Ezequiel 4:1-17
4 Rü Cori ya Tupana rü ñanagürü: —Cumax, Pa Echequiéx, ¡rü nayaxu ya wüxi ya ladriyu rü cugüpe̱xegu naxǘ! ¡Rü yimagu naxüxchicüna̱xã ya yima ĩane ya Yerucharéü̃!
2 ¡Rü ngẽmawena rü yima ĩanechicüna̱xãcüwagu naxüxchicüna̱xã i churaragü rü naxnegü i dairuxü̃ ixĩgüxü̃! ¡Rü naxüxchicüna̱xã i norü poxeguxü̃ i norü guxü̃cüwawa! ¡Rü naxüxchicüna̱xã i wüxi ya toxṍõne nax ngẽmaãcü yima ĩane ya ípoxegunewa dauxü̃ naxĩgüxü̃ca̱x i ngẽma churaragü!
3 ¡Rü ngẽmawena rü nayaxu i wüxi i fierutachinü! ¡Rü yima ĩanechicüna̱xãpe̱xegu rü ñu̱xũchi cugüpe̱xearü ngãxü̃gu naxǘ i ngẽma fierutachinü ñoma wüxi i naxtapü̱xrüxü̃! Rü cuma rü ñoma ĩaneca̱x ícuyagoõchixü̃rüxü̃ tá cugü quixĩxẽxẽ. Rü guxü̃ma i ngẽma rü Iraétanüxü̃ca̱x rü wüxi i cua̱xruxü̃ tá nixĩ.
4 ¡Rü curü to̱xwecüwamaxã ínaca nax ngẽmaãcü cuyangéxü̃ca̱x i ngẽma Iraéanecüã̱xgüarü chixexü̃gü! Rü ngẽxguma curü to̱xwecüwamaxã icucaxgu rü cugüétü tá cuyange i norü chixexü̃gü i ngẽma Iraéanecüã̱xgü.
5 Rü 390 i ngunexü̃ tá nixĩ i curü to̱xwecüwamaxã icucaxü̃. Rü ngẽma 390 i ngunexü̃ i nagu ngẽxma cucaxü̃ rü nachiga nixĩ ga guma 390 ga taunecü ga Iraéanecüã̱xgü pecadu nagu ügücü.
6 Rü ngẽxguma marü cuyanguxẽẽgu i ngẽma ngunexü̃gü rü curü tügünecüwamaxã tá ícuca i 40 i ngunexü̃. Rü ngẽmaãcü tá cugüétü cuyange i norü chixexü̃gü i ngẽma Yudáanecüã̱xgü. Rü ngẽma 40 i ngunexü̃ i nagu ngẽxma cucaxü̃ rü nachiga nixĩ ga guma 40 ga taunecügü ga Yudáanecüã̱xgü pecadu nagu ügücü.
7 Rü ngẽmawena rü tá naxca̱x cudauegu ya Yerucharéü̃ ya norü uanügü nüxü̃ íchomaeguãchine. Rü curü numaxã tá yima ĩanexü̃ cuwe̱xgüchacüxü rü chauégagu tá poxcu namaxã cuxuegu.
8 Rü dücax, cuxü̃ tá naxpanaxãmaxã china̱i̱x nax ngẽmaãcü tama nu ne cunaxũxü̃ca̱x, ñu̱xmatáta yangu i ngẽma ngunexü̃ i nagu tá ngúxü̃ quingexü̃.
9 ¡Rü tanayaxu i trigu, rü chebáda, rü quínua, rü abéna, rü ñu̱xũchi ábagü, rü lentéyagü! ¡Rü guxü̃ma i ngẽma rü wüxigu tá cunaxõẽ i wüxi i naxpáü̃wa! Rü ñu̱xũchi ngẽmawa tá curü paũ cuxü. Rü ngẽma tá nixĩ i cungṍxü̃ i ngẽma 390 i ngunexü̃ i nagu curü to̱xwecüwamaxã icucaxü̃gu.
10 4:10-11 Rü ngẽma ora i nagu cuxunetaxü̃gu tá cunangõ̱x i ngẽma cuwemü. Rü wüxichigü i ngunexü̃gu tá cunangõ̱x i 250 gramu i õna. Rü ngẽma dexá rü ngẽma ora i nagu cuxunetaxü̃gu tá cuyaxaxü. Rü wüxi i ngunexü̃gu tá cuyaxaxü i ngãxü̃ i litru i dexá.
11 Nüü̃ nadau 4:10
12 Rü ngẽma cuwemü rü paũ i chebádanaxca̱x tá nixĩ i duü̃xü̃xü̃wa iguxü̃. Rü guxü̃ i duü̃xü̃güpe̱xewa tá nixĩ i cuyaguxü̃ —ñanagürü choxü̃ ga Cori ya Tupana.
13 Rü ñu̱xũchi nüma ga Cori ya Tupana rü ñanagürüama choxü̃: —Rü ngẽxgumarüxü̃ tá nixĩ i Iraétanüxü̃ i õna i ãũãchixü̃ tá nangõ̱xgüxü̃ nawa i ngẽma nachixü̃anegü i nagu tá chanawoonexü̃ —ñanagürü choxü̃.
14 Rü choma rü chanangãxü̃ rü ñacharügü nüxü̃: —Natürü, Pa Corix, choma rü taguma nüxü̃ chingõ̱gü i ta̱xacü i ãũãchixü̃, rü taguma chanangõ̱x i wüxi i naeü̃ i nüechama yuxü̃machi rüe̱xna aigü imaxgüxü̃machi, rü bai nax ñuxgu nüxü̃ changõ̱xnetaxü̃ i namachi i ãũãchixü̃ —ñachagürü nüxü̃.
15 Rü yexguma ga nüma rü choxü̃ ñanagürü: —Name i ngẽma nüxü̃ quixuxü̃ rü ngẽmaca̱x cuxü̃ chamu nax wocaü̃wa cuyaguxü̃ i curü paũ rü tama i duü̃xü̃xü̃wa —ñanagürü choxü̃.
16 Rü yemawena rü choxü̃ ñanagürü: —Yerucharéü̃arü ĩanewa rü tá chanatauxẽxẽ i õnagü. Rü ngẽma õna rü nügü tá nayaxíxra rü ngẽmaãcü tá ngechaü̃ãcü nanangõ̱xgü i duü̃xü̃gü. Rü ngẽma dexá rü ngugügumarexü̃ tá nixĩ, rü oegaãẽãcüma tá nayaxagü.
17 Rü tá nataxu i dexá rü õna. Rü duü̃xü̃gü rü muü̃ãcü tá nügü narüdaunü. Rü ngẽma norü pecadugügagu tá nituraetanü rü niyuetanü —ñanagürü choxü̃.
