü ore! —ñanagürü choxü̃.
2 Rü chicho ga yexguma, rü choxü̃ nanangõ̱xẽxẽ ga yema popera ga ãmatüxü̃.
3 Rü yemawena rü choxü̃ ñanagürü: —¡Ẽcü ínaga i ngẽma popera i ãmatüxü̃ i cuxna chaxãxü̃, rü cugü namaxã nangãxcharaü̃xẽxẽ! —ñanagürü choxü̃. Rü choma rü chanangõ̱x ga yema, rü ñoma berurerüxü̃ cha̱u̱xca̱x namaixcura.
4 Rü yemawena rü ñanagürü choxü̃: —¡Inaxũãchi rü Iraétanüxü̃maxã nüxü̃ yarüxu i ngẽma ore i namaxã nüxü̃ chixuxchaü̃xü̃!
5 Choma rü tama natanüwa cuxü̃ chamu i duü̃xü̃gü i to i naga i guxchaxü̃wa idexagüxü̃ rü guxchaãcü nüxü̃ cuxĩnüxü̃. Natürü Iraétanüxü̃tanüwa nixĩ i cuxü̃ chamuxü̃.
6 Rü tama natanüwa cuxü̃ chamu i nachixü̃anegü i muarü duü̃xü̃ã̱xgüxü̃ i guxchaxü̃ i nagawa idexagüxü̃ i taxũchima nüxü̃ cuxĩnüxü̃. Natürü ngẽxguma chi natanüwa cuxü̃ chamuxgu i ngẽma duü̃xü̃gü i to i nagawa idexagüxü̃, rü nümagü rü cuga chi naxĩnüe.
7 Natürü ngẽma Iraétanüxü̃ rü taxũtáma cuga naxĩnüe, erü tama chauga naxĩnüechaü̃. Rü guxü̃ma i ngẽma Iraétanüxü̃ rü tama chauga naxĩnüe rü tama choxü̃ nacua̱xgüchaü̃.
8 Natürü i choma rü ngẽma duü̃xü̃gü i tama chauga ĩnüexü̃pe̱xewa tá cuxü̃ chaporaxẽxẽ nax tama ngẽma duü̃xü̃güga cuxĩnüxü̃ca̱x i ngẽxguma namaxã quidexagu.
9 Rü aixcüma tá cuxü̃ chaporaxẽxẽxü̃chi nax ñoma diamánterüxü̃ rü ñoma nuta i taixü̃rüxü̃ cutaixü̃ca̱x nape̱xewa i ngẽma duü̃xü̃gü. ¡Rü taxṹ i nüxü̃ cumuü̃xü̃! ¡Rü taxṹ i nachametügümaxã cubaixãchixü̃ i ngẽxguma yexera chomaxã nanuegu! —ñanagürü choxü̃.
10 Yemawena rü ñanagürü choxü̃: —¡Mea irüxĩnü i guxü̃ma i ngẽma cumaxã tá nüxü̃ chixuxü̃, rü ñu̱xũchi cugüãẽgu namaxã nanguxü̃!
11 ¡Rü natanüwa naxũ i ngẽma cutanüxü̃ i ínamugüãxü̃wa ngẽxmagüxü̃ rü namaxã nüxü̃ yarüxu i ngẽma ore i cumaxã nüxü̃ chixuxü̃! Rü ngẽxguma cuga naxĩnüegu rüe̱xna tama cuga naxĩnüegu, rü ñacurügü tá nüxü̃: “Cori ya Tupana ya Guxãétüwa Ngẽxmacü nixĩ i ngẽma ñacü pexü̃” —ñanagürü.
12 Rü yexguma ga yema Tupanaãxẽ rü choxü̃ inachixẽxẽ. Rü choweama nüxü̃ chaxĩnü ga wüxi ga naga ga tagaxü̃ ga ñoma iã̱xãchianexü̃rüxü̃ ixĩxü̃, rü ñanagürü: —Namexẽchi nixĩ i ngẽma Tupanaarü üüne i nüma ínangexmaxü̃wa —ñanagürü.
13 Rü yexgumarüxü̃ ta nüxü̃ chaxĩnü ga nagape̱xatügü ga yema querubíü̃gü ga yexguma nügüpe̱xatümaxã yanaxüüxü̃gu. Rü ñu̱xũchi nüxü̃ chaxĩnü ga naga ga yema iboxü̃ ga naxü̃tawa yexmagüxü̃. Rü yema naga rü ñoma iã̱xãchianexü̃rüxü̃ nixĩ. Rü guxü̃ma ga yema nagagü rü natagaxüchi.
14 Rü yema Tupanaãxẽ ya Üünexü̃ rü choxü̃ nachixẽxẽ, rü choxü̃ inagaxüchi ga yéma. Rü choma rü ngechaü̃ãcüma rü oegaãẽãcüma chataegu ga yéma. Rü nüma ga Cori ya Tupana rü poraãcü naxme̱xmaxã choxü̃ ningĩ.
15 Rü yexguma ga choma rü Téx-abíxwa changu ga natü ga Quebáxpechinüwa ga Iraétanüxü̃ íyexmagüxü̃wa. Rü 7 ga ngunexü̃ yéma natanüwa chayexma. Rü tama nüxü̃ chacua̱xéga nax ta̱xacü tá chaxüxü̃, rü ta̱xacüxü̃ tá chixuxü̃.
Tupana rü Echequiéxü̃ namu nax dauxü̃taeruxü̃ yixĩxü̃ca̱x
16 Rü yexguma 7 ga ngunexü̃guwena rü nüma ga Cori ya Tupana rü chomaxã nidexa rü ñanagürü:
17 —Pa Yatüx, choma rü cuxü̃ chamu nax dauxü̃taeruxü̃ quixĩxü̃ca̱x natanüwa i ngẽma Iraétanüxü̃. Rü ngẽxguma ta̱xacürü orexü̃ cumaxã chixuxgu ¡rü namaxã nüxü̃ ixu i ngẽma chorü ore nax ngẽmaãcü nüxü̃ nacua̱xgüxü̃ca̱x!
18 Dücax, rü ngẽxguma choma rü cumaxã nüxü̃ chixuxgu nax wüxi i duü̃xü̃ i chixexü̃gu maxü̃xü̃maxã chaxueguxü̃ i poxcu, natürü i cuma rü tama cunaxucu̱xẽgu nax nüxü̃ naxoxü̃ca̱x i nacüma i chixexü̃ nax ngẽmaãcü namaxü̃xü̃ca̱x, rü nüma rü tá nayu nagagu i norü chixexü̃. Natürü i chomax rü tá cuxna naxca̱x chaca i ngẽma duü̃xü̃ erü tama cunaxucu̱xẽ.
19 Natürü ngẽxguma chi cuma rü ngẽma duü̃xü̃ i chixexü̃gu maxü̃xü̃ cuxucu̱xẽgu nax nüxü̃ naxoxü̃ca̱x i ngẽma nacüma i chixexü̃ rü nüma rü tama nüxü̃ naxoxchaü̃gu, rü ngẽma norü pecadugagu tá nayu. Natürü i cuma rü taxuca̱xtama cuxna chaca, rü tá cumaxü̃.
20 Rü ngẽxguma chi wüxi i duü̃xü̃ i noxri mea maxü̃xü̃ rü nüxü̃ naxoxgu nax mea namaxü̃xü̃ rü poxcu namaxã chaxueguxgu rü ngẽxguma cuma rü tama cunaxucu̱xẽgu rü nüma rü norü chixexü̃gu tá nayu. Rü yema mexü̃ ga noxri naxüxü̃ rü taxũtáma chope̱xewa ínanapoxü̃. Rü nüma rü norü chixexü̃gagu tá nayuama, natürü i choma rü tá cuxna naxca̱x chaca i ngẽma duü̃xü̃ erü tama cunaxucu̱xẽ.
21 Natürü i cumax, rü ngẽxguma chi cunaxucu̱xẽgu i ngẽma duü̃xü̃ nax tama chixexü̃ naxüxü̃ca̱x rü nüma rü cuxü̃́ inaxĩnügu nax tama wena chixexü̃ naxüxü̃ rü tá namaxü̃ erü cuga naxĩnü. Rü cuma rü tá ta cumaxü̃ —ñanagürü choxü̃ ga Tupana.
Nangea̱x ga Echequía
22 Rü yemawena ga nüma ga Cori ya Tupana rü chauétügu naxǘxme̱x, rü ñanagürü choxü̃: —¡Inachi rü yea ínadoxonexü̃wa naxũ! Rü ngéma ta nixĩ i cumaxã chidexaxü̃ —ñanagürü choxü̃.
23 Rü ichachi ga choma rü ínadoxonexü̃wa chaxũ. Rü yéma nüxü̃ chadau ga Cori ya Tupanaarü üüne, yema natü ga Quebáxpechinüwa nüxü̃ chada̱u̱xgurüxü̃. Rü chacaxã́püxü rü chanangücuchi ñu̱xmata waixü̃müanewa yaxũ ga chaucatü.
24 Rü yexguma ga Tupanaãxẽ ya Üünexü̃ rü choxna nangu rü choxü̃ inachixẽxẽ. Rü nüma ga Cori ya Tupana rü ñanagürü choxü̃: —¡Íxũ rü cupatagu cugü rüwãxtaxü̃!
25 Rü dücax, napana̱xãmaxã tá cuxü̃ nina̱ĩ̱xgü. Rü ngẽmaãcü taxucürüwa tá ícuxũxũ nax duü̃xü̃gütanüwa cungexmaxü̃ca̱x.
26 Rü ñu̱xũchi i choma rü cuxmanaawa tá cuxü̃ chayaxũarü conüã̱xẽxẽ rü tá cungea̱x. Rü taxucürüwa tá cuyaxucu̱xẽgü i ngẽma duü̃xü̃gü i chixexü̃gu maxẽxü̃ rü nuewa̱xegüxü̃.
27 Natürü ngẽxguma ta̱xacüxü̃ tá cumaxã chixuxgu i choma rü cuxü̃ tá chidexaxẽxẽ. Rü ngẽxguma rü ñacurügü tá nüxü̃ i ngẽma duü̃xü̃gü: “Ngẽma pemaxã nüxü̃ chixuxü̃ rü ngẽma nixĩ i Cori ya Tupanaarü ore”, ñacurügü tá. Rü ngẽma irüxĩnüchaü̃xü̃, rü tá inarüxĩnü, natürü ngẽma tama irüxĩnüchaü̃xü̃ rü taxũtáma inarüxĩnü, erü ngẽma duü̃xü̃gü rü tama ĩrüxĩnüechaü̃xü̃ nixĩgü —ñanagürü.
