Ezequiel 39:1-29
39 —Cumax, Pa Yatüx, ¡Chauégagu Góxmaxã nüxü̃ ixu i norü poxcuchiga rü ñacurügü nüxü̃! “Cori ya Tupana rü ñanagürü, ‘Pa Góx ya Ĩanegü ya Méchemaxã rü Tubáxmaxã Icuáxex, choma rü chaugü chixu nax curü uanü chixĩxü̃.
2 Rü ngẽma naane i nórtearü yexerawa ngẽxmaxü̃wa rü tá cuxü̃ ne chaga, rü Iraéanearü máxpü̱xanexü̃wa tá cuxü̃ chaga.
3 Rü ñu̱xũchi tá chayabüye ya curü würa ya curü to̱xweme̱xẽwa cungexü̃ne. Rü tá chanayixẽxẽ ya yima chuxchigü ya curü tügüneme̱xẽwa cunaxü̃ne.
4 Rü cuma rü guxü̃ma i curü churaragü rü duü̃xü̃gü i cuxü̃ ümücügüxü̃maxã tá Iraéanearü máxpü̱xanexü̃gu peyue. Rü tá chanamu i naguxü̃raü̃xü̃ i ngurucugü rü naeü̃gü i düraexü̃ nax pexü̃ nangõ̱xgüxü̃ca̱x.
5 Rü guxãma i pema rü tá waixü̃müanegu piwaagümare. Rü ngẽma nixĩ i pemaxã chaxueguxü̃. Rü choma ya Cori ya Tupana nixĩ i nüxü̃ chixuxü̃ i ngẽma.
6 Rü tá chayagu i ngẽma naane i Magóx. Rü ngẽma duü̃xü̃gü i ngẽma nachixü̃anegü i márpechinüwa taãẽãcü maxẽxü̃ rü naétü tá chanayixẽxẽ ya üxüema. Rü ngẽxguma tá nixĩ i choxü̃ yacua̱xãchitanüxü̃ nax choma yixĩxü̃ ya Cori ya Tupana.
7 Rü ngẽmaãcü tá chorü duü̃xü̃gü i Iraétanüxü̃xü̃ nüxü̃ chacua̱xẽxẽ i chauéga i üünexü̃. Rü tama chanaxwa̱xe nax chixri nachiga yadexagüechaxü̃ i chauéga. Rü ngẽma togü i nachixü̃anegü rü tá nüxü̃ nacua̱xgü nax choma ya Cori ya Tupana rü Iraéanewa ichanawéxü̃ i chorü üüne.
8 Rü ngẽma ngunexü̃ rü paxa tá ínangu. Rü choma ya Cori ya Tupana nixĩ i nüxü̃ chixuxü̃ i ngẽma.
9 Rü ngẽma duü̃xü̃gü i Iraéanearü ĩanegücüã̱x rü tá cuxca̱x ínachoxü̃, Pa Góx, rü tá nanade ya cuxnegü, rü curü poxü̃ruü̃gü, rü curü würagü, rü curü chuxchigü, rü curü wocaegü rü tá ínanagu. Rü ngẽmaãcü cuxnegümaxã tá 7 ya taunecüca̱x nüxü̃́ nangẽxma i norü üxü.
10 Rü ngẽxguma i ngẽma Iraétanüxü̃ rü taxuca̱xtama norü üxüca̱x naxoegaãẽgü. Rü taxuca̱xtama naanegüwa rü naixnecüwa norü üxüwa naxĩ, erü guxü̃nema ya yima cuxnegü rü tá üxüwa nüxü̃́ name. Rü ngẽmaãcü i ngẽma Iraétanüxü̃ rü tá nüxí pexna nanapuxü̃ i perü ngẽmaxü̃gü yema pema norü yemaxü̃gü nüxna pepuxü̃xü̃rüxü̃. Rü choma ya Cori ya Tupana nixĩ i nüxü̃ chixuxü̃ i ngẽma, rü aixcüma tá ngẽmaãcü ningu’ ” —ñanagürü.
Góxarü táchiga
11 Rü ñanagürü ta: —Ngẽma ngunexü̃gu rü tá Góxna chanaxã i wüxi i nachica nax ngẽmagu natáxü̃ca̱x. Rü ngẽma nachica rü Iraéanewa tá nangẽxma nawa i ngẽma metachinüxü̃ i már arü to̱xma̱xtawa ngẽxmaxü̃ i nawa nachopetüxü̃ i duü̃xü̃gü i éstewaama ĩxü̃. Rü ngẽma nax namuxũchixü̃ i naxü̃negü i ngẽma Góxarü churaragü i yuexü̃ rü taxucürüwa ngéma nachopetü i duü̃xü̃gü. Rü ngẽxma tá nixĩ i nata̱xgüãxü̃ i Góx rü ñu̱xũchi guxü̃ma i norü churaragü. Rü tá nanaxüégagü Metachinüxü̃ i Góxarü Churaragü Nagu Ta̱xgüxü̃.
12 Rü ngẽma Iraétanüxü̃ rü 7 ya tauemacü tá nixĩ i ta̱xgüwa napuracüexü̃ nax ngẽmaãcü tama Tupanape̱xewa naxãũãchixü̃ca̱x i nachixü̃ane.
13 Rü guxü̃ma i ngẽma Iraétanüxü̃ rü tá ngẽma yuexü̃arü ta̱xwa napuracüe. Rü norü taãxẽ tá nixĩ nax nata̱xgüãxü̃. Rü ngẽma ngunexü̃gu rü tá ichanawe̱x i chorü pora. Rü choma ya Cori ya Tupana nixĩ i nüxü̃ chixuxü̃ i ngẽma.
14 Rü ngẽxguma marü nangupetügu ya yima 7 ya tauemacügü, rü tá nanamugü i wüxitücumü i duü̃xü̃gü nax guxü̃ma i Iraéanegu íyachoeguxü̃ca̱x rü ínata̱xgüãxü̃ca̱x ya yima duüxü̃güchina̱xãgü ya nüxü̃ iyangaugüne. Rü ngẽmaãcü tá nanaxügü nax Tupanape̱xewa namexẽxẽgüãxü̃ca̱x i norü naane.
15 Rü ngẽxguma wüxi i ngẽma duü̃xü̃gü namaxã iyarüxũxgu i duü̃xẽchina̱xã rü naxü̃tagu tá nanapu i wüxi i cua̱xruxü̃ nax ngẽmawa nüxü̃ nacua̱xgüxü̃ca̱x i ngẽma táetatanüxü̃ i ngẽxguma ngéma nangugügu. Rü ngẽma táetatanüxü̃ tá nixĩ i nata̱xgüxü̃ nagu i ngẽma Metachinüxü̃ i Góxarü Churaragü Nagu Ta̱xgüxü̃.
16 Rü ngẽmaãcü tá nixĩ i Tupanape̱xewa namexẽxẽgüaxü̃́ i nachixü̃ane —ñanagürü. Rü ngẽma nachica i Metachinüxü̃ i Góxarü Churaragü Nagu Ta̱xgüxü̃wa tá nangẽxma ya wüxi ya ĩane ya Churaragügu ãégane.
17 Rü Cori ya Tupana rü chomaxã nidexa rü ñanagürü: —Pa Yatüx, ¡namaxã nüxü̃ ixu i guxü̃ma i ngurucugü rü guxü̃ma i naeü̃gü i düraexü̃ i guxü̃wama ne ĩxü̃ nax Iraéanearü máxpü̱xanexü̃gu nangutaqu̱exegüxü̃ca̱x! Erü ngẽxma tá chanadai i Iraéanearü uanügü rü ngẽmaãcü tá ngẽma ngurucugüca̱x rü naeü̃güca̱x chanamexẽxẽ i wüxi i taxü̃ i õna nax nangõ̱xgüãxü̃ca̱x i namachi rü yaxaxgüãxü̃ca̱x ya nagü.
18 Rü ngẽma ngurucugü rü naeü̃gü rü ñoma carnérugümachi, rüe̱xna carnéruxacügümachi, rüe̱xna chíbugümachi, rüe̱xna wocaxacügü i Bacháü̃anegu íngüexü̃machi nangõ̱xgüxü̃rüxü̃ tá nanangõ̱xgü i ngẽma churaragümachi rü tá nayaxagü ya nagü i ñoma i naanearü ãẽ̱xgacügü.
19 Rü ngẽma õna i naxca̱x tá chaxüxü̃wa rü tá nanangõ̱xgü i chíxü̃ ñu̱xmatáta nawa yada̱xawee. Rü ñu̱xũchi tá nayaxagü ya nagü ñu̱xmatáta nawa nangãxe.
20 Rü naxca̱x tá chanaxü i wüxi i õna i taxü̃ i cowarugümachi, rü churaragü i cowaruétügu ĩxü̃machi rü naguxü̃raü̃xü̃ i togü i churaragümachi nax ngẽma ngurucugü rü naeü̃gü nangõ̱xgüxü̃ca̱x ñu̱xmatata mea nangãxpütüwegü. Rü choma ya Cori ya Tupana nixĩ i nüxü̃ chixuxü̃ i ngẽma.
21 Rü ngẽmaãcü tá nixĩ i ngẽma togü i nachixü̃anegüpe̱xewa ichanawéxü̃ i chorü pora. Rü guxü̃ma i ngẽma togü i nachixü̃anegü rü tá nüxü̃ nadaugü nax ñuxãcü tá nüxna naxca̱x chacaxü̃ i norü chixexü̃gü ga inaxügüxü̃chiga, rü ñuxãcü poxcu naxca̱x íchanguxẽẽxü̃.
22 Rü yema ngunexü̃wena rü nüma i Iraétanüxü̃ tá nüxü̃ nicua̱xãchitanü nax choma chixĩxü̃ ya norü Cori ya Tupana.
23 Rü ngẽma togü i nachixü̃anegü rü tá nüxü̃ nicua̱xãchitanü nax yema Iraétanüxü̃ rü norü chixexü̃ ga naxügüxü̃gagu yixĩxü̃ nax to ga nachixü̃anewa nagagüxü̃. Rü choma rü nüxna chaxãca̱xwe̱xmare, yerü tama aixcüma choxü̃ nangechaxü̃gü. Rü yemaca̱x nüxna chixũgachi nax norü uanügü taramaxã daigu nada̱i̱xü̃ca̱x.
24 Rü yema nixĩ ga norü natanügü naxca̱x ga norü chixexü̃gü ga chope̱xewa naxügüxü̃ rü yema nax tama chauga naxĩnüexü̃. Rü yemaca̱x ga choma rü nüxna chaxãca̱xwe̱xmare.
Iraéane rü wena táxarü nagu narüme
25 Natürü i ñu̱xma i choma ya Cori ya Tupana rü nüxü̃ chixu rü ñachagürü: Ñu̱xma rü tá choxü̃́ naxãũxãchitümüxü̃gü i guxü̃ma i ngẽma Iraétanüxü̃ i Acóbutaagü ixĩgüxü̃. Rü ñu̱xma rü tá yáxna namaxã chaxĩnü nax ngẽmaãcü nüxü̃ yacua̱xüü̃güxü̃ca̱x i chauéga i üünexü̃.
26 39:26-27 Rü ngẽma Iraétanüxü̃ i togü i nachixü̃anegüwa ngẽxmagüxü̃ i norü uanügüchixü̃anegüwa rü wena tá wüxiwa chanagagü. Rü ngẽxguma rü taãẽãcü tá norü naanewa nangẽxmagü, rü taxúetama texe ítanabai̱xgügü. Rü ngẽmaãcü tá ichanawe̱x i chorü pora rü chorü üüne nax muxü̃ma i nachixü̃anegü nüxü̃ nadaugüxü̃ca̱x. Rü ngẽma Iraétanüxü̃ rü tá nüxü̃ narüngümae ga yema poxcu ga ü̃pa norü chixexü̃gagu naxca̱x íchanguxẽẽxü̃.
27 Nüü̃ nadau 39:26
28 Rü choma nixĩ ga togü ga nachixü̃anegüwa chamugüxü̃ ga yema Iraétanüxü̃ nax yexma napoxcuexü̃ca̱x. Rü chomatátama nixĩ i wena norü naaneca̱x chanawoeguẽẽxü̃. Rü taxúexü̃táma togü i nachixü̃anewa tüxü̃ chayaxüxẽxẽ. Rü ngẽxguma i ngẽma Iraétanüxü̃ rü tá nüxü̃ nicua̱xãchitanü nax choma yixĩxü̃ i norü Cori ya Tupana.
29 Rü tagutáma wena nüxna chaxãca̱xwe̱x, erü ngẽma Iraétanüxü̃tanüwa tá chanamu i Chauãxẽ. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.
