Ezequiel 40:1-49
40 40:1-2 Rü yexguma 25 ga taunecü ínguxgu nax Babiróniawa tayexmagüxü̃ rü yexgumarüxü̃ ta 14 ga taunecü marü ningu nax Yerucharéü̃ yapugüxü̃ ga Babiróniacüã̱x. Rü gumá tauemacü ga taunecü namaxã ixügücüarü 10 ga ngunexü̃gu rü nüma ga Cori rü chaugu naxǘxme̱x rü chango̱xetü. Rü yema chorü ngo̱xetüwa Iraéanewa choxü̃ naga. Rü Iraéanewa rü wüxi ga ma̱xpǘne ga máchanenegu choxü̃ nachixẽxẽ. Rü yéma rü súrguama chadawenü, rü nüxü̃ chadau ga ĩpatagü ga itaxü̃ne. Rü chauxca̱x rü wüxi ga ĩane ga taxü̃nerüxü̃ nixĩ.
2 Nüü̃ nadau 40:1
3 Rü Cori ya Tupana rü guma ĩanewa choxü̃ naga, rü guma ĩanewa nüxü̃ chadau ga wüxi ga yatü ga nabróũchewa üxü̃raü̃xü̃. Rü ĩã̱xgu nachi, rü naxme̱xwa nanange ga wüxi ga ãnütaxü̃ ga ngugüruxü̃ ga línuchinaxca̱x, rü ñu̱xũchi wüxi ga naixmena̱xã ga ngugüruxü̃ ixĩxü̃ne.
4 Rü gumá yatü rü chomaxã nidexa rü ñanagürü: —¡Mea inadawenü rü mea choxü̃ irüxĩnü rü mea nangugü i guxü̃ma i ngẽma tá cuxü̃ chawéxü̃, erü nüma ya Tupana rü nua cuxü̃ naga nax nüxü̃ cudauxü̃ca̱x i ngẽma tá cuxü̃ chawéxü̃! ¡Rü ngẽxguma marü cuxü̃ chanawe̱xguwena rü ñu̱xũchi Iraétanüxü̃maxã nüxü̃ ixu i guxü̃ma i ngẽma nüxü̃ cudauxü̃chiga! —ñanagürü.
Tupanapataarü poxeguxü̃arü ücuchica i éstewaama üxü̃
5 Rü Tupanapata ga taxü̃nearü düxétüwa rü nayexma ga wüxi ga naxtapü̱x ga Tupanapataxü̃ íyadaeguxü̃. Rü guma yatüme̱xẽwa yexmaxü̃ ga ngugüruxü̃ rü 3 metru nixĩ ga norü ma̱x. Rü yexguma nanguãgu ga yema naxtapü̱x rü 3 metru nixĩ ga norü yacü, rü 3 metru nixĩ ga norü máchane
6 Rü yemawena ga yema yatü rü yema ücuchica ga éstewaama üxü̃wa naxũ. Rü guma toxṍõnewa naxĩnagü rü nanangu ga yema ücuchicaarü tatachinü. Rü nüxü̃́ nayexma ga 3 metru ga norü tatachinü.
7 Rü nacüwagüwa ga yema ücuchica rü nüxü̃́ nayexma ga norü dauruü̃güarü ucapugü. Rü wüxichigü ga yema ucapugü rü 3 metru nixĩ ga norü ma̱x, rü 3 metru nixĩ ga norü tachiã. Rü yema ucapugü rü 2 metruarü ngãxü̃ nixĩ ga nügüna nayáxü̃guxü̃. Rü yema ücuchica iyacuáxü̃wa rü 3 metru nixĩ ga norü tachiã rü yéma nayexma ga wüxi ga ucapu ga ngu̱xẽẽchica. Rü yema ücuchica iyacuáxü̃wa nüxü̃ tadau ga guma Tupanapata ga taxü̃ne.
8 40:8-9 Rü gumá yatü rü nanangu ga yema ucapu ga ngu̱xẽẽchica ga guma Tupanapata ga taxü̃nexü̃ nawa idauxü̃ rü yema rü 4 metru nixĩ ga norü taxmachiã. Rü yéma nayexma ga taxre ga caxtagü ga wüxi ga metru ixĩgüne ga norü yaxcü.
9 Nüü̃ nadau 40:8
10 Rü yema naxã̱xtüarü ĩã̱x ga nawa ixücuxü̃ ga éstewa yexmaxü̃ rü norü wüxicüwawachigü rü nüxü̃́ nayexma ga tomaepü̱x ga ucapugü. Rü guxü̃ma ga yema ucapugü rü nawüxigumare ga norü taxmachiãwa. Rü guma caxtagü ga wüxicüwawa yexmagüne rü wüxi ga metru ixĩgüne ga norü yaxcü.
11 Rü yemawena ga gumá yatü rü nanangu ga yema ücuchica ga aixepewa iyacuáxü̃wa. Rü 5 metru nixĩ ga norü tachiã rü 6 metruarü ngãxü̃ nixĩ ga norü ma̱x.
12 Rü yema ücuchicaarü aixepewa yexmagüxü̃ ga ucapugüpe̱xewa nayexma ga wüxi ga norü poxeguxü̃ ga ínuxtapüxü̃ ga 50 chentímetru ga norü máchane. Rü yema ucapugü rü wüxichigü nüxü̃́ nayexma ga 3 metru ga norü taxmachiã, rü 3 metru ta ga norü ma̱xmachiã.
13 Rü yemawena rü nanangu ga norü taxmachiã ga yema ücuchica. Rü yexguma nanguãgu, rü guxü̃ma ga yema ucapugü ga nügüarü to̱xma̱xtawa ixüchigüxü̃maxã nixĩ ga nanguãxü̃. Rü guxü̃wama rü 12 metruarü ngãxü̃ nixĩ ga norü taxmachiã.
14 Rü yemawena rü nanangu ga yema ucapu ga ngu̱xẽẽchica ga yema ücuchica iyacuáxü̃wa yexmaxü̃. Rü 10 metru nixĩ ga norü taxmachiã. Rü yexguma marü nüxü̃ ingupetügu ga yema ücuchica iyacuáxü̃wa rü natauxcha nax norü guxü̃a̱xtüwa ixũxü̃ ga guma Tupanapata.
15 Rü yexguma nanguãgu ga yema ücuchicaxü̃, rü norü ügüwa inanaxügü nax nanguãxü̃ ñu̱xmata yema aixepe iyacuáxü̃wa nangu, rü guxü̃wama 25 metru nixĩ ga norü ma̱x.
16 Rü yema ucapugü ga yema ücuchicaarü guxü̃cüwawa yexmagüxü̃ rü norü caxtagü nüxü̃́ nayexma ga norü beü̃tánagü ga fierumena̱xãnaxca̱x. Rü yexgumarüxü̃ ta ga yema ucapu ga ngu̱xẽẽchica ga iyacuáxü̃wa yexmaxü̃ rü aixepewa nüxü̃́ nayexma ga norü beü̃tánagü ga fierumena̱xãnaxca̱x. Rü yema beü̃tánagü rü palmerachicüna̱xãgümaxã nanga̱xãẽgü.
Naa̱xtü ga düxétüwaama yexmaxü̃
17 Rü yemawena ga gumá yatü rü naa̱xtü ga düxétüwaama yexmaxü̃wa choxü̃ naga. Rü yema naa̱xtü rü nacüwawa nutatachinügümaxã ínachauxegu. Rü yéma nacüwawa nayexma ga 30 ga ucapugü.
18 Rü yema nutatachinügümaxã íchauxeguxü̃ rü yema ücuchicaxü̃ narüñaxtügumae, rü yema ücuchicacüwana nayaxũ. Rü norü tatachinü ga yema íchauxeguxü̃ rü namaxã nawüxigu ga yema ücuchicaarü ma̱x.
19 Rü gumá yatü nanangu nax ñuxre ga metru yixĩxü̃ ga naa̱xtü ga yema nüxíraxü̃ ga ücuchica iyacuáxü̃wa inanaxügü rü ñu̱xmata yema ücuchica ga aixepewa yexmaxü̃wa nangu. Rü 50 ga metru nixĩ ga naa̱xtü ga aixepewa üxü̃. Rü yema naa̱xtü ga nórtewa yexmaxü̃ rü yema naa̱xtü ga éstewa yexmaxü̃maxã nawüxigu ga norü tatachinü.
Tupanapataarü poxeguxü̃arü ücuchica i nórtewaama üxü̃
20 Rü nayexma ta ga wüxi ga ücuchica ga nórtewa üxü̃. Rü yema ücuchica rü naa̱xtü ga düxétüwa yexmaxü̃wa nangu. Rü gumá yatü rü nanangu ga yema ücuchicaarü ma̱x rü norü tachiã.
21 Rü norü wüxicüwawachigü rü nayexma ga tomaepü̱x ga ucapugü. Rü nayexma ta ga norü caxtagü rü norü ucapu ga ngu̱xẽẽchica. Rü yema ücuchica ga nórtewa üxü̃ rü norü ma̱x rü norü tachiã rü nawüxigu namaxã ga yema ücuchica ga éstewa üxü̃. Rü yemaacü nüxü̃́ nayexma ga 25 metru ga norü ma̱x rü 12 metruarü ngãxü̃ ga norü tatachinü.
22 Rü yema ücuchica ga nórtewa üxü̃ rü norü ucapu ga ngu̱xẽẽchica rü norü beü̃tánagü rü norü palmerachicüna̱xãgü rü nawüxigu namaxã ga yema éstewa üxü̃ ga ücuchicaarü ucapu ga ngu̱xẽẽchica rü norü beü̃tánagü rü norü palmerachicüna̱xãgü. Rü nayexma ta ga norü toxṍõne ga 7 ga chinagü nüxü̃́ yexmane. Rü nayexma ta ga norü ucapu ga ngu̱xẽẽchica ga aixepewa yexmaxü̃
23 Rü yema éstewaama üxü̃ ga ücuchicarüxü̃, nayexma ga Tupanapataarü ücuchica ga nórtewaama üxü̃. Rü yema ücuchicaarü to̱xma̱xtawa nayexma ga to ga ücuchica ga naa̱xtü ga aixepewa yexmaxü̃wa nadaxü̃. Rü gumá yatü inanangu ga norü tatachinü ga yema naa̱xtü ga yema taxre ga ücuchicagüarü ngãxü̃wa üxü̃. Rü 50 ga metru nixĩ ga norü tatachinü.
Tupanapataarü poxeguxü̃arü ücuchica i súrwaama üxü̃
24 Rü yemawena ga yema yatü rü súrwaama choxü̃ naga. Rü yéma nayexma ga to ga ücuchica. Rü inanangu ga norü caxtagü rü norü ucapugü rü norü ngu̱xẽẽchicagü. Rü norü ta ga yema caxtagü rü norü ucapugü rü norü ngu̱xẽẽchicagü rü namaxã nawüxigumare ga yema to ga ücuchicagü.
25 Rü napata ga yema ücuchica rü yema togü ga ücuchicagürüxü̃ nüxü̃́ nayexma ga norü ucapu ga ngu̱xẽẽchica rü norü beü̃tánagü ga norü guxü̃cüwawa. Rü guxü̃wama rü 25 metru nixĩ ga norü ma̱x rü 12 metruarü ngãxü̃ nixĩ ga norü tachiã.
26 Rü nüxü̃́ nayexma ta ga norü toxṍõne ga 7 ga chinagü nüxü̃́ yexmane. Rü nayexma ta ga norü ngu̱xẽẽchica ga aixepewa yexmaxü̃. Rü wüxichigü ga norü caxtagü rü guxü̃cüwawa palmerachicüna̱xãgümaxã nanga̱xãxẽ
27 Rü yema naa̱xtü ga aixepewaama yexmaxü̃ rü ta nüxü̃́ nayexma ga ücuchica ga súrwa üxü̃. Rü gumá yatü inanangu ga naa̱xtü ga yema ücuchica ga düxétüwa üxü̃ rü yema ücuchica ga aixepewa üxü̃arü ngãxü̃wa üxü̃ ga naa̱xtü. Rü 50 metru nixĩ ga norü tatachinü.
Ücuchica ga súrwaama yexmaxü̃
28 Rü yema súrwa yexmaxü̃ ga ücuchica ga nawa ixücuxü̃ naxca̱x ga yema naa̱xtü ga aixepewa yexmaxü̃wa choxü̃ naga. Rü inanangu ga yema ücuchica. Rü yema togü ga ücuchicagüarü ta nüxü̃́ nayexma.
29 40:29-30 Rü norü ucapugü rü norü ucapu ga ngu̱xẽẽchica rü norü caxtagü rü yema togü ga ücuchicagüarü ucapugü, rü ucapu ga ngu̱xẽẽchica, rü norü caxtagüarü ta nüxü̃́ nayexmagü. Rü napata ga yema ücuchica rü norü ucapu ga ngu̱xẽẽchica rü guxü̃ma nüxü̃́ nayexma ga norü beü̃tánagü. Rü norü ma̱x rü 25 metru nixĩ rü norü taxmachiã rü 12 metruarü ngãxü̃ nixĩ.
30 Nüü̃ nadau 40:29
31 Rü yema ücuchicaarü ucapu ga ngu̱xẽẽchica rü naa̱xtü ga düxétüwa üxü̃waama nixĩ ga nayexmaxü̃. Rü guma norü caxtagü rü palmerachicüna̱xãgümaxã nanga̱xãẽgü. Rü nape̱xewa nayexma ga norü toxṍõne ga 8 ga chinagü nüxü̃́ yexmane.
Naa̱xtü ga aixepewaama yexmaxü̃
32 Rü yexguma ga yema yatü rü yema ücuchica ga éstewaama yexmaxü̃wa chomaxã narüxücu rü yema naa̱xtü ga aixepewa yexmaxü̃wa chomaxã naxũ. Rü nanangu ga yema ücuchicaarü taxmachiã. Rü yema togü ga ücuchicagüarü ta nüxü̃́ nayexma.
33 Rü norü ucapugü rü norü caxtagü rü yema norü ngu̱xẽẽchica rü namaxã nawüxigu ga norü ta ga yema togü ga ücuchicagüarü ucapugü rü caxtagü rü ngu̱xẽẽchica. Rü napata ga yema ücuchica rü norü ucapu ga ngu̱xẽẽchica rü guxü̃wama nüxü̃́ nayexma ga norü beü̃tánagü. Rü norü ma̱x rü 25 metru nixĩ rü norü taxmachiã rü 12 metruarü ngãxü̃ nixĩ.
34 Rü yema ücuchicaarü ucapu ga ngu̱xẽẽchica rü naa̱xtü ga düxétüwa üxü̃waama nixĩ ga nayexmaxü̃. Rü guma norü caxtagü rü guxü̃cüwawa palmerachicüna̱xãgümaxã nanga̱xãẽgü. Rü nape̱xewa nayexma ga norü toxṍõne ga 8 ga chinagü nüxü̃́ yexmane.
35 Rü yemawena ga gumá yatü rü yema ücuchica ga nórtewa yexmaxü̃wa choxü̃ naga. Rü nanangu ga yema ücuchicaarü taxmachiã. Rü yema togü ga ücuchicagüarü ta nüxü̃́ nayexma.
36 Rü nayexma ta ga norü ucapugü rü caxtagü rü yema norü ucapu ga ngu̱xẽẽchica. Rü guxü̃cüwawa nüxü̃́ nayexma ga norü beü̃tánagü. Rü napata ga yema ücuchica rü 25 metru nixĩ ga norü ma̱x rü 12 metruarü ngãxü̃ nixĩ ga norü taxmachiã
37 Rü yema ücuchicaarü ucapu ga ngu̱xẽẽchica rü naa̱xtü ga düxétüwa üxü̃waama nixĩ ga nayexmaxü̃. Rü guma norü caxtagü rü nacüwagüwa palmerachicüna̱xãgümaxã nanga̱xãẽgü. Rü nape̱xewa nayexma ga norü toxṍõne ga 8 ga chinagü nüxü̃́ yexmane.
Ücuchica ga nórtewa yexmaxü̃
38 Rü yema nórtewa yexmaxü̃ ga ücuchicaarü ngu̱xẽẽchicacüwawa nayexma ga wüxi ga to ga ucapu. Rü yema ucapuwa nixĩ ga yayauxgüãxü̃ ga yema naxü̃nagü ga nadaigüxü̃ ga Tupanaca̱x ínagugüchaü̃xü̃.
39 Rü yema ucapu ga ngu̱xẽẽchicawa nayexma ga ãgümücü ga mechagü. Rü wüxicüwawa nayexma ga taxre ga mechagü rü yema tocüwawa nayexma ga taxre. Rü yema mechagüétügu nixĩ ga nadaiaxü̃ ga naxü̃nagü ga Tupanaca̱x ínaguxchaü̃güxü̃, rü naxü̃nagü ga pecadugüarü ütanüca̱x ínagugüxü̃, rü yema naxü̃nagü ga nagagutama naxüxü̃ ga pecaduarü ütanüruxü̃ca̱x ínagugüxü̃.
40 Rü yema nórtewa yexmaxü̃ ga ücuchicaarü ucapu ga ngu̱xẽẽchicaarü düxétüwa nayexma ga mechagü. Rü wüxicüwawa nayexma ga taxre ga mechagü rü yema norü tocüwawa nayexma ga to ga taxre.
41 Rü yemaacü aixepewa nayexma ga ãgümücü ga mechagü rü düxétüwa nayexma ga to ga ãgümücü ga mechagü. Rü yemaacü guxü̃wama nayexma ga 8 ga mechagü. Rü yema mechagüétügu nixĩ ga nadaiaxü̃ ga naxü̃nagü
42 40:42-43 Rü nayexma ta ga ãgümücü ga to ga mechagü. Rü yema mechagü rü yema naxü̃nagü ga ínagugüxü̃ca̱x nixĩgü. Rü nutachipanünaxca̱x nixĩgü. Rü wüxichigü rü 75 chentímetru nixĩ ga norü ma̱x, rü 75 chentímetru ta nixĩ ga norü tatachinü rü 50 chentímetru nixĩ ga norü ma̱xpara. Rü yema mechaétügu nixĩ ga nanugüãxü̃ ga norü cüchigü ga namaxã nadaiaxü̃ ga yema naxü̃nagü ga Tupanaca̱x ínaguxü̃. Rü yemaétügu nixĩ ga nanugüãxü̃ ga yema naxü̃nagümachi ga Tupanaca̱x ixĩxü̃. Rü norü guxü̃cüwawa ga yema ucapuchiã rü narütugü ga namachiarü choruü̃gü. Rü wüxichigü rü 25 chentímetru nixĩ ga norü ma̱x.
43 Nüü̃ nadau 40:42
44 Rü yema naa̱xtü ga aixepewa yexmaxü̃wa rü nayexma ga taxre ga ucapugü nacüwawa ga yema ücuchica ga aixepewa yexmagüxü̃. Rü yema ücuchica ga nórtewa üxü̃cüwawa nayexma ga wüxi ga yema ucapu. Rü yema rü súrguama nadawenü. Rü yema to ga ucapu rü yema ücuchica ga súrwa üxü̃cüwawa nayexma. Rü yema rü nórteguama nadawenü.
45 Rü yexguma ga gumá yatü rü chomaxã nidexa rü ñanagürü: —Ngẽma ucapu i súrguama dawenüxü̃ rü chacherdótegü i Tupanapata ya taxü̃newa puracüexü̃ca̱x nixĩ.
46 Rü ngẽma ucapu i nórteguama dawenüxü̃ rü chacherdótegü i ãmarearü guwa puracüexü̃ca̱x nixĩ. Rü ngẽma chacherdótegü rü Chadóxtaagü nixĩgü. Rü ngẽmagüxicatama nixĩ i Lebítanüxü̃ i mexü̃ nax Cori ya Tupanana ngaixcamagüxü̃ nax naxügüã̱xü̃ca̱x i norü puracü i napatawa —ñanagürü.
Tupanapataa̱xtü ga aixepewa yexmaxü̃
47 Rü yemawena ga gumá yatü rü nanangu ga yema naa̱xtü ga aixepewa yexmaxü̃. Rü yema naa̱xtü rü norü guxü̃cüwawa rü 50 metru nixĩ. Rü yema ãmarearü guruxü̃ rü Tupanapata ga taxü̃nepe̱xewa nayexma.
48 Rü yexguma ga yema yatü rü yema Tupanapata ga taxü̃nearü ucapu ga nüxíra nawa ixücuxü̃wa choxü̃ naga. Rü nanangu ga norü caxtagü. Rü wüxichigü ga guma caxtagü rü 2 metruarü ngãxü̃ nixĩ ga norü tamena̱xã. Rü guma Tupanapataarü ĩã̱x ga nawa ixücuxü̃ rü 7 metru nixĩ ga norü tatachinü. Rü wüxichigü ga yema naxpenüxü̃ ga nacüwawa yexmagüxü̃ rü wüxi ga metruarü ngãxü̃ nixĩ ga norü tatachinü.
49 Rü yema ucapu i nawa ixücuxü̃ rü 10 metru nixĩ ga norü tachiã. Rü norü máchiã rü 6 metru nixĩ. Rü nayexma ga norü toxṍõne ga Tupanapataca̱x nawa naxĩnagügüne. Rü 10 ga chinagü nüxü̃́ nayexma. Rü wüxichigü ga norü ĩã̱xarü naxpenüxü̃cüwawa nayexma ga wüxi ga caxtagü ga itaxü̃ne.
