Ezequiel 37:1-28
37 Rü nüma ga Cori rü chaugu naxǘxme̱x rü choxü̃ naporaxẽxẽ namaxã ga norü pora. Rü Naãxẽ ya Üünecü rü chomaxã inacua̱x, rü wüxi ga metachinüxü̃ ga naxchina̱xãmaxã napaxü̃wa choxü̃ naga.
2 Rü nüma ga Cori ya Tupana rü natanügu choxü̃ nixũgüchigüxẽxẽ ga guma naxchina̱xãgü ga yema metachinüxü̃wa namaxã napaxü̃ne. Rü namuxũchi, natürü nipagümare.
3 Rü yexguma ga nüma ga Cori ya Tupana rü choxna naca rü ñanagürü: —¿Cuyaxõxü̃ yixĩxü̃ i cumax, rü daa naxchina̱xãgü rü tá wena namaxẽxü̃? —ñanagürü. Rü yexguma ga chomax rü chanangãxü̃ rü ñachagürü: —Pa Corix, cuxicatama nixĩ i nüxü̃ cucuáxü̃ i ngẽma —ñachagürü.
4 Rü yexguma ga nüma ga Cori ya Tupana rü ñanagürü choxü̃: —¡Chauégagu namaxã idexa ya daa naxchina̱xãgü! Rü ñacugürü tá nüxü̃: “Pa Naxchina̱xãgü ya Ipagünex ¡rü iperüxĩnüe i ñaa Cori ya Tupanaarü ore!
5 Rü nüma ya Cori ya Tupana rü ñanagürü pexü̃: ‘Rü pegu tá chanaxücuxẽxẽ i maxü̃ nax pingü̃ãtanücüüxü̃ca̱x rü wena pemaxẽxü̃ca̱x.
6 Rü wena tá chanaxüxẽxẽ i perü tarumagü, rü tá pexü̃ chaxümachi, rü tá pexü̃ chaxüxcha̱xmüxü̃, rü tá pexna chanaxã i perü ngü̃ãcüxü nax wena pemaxẽxü̃ca̱x. Rü ngẽxguma i pema rü tá nüxü̃ picua̱xãchie nax choma chixĩxü̃ ya Cori ya Tupana’ ” —ñanagürü.
7 Rü yexguma ga choma ga Echequié rü yema Cori ya Tupana chomaxã nüxü̃ ixuxü̃ãcü guma naxchina̱xãgümaxã nüxü̃ chixu. Rü yexguma namaxã íchidexayane rü nüxü̃ chaxĩnü ga wüxi ga naga rü naxĩã̱xãchiane. Rü guma naxchina̱xãgü rü inanaxügü nax wüxichigü nügüca̱x naxĩxü̃.
8 Rü nüxü̃ chadau ga ngürü nax yatarumaã́xü̃ rü naxãmachixü̃ rü naxãxcha̱xmüxü̃. Natürü nangearü maxü̃ã̱xgüxü̃.
9 Rü yexguma ga nüma ga Cori ya Tupana rü ñanagürü choxü̃: —¡Chauégagu naxca̱x naca ya buanecü i maxü̃ nawa ngẽxmacü, rü ñacuxü̃ tá nüxü̃! “Pa Buanecü i Guxü̃cüwawa ne Ũcüx, ¡rü nua naxũ nax cunamaxẽxẽxẽxü̃ca̱x i ñaa naxü̃negü i yuexü̃!” —ñanagürü ga Cori ya Tupana.
10 Rü yexguma ga chomax rü Cori ya Tupanaégagu gumá buanecümaxã chidexa yema nüma choxü̃ namuxü̃rüxü̃. Rü gumá buanecü rü ínangu rü yema naxü̃negügu naxücu. Rü nüma ga yema naxü̃negü rü wenaxarü namaxẽ rü inachigü. Rü yemaacü namuxũchi ga yema írüdagüxü̃.
11 Rü yexguma ga Cori ya Tupana rü ñanagürü choxü̃: —Ngẽma Iraétanüxü̃ rü daa naxchina̱xãgürüxü̃ nixĩgü. Rü nügümaxã ñanagürügü: “Rü yixemagü rü ñoma naxchina̱xãgü ya ipagünerüxü̃ tixĩgü erü nataxuma i tórü ngü̃xẽẽruxü̃, rü ngẽmaca̱x tagutáma wenaxarü tachixü̃aneca̱x tawoegu”, ñanagürügü.
12 Natürü i choma rü cuxü̃ chamu nax chauégagu namaxã quidexaxü̃ ¡rü ñacurügü tá nüxü̃! “Nüma ya Cori ya Tupana rü ñanagürü pexü̃: ‘Pa Chorü Duü̃xü̃gü i Iraétanüxü̃x, rü tá pexü̃ íchanguxü̃xẽxẽ nawa i ngẽma nachixü̃anegü i nagu pepoxcuexü̃, rü tá perü naaneca̱x pexü̃ chawoeguxẽxẽ.
13 Rü ngẽxguma choma ngẽmaãcü pexü̃ charüngü̃xẽẽgu nax ípenguxü̃xü̃ca̱x nawa i ngẽma nachixü̃anegü, rü pemax, Pa Chorü Duü̃xü̃güx, rü tá nüxü̃ picua̱xãchitanü nax choma yixĩxü̃ i perü Cori ya Tupana.
14 Rü choma rü tá pexna chanamu i Chauãxẽ i Üünexü̃, rü pema rü tá íperüdagü. Rü tá perü naanewa tátama wena pexü̃ changexmagüxẽxẽ. Rü ngẽxguma tá nixĩ i nüxü̃ pecuáxü̃ nax choma ya Cori ya Tupana chixĩxü̃ i pemaxã nüxü̃ chixuxü̃ i ngẽma, rü choma nixĩ i pexü̃ chinguxẽẽxü̃. Rü choma ya Cori ya Tupana nixĩ i ngẽma ñachaxü̃’ ” —ñanagürü.
Yudáane rü Iraéane rü wena táxarü wüxitama i nachixü̃ane nixĩ
15 Rü nüma ga Cori ya Tupana rü chomaxã nidexa rü ñanagürü:
16 —Pa Yatüx, ¡wüxi ya naixmena̱xã nayaxu, rü yimámena̱xãgu naxümatü Yudátanüxü̃ rü ngẽma Iraétanüxü̃ i Yudáwaama ügüxü̃! ¡Rü ngẽmawena rü nai ya naixmena̱xã nayaxu rü yimámena̱xãgu naxümatü: Efraíü̃ i Namaxã Icuáxü̃ i Yúchetanüxü̃ rü Guxü̃ma i Ngẽma Iraétanüxü̃ i Efraíü̃waama Ügüxü̃!
17 Rü ngẽma taxre i naixmena̱xãgü ¡rü cuxme̱xmaxã wüxigu nade nax ngẽmaãcü wüxitama nax yixĩgüxü̃ca̱x!
18 Rü ngẽxguma cutanüxü̃ cuxna nacagügu rü ñagügu cuxü̃: “¡Tomaxã nüxü̃ ixu nax ta̱xacüchiga yixĩxü̃ i ngẽma!”
19 Rü ngẽxguma i cuma ¡rü ñaãcü namaxã nüxü̃ ixu! “Cori ya Tupana rü ñanagürü: ‘Choma rü tá cho̱xme̱xmaxã chanayaxu ya yima naixmena̱xã ya nagu naxümatüne Efraíü̃ i Namaxã Icuáxü̃ i Yúchetanüxü̃ rü Guxü̃ma i Iraétanüxü̃ i Efraíü̃waama Ügüxü̃, rü tá wüxigu chananu namaxã ya yima naixmena̱xã ya nagu naxümatüne Yudátanüxü̃ rü Ngẽma Iraétanüxü̃ i Yudáwaama Ügüxü̃. Rü ngẽmaãcü wüxitama ya naixmena̱xã tá nixĩ i cho̱xme̱xwa ngẽxmane.
20 Rü yima taxre ya naixmena̱xã ya quixügüégane, rü duü̃xü̃güpe̱xewa inawe̱x nax nüxü̃ nadaugüxü̃ca̱x’.
21 Rü ngẽmawena rü duü̃xü̃gümaxã nüxü̃ ixu i chorü ore i ñaxü̃: ‘Choma rü tá íchanagaxü̃ i ngẽma Iraétanüxü̃ nawa i ngẽma nachixü̃anegü ga nawa nagagüãxü̃. Rü wüxiwa tá chanagagü i ngẽma Iraétanüxü̃ i ñu̱xma guxü̃ma i nachixü̃anegu woonemarexü̃. Rü choma rü tá norü naanewa chanagagü.
22 Rü Iraéanearü mápü̱xanexü̃wa rü wüxitama i nachixü̃ane tá chayaxĩxẽxẽ, rü wüxi tátama nixĩ i norü ãẽ̱xgacü. Rü marü taxũtáma taxre i nachixü̃anegü nixĩ, rü taxũtáma taxre i ãẽ̱xgacügü namaxã inacua̱x.
23 Rü taxũtáma nüxü̃ nicua̱xüü̃gü i ngẽma tupananetachicüna̱xãgü i nawa chanaxoxégaxü̃. Rü taxũtáma chixexü̃ i nacümagu namaxẽ. Rü choma rü tá nawa íchananguxü̃xẽxẽ i ngẽma nacüma i naxca̱x choxü̃ naxoexü̃. Rü yema chixexü̃gü ga naxügüxü̃ rü tá nüxü̃́ nüxü̃ icharüngüma. Rü nümagü i Iraétanüxü̃ rü tá chorü duü̃xü̃gü nixĩgü rü choma rü tá norü Tupana chixĩ.
24 Rü yimá chorü duü̃ ya Dabítaxa tá nixĩ ya chorü duü̃xü̃güarü ãẽ̱xgacü ixĩcü. Rü nüxica tátama nixĩ i norü dauruxü̃ yixĩxü̃. Rü nümagü rü tá chauga naxĩnüe rü tá nagu namaxẽ i chorü mugü rü ucu̱xẽgü.
25 Rü nümagü rü nawa tá namaxẽ i ngẽma nachixü̃ane ga norü o̱xigü nawa maxẽxü̃ ga chorü duü̃ ga Acóbuna chaxãxü̃. Rü ngéma tá nixĩ i guxü̃gutáma nangẽxmagüxü̃ i nümagü, rü naxacügü, rü guxü̃ma i nataagü. Rü yimá chorü duü̃ ya Dabítaxa tá nixĩ ya guxü̃gutáma norü ãẽ̱xgacü ixĩcü.
26 Rü ngẽma chorü duü̃xü̃gümaxã tá ichaxuneta nax ngẽmaãcü aixcüma nataãẽgüxü̃ca̱x. Rü ngẽma chorü uneta rü tagutáma inayacua̱x. Rü choma rü tá nüxü̃ charüngü̃xẽxẽxü̃ nax yamuxü̃ca̱x. Rü natanüwa tá chanangexmaxẽxẽ ya chopata ya üünene nax guxü̃gutáma ngéma nangẽxmaechaxü̃ca̱x.
27 Rü choma rü natanüwa tá changexma. Rü choma tá nixĩ i norü Tupana chixĩxü̃ rü nümagü rü tá chorü duü̃xü̃gü nixĩgü.
28 Rü ngẽxguma yima chopata ya üünene guxü̃guma natanüwa ngẽxmagu, rü ngẽma togü i nachixü̃anegü rü tá nüxü̃ nicua̱xãchitanü nax choma yixĩxü̃ i nüxü̃ chaxunetaxü̃ i ngẽma Iraétanüxü̃ nax chorü duü̃xü̃gü yixĩgüxü̃ca̱x’ ” —ñanagürü.
