Ezequiel 35:1-15
35 Nüma ga Cori ya Tupana rü chomaxã nidexa rü ñanagürü:
2 —Pa Yatüx, ¡máxpü̱xane ya Cheíguama nadawenü rü chauégagu namaxã nüxü̃ ixu i norü poxcuchiga!
3 Rü ñaa tá nixĩ i ngẽma ore i nüxü̃ quixuxü̃: “Cori ya Tupana rü ñanagürü: ‘Choma rü cumaxã nüxü̃ chixu, Pa Ma̱xpǘne ya Cheí, nax cumaxã charüxuanüxü̃. Rü tá cuxü̃ chapoxcu rü tá chianexü̃xü̃ chayanguxuchixẽxẽ i curü naane nax taxúema nawa maxü̃xü̃.
4 Rü tá nagu chipogügü ya curü ĩanegü rü tá chianexü̃xü̃ chayaxĩxẽxẽ i curü naane. Rü ngẽxguma ngẽma cuxü̃ ngupetügu rü tá nüxü̃ quicua̱xãchi nax choma yixĩxü̃ ya Cori ya Tupana chixĩxü̃.
5 Rü cuma rü guxü̃guma Iraétanüxü̃arü uanü quixĩ. Rü yexguma norü pecadugügagu chanapoxcueyane, rü cuma rü cuyoxnie nax naxca̱x ícuyagoõchixü̃.
6 Rü cumaxã nüxü̃ chixu rü ñu̱xma nax aixcüma yixĩxü̃ nax chamaxü̃xü̃ i choma rü aixcüma tá nixĩ nax cuyuxü̃ rü curüxoxü̃. Erü cugagu nixĩ nax nayuexü̃ ga yema Iraétanüxü̃, rü ngẽmaca̱x tá cuwe ningechigü i ngẽma yu.
7 Pa Ma̱xpǘne ya Cheí, choma rü tá chianexü̃xü̃ cuxü̃ chixĩxẽxẽ, rü cuchitaü̃xica tá ngéma nayaxǘ. Rü choma rü tá chanadai i ngẽma cuchitaü̃wa chopetüamaxü̃.
8 Rü naxü̃negü i ngẽma churaragü i daigu yuexü̃maxã tá chanapagüxẽxẽ i curü ma̱xpǘnegü, rü curü doxonexü̃gü, rü curü natügü.
9 Rü ngẽma curü naane rü guxü̃gutáma nachica i chianexü̃xü̃ chayanguxuchixẽxẽ. Rü curü ĩanegüwa rü taxuxü̃táma i duü̃xü̃ nagu naxãpata. Rü ngẽxguma tá nixĩ i nüxü̃ picua̱xãchitanüxü̃ nax choma yixĩxü̃ ya Cori ya Tupana’.
10 ‘Rü cumax, Pa Ma̱xpǘne ya Cheíx, rü ñacurügü: Ngẽma Iraéane rü Yudáane rü chaugüaxü̃́ tá chanade rü choxrü tá nixĩgü. Rü choma tá nixĩ i norü yora woo Cori ya Tupana rü nawa ngẽxmaxü̃ rü ngéma maxü̃.
11 Cuma rü quixãũxãchi rü naxchi cuxai ga yema Iraétanüxü̃ rü namaxã cunu. Rü ñu̱xma i choma ya Cori ya Tupana rü chauégagu cumaxã chanaxuegu rü yema Iraétanüxü̃maxã cunaxüxü̃ãcütama tá cumaxã chanaxü i choma. Rü ngẽxguma cuxü̃ chapoxcugu rü ngẽma Iraétanüxü̃ tá nüxü̃ nicua̱xãchitanü nax choma yixĩxü̃ i norü Tupana chixĩxü̃.
12 Rü ngẽxguma i cuma rü tá nüxü̃ cucua̱x nax choma ya Cori ya Tupana rü marü nüxü̃ chaxĩnüxü̃ ga guxü̃ma ga yema ore ga chixexü̃ ga yema Iraéanearü máxpü̱xanegüchiga nüxü̃ quixuxü̃. Erü cuma rü ñacurügü: Ngẽma Iraéane rü chianexü̃mare nixĩ i ñu̱xma, rü ngẽmaca̱x tüxü̃́ natauxcha nax tóxrüxü̃ nayaxuxü̃, ñacurügü.
13 Rü cuma rü quidexa rü curü conümaxã chauchiga quidexa rü choxü̃ cunuxẽxẽ. Rü choma rü meama nüxü̃ chaxĩnü ga curü dexa.
14 Rü ngẽmaca̱x i choma ya Cori ya Tupana rü ñacharügü: Ngẽxguma choma ñoma i naanewa cuxü̃ charüxoxẽẽgu rü guxü̃ma i ñoma i naane rü tá nataãxẽ.
15 Rü cuma rü poraãcü cutaãxẽ ga yexguma nagu yanachixegu ga yema naane ga Iraétanüxü̃ noxrüxü̃ yauxgüxü̃. Natürü ngẽma guxcha tátama nixĩ i pexü̃ ngupetüxü̃ Pa Cheíarü Ma̱xpǘnex, rü guxü̃ma i curü naane Pa Edóü̃x. Rü ngẽma curü naane rü chianexü̃xü̃ tá nayanguxuchi. Rü ngẽxguma i curü duü̃xü̃gü rü tá nüxü̃ nicua̱xãchitanü nax choma chixĩxü̃ ya Cori ya Tupana’ ” —ñanagürü.
