Ezequiel 33:1-33
33 Nüma ga Cori ya Tupana rü chomaxã nidexa rü ñanagürü:
2 —Pa Yatüx, name nixĩ i cutanüxü̃maxã quidexaxü̃ rü namaxã nüxü̃ quixuxü̃ i ñaa ore: “Rü ngẽxguma wüxi i nachixü̃ane rü to i nachixü̃aneca̱x íchayaxüãchixẽẽgu nax nügü nada̱i̱xü̃ca̱x, rü ngẽxguma i ngẽma duü̃xü̃gü i ngẽma nachixü̃ane i naxca̱x íyaxüãchixü̃ rü wüxi i duü̃xü̃xü̃ naxunetagü nax nadauxü̃taexü̃ca̱x.
3 Rü ngẽma dauxü̃taeruxü̃ rü ngẽxguma nüxü̃ nada̱u̱xgu nax yangaicaxü̃ i norü uanüarü churaragü nax daiwa naxĩxü̃, rü norü cornétagu nicue nax ngẽmaãcü ínaxũãẽgüxü̃ca̱x i duü̃xü̃gü.
4 Rü texe yima cornétagaxü̃ ĩnüchiréxe, natürü tama tügüna dauxe, rü ngẽxguma ngẽma uanügüarü churaragü ngéma ngugügu rü tüxü̃ yama̱xgügu rü yíxema tama íxuãẽgüxe rü tümagagu tátama nixĩ i tayuxü̃.
5 Erü yíxema nüxü̃ ĩnüchiréxe ya cornétaga, natürü tama tügüna ítada̱u̱xgu, rü tümagagu tátama nixĩ i tayuxü̃. Rü ngẽxguma chi ítaxuãẽgu rü taxũchima tayu.
6 Natürü ngẽma dauxü̃taeruxü̃ rü ngẽxguma chi nüxü̃ nada̱u̱xgu nax ínangugüxü̃ i ngẽma uanüarü churaragü, rü tama yacueãgu ya norü cornéta nax naxuãẽgüxü̃ca̱x i duü̃xü̃gü, rü chi ngẽmagagu ngẽma uanügü texéxü̃ yama̱xgu rü yíxema rü tümaarü pecadugügagu tá tayu, natürü choma ya Cori ya Tupana rü tá ngẽma dauxü̃taeruxü̃na chacaxü̃ naxca̱x i ngẽma duü̃xü̃arü yuchiga”.
7 Pa Yatüx, choma ya Cori ya Tupana rü cuxü̃ chaxuneta nax Iraétanüxü̃arü dauxü̃taeruxü̃ quixĩxü̃ca̱x. Rü cumaxã tá nixĩ i nüxü̃ chixuxü̃ i chorü ore. Rü ñu̱xũchi cuma tá nixĩ i ngẽma chorü oremaxã cuyaxucu̱xẽgüxü̃ i ngẽma duü̃xü̃gü nax naxuãẽgüxü̃ca̱x.
8 Rü ngẽxguma chi choma rü yu namaxã chaxuegugu i wüxi i duü̃xü̃ i chixexü̃ üxü̃, rü chi cuma rü tama namaxã nüxü̃ quixuxgu nax nüxü̃ naxoxü̃ca̱x i ngẽma nacüma i chixexü̃, rü nüma rü tama nüxü̃ naxoxgu, rü nüma rü düxwa norü pecadugagu tá nayu. Natürü i choma rü tá cuxna chaca naxca̱x i ngẽma duü̃xü̃ i norü chixexü̃gu yuxü̃.
9 Natürü ngẽxguma chi cuma rü ngẽma duü̃xü̃ i chixexü̃arü üruxü̃maxã nüxü̃ quixuxgu nax nüxü̃ naxoxü̃ i ngẽma nacüma i nagu namaxü̃xü̃, natürü tama cuga naxĩnügu, rü nüma rü nagagutátama norü chixexü̃gu nayu. Natürü i cuma rü tá cumaxü̃ erü marü tama nicuguãchi —ñanagürü.
Wüxichigü i duü̃xü̃ rü nanaxwa̱xe nax norü maxü̃na nadauxü̃
10 Rü ñanagürü ta: —Cuma Pa Yatüx, ¡rü Iraétanüxü̃maxã nüxü̃ ixu i chorü ore i ñaxü̃! “Pema rü ñaperügü: ‘Torü chixexü̃gü rü torü pecadugü rü toxü̃́ naya. Rü ngẽmaca̱x nachixe i torü maxü̃. ¿Rü ñuxãcü tá tanamexẽxẽ i torü maxü̃?’ ”
11 Natürü choma ya Cori ya Tupana rü chauégagu nüxü̃ chixu nax tama chanaxwa̱xexü̃ nax texe tümaarü pecadugu yuxü̃. Natürü ngẽma chanaxwa̱xexü̃ nixĩ nax nüxü̃ tarüxoxü̃ i tümacüma i chixexü̃ nax ngẽmaãcü tüxü̃́ nangẽxmaxü̃ca̱x i maxü̃. Pa Iraétanüxü̃x, ¡nüxna pixĩgachitanü i ngẽma chixexü̃ i nacüma i nagu pemaxẽxü̃! ¿Rü ta̱xacüca̱x yuwa pegü pexĩxẽxẽ?
12 Cuma, Pa Yatüx, ¡rü cutanüxü̃maxã nüxü̃ ixu i chorü ore i ñaxü̃! “Rü ngẽxguma wüxi ya yatü ya mecümacü chixexü̃ uxgu, rü yema mexü̃ ga ü̃paacü naxüxü̃ rü taxũtáma nanamaxẽxẽ. Rü ngẽxguma wüxi i duü̃xü̃ i chixexü̃arü üruxü̃ nüxü̃ rüxoxgu i ngẽma chixexü̃ i nagu namaxü̃xü̃, rü yema chixexü̃ ga ü̃paacü naxüxü̃ rü taxũtáma naxca̱x nayu. Rü ngẽxguma ngẽma duü̃xü̃ i mexü̃gu maxü̃xü̃ rü chixexü̃ naxü̱xgu, rü ngẽma nacüma ga mexü̃ ga ü̃paacü naxüxü̃ rü taxũtáma ínanapoxü̃ nax tama nayuxü̃ca̱x.
13 Rü ngẽxguma chi choma ya Cori ya Tupana rü maxü̃ namaxã chixuxgu i wüxi i yatü i mea maxü̃xü̃ rü nüma rü norü mecümagu yaxõõgu natürü chixexü̃ naxü̱xgu, rü choma rü taxũtáma nüxü̃́ nüxna chacua̱xãchi ga yema mexü̃ ga nacüma ga ü̃paacü naxüxü̃. Rü ngẽma chixexü̃ i naxüxü̃gagu tá nayu.
14 33:14-15 Rü ngẽxguma chi yu namaxã chixuxgu i wüxi i yatü i chixexü̃gu maxü̃xü̃, rü nüma rü nüxü̃ naxoxgu i ngẽma pecadu i nagu namaxü̃xü̃, rü mexü̃ naxü̱xgu, rü aixcüma yanguxẽẽãgu i ngẽma mexü̃ i nüxü̃ yaxuxü̃, rü natáeguxẽẽã̱xgu ga yema namücüarü ngẽmaxü̃ ga norü diẽruca̱x nüxna taxãxü̃, rü natáeguxẽẽã̱xgu ga yema naxca̱x nangĩ́xü̃, rü naga naxĩnügu i ngẽma mugü i maxü̃ ixãxü̃, rü nüxü̃ naxoxgu nax chixexü̃ naxüxü̃, rü aixcüma tá namaxü̃ rü taxũtáma nayu.
15 Nüü̃ nadau 33:14
16 Rü choma rü taxũtáma nüxü̃́ nüxna chacua̱xãchi i bai i wüxi i ngẽma pecadu ga ü̃paacü naxüxü̃. Rü nüma rü tá namaxü̃ erü mexü̃ naxü rü nayanguxẽxẽ ga yema mexü̃ ga nüxü̃ yaxuxü̃”.
17 Rü ngẽma cutanüxü̃ rü tá ñanagürügü rü ngẽma chaxüxü̃ rü tama name, natürü nümagüwaxi nixĩ i tama mexü̃ naxügüxü̃.
18 Rü ngẽxguma yimá yatü ya mexü̃ i nacümagu maxü̃cü, rü nawena nüxü̃ naxoxgu nax ngẽma mexü̃ i nacüma naxüxü̃, rü ñu̱xũchi chixexü̃ i nacümagu namaxü̃gu, rü ngẽma chixexü̃ i nacüma i naxüxü̃gagu tá nayu.
19 Rü ngẽxguma ngẽma duü̃xü̃ i chixexü̃arü üruxü̃ rü nüxü̃ naxoxgu nax naxüaxü̃ i chixexü̃, rü mexü̃ i nacümagu namaxü̃gu, rü ngẽma nacüma i mexü̃ i naxüxü̃gagu rü tá namaxü̃.
20 Rü pemax rü muẽ̱xpü̱xcüna rü ñaperügüecha: “Ngẽma Cori ya Tupana üxü̃ rü tama name”. Natürü i chomax, Pa Iraétanüxü̃x, rü aixcüma tá wüxichigüna chaca naxca̱x i ngẽma mexü̃ rüe̱xna chixexü̃ i naxüxü̃ —ñanagürü.
Yerucharéü̃ rü norü uanügüme̱xẽgu nangu
21 Rü yexguma 12 ga taunecü ínguxgu nax Babiróniawa tayexmagüxü̃, rü gumá norü 10 ga tauemacüarü wüxime̱e̱xpü̱x ga ngunexü̃gu rü wüxi ga yatü ga Yerucharéü̃wa iñaxü̃ rü Babiróniaanewa nangu. Rü chomaxã nüxü̃ nixu nax uanügüme̱xẽgu nanguxü̃ ya Yerucharéü̃.
22 Rü yema chütaxü̃ naxü̃pa nax chauxü̃tawa nanguxü̃ ga yema Yerucharéü̃wa íñaxü̃ ga yatü, rü Cori ya Tupana rü choxü̃ ningõgü rü choxü̃ nangegaxẽxẽ. Rü ngẽxguma moxü̃ãcü pa̱xmama chauxü̃tawa nanguxgu ga yema yatü rü Cori ya Tupana rü wena choxü̃ nidexaxẽxẽ.
Ĩanetanüxü̃güarü pecadugüchiga
23 Rü yemawena Cori ya Tupana rü chomaxã nidexa rü ñanagürü choxü̃:
24 —Pa Yatüx, yima ĩanegü ya Iraéanewa nagu napogüenewa maxẽxü̃ i duü̃xü̃gü rü ñaãcü nidexagü rü ñanagürügü: “Abraáü̃ rü wüxitama ga duü̃xü̃ nixĩ natürü nawa nangu nax noxrü yixĩxü̃ ga guxü̃ma ga ñaa nachixü̃ane. Natürü i yíxema rü tamu i ñu̱xma rü ngẽmaca̱x yexeraãcü tüxna naxǘ nax tóxrü yixĩxü̃ i ñaa naane”, ñanagürügü.
25 Rü ngẽmaca̱x chanaxwa̱xe i ngẽma duü̃xü̃gümaxã nüxü̃ quixu i chorü ore i ñaxü̃: “Pema chixexü̃ pexü. Rü penangõ̱x i namachi i nagüã́xü̃, rü tupananetachicüna̱xãgüxü̃ picua̱xüü̃gü, rü pemáetagü. ¿Rü ngẽmaétüwa nagu perüxĩnüe nax pexrü yixĩxü̃ i ñaa nachixü̃ane?
26 Rü pema rü perü taramaxã pemáeta, rü taxü̃ i chixexü̃gü pexüe, rü pexma̱xgüna nai i ngexü̃maxã pemaxẽ. ¿Rü ngẽmaétüwa nagu perüxĩnüe nax pexrü yixĩxü̃ i ñaa nachixü̃ane?”
27 Rü ngẽmaca̱x name i ngẽma duü̃xü̃gümaxã nüxü̃ quixu i chorü ore i ñaxü̃: “Chauégagu pemaxã nüxü̃ chixu rü pema ya yima ĩanegü ya nagu napogüenewa ngẽxmagüe rü tá pexü̃ nadai. Rü pema i naanewa ngẽxmagüxe rü tá ai pexca̱x íchangugüxẽxẽ nax ngẽma pexü̃ ngṍxü̃ca̱x. Rü pema i cu̱xchicaxü̃wa rü ma̱xpǘnearü ãxmaxü̃güwa ngẽxmagüxe, rü tá da̱xaweanemaxã peyue.
28 Rü pechixü̃ane rü tá chianexü̃ i taxúema nagu ãpataxü̃ chayanguxuchixẽxẽ. Rü ngẽma perü pora i namaxã pegü picua̱xüü̃güxü̃ rü tá pexna chanayaxu. Rü Iraéanearü ma̱xpǘnegü rü tá nangeãcuanemare rü taxúetama nawa taxüpetü.
29 Rü ngẽxguma chianexü̃xü̃ chayanguxuchixẽẽgu i Iraéchixü̃ane rü nachitaxü̃xicatama íchayaxüxẽẽgu nagagu i norü chixexü̃ i naxügüxü̃, rü ngẽxguma tá nixĩ i nüxü̃ yacua̱xãchiexü̃ nax choma chixĩxü̃ ya Cori ya Tupana”.
30 Rü ngẽma cutanüxü̃ rü cuchigaxü̃ nügümaxã nixugügü ĩanearü poxeguxü̃tápü̱xwa, rü napatagüarü ĩã̱xgüwa. Rü nügümaxã ñanagürügü: “¡Ngĩxã itarüxĩnüe i ngẽma ore i Cori ya Tupana taxca̱x nua muxü̃!”
31 Rü ngẽmaãcü i chorü duü̃xü̃gü rü cuxca̱x naxĩ, rü cupe̱xewa nayarütogü guxü̃gurüxü̃ nax yanaxĩnüexü̃ca̱x i ngẽma ore i nüxü̃ quixuxü̃. Natürü woo nüxü̃ naxĩnüegu i ngẽma ore natürü tama aixcüma nagu namaxẽ. Rü naã̱xmaxã choxü̃ nicua̱xüü̃gü, natürü norü maxü̃wa rü yexeraãcü diẽruguama narüxĩnüe.
32 Rü ngẽma duü̃xü̃gü rü cuxü̃ nadaugü nax nüxü̃ cucuáxü̃ nax nagu cuwiyaexü̃ i ãarüã̱xarü wiyaegü, rü cumegaxü̃, rü nüxü̃ cucuáxü̃ i árpaarü paxü. Rü inarüxĩnüechire̱x i curü ore i nüxü̃ quixuxü̃, natürü tama aixcüma nagu namaxẽ.
33 Natürü guxü̃ma i ngẽma nüxü̃ quixuxü̃ rü tá ningu. Rü ngẽxguma yanguxgu rü ngẽma duü̃xü̃gü tá nüxü̃ nicua̱xãchitanü nax aixcüma natanüwa nayexmaxü̃ ga chorü orearü uruxü̃ —ñanagürü.
