Ezequiel 43:1-27
43 Rü yemawena ga gumá yatü rü yema ĩã̱x ga éstewa yexmaxü̃wa chomaxã naxũ.
2 Rü nüxü̃ chadau ga Cori ya Iraétanüxü̃arü Tupanaarü üüne ga éstewa ne ũxü̃. Rü nüxü̃ chaxĩnü ga wüxi ga naga ga natüarü poraü̃chiüxü̃garaü̃xü̃. Rü ñoma ga naane rü poraãcü nangóone
3 Rü ngẽma nüxü̃ chadauxü̃ rü nananaraxü̃ ga yema nüxü̃ chadauxü̃ ga yexguma Cori ya Tupana ñoma ga naanewa ũxgu nax Yerucharéü̃ca̱x poxcu ínangu̱xuxẽẽxü̃ca̱x. Rü nananaraxü̃ ga yema nüxü̃ chadauxü̃ ga yexguma yema natü ga Quebáxanacüwa chango̱xetügu. Rü yexguma yemaxü̃ chada̱u̱xgu rü choma rü waixü̃müanegu chayangücuchi.
4 Rü Cori ya Tupanaarü üüne rü napataarü ĩã̱x ga éstewa yexmaxü̃wa nixücu.
5 Rü Tupanaãxẽ choxü̃ inachixẽxẽ, rü ĩã̱xtü ga aixepewa yexmaxü̃wa choxü̃ naga. Rü nüxü̃ chadau nax napata namaxã yapaxü̃ ga norü üüne.
6 Rü gumá yatü rü chaucüwagu nachi, rü choma rü nüxü̃ chaxĩnü nax napatawa chomaxã yadexaxü̃ ga Cori ya Tupana.
7 Rü choxü̃ ñanagürü: —Ñaa nixĩ i cha̱u̱xma̱xwe̱xechica, rü nachica i nagu chacuaixcutüxü̃. Rü ñaa nachicawa tá nixĩ i guxü̃gutáma Iraégütanügüwa chamaxü̃xü̃. Rü woo Iraétanüxü̃, rü woo norü ãẽ̱xgacügü rü taxũtáma wena norü tupananetagüca̱x nanaxãũãchixẽxẽ i chauéga i üünexü̃. Rü taxũtáma norü ãẽ̱xgacügü i yuexü̃chique̱xewa naxĩ nax nüxü̃ yacua̱xüü̃güxü̃ca̱x.
8 Yema Iraétanüxü̃ rü norü taxü̃ ga chixexü̃gümaxã nagu nidauxcüraxü̃gü ga chauéga i üünexü̃. Yerü chorü ãmarearü guruü̃gücüwagu nanaxü ga norü tupananetagüarü ãmarearü guruü̃gü. Rü wüxi ga naxtapü̱xicatama nixĩ ga nügüna nayaxü̃guxẽẽxü̃. Rü yemaca̱x nixĩ ga namaxã chanuxü̃ rü chanadaixü̃.
9 ¡Rü nüxü̃ naxoe nax norü tupananetachicüna̱xãgüxü̃ yacua̱xüü̃güxü̃! ¡Rü nüxü̃ naxoe nax norü ãẽ̱xgacügü i yuexü̃chicüna̱xãgüxü̃ yacua̱xüü̃güxü̃! Rü ngẽxguma i choma rü guxü̃gutáma natanüwa chamaxü̃.
10 Rü ngẽmaca̱x, Pa Yatüx, ¡Iraétanüxü̃maxã nüxü̃ ixu i ngẽma nüxü̃ cudauxü̃ nax ñuxãcü naxüxü̃ ya yima chopata rü nañuxraxü̃xü̃ i norü ma̱x rü norü tachiã! Rü ngẽxguma ngẽmaxü̃ naxĩnüegu rü tá naxãnẽxẽ naxca̱x i ngẽma norü chixexü̃ i nagu namaxẽxü̃.
11 Rü ngẽxguma ngẽma Iraétanüxü̃ nüxü̃ rüxoegu i ngẽma chixexü̃ i nagu namaxẽxü̃, ¡rü namaxã nüxü̃ ixu nax ñuxãcü tá naxüxü̃ ya yima chopata rü ta̱xacü tá yixĩxü̃ i norü ngẽmaxü̃gü i nawa tá ngẽxmagüxü̃ rü ñuxãcü tá naxüxü̃ i norü ũxũchicagü rü norü ücuchicagü! ¡Rü ngẽmaãcü namaxã nüxü̃ ixu i guxü̃ma i chopatachiga! ¡Rü ngẽxgumarüxü̃ ta namaxã nüxü̃ ixu i chorü mugüchiga nax naga naxĩnüexü̃ca̱x! ¡Rü naxca̱x naxümatü i naxchicüna̱xã ya yima chopata nax ngẽmaãcü mea naxca̱x nangóxü̃ca̱x nax ñuxãcü tá naxügüãxü̃! ¡Rü ngẽxgumarüxü̃ ta naxca̱x naxümatü i guxü̃ma i chopataarü mugü nax ngẽmaãcü aixcüma yanguxẽxẽgüãxü̃ca̱x!
12 Rü ñaa nixĩ i ngẽma norü mugü ya chopata: Rü guxü̃ma i ngẽma naane i chopatagu íyadaeguxü̃ i ma̱xpǘnechitaeruwa ngẽxmaxü̃ rü wüxi i nachica i üünexü̃ tá nixĩ —ñanagürü.
Ãmarearü guruxü̃
13 Rü ñaa nixĩ ga norü ta ga ãmarearü guruxü̃. Rü ãmarearü guruü̃cüwawa rü nayexma ga wüxi ga catexü̃ ga 50 chentímetru ga norü ma̱xü̃ma, rü 50 chentímetru ta ga norü taxü̃ma. Rü norü guxü̃cüwawa ga yema catexü̃ rü nachauxnagügü ga nacüwagü, rü 25 chentímetru nixĩ ga nachauxnagüxü̃. Rü norü máchane rü ñaa nixĩ:
14 Rü yema catexü̃mawa rü ñu̱xmata yema nüxíraxü̃xü̃ ga norü chauxnagü ga ãmarearü guruxü̃ rü wüxi ga metru nixĩ ga norü chauxnagü. Rü yema nuxíraxü̃xü̃ ga norü chauxnagü, rü 50 chentímetru nixĩ ga nabera. Rü yema norü taxre ga chauxnagü rü taxre ga metru nixĩ ga norü máchane. Rü yema rü ta 50 chentímetru nixĩ ga nabera.
15 Rü yema ãmarearü guruü̃arü chauxnagü ga dauxnawa üxü̃ ga naxü̃na nawa ínagugüxü̃ rü 2 metru nixĩ ga norü máxchane. Rü nüxü̃́ nayexma ga ãgümücü ga norü cuípe̱xegü ga dauxü̃wa nadagüxü̃.
16 Rü yema nawa yacuáxü̃ ga naxü̃ne ga yema ãmarearü guruxü̃ rü nawüxigu ga nacüwagü. Rü wüxichigü ga nacüwagü rü 6 metru nixĩ.
17 Rü yema ãmarearü guruü̃arü ngãxü̃wa üxü̃ ga naxü̃ne rü nawüxigu ga nacüwagü. Rü wüxichigü ga nacüwagü rü 7 metru nixĩ. Rü yema catexü̃ ga nacüwawa yexmaxü̃ rü 50 chentímetru nixĩ ga norü taxü̃ma. Rü yema chauxnagü ga yema catexü̃cüwawa yexmaxü̃ rü 25 chentímetru nixĩ ga norü tabera. Rü guma ãmarearü guruü̃arü toxṍõne rü éstecüwawa nayexma.
18 Rü yemawena chomaxã nidexa ga gumá yatü rü ñanagürü: —Pa Yatüx, ñaa nixĩ i norü ore ya yima Cori ya Tupana ya Guxü̃étüwa Ngẽxmacü: “Rü ngẽxguma nawa nanguxgu nax marü yanguxü̃ i ngẽma ãmarearü guruxü̃ rü chanaxwa̱xe nax peyanguxẽẽxü̃ i ñaa mugü: Rü ngẽma ãmarearü guruü̃wa tá cha̱u̱xca̱x peyagu i wüxi i naxü̃na. Rü yimá nagümaxã tá penamaxcuétü i ngẽma ãmarearü guruxü̃.
19 Rü ngẽma chacherdótegü i Lebítanüxü̃ i Chadóxtaagü tá nixĩ i cha̱u̱xca̱x naxügüxü̃ i ngẽma puracü. Rü cuma rü tá nüxna cunamu i wüxi i wocaxacü i yatüxü̃ nax pecadutanü cha̱u̱xca̱x yagugüãxü̃ca̱x. Rü choma ya Cori ya Tupana rü ngẽma nixĩ i cuxü̃ chamuxü̃.
20 Rü ngẽmawena rü íxracü ya nagü tá cuyaxu rü yimá nagümaxã tá cunamaxcu i ngẽma guruü̃arü cuípe̱xegü. Rü ngẽxgumarüxü̃ ta tá yimamaxã cunamaxcu i ngẽma ngãxü̃wa üxü̃ i naxü̃nearü poxõchigü rü guxü̃ma i ngẽma nabera i nüxü̃ íxümaeguãchixü̃. Rü ngẽmaãcü tá cunaxüünexẽxẽ i ngẽma ãmarearü guruxü̃.
21 Rü ngẽmawena rü tá cunayaxu i ngẽma wocaxacü i yatüxü̃ i pecaduarü ütanüca̱x ixĩxü̃. Rü Tupanapata ya taxü̃nearü düxétüwa tá cuyagu nawa i ngẽma nachica i woetama ngẽmaruxü̃ ixĩxü̃.
22 Rü moxü̃ãcü rü wüxi i chíbuxacü i yatüxü̃ i taxuwama chixexü̃ tá cha̱u̱xca̱x quigu pecaduarü ütanüruxü̃. Rü nüma i chacherdótegü rü yimá nagümaxã tá cunaxüünexẽxẽ i ngẽma ãmarearü guruxü̃ yema wocaxacügümaxã naxüxü̃rüxü̃.
23 Rü ngẽxguma marü cunagu̱xẽẽgu nax cunaxüünexẽẽxü̃ i ngẽma ãmarearü guruxü̃, rü tá cuyayaxu i wüxi i wocaxacü i yatüxü̃ i taxuwama chixexü̃ rü wüxi i carnéru i yatüxü̃ i taxuwama chixexü̃.
24 Rü cha̱u̱xca̱x tá cunadai. Rü nüma ga chacherdótegü rü tá yuxcürachiümaxã nanamaxcuxü̃negü rü tá cha̱u̱xca̱x ínanagu.
25 Rü wüxichigü i ngẽma 7 i ngunexü̃gügu tá cha̱u̱xca̱x cuyama̱x rü cuyagu i wüxi i chíbuxacü i yatüxü̃ pecaduarü ütanüruxü̃. Rü ngẽxgumarüxü̃ tá ta ngẽma ngunexü̃gügu cuyama̱x i wüxi i wocaxacü i yatüxü̃ rü wüxi i carnéru i yatüxü̃. Rü guxü̃ma i ngẽma naxü̃nagü rü taxuwama i chixexü̃ tá nixĩ.
26 Rü wüxichigü i ngẽma ngunexü̃gügu rü ngẽma chacherdótegü tá ngẽmaãcü mea nanaxüünexẽẽgü i ngẽma ãmarearü guruxü̃ nax ngẽmaãcü ínamexü̃ca̱x naxca̱x i ngẽma puracü i üünexü̃.
27 Rü 7 i ngunexü̃ tá nixĩ i ngẽmaãcü naxügüãxü̃ nax naxüünexü̃ca̱x i ngẽma ãmarearü guruxü̃. Rü ngẽxguma norü 8 i ngunexü̃wa nanguxgu rü ngẽma chacherdótegü tá inanaxügüe nax ngẽma ãmarearü guruü̃wa cha̱u̱xca̱x ínagugüãxü̃ i duü̃xü̃güarü ãmaregü rü ngẽma norü ãmaregü i choxü̃ namaxã nangüxmüxẽẽgüxü̃. Rü ngẽxguma i choma rü tá taãẽãcü pexü̃ chayaxu. Rü choma ya Cori ya Tupana nixĩ i nüxü̃ chixuxü̃ i ngẽma” —ñanagürü.
