Ezequiel 42:1-20
42 Rü yexguma ga gumá yatü rü yema naa̱xtü ga nórtewaama üxü̃wa choxü̃ naga. Rü guma taxü̃ne ga ĩpata ga muarü ucapuã́ne ga Tupanapata ga taxü̃nearü nórtewaama yexmanegu choxü̃ naxücuxẽxẽ. Rü guma ĩpata rü yema naa̱xtü ga aixepewa üxü̃arü to̱xma̱xtawa nayexma nape̱xewa ga guma ĩpata ga taxü̃ne ga Tupanapataca̱xwe̱xwa yexmane.
2 Rü guma ĩpata ga muarü ucapuã́ne ga nórtecüwawaama üxü̃ne rü 50 metru nixĩ ga norü ma̱x, rü 25 metru nixĩ ga norü tatachinü.
3 Rü guma ĩpataarü aixepewa nayexma ga norü üpetüchica ga 10 metru ga norü tatachinü. Rü yema üpetüchicaarü wüxicüwawa nayexma ga ucapugü ga yema ĩã̱xtü ga aixepewa yexmaxü̃waama ügüxü̃. Rü yema üpetüchicaarü tocüwawa nayexma ga ucapugü ga yema düxétüwa yexmaxü̃ ga naã̱xtüwaama ügüxü̃. Rü guma ĩpata rü tomaepü̱xgu naxü̃nagü ga nachiã.
4 Rü yema ucapugüpe̱xewa rü nayexma ga wüxi ga norü namaxacü ga aixepewa nadaxü̃. Rü 5 metru nixĩ ga norü tatachinü, rü 50 metru nixĩ ga norü ma̱x. Rü yema ucapugüarü ĩã̱xgü rü nórtewaama naxügü.
5 Rü yema ucapugü ga dauxü̃chiãwa ügüxü̃ rü yema ucapugü ga ñaxtüwa ügüxü̃xü̃ narüxíxramaegü. Rü wüxichigü ga naxmachiã rü narüxíramaechigü yerü yema namaxacügü nanaxíxraxẽxẽ.
6 Rü guma ĩpata rü tomaepü̱x nixĩ ga naxmachiã. Rü yema norü ucapugü ga dauxü̃wa ügüxü̃ rü narüxíragü yerü nape̱xewa rü ningearü caxtaã̱xgü. Natürü yema ñaxtüwa ügüxü̃ ga ucapugüpe̱xewa ga naa̱xtü ixüxü̃waama rü nicaxtaã̱xgü.
7 42:7-8 Rü yema ucapugüarü düxétüwaama nayexma ga wüxi ga naxtapü̱x ga naa̱xtü ga düxétüwa üxü̃cüwagu idaxü̃. Rü 25 metru nixĩ ga norü ma̱x. Rü yema ucapugü ga naa̱xtü ga düxétüwaama üxü̃wa ügüxü̃ rü 25 metru nixĩ ga norü ma̱x. Rü yema ucapugü ga Tupanapata ga taxü̃newaama ügüxü̃ rü 50 metru nixĩ ga norü ma̱x.
8 Nüü̃ nadau 42:7
9 Rü yema ucapugü ga ñaxtüchiü̃waama yexmagüxü̃ca̱x nax ixücuxü̃ rü yema naa̱xtü ga éstewaama yexmaxü̃wa nixĩ ga ixücuxü̃.
10 Rü Tupanapata ga taxü̃nearü súrcüwawa nayexmagü ga to ga ucapugü. Rü yema ucapugü rü naã̱xtüarü poxeguxü̃arü ma̱xwa nangugü. Rü yema ucapugü, rü guma taxü̃ne ga ĩpata ga Tupanapataca̱xwena yexmanecüwawa nangugü.
11 Rü yema ucapugüpe̱xewa nayexma ga norü namaxacü yema ucapugü ga nórtewa ügüxü̃rüü̃tama. Rü yema nórtewa ügüxü̃ ga ucapugüarü ma̱x rü norü tatachinü nüxü̃́ nayexmagü. Rü yema nórtewa ügüxü̃rüxü̃ nüxü̃́ nayexmagü ga norü ücuchicagü rü norü ũxü̃chicagü.
12 Rü yema namaxacü ga aixepewa nguxü̃ rü nüxü̃́ nayexma ga norü ĩã̱x. Rü yemawa nixĩ ga ixücuxü̃ nax yema ucapugü ga súrwa yexmagüxü̃wa inguxü̃ca̱x. Rü yema ĩã̱x rü norü poxeguxü̃arü to̱xma̱xtawa nayexma ga norü éstecüwawa.
13 Rü gumá yatü rü chomaxã nidexa rü ñanagürü: —Ngẽma naã̱xtüarü poxeguxü̃arü to̱xma̱xtawa ngẽxmagüxü̃ i ucapugü i nórtewa ngẽxmagüxü̃ rü súrwa ngẽxmagüxü̃, rü ucapugü i üünexü̃ nixĩgü. Rü ngẽma chacherdótegü i Cori ya Tupanaca̱x daugüxü̃ rü ngẽma ucapugüwa tá nixĩ i nangõ̱xgüãxü̃ i ngẽma ãmaregü i üünexü̃. Rü ngẽma ucapugügu tá nixĩ i nanucuãxü̃ i ngẽma ãmaregü i üünexü̃ i trigute̱xe, rü ãmare i pecaduarü ütanüca̱x inaxãgüxü̃ rü ngẽma ãmare i wüxi i guxchaxü̃ nax naxüxü̃gagu ixãxü̃ erü ngẽma ucapugü rü nachica i üünexü̃ nixĩgü.
14 Rü ngẽxguma Tupanapata ya taxü̃negu nachocugu i ngẽma chacherdótegü rü tama name nax ĩã̱xtü i düxétüwa ngẽxmaxü̃wa naxĩxü̃ naxü̃pa nax ínacuxü̃xü̃ rü ngẽxma nanuãxü̃ i ngẽma naxchiru i Cori ya Tupanaarü puracü namaxã naxügüxü̃, erü ngẽma naxchiru rü nixüüne. Rü ngẽxguma ínachoxü̃gu rü duü̃xü̃gü íngẽxmaxü̃wa naxĩxgu rü name i to i naxchirugu nicu̱xgü —ñanagürü ga gumá yatü.
Inanangu ga norü ta ga yema nachica ga Tupanapata ga taxü̃ne nagu üxü̃
15 Rü yexguma marü nüxü̃́ nagu̱xgu nax nanguãxü̃ ga Tupanapata ga taxü̃nearü tachiã ga aixepewa, rü gumá yatü rü chomaxã ínaxũxũ nawa ga yema ĩã̱x ga éstewa üxü̃. Rü nanangugü ga guxü̃ma ga norü ta ga yema naane ga Tupanapata ga taxü̃ne nagu üxü̃.
16 Rü nanayaxu ga yema ngugüruxü̃ rü nanangugü ga yema naanecüwa ga éstewaama üxü̃. Rü yema rü nüxü̃́ nayexma ga 250 metru ga norü ma̱x.
17 Rü yemawena rü nanangugü ga yema nacüwa ga nórtewaama üxü̃. Rü yema rü ta 250 metru nixĩ ga norü ma̱x.
18 Rü yemawena rü nanangugü ga nacüwa ga súrwaama üxü̃. Rü yema rü ta nüxü̃́ nayexma ga 250 metru ga norü ma̱x.
19 Rü yemawena rü nanangugü ga nacüwa ga oéstewaama üxü̃, rü yema rü ta nüxü̃́ nayexma ga 250 metru ga norü ma̱x.
20 Rü guxü̃ma ga norü ãgümücücüwa ga yema naane rü nanangu. Rü yema naane ga Tupanapata ga taxü̃ne nagu üxü̃ rü norü wüxicüwawachigü rü nüxü̃́ nayexma ga norü poxeguxü̃ ga 250 metru ga norü ma̱x. Rü yema norü poxeguxü̃ nixĩ ga yema Tupanapata ga taxü̃nearü naane ga üünexü̃ yáxü̃guxẽẽxü̃ nüxna ga yema naane ga düxétüwa yexmaxü̃ ga tama üünexü̃.
