Ezequiel 34:1-31
34 Rü Cori ya Tupana rü chomaxã nidexa rü ñanagürü choxü̃:
2 —Cumax, Pa Yatüx, ¡rü chauégagu namaxã idexa i ngẽma dauruü̃gü i namaxã icua̱xgüxü̃ i chorü duü̃xü̃gü i Iraétanüxü̃ i ñoma carnérugürüxü̃ ixĩgüxü̃! ¡Rü ngẽma dauruü̃gümaxã nüxü̃ ixu i ñaa chorü ore rü ñaxü̃! “Pegümaxã pengechaxü̃gü, Pa Chorü Carnérugüarü Dauruü̃güx erü pegünaxicatama pedaugü. Natürü ngẽma penaxwa̱xexü̃ nixĩ nax mea nüxna pedaugüxü̃ i ngẽma chorü carnérugü.
3 Rü pema rü ngẽma carnérugüarü lechi pixaxgü rü naxta̱xawa penaxü i pexchirugü rü penadai i ngẽma carnérugü i rümemaegüxü̃ nax namaxã pexãwemügüxü̃ca̱x, natürü tama mea nüxna pedaugü.
4 Rü ngẽma chorü carnéru ya turaxü̃ rü pema rü tama nüxü̃ perüngü̃xẽxẽ, rü ngẽma ida̱xawexü̃ rü tama penaxüxü̃, rü ngẽma ibüyeparaxü̃ rü tama peyana̱i̱xpara, rü ngẽma rütaxuxü̃ rü tama naxca̱x peyadau. Natürü i pema rü namaxã pechixecümagü rü chixrimare nüxna pedaugü.
5 Rü ngẽmaãcü i chorü carnérugü rü nangearü daruü̃ã̱xgü, rü nu ne nanaxĩmare, rü aigü rü nayoxnie nax nangõ̱xcuxãxü̃.
6 Rü yema chorü carnérugü rü guxü̃ma ga máxpü̱xanexü̃gu rü ma̱xpǘnegügu rü guxü̃ma ga naanegu nügü nawoone rü ínatüe. Rü taxúema naxca̱x taxoegaãxẽ, rü naxca̱x tayadaugü.
7 Pa Chorü Duü̃xü̃güarü Dauruü̃güx, pema rü ñoma carnérugüarü dauruü̃gürüxü̃ pixĩgü, rü chanaxwa̱xe i mea choxü̃́ iperüxĩnüe i ñaa chorü ore.
8 Rü choma ya Cori ya Tupana rü chauégagu pemaxã nüxü̃ chixu rü muxü̃ma ga naeü̃gü ga idüraexü̃ rü marü naxca̱x nangĩ̱xgü rü nanangõ̱xcu ga chorü carnérugü, yerü nangearü dauruxü̃ã̱xgü. Rü pema i norü dauruü̃gü rü tama naxca̱x peyadaugü. Rü pema rü pegünaxicatama pedaugü rü tama chorü carnérugüna pedaugü.
9 Rü ngẽmaca̱x, Pa Chorü Carnérugüarü Dauruü̃güx, name i choxü̃́ iperüxĩnüe i ñaa ore i pemaxã nüxü̃ chixuxü̃:
10 Rü choma ya Cori ya Tupana rü ñachagürü pexü̃, Pa Chorü Carnérugüarü Dauruü̃güx: Choma rü pemaxã ícharüxuanü. Rü tá pexna chaca i chorü carnérugüchiga, rü tá pexna chanayaxu i ngẽma puracü nax chorü carnérugüarü dauruü̃gü pixĩgüxü̃. Rü ngẽmaãcü taxũtáma nüxna pedaugü rü taxũtáma namachimaxã pexãwemügü” —ñanagürü.
Carnérugüarü dauruxü̃ i aixcüma mecü
11 Rü choma ya Cori ya Tupana rü ñachagürü: —Chomatátama nüxna chadau i ngẽma chorü carnérugü.
12 Rü ñoma carnérugüarü dauruxü̃ i norü carnérugüca̱x oegaãẽxü̃ i ngẽxguma nawoonegu, rü ngẽxgumarüxü̃ tá ta i choma rü naxca̱x chaxoegaãxẽ i ngẽma chorü carnérugü. Rü wüxi ga ngunexü̃ ga ẽanexü̃gu rü taxü̃ ga buanecü ixüxgu rü nügü nawoonemare, natürü i choma rü wena táxarü chayagagü i ngexta ínawoonexü̃wa nax wüxiwa nangẽxmagüxü̃ca̱x.
13 Rü ngẽma togü i nachixü̃anegü i nagu nawoonexü̃wa rü tá íchanagaxü̃, rü wüxigu tá chanangutaque̱xexẽxẽ. Rü norü naanewa tátama chanagagü. Rü ngẽma Iraéanearü ma̱xpǘnegüwa tá chanamugü nax ngéma nachibüexü̃ca̱x rü natügüwa naxaxegüxü̃ca̱x. Rü ngẽmaãcü i ngẽma duü̃xü̃gü i yaxǘgüxü̃ i ngẽma naanewa íngẽxmagüxü̃wa tá nangẽxmagü i ngẽma chorü carnérugü.
14 Rü yima rümemaecü ya maxẽwa tá chanagagü nax yimawa nachibüexü̃ca̱x i Iraéanearü máxpü̱xanexü̃wa. Rü ngẽxma tá narüngü̃gü rü yima rümemaecü ya maxẽ tá nanangõ̱xgü.
15 Rü chomatátama nixĩ i chorü carnérugüna chadauxü̃. Rü chomatátama nixĩ i nachicagü i mexü̃wa chanagagü nax ngẽxma nangü̃güxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma.
16 Rü choma rü tá naxca̱x chadau i chorü carnérugü i iyarütauxexü̃. Rü tá chayagagü i ngẽma chorü carnérugü i choxna ítüexü̃. Rü ngẽma ibüyeparagüxü̃ rü tá chayanaixgüpara. Rü ngẽma turaexü̃ rü tá nüxü̃ charüngü̃xẽxẽxü̃ natürü ngẽma ingüexü̃ rü iporaexü̃ rü tá chayanaxoxẽxẽ. Rü ngẽmaãcü i choma rü tá mea namaxã ichacua̱x i chorü carnérugü —ñanagürü.
17 Rü choma ya Cori ya Tupana rü ñachagürü: —¡Iperüxĩnüe, Pa Chorü Carnérugüx! Choma rü tá pemaxã nüxü̃ chixu i nacüma i mexü̃ nax nagu tá pexĩxü̃ i pema i carnérugü rü chíbugü. Rü pema nax pemecümaxü̃ rü tá pexü̃ íchapoxü̃ nüxna i ngẽma chixecümaxü̃.
18 Rü ñuxre i pema rü pechixecüma rü tama petaãẽgü nax woo mecü ya maxẽ nax penangṍxü̃ natürü yima íyaxüxcü rü nagu pepugüe. Rü ñu̱xũchi mechiüxü̃ i dexáwa pexaxegü rü ngẽmawena nawa pecuaixegü nax togüca̱x nabuxchíüxü̃ca̱x.
19 Rü ngẽmaãcü i chorü carnérugü rü yima maxẽ ya nagu pepugüecü nangõ̱xgü rü ngẽma dexá i pebuchiü̃xẽẽxü̃wa naxaxegü.
20 Rü ngẽmaca̱x i choma ya Cori ya Tupana rü pexü̃ ñacharügü: “Choma rü tá chanapoxcue i ngẽma carnérugü i ngüexü̃ i chixri namaxã icua̱xgüxü̃ i ngẽma togü i carnérugü i aexü̃.
21 Rü pemax i ngüexü̃ i poraexü̃ rü ípenawoxü̃ i ngẽma turaexü̃. Rü ípenacaixü̃ i ngẽma turaexü̃ nax ngẽmaãcü naxĩgüxü̃ca̱x.
22 Natürü choma rü tá nüxna chadau i chorü carnérugü. Rü tá ngẽma ngĩ́ta̱xagüxü̃na íchanapoxü̃ nax tama naxca̱x nangĩ̱xgüechaxü̃ca̱x. Rü tá chanapoxcu i ngẽma carnérugü i namücümaxã chixecümagüxü̃”.
23 Rü choma rü tá chanamu i chorü duü̃ ya Dabí nax wenaxarü chorü carnérugümaxã inacuáxü̃ca̱x. Rü nüma tá nüxna nadau, rü norü dauruxü̃ tá nixĩ.
24 Rü choma rü chorü carnérugüarü Tupana tá chixĩ rü yima chorü duü̃ ya Dabí tá nixĩ i namaxã icuácü. Rü choma ya Cori ya Tupana nixĩ i nüxü̃ chixuxü̃ i ngẽma.
25 Rü chorü carnérugümaxã tá chanaxü i chorü uneta nax taãxẽwa nangẽxmagüxü̃ca̱x. Rü nachixü̃anewa tá chayanaxoxẽxẽ i ngẽma aigü i düraexü̃ nax ngẽmaãcü taãẽãcüma ngẽma naanewa namaxẽxü̃ca̱x rü naixnecügu napegüxü̃ca̱x.
26 Rü chorü ma̱xpǘne ya üünecüwagu tá chanamugü i chorü carnérugü. Rü tá nüxü̃ charüngü̃xẽxẽxü̃ rü naxca̱x chanapuxẽxẽ nax mea nachibüexü̃ca̱x.
27 Rü ngẽma nanetügü i naanewa rüxügüxü̃ rü tá nixo. Rü ngẽma naanegü i nanetügü nagu natogüxü̃ rü muxü̃ma i nanetügüarü o tá nawa nabuxgü. Rü ngẽxguma norü uanügüme̱xẽwa íchanguxü̃xẽẽgu i chorü duü̃xü̃gü, rü tá nüxü̃ nicua̱xãchitanü nax choma chixĩxü̃ i norü Tupana.
28 Rü taxuxü̃táma i togü i nachixü̃anegü chorü duü̃xü̃gümaxã inacua̱x. Rü woo ngẽma naeü̃gü i düraexü̃ rü taxũtáma wena nanangõ̱xcu i chorü duü̃xü̃gü. Rü taãẽãcüma tá namaxẽ rü taxuca̱xtama namuü̃e.
29 Rü chorü duü̃xü̃güna tá chanaxã i ngẽma naane i nanetü mea nawa rüxügüxü̃. Rü ngẽmaca̱x i ngẽma chorü duü̃xü̃gü rü taxũtáma wena taiya nüxü̃́ nangu̱x. Rü ngẽma togü i nachixü̃anecüã̱xgü rü taxũtáma wena nüxü̃ nacugüe rü nagu nidauxcüraxü̃gü i chorü duü̃xü̃gü.
30 Rü ngẽxguma i ngẽma chorü duü̃xü̃gü rü tá nüxü̃ nacua̱xgü nax choma chixĩxü̃ i norü Cori ya Tupana. Rü tá nüxü̃ nacua̱xgü nax naxü̃tawa changexmaxü̃ rü nümagü i Iraétanüxü̃ rü chorü duü̃xü̃gü nax yaxĩgüxü̃. Rü choma ya Cori ya Tupana nixĩ i nüxü̃ chixuxü̃ i ngẽma.
31 Rü pematama nixĩ i chorü carnérugü pixĩgüxü̃ rü chorü naanewa pengẽxmagüxü̃. Rü choma nixĩ i perü Tupana chixĩxü̃. Rü choma ya Cori ya Tupana nixĩ i pemaxã nüxü̃ chixuxü̃ i ngẽma —ñanagürü.
