Ezequiel 38:1-23
38 38:1-2 Nüma ga Cori ya Tupana rü chomaxã nidexa rü ñanagürü: —Cumax, Pa Yatüx, rü ñu̱xma rü Magóxaneama nadawenü. Rü ngẽma Magóxanecüã̱x i Góx i Mécheanemaxã rü Tubáxanemaxã icuáxü̃, ¡rü chauégagu namaxã nüxü̃ ixu i norü poxcuchiga! —ñanagürü.
2 Nüü̃ nadau 38:1
3 ¡Rü namaxã nüxü̃ ixu i ñaa ore: —Cori ya Tupana rü ñanagürü cuxü̃: “Pa Góx, Pa Ãẽ̱xgacü ya Guxü̃ma ya Mécheanemaxã rü Tubáxanemaxã Icuácüx, choma rü cumaxã charüxuanü!
4 Rü choma rü tá taxwa cua̱xwa chichocuchi rü ngẽmaãcü tá cuxü̃ íchatúxuchi cuchixü̃anewa nax daiwa cuxũxü̃ca̱x namaxã i guxü̃ma i curü churaragü i nacutügu ĩxü̃ rü curü churaragü i mea ãxchiruxü̃ i cowarugüétügu ĩxü̃. Rü nümagü rü namuxũchi rü meama taragümaxã nixãxne, rü meama nixãxchiru. Rü guxü̃raxü̃xü̃ i poxü̃ruü̃gü nüxü̃́ nangẽxma.
5 Rü tá cuxü̃ ínixümücü i churaragü i Pérchiaanecüã̱xgü, rü Etiopíaanecüã̱xgü rü Líbiaanecüã̱xgü. Rü guxü̃ma i ngẽma churaragü rü tá nixãxne rü nixãpate̱xe rü tá nüxü̃́ nangẽxmagü i norü poxü̃ruü̃gü.
6 Rü cuxü̃ tá ta naxümücügü i guxü̃ma i Gómecüã̱xarü churaragü, rü Bex-togamácüã̱xarü churaragü i yáxü̃anexü̃wa ne ĩxü̃ i nórtewa. Rü ngẽmaãcü tá namuxũchi i ngẽma churaragü i cuwa ügüxü̃.
7 ¡Rü cugü namexẽxẽ rü namexẽxẽ i guxü̃ma i ngẽma churaragü i cuwa ügüxü̃! ¡Rü cuma namaxã inacua̱x!
8 Rü mucü ya taunecü ngupe̱xtüguwena rü cuxca̱x tá ínangu i wüxi i mu nax naxca̱x ícuyagoõchixü̃ca̱x i wüxi i nachixü̃ane ga daiwa yexmaxü̃ natürü i ñu̱xma rü wenaxarü marü mexü̃. Rü yema duü̃xü̃gü rü noxri muxü̃ma ga nachixü̃anegu nawoonemare rü norü naane rü poraãcü nangeãcu. Natürü wenaxarü Iraéane i máxpü̱xanexü̃ca̱x nawoegu. Rü ñu̱xma rü guxü̃ma i nümagü rü ngéma nangẽxmagü rü taãẽãcü ngéma namaxẽ.
9 Rü cumax, Pa Góx, rü ngẽma nachixü̃anewa tá cungu rü ñoma wüxi i caixanexü̃ i waemaxü̃rüxü̃ tá curü muxü̃ma i churaragü i muxü̃ma i nachixü̃anewa ne ĩxü̃maxã cuyapaxẽxẽ i ngẽma nachixü̃ane”, ñachagürü.
10 Rü Choma ya Cori ya Tupana rü cumaxã nüxü̃ chixu: “Rü ngẽma ngunexü̃gu rü chixexü̃ i ĩnü tá cuwa nangu.
11 Rü cuma rü tá ñacurügü: ‘Naxca̱x tá íchayagoõchi i wüxi i nachixü̃ane i turaxü̃ i tama nüxü̃ cuáxü̃ nax nügü ínapoxü̃xü̃ rü ngẽma norü duü̃xü̃gü rü taãẽãcü imaxẽxü̃ rü nagu rüxĩnüexü̃ nax taxuxü̃táma i ta̱xacü nüxü̃́ ngupetüxü̃. Rü guxü̃nema ya yima norü ĩanegü rü nataxuma i norü poxeguxü̃gü rü nataxuma i norü ĩã̱xgü rü nataxuma i norü wãxtaruü̃gü.
12 Rü guxü̃ma i ngẽma ngẽmaxü̃gü ya yima ĩanegüwa ngẽxmagüxü̃ rü tá chaugüxü̃́ chanade rü chayana. Rü tá naxca̱x íchayagoõchi ya yima ĩanegü ya ngexwaca yamexẽẽgüne i ngẽma duü̃xü̃gü ga noxri togü ga nachixü̃anegu woonexü̃ rü ñu̱xma wenaxarü nachixü̃aneca̱x woeguxü̃. Rü nümagü rü nüxü̃́ nangẽxma i muxü̃ma i wocagü rü ngẽmaxü̃gü, rü ñu̱xũchi nagu narüxĩnüe rü ñoma i naanearü ngãxü̃wa nixĩ i namaxẽxü̃’, ñacurügü.
13 Natürü, Pa Góx, ngẽma duü̃xü̃gü i Chabácüã̱xgü rü Dedáü̃cüã̱xgü, rü ngẽma taxetanüxü̃ ya ĩane ya Tárchixcüã̱xgü rü ñu̱xũchi ngẽma duü̃xü̃gü i náigü ya ĩanecüã̱xgü, rü tá cuxna nacagüe rü tá ñanagürügü: ‘¿Ẽ̱xna ngĩ́xwa nixĩ i nua cuxũxü̃? ¿Rü ẽ̱xna cunanutaque̱xe i curü churaragü nax ngẽmamaxã pegüaxü̃́ penadexü̃ca̱x i diẽrumü, rü úiru, rü naxü̃nagü rü togü i ngẽmaxü̃gü nax ngẽmaãcü peyanaxü̃ca̱x i muxü̃ma i mexü̃gü?’ ” ñanagürü.
14 Rü ngẽmaca̱x, Pa Yatü, chauégagu Góxmaxã nüxü̃ ixu rü ñacurügü: “Cori ya Tupana rü ñanagürü: ‘Pa Góx, ngẽxguma chorü duü̃xü̃gü i Iraétanüxü̃ taãẽãcü tá imaxẽgu rü cuma rü tá icuxũãchi nax naxca̱x ícuyagoõchixü̃ca̱x.
15 Rü cuchixü̃ane i nórtewa ngẽxmaxü̃wa tá icuxũãchi namaxã i ngẽma muxchixü̃ i curü churaragü i poraexü̃ rü churaragü i cowaruétügu ĩxü̃.
16 Rü tá naxca̱x ícuyagoõchi i chorü duü̃xü̃gü i Iraétanüxü̃. Rü cumax, Pa Góx, rü curü churaragümaxã tá cunapaxẽxẽ i norü naane ñoma wüxi i caixanexü̃ i waemaxü̃rüxü̃. Rü ngẽma nawa iyacuáxü̃ i ngunexü̃gügu rü tá cuxü̃́ chanatauxchaxẽxẽ nax naxca̱x ícuyagoõchixü̃ca̱x i chorü naane. Rü ngẽmaãcü tá chanaxü nax ngẽma togü i nachixü̃anegü cugagu choxü̃ cua̱xgüxü̃ca̱x i ngẽxguma nape̱xewa tá ichanawe̱xgu i chorü üüne’ ”, ñanagürü ya Tupana.
17 Rü choma ya Cori ya Tupana rü nüxü̃ chixu rü ñacharügü: “Pa Góx, cuchiga nixĩ ga chidexaxü̃ ga yexguma ü̃pa chorü duü̃xü̃gü i Iraéanearü orearü uruü̃güwa chidexagu. Rü yexguma ga nümagü rü nanaxunagügü nax Iraéanewa tá cuxü̃ chaxũxẽxẽxü̃ nax naxca̱x ícuyagoõchixü̃ca̱x i ngẽma Iraétanüxü̃”, ñachagürü.
Góxarü poxcu
18 Rü choma ya Cori ya Tupana, rü nüxü̃ chixu rü ñachagürü: “Ngẽxguma Góx Iraéaneca̱x íyagoõchigu, rü poraãcü tá chanu.
19 Rü chauégagu nüxü̃ chixu rü ngẽma ngunexü̃gu rü chorü numaxã tá nangẽxma i wüxi i taxü̃ i ĩã̱xãchiane i Iraéanewa.
20 Rü ngẽma ngunexü̃gu rü ngẽma choxnigü i márwa ngẽxmagüxü̃, rü werigü i dauxü̃wa ngẽxmagüxü̃, rü naeü̃gü i düraexü̃, rü naeü̃gü i waixü̃müanegu nügü itúgüxü̃ rü tá chope̱xewa nidu̱xruxe. Rü ngẽxgumarüxü̃ ta i guxü̃ma i duü̃xü̃gü i ñoma i naanecüã̱xgü rü tá chope̱xewa nidu̱xruxe. Rü yima ma̱xpǘnegü rü tá nabu, rü yima nutagü rü tá nidigü. Rü guxü̃ma i ngẽma ĩanegüarü poxeguxü̃gü rü tá niwa̱xgü.
21 38:21-22 Rü choma rü Góxca̱x tá íchananguxẽxẽ i naguxü̃raü̃xü̃ i guxchaxü̃gü i tá namuü̃xẽxẽxü̃. Rü da̱xaweanemaxã rü daimaxã tá chanapoxcu. Rü norü churaragüétügu rü ngẽma muxü̃ma i togü i duü̃xü̃gü i naxümücügüxü̃étügu tá poraãcü chanapuxẽxẽ, rü tá gáuxü̃püta naétü chanayixẽxẽ. Rü choma rü tá üxüema rü achúfre naétü chayixẽxẽ. Rü norü churaragü rü nügütátama taramaxã nadai. Rü choma ya Cori ya Tupana nixĩ i nüxü̃ chixuxü̃ i ngẽma.
22 Nüü̃ nadau 38:21
23 Rü ngẽmaãcü tá nixĩ i muxü̃ma i duü̃xü̃güxü̃ chanawéxü̃ nax choma rü guxü̃étüwa changexmaxü̃ rü chaxüünexü̃. Rü ngẽmaãcü tá chaugü nüxü̃ chacua̱xẽxẽ i duü̃xü̃gü. Rü nümagü rü tá nüxü̃ nicua̱xãchitanü nax choma yixĩxü̃ ya Cori ya Tupana” —ñachagürü.
