Ezequiel 36:1-38
36 —Rü cumax, Pa Yatüx, rü chauégagu Iraéanearü ma̱xpǘnegümaxã idexa rü namaxã nüxü̃ ixu nax mea inaxĩnüexü̃ i ngẽma ore i namaxã nüxü̃ chixuxü̃:
2 Rü choma ya Cori ya Tupana rü ñachagürü: “Ngẽma Iraétanüxü̃arü uanügü rü nagu narüxĩnüe nax marü noxrü yixĩxü̃ i guxü̃ma i Iraéanearü naane.
3 ¡Rü ñu̱xma rü chauégagu namaxã idexa rü ñanagürü nüxü̃!: ‘Cori ya Tupana rü ñanagürü: Ñu̱xma rü guxü̃ i nachixü̃anewa ne ĩxü̃ i duü̃xü̃gü rü pexca̱x ínayachoõchi nax yadaiãxü̃ca̱x i perü duü̃xü̃gü. Rü guxü̃ma i ngẽma togü i nachixü̃anegüarü duü̃xü̃gü rü noxrüxü̃ pexü̃ nixĩgüxẽxẽ. Rü pexü̃ nacugüe rü pegu nidauxcüraxü̃gü.
4 Rü ngẽmaca̱x, Pa Iraéanearü Ma̱xpǘnegüx, ¡iperüxĩnüe i Cori ya Tupanaarü ore i pexca̱x ixĩxü̃, Pa Ma̱xpǘnegüx, rü Pa Máxpü̱xanexü̃güx, rü Pa Natügüx, rü Pa Doxonexü̃güx, rü Pa Ĩanechicagü i Ngearü Duü̃xü̃ã̱xgüxü̃x, rü Pa Ĩanegü ya Perü Uanügü Pexü̃ Deãcune rü Pegu Dauxcüraxü̃güne!
5 Erü Cori ya Tupana rü ñanagürü: Choma rü chorü numaxã chidexa ga yexguma poxcu namaxã chaxueguxgu ga yema togü ga nachixü̃anegü. Rü yexera yema Edóü̃chixü̃aneca̱x nixĩ i ngẽma poxcu yerü taãẽãcüma nügüaxü̃́ nanayauxgü ga chorü naane rü ñu̱xũchi chorü duü̃xü̃gü ga Iraétanüxü̃xü̃ nacugüeãcüma norü naanegüwa nayabuxgü ga nanetügüarü o rü nayagagü ga naxü̃nagü’ ” —ñanagürü.
6 —Rü ngẽmaca̱x, Pa Yatüx, ¡chauégagu Iraéanemaxã idexa rü ñanagürü nüxü̃!: “Cori ya Tupana rü ñanagürü pexü̃, Pa Ma̱xpǘnegü, rü Pa Máxpü̱xanexü̃gü, rü Pa Natügü rü Pa Doxonexü̃güx: ‘Choma rü poraãcüma namaxã chanu i ngẽma togü i nachixü̃anegü i pexna ngaicamagüxü̃ i pegu idauxcüraxü̃xü̃ rü pexü̃ cugüexü̃.
7 Rü ngẽmaca̱x i choma ya Cori ya Tupana rü namaxã chanaxuegu i ngẽma nachixü̃anegü i pexna ngaixcamagüxü̃ rü choma rü tá poraãcü chanaxãnexẽxẽ.
8 Natürü i pema, Pa Iraéanearü Ma̱xpǘnegüx, rü pewa tá narüxügü i muxü̃ma i nanetügü i taxü̃ i muarü oṍxü̃ naxca̱x i chorü duü̃xü̃gü i Iraétanüxü̃ i paxa tá pexca̱x woeguxü̃.
9 Rü choma ya Cori ya Tupana rü tá pexna chadau, Pa Ma̱xpǘnegüx, erü chorü duü̃xü̃gü rü tá wena pegu nixüanegü rü pegu nitoegü.
10 Rü choma rü tá chayamuxẽxẽ i ngẽma Iraétanüxü̃ i ngéma ãpatagüxü̃. Rü yima norü ĩanegü rü tá wenaxarü duü̃xü̃gümaxã nanapagü. Rü yima ĩanegü i ñu̱xma nachicagümare íyaxügüne rü tá wena nimexẽẽgü.
11 Pa Ma̱xpǘnegüx, choma rü tá pewa chayamuxẽxẽ i duü̃xü̃gü rü naxü̃nagü. Rü tá poraãcü nügü nimuxẽxẽ. Rü ngẽmaãcü noxrirüxü̃ tá namuxũchi i duü̃xü̃gü i Iraéanewa, rü ü̃paarü yexera tá mexü̃wa nangẽxmagü. Rü ngẽxguma ngẽma chaxüxgu rü tá nüxü̃ nicua̱xãchitanü nax choma yixĩxü̃ i Cori ya Tupana.
12 Pa Ma̱xpǘnegüx, choma rü tá wena pewa chanangexmagüxẽxẽ i chorü duü̃xü̃gü i Iraétanüxü̃. Rü nümagü rü tá wena perü yora nixĩgü rü tá pemaxã inacua̱xgü. Rü nanegü rü guxü̃gutáma pewa nangẽxmagü’ ” —ñanagürü.
13 Pa Ma̱xpǘnegüx, choma ya Cori ya Tupana rü pemaxã nüxü̃ chixu rü ñachagürü: —Duü̃xü̃gü nüxü̃ nixugü nax ípenagagüxü̃ ga nanegü ga daigu yuexü̃ rü yemaca̱x nagu̱x ga nanegü ga guma norü ĩanegü.
14 Natürü, Pa Ma̱xpǘnegüx, pema rü taxũtáma wena ípenagagü i duü̃xü̃gü rü pewa rü taxũtáma daigu nayue ga nanegü. Rü choma ya Cori ya Tupana nixĩ i nüxü̃ chixuxü̃ i ngẽma.
15 Rü marü tama chanaxwa̱xe nax pema, Pa Iraéanearü Ma̱xpǘnegücüã̱x, wena nüxü̃ pexĩnüexü̃ nax chixri pechiga yadexagüxü̃ i ngẽma togü i nachixü̃anegü. Rü marü taxũtáma wena nüxü̃ pexĩnüe nax pemaxã naguxchigagüxü̃. Erü ngẽxguma rü marü taxuxü̃táma daigu nayue i nanegü i duü̃xü̃gü nax ípenagagüxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
16 Rü nüma ga Cori ya Tupana rü wena chomaxã nidexa rü ñanagürü:
17 —Pa Yatüx, yema Iraétanüxü̃ rü yexguma norü naanewa nayexmagügu, rü nacüma ga chixexü̃ ga nagu namaxẽxü̃maxã nanaxãũxãchigü ga yema norü naane. Rü yema nacüma ga nagu namaxẽxü̃ rü cha̱u̱xca̱x rü naxãũãchi rü nawa chanaxoxéga.
18 Rü nümagü rü yema nachixü̃anewa namáetagü rü tupananetagüxü̃ nicua̱xüü̃gü. Rü yemaca̱x nixĩ ga chorü numaxã poxcu naxca̱x íchanguxẽẽxü̃.
19 Rü yema norü poxcu ga naxca̱x íchanguxẽẽxü̃ nagagu ga yema chixexü̃ ga naxügüxü̃, rü yemaca̱x nixĩ nax togü ga nachixü̃anegügu chanawoonexü̃.
20 Natürü yema Iraétanüxü̃ rü guxü̃ma ga guma ĩanegü ga nagu nawoonenewa rü chixri chauchiga nidexagü rü nanaxãũãchixẽxẽ ga chauéga i üünexü̃. Rü yemaca̱x ga yema togü ga duü̃xü̃gü rü ñanagürügü: “Ñaa nixĩ i Cori ya Tupanaarü duü̃xü̃gü, natürü nachixü̃anewa ínachoxü̃”, ñanagürügü —ñanagürü ya Tupana.
21 —Rü choxü̃́ nangu̱x ga yexguma nüxü̃ chada̱u̱xgu nax yema Iraétanüxü̃gagu chixri chauchiga yadexagüxü̃ ga yema togü ga nachixü̃anecüã̱x ga nawa nangugüxü̃ ga yema Iraétanüxü̃.
22 Rü ngẽmaca̱x, Pa Echequiéx, ngẽma Iraétanüxü̃maxã nüxü̃ ixu i ñaa ore: “Cori ya Tupana rü ñanagürü: ‘Choma rü tá pechixü̃aneca̱x pexü̃ chawoeguxẽxẽ, natürü tama ta̱xacürü mexü̃ nax pexüxü̃ca̱x tá nixĩ. Natürü tá pexü̃ chawoeguxẽxẽ nax ngẽmaãcü íchanapoxü̃xü̃ca̱x i chauéga i üünexü̃ i pegagu chixri nachiga yadexagüxü̃ i ngẽma togü i nachixü̃anegü i natanügu pewoonexü̃.
23 Rü choma rü ngẽma nachixü̃anegüpe̱xewa tá chanawe̱x nax naxüünexü̃ i chauéga i pema natanüwa chixri nachiga pidexagüxü̃. Rü ngẽxguma ngẽma chaxüxgu, rü ngẽma nachixü̃anegü rü tá nüxü̃ nicua̱xãchitanü nax choma chixĩxü̃ ya Cori ya Tupana. Rü choma ya Cori ya Tupana nixĩ i nüxü̃ chixuxü̃ i ngẽma.
24 Rü choma, Pa Iraétanüxü̃x, rü tá pexü̃ íchagaxü̃ nawa i guxü̃ma i ngẽma nachixü̃anegü i nawa pengẽxmagüxü̃. Rü wüxiwa tá pexü̃ chagagü, rü ñu̱xũchi perü naaneca̱x tá pexü̃ chawoeguxẽxẽ.
25 Rü dexá i mechiüxü̃wa tá pexü̃ chixaiyagü. Rü guxü̃ma i perü chixexü̃wa tá pexü̃ chingematagüxẽxẽ. Rü ngẽma nax tupananetagümaxã petupanaã̱xgüxü̃ rü tá nüxna pexü̃ chixĩgachixẽxẽ nax ngẽmaãcü aixcüma pimexü̃ca̱x.
26 Rü ngexwacaxü̃ne ya perü maxü̃ne rü ngexwaca̱xü̃xü̃ i pexãxẽ tá pexna chaxã. Rü tá pexna chanayaxu ya yima perü maxü̃ne ya ñoma nutarüxü̃ taixü̃ne. Rü wüxi ya maxü̃ne ya aixcüma mexü̃ne tá pexna chaxã.
27 Rü pewa tá chanamaxẽxẽ ya Chauãxẽ ya Üünecü nax ngẽmaãcü mea peyanguxẽẽxü̃ca̱x i chorü mugü.
28 Rü nagu tá pexãpatagü i ngẽma naane ga perü o̱xigüna chaxãxü̃. Rü pemax rü chorü duü̃xü̃gü tá pixĩgü rü choma tá nixĩ i perü Tupana chixĩxü̃.
29 Rü pexna tá chayaxũgachixẽxẽ i guxü̃ma i ta̱xacü i chixexü̃ i nagu perüxĩnüexü̃ rü perü maxü̃ chixexẽẽxü̃. Rü tá chayamuxẽxẽ i perü trigu. Rü taxũtáma wena taiya pexca̱x íchanguxẽxẽ.
30 Rü choma rü peanegüwa tá chanamuarü oõ̱xẽxẽ i penetügü nax ngẽmaãcü tama taiyagagu pexãneexü̃ca̱x nape̱xewa i ngẽma togü i nachixü̃anegü.
31 Rü ngẽxguma tá nüxna pecua̱xãchiegu ga yema pecüma ga chixexü̃ rü yema chixexü̃gü ga pexügüxü̃, rü pema rü tá pegücha̱xwa pexãnee naxca̱x ga yema pecadugü rü chixexü̃gü ga pexügüxü̃.
32 Rü choma ya Cori ya Tupana nüxü̃ chixu rü ñachagürü: Pa Iraétanüxü̃x, chanaxwa̱xe nax nüxü̃ pecuáxü̃ nax tama ta̱xacürü mexü̃ nax pexüxü̃gagu nixĩ i pexü̃ charüngü̃xẽẽxü̃. Rü ngẽmaca̱x tá pexãnee rü pexoegaãẽgü yerü chixexü̃ pexügü’ ” —ñachagürü.
33 Rü choma ya Cori ya Tupana rü pemaxã nüxü̃ chixu rü ñachagürü: —Ngẽxguma marü pexü̃ chimexẽẽgügu nawa i guxü̃ma i perü pecadugü, rü tá perü ĩanegüca̱x pexü̃ chawoeguxẽxẽ nax nawa pemaxẽxü̃ca̱x rü wena peyamexẽxẽgüxü̃ca̱x ya perü ĩanegü ya ichixegüne.
34 Rü ngẽma peanegü i ñu̱xma taxuxü̃ma i nanetü nawa rüxügüxü̃, rü pema rü tá wena nagu petoegü. Rü penetügü rü tá narüxügü rü guxü̃ma i duü̃xü̃gü i ngéma chopetüxü̃ rü tá nüxü̃ nadaugü.
35 Rü ngẽxguma i ngẽma duü̃xü̃gü rü tá ñanagürügü: “Ngẽma naane ga taxuxü̃ma i ta̱xacü nawa rüxügüxü̃ rü ñu̱xma rü ñoma Edéü̃arü naanerüxü̃ nixĩ. Rü guma ĩanegü ga nagu napogüegüne rü ñu̱xma rü ínipoxegugü rü duü̃xü̃gü rü nawa namaxẽ.
36 Rü ngẽxguma i ngẽma nachixü̃anegü i perü ngaixcamawa ngẽxmagüxü̃ rü tá nüxü̃ nicua̱xãchitanü nax choma ya Cori ya Tupana yixĩxü̃ nax wenaxarü chayamexẽẽxü̃ ga guma ĩanegü ga marü nagu napogüegüne rü ñu̱xũchi wena chanatoxü̃ ga yema naanegü ga marü ngẽnetügüxü̃. Rü choma ya Cori ya Tupana nixĩ i nüxü̃ chixuxü̃ i ngẽma rü aixcüma tá chayanguxẽxẽ” —ñanagürü.
37 Rü choma ya Cori ya Tupana rü ñachagürü: —Choma rü yexeraãcü tá nüxü̃ charüngü̃xẽxẽchigüama i ngẽma Iraétanüxü̃. Rü ngẽxguma ta̱xacüca̱x choxna nacagügu rü tá nüxna chanaxã. Rü tá chayamuxẽxẽ i norü duü̃xü̃gü ñoma carnérugü imuxü̃rüxü̃.
38 Rü nachicagü ga guma ĩanegü rü tá wena nagu nixüpatagü rü duü̃xü̃gümaxã tá nanapa. Rü tá namuxũchi i ngẽma duü̃xü̃gü ñoma carnérugü i Üpetüchigaarü petagu Yerucharéü̃wa gagüxü̃ nax ãmareca̱x nada̱i̱xü̃rüxü̃. Rü ngẽxguma i ngẽma duü̃xü̃gü rü tá nüxü̃ nicua̱xãchitanü nax choma yixĩxü̃ ya Cori ya Tupana —ñanagürü.
