Ezequiel 41:1-26
41 Rü yemawena ga gumá yatü rü Tupanapata ga taxü̃nearü aixepewa choxü̃ naga. Rü nanangu ga norü yacü ga guma taxre ga caxtagü ga norü ĩã̱xcüwawa yexmagüne. Rü wüxichigü ga guma caxtagü, rü 3 metru nixĩ ga norü yaxcü.
2 Rü yema Tupanapataarü ĩã̱x i nawa ixücuxü̃ rü 5 metru nixĩ ga norü tatachinü. Rü yema naxpenügü ga nacüwawa ügüxü̃ rü wüxichigü rü 2 metruarü ngãxü̃ nixĩ ga norü tatachinü. Rü yemawena rü nanangu ga Tupanapatamachiã ga ngãxü̃wa üxü̃. Rü yema rü nüxü̃́ nayexma ga 20 metru ga norü máchiã. Rü norü tachiã rü 10 metru nixĩ.
3 Rü yemawena rü yema taxü̃ ga Tupanapatamachiãgu naxücu. Rü nanangu ga norü caxtagü ga ĩã̱xcüwawa ügüne. Rü wüxichigü rü nüxü̃́ nayexma ga wüxi ga metru ga norü ta. Rü yema ĩã̱x ga nawa ixücuxü̃ rü 3 metru nixĩ ga norü tatachinü. Rü naxtapü̱xgü ga norü ĩã̱xcüwawa yexmagüxü̃, rü wüxichigü rü 3 metruarü ngãxü̃ nixĩ ga norü ta.
4 Rü yemawena rü nanangu ga yema naxmachiã ga aixepewa yexmaxü̃. Rü yema naxmachiã rü guxü̃wama nawüxigu ga yema ãgümücü ga nacüwagü, rü 10 metru chigü nixĩ ga norü ma̱x. Rü yexguma ga yema yatü rü chomaxã nidexa rü ñanagürü: —Ñaa naachiã rü Nachica i Üünexüchixü̃ nixĩ —ñanagürü.
Ucapugü ga naxtapü̱xarü düxétüwa yaxũxgüxü̃
5 Rü yemawena ga gumá yatü rü nanangu ga naxtapü̱x ga Tupanapata ga taxü̃ne ga düxétüwaama. Rü yema naxtapü̱x rü 3 metru nixĩ ga norü yaxcü. Rü yema naxtapü̱xarü düxétüwa rü guxü̃cüwawa nayexma ga ucapugü ga nawa yaxũxgüxü̃ ga 2 metru chigü ixĩgüxü̃ ga norü tachiã.
6 Rü Tupanapata ga taxü̃nearü naxtapü̱xcüwawa rü tomaepü̱x nixĩ ga norü ünagü. Rü wüxichigü ga yema ünagüwa rü nayexma ga 30 ga ucapugü. Rü yema naxtapü̱xgü ga Tupanapata rü wüxichigü ga ünagüwa rü inarüxíchigü. Rü ñoma toxṍõnerüxü̃ nixĩ ga norü duxétütapü̱xwa ga guma Tupanapata. Rü yema toxṍõneraxü̃gu nixĩ ga naxǘnagüxü̃ ga norü omütagü ga wüxichigü ga norü ünagü. Rü yemaacü tama Tupanapataarü aixepewa nango̱x ga nape̱xegü ga guma omütagü.
7 Rü yema norü ünagü ga dauxü̃wa üxü̃ rü narütamae, rü yemaca̱x ga yema norü ucapugü ga nawa yexmagüxü̃ rü yexera nitachiã. Rü yema ucapugü ga Tupanapata ga taxü̃nearü poxeguxü̃gücüwawa yexmagüxü̃ rü nüxü̃́ nayexma ga norü toxṍõne ga dauxü̃wa nguxü̃ne. Rü gumawa nixĩ ga naxĩgüxü̃ ga yexguma norü ngãxü̃wa üxü̃ ga ünagüwa naxĩxgu rüe̱xna yema ünagü ga nawa iyacuáxü̃wa naxĩxgu.
8 Rü nüxü̃ chadau ga Tupanapata rü norü ucapugü ga nacüwawa ügüxü̃ rü wüxi ga chauxtachinüxü̃étügu naxü. Rü norü yaxcü ga yema chauxtachinüxü̃ rü 3 metru nixĩ.
9 41:9-10 Rü yema ucapugütapü̱x ga düxétüwaama üxü̃ rü 2 metruarü ngãxü̃ nixĩ ga norü yaxcü. Rü guxü̃cüwawa ga Tupanapata ga taxü̃ne rü nayexma ga nai ga ĩpatagü ga chacherdótegüca̱x ixĩgüne. Rü norü tatachinü ga yema naa̱xtü ga nügüna nawa nayáxü̃gugüxü̃ ga guma chacherdótegüpatagü namaxã ga yema ucapugü ga Tupanapatawa yaxũxgüxü̃ rü 10 metru nixĩ ga norü tatachinü.
10 Nüü̃ nadau 41:9
11 Rü yema Tupanapata ga taxü̃newa yaxũxgüxü̃ ga ucapugüpe̱xewa rü nayexma ga wüxi ga üpetüchica. Rü yema üpetüchica nüxü̃́ nayexma ga taxre ga ĩã̱xgü. Rü wüxi nixĩ ga norü nórtepe̱xewa üxü̃ rü yema to nixĩ ga norü súrpe̱xewa üxü̃. Rü yema taxre ga ĩã̱xgü rü nügüarü to̱xma̱xtawa naxügü. Rü yema üpetüchicaarü tatachinü rü taxre ga metruarü ngãxü̃ nixĩ.
Ĩpata ga oéstewa yexmane
12 Rü oéstewaama rü nayexma ga wüxi ga ĩpata ga ĩã̱xtü ga ípoxeguxü̃guama dawenüne. Rü guma ĩpata rü 35 metru nixĩ ga norü tachiã, rü 45 metru ga norü ma̱x. Rü naxtapü̱xarü yaxcü rü 2 metruarü ngãxü̃ nixĩ.
Nanangu ga Tupanapata ga taxü̃ne
13 Rü gumá yatü rü nanangu ga Tupanapata ga taxü̃ne. Rü guxü̃wama rü 50 metru nixĩ ga norü ma̱x. Rü norü tatachinü rü 50 metru nixĩ ga yexguma nanguxgu ga Tupanapataarü tatachinü namaxã ga naa̱xtü rü naã̱xtüarü poxeguxü̃.
14 Rü yema naa̱xtü ga Tupanapata ga taxü̃nepe̱xewa inaxügü ñu̱xmata yema naã̱xtüarü poxeguxü̃wa nangu ga éstewaama rü 50 metru nixĩ.
15 Rü yemawena rü nanangu ga norü ma̱x ga guma ĩpata ga Tupanapata ga taxü̃neweama yexmane ga naã̱xtüpe̱xewa. Rü guma ĩpata namaxã ga norü poxeguxü̃gü rü 50 metru nixĩ ga norü ma̱x, rü mürapewamaxã natüchiã.
Norü ucapugü ga Tupanapata ga taxü̃ne
16 41:16-17 Rü yema beü̃tánagü rü fierumena̱xãnaxca̱x nixĩ. Rü yema naxpenüxü̃gü rü norü tomaepü̱xcüwawa rü mürapewagü nixĩ. Rü yema beü̃tánatüü̃wa nadaxü̃ ga naxtapü̱x rü mürapewamaxã natü. Rü yema ĩã̱xétüwa üxü̃ ga naxtapü̱x rü ta rü mürapewamaxã natü. Rü yemaacü ga yema naxtapü̱x ga Tupanapata ga taxü̃ne rü aixepewa rü düxétüwa rü guxü̃wama mürapewamaxã natü.
17 Nüü̃ nadau 41:16
18 Rü yema mürapewagü ga norü tüchiãruü̃gü rü naxchicüna̱xãgümaxã nanga̱xãxẽ. Rü wüxi ga mürapewawa nayexma ga wüxi ga dauxü̃cüã̱xchicüna̱xã rü to ga mürapewawa nayexma ga wüxi ga palmerachicüna̱xã. Rü yemaacü nixĩ ga guxü̃cüwawa. Rü wüxichigü ga yema dauxü̃cüã̱xchicüna̱xãgü rü nataxrechametü.
19 Rü yema norü duü̃xü̃chametü rü palmerachicüna̱xãguama nadawenü. Rü yema norü leóü̃chametü rü yema tocüwawa üxü̃ ga palmerachicüna̱xãguama nadawenü. Rü yemaacü nixĩ ga guxü̃ma ga Tupanapata ga taxü̃nemachiãwa.
20 Rü yema dauxü̃cüã̱xchicüna̱xãgü rü palmerachicüna̱xãgü ga norü ĩã̱xgüwa yexmagüxü̃ rü ĩã̱xarü ñaxtüwa inaxügü rü ñu̱xmata dauxü̃wa nangu. Rü yemaacü ta nanga̱xãxẽ ga naxmachixü̃ ga Tupanapata ga taxü̃ne.
21 Rü guma norü ĩã̱xarü caxtagü rü nawüxigumare ga norü duchipanü.
Ãmarearü guruxü̃ ga mürapewanaxca̱x
22 Rü nape̱xewa ga yema ucapu ga üünexü̃arü ĩã̱x rü nayexma ga wüxi ga ta̱xacü ga ãmarearü guruü̃raxü̃xü̃ ga mürapewanaxca̱x. Rü yema rü guxü̃ma ga norü ãgümücü ga nacüwawa rü wüxi ga metru nixĩ. Rü wüxi ga metru rü naétü ngãxü̃ ga metru nixĩ ga norü máxchane. Rü guxü̃ma ga norü cuípe̱xexü̃gü rü naparagü rü nacüwagü rü nainaxca̱x nixĩgü. Rü gumá yatü rü ñanagürü choxü̃: —Ñaa nixĩ i ngẽma mecha i Tupanape̱xewa ngẽxmaxü̃ —ñanagürü choxü̃.
Tupanapata ga taxü̃nearü ĩã̱xgü
23 41:23-24 Rü yema naxmachiã ga ngãxü̃wa yexmaxü̃ rü ñu̱xũchi yema naxmachiã ga Üünexüchixü̃ rü nüxü̃́ nayexmagü ga norü ĩã̱x ga taxrecüwawa ingenaxü̃.
24 Nüü̃ nadau 41:23
25 Rü yema naxmachiã ga ngãxü̃wa yexmaxü̃arü ĩã̱xgü rü dauxü̃cüã̱xchicüna̱xãgümaxã rü palmerachicüna̱xãgümaxã nanga̱xãẽgü. Rü yexgumarüxü̃ ta nixĩ ga nanga̱xãẽgüxü̃ ga naxtapü̱xgü. Rü yema nüxíraxü̃xü̃ ga naxmachiã ga nawa ixücuxü̃arü düxétüwa rü nayexma ga wüxi ga waicumüchate̱xexü̃ ga nainaxca̱x.
26 Rü yema nüxíraxü̃xü̃ ga naxmachiã rü nüxü̃́ nayexma ga norü beü̃tánagü ga fierumena̱xãgünaxca̱x. Rü nacüwagüwa rü palmerachicüna̱xãmaxã nangã̱xãẽgü. Rü yema ucapugü ga Tupanapata ga taxü̃nena yaxũxgüxü̃ rü yemagü rü ta nüxü̃́ nayexma ga norü beü̃tánagü ga fierumena̱xãgünaxca̱x. Rü yemacüwagüwa rü ta palmerachicüna̱xãmaxã nangã̱xãẽgü.
