Ezequiel 44:1-31
44 Rü gumá yatü rü wenaxarü Tupanapata ga taxü̃nea̱xtü ga düxétüwa yexmaxü̃arü ĩã̱x ga éstewa üxü̃wa choxü̃ naga. Natürü yema ĩã̱x rü narüwãxta.
2 Rü yéma rü Cori ya Tupana rü chomaxã nidexa rü ñanagürü: —Ñaa ĩã̱x rü guxü̃gutáma narüwãxtaecha, rü tama name nax yawãxnaxü̃. Rü ñaa ĩã̱x rü tama name nax texé nawa ixücuxü̃, yerü ñaa ĩã̱xwa nixĩ ga yaxücuxü̃ ga Cori ya Iraétanüxü̃arü Tupana. Rü ngẽmaca̱x i ñaa ĩã̱x rü guxü̃gutáma narüwãxtaecha.
3 Rü ñaa ĩã̱x rü ãẽ̱xgacüxicatama tá nixĩ ya nawa ixücucü, ega ngẽxguma Cori ya Tupanape̱xewa õna i üünexü̃ nangõ̱xgu. Rü nüma ya ãẽ̱xgacü rü nanaxwa̱xe nax ngẽma ucapu i éstewa ngẽxmaxü̃wa yaxücuxü̃ rü ngématama ínaxũxũxü̃ —ñanagürü.
Texé tá tixĩgü ya yíxema Tupanapata ya taxü̃negu chocuxe
4 Rü yemawena ga gumá yatü rü yema ĩã̱x ga nórtewa yexmaxü̃ ga Tupanapata ga taxü̃nepe̱xewa üxü̃wa chomaxã naxũ. Rü choma rü nüxü̃ chadau ga Cori ya Tupanaarü üüne nax napata namaxã yapaxü̃. Rü yexguma ga choma rü waixü̃müanegu chayangücuchi.
5 Rü yexguma ga nüma ga Cori ya Tupana rü chomaxã nidexa rü ñanagürü: —Cuma, Pa Yatüx, ¡mea idauchixetü, rü mea irüxĩnü i guxü̃ma i ngẽma chopataarü mugü i tá cumaxã nüxü̃ chixuxü̃! ¡Rü dücax, mea irüxĩnü nax texégü tá tixĩgüxü̃ ya yíxema chopatagu chocuxe rü ñu̱xũchi texégü tá tixĩgüxü̃ ya yíxema taxucürüwa nagu chocuxe!
6 ¡Rü namaxã nüxü̃ ixu i ngẽma Iraétanüxü̃ i tama chauga ĩnüexü̃!: “Cori ya Tupana rü ñanagürü: ‘Pa Duü̃xü̃gü i Iraétanüxü̃x, ¡nüxü̃ perüxoe i ngẽma taxü̃ i ãũãchixü̃ i pexügüxü̃!
7 Rü pemax rü penaxãũãchixẽxẽ ya chopata ya taxü̃ne erü nagu penachocuxẽxẽ i duü̃xü̃gü i to i nachixü̃anecüã̱xgü i tama íwiü̃cha̱xmüü̃pe̱xechiraü̃güxü̃ rü tama chorü mugügu maxẽxü̃. Rü naétü ga pema rü chorü õnaca̱x choxna penaxã ga paũ rü chíxü̃ rü nagü. Rü yemaacü yema taxü̃ ga ãũãchixü̃ ga pexügüxü̃maxã peyanaxoxẽxẽ i ngẽma uneta ga pemaxã chaxüxü̃.
8 Rü pema rü tama chacherdótegüxü̃ pemu nax naxügüã̱xü̃ca̱x ga yema puracü i üünexü̃, natürü to ga nachixü̃anecüã̱xgüme̱xẽwa penayexmaxẽxẽ ga yema puracü’ ”, ñanagürü.
9 Rü ngẽmaca̱x i choma i Cori ya Tupana rü ñachagürü: Rü taxuxü̃táma to i nachixü̃anecüã̱x i duü̃xü̃ i tama íwiecha̱xmüü̃pe̱xechiraü̃xü̃ rü tama chorü mugügu maxü̃xü̃ tá chopatagu naxücu, woo Iraétanügu naxãpatagu.
10 Rü yema Lebítanüxü̃ ga choxna ixĩgachitanüxü̃ ga yexguma Iraéanecüã̱x choxna ixĩgachitanügu nax yema tupananetachicüna̱xãgüxü̃ yacua̱xüü̃güxü̃ca̱x, rü ngẽma Lebítanüxü̃ rü tá nanaxütanügü ga yema pecadu ga naxügüxü̃.
11 Rü ngẽma Lebítanüxü̃ tá nixĩ i chopatawa puracüexü̃, rü chopataarü ĩã̱xarü dauruü̃gü yaxĩgüxü̃, rü naxügüãxü̃ i ngẽma to i puracü i chopatawa ngẽxmaxü̃. Rü nümagü tá nixĩ i nadaiaxü̃ i ngẽma naxü̃nagü i Tupanaca̱x íguxü̃ rü ngẽma naxü̃nagü i duü̃xü̃gü Tupanana ãmaregüxü̃. Rü nümagü tá ínamemaregü nax duü̃xü̃güxü̃ nangü̃xẽẽgüxü̃.
12 Rü nümagü nixĩ ga yema Iraétanüxü̃maxã inacua̱xüü̃gü ga yexguma tupananetachicüna̱xãgüxü̃ yacua̱xüü̃gügu. Rü yemaacü yema Iraétanüxü̃xü̃ pecadugu nayixẽxẽ. Rü ngẽmaca̱x i ngẽma Lebítanüxü̃ rü tá nanaxütanügü ga yema chixexü̃ ga naxügüxü̃. Rü ngẽma nixĩ i choma ya Cori ya Tupana namaxã chaxueguxü̃.
13 Rü ngẽma Lebítanüxü̃ rü taxũtáma choxna nangaicamagü nax chacherdótegürüxü̃ chorü puracü naxügüxü̃ca̱x. Rü ngẽma chorü ngẽmaxü̃ i üünegüxü̃ rü taxũtáma nüxna nangaicamagü, rü yexera i ngẽma chorü ngẽmaxü̃gü i üünexüchixü̃. Rü tá poraãcü ãne ningegü nagagu ga yema chixexü̃ ga naxügüxü̃.
14 Rü ngẽma nagu chanamugüxü̃ i ngẽma Lebítanüxü̃ tá nixĩ nax chopatana nadaugüxü̃ rü ñu̱xũchi nax naxügüãxü̃ i guxü̃ma i ngẽma togümare i puracü i chopatawa ngẽxmaxü̃.
Chacherdótegüchiga
15 “Rü yema chacherdótegü ga Lebítanüxü̃ ga Chadóxtaagü ixĩgüxü̃, rü yemagü nixĩ ga naxügüamaxü̃ ga chopataarü puracü ga yexguma yema Iraétanüxü̃ choxna ixĩgachitanügu. Rü ñu̱xma rü ngẽma Chadóxtaagü tá nixĩ i choxna ngaixcamagüxü̃ nax chorü puracü naxügüxü̃ca̱x. Rü nümagü tá nixĩ i choxna naxãgüãxü̃ i ngẽma naxü̃nagü i cha̱u̱xca̱x nada̱i̱xü̃arü chíxü̃ rü yimá nagü. Rü choma ya Cori ya Tupana ya Guxãétüwa Ngẽxmacü rü ngẽmaãcü chanaxuegu.
16 Rü nümagü i chacherdótegü tá nixĩ i chopatagu nachocuxü̃, rü chorü ãmarearü guruü̃na nangaicamagüxü̃ nax cha̱u̱xca̱x naxügüã̱xü̃ca̱x i chorü puracü. Rü nümagü tá nixĩ i namaxã inacua̱xgüxü̃ i ngẽma puracü i choma nagu chanamugüxü̃.
17 Rü ngẽxguma ĩã̱x i aixepeguxü̃arü ĩã̱xwa yachocu̱xgu, rü nanaxwa̱xe nax naxchiru i línuchinaxca̱xgu yacu̱xgüxü̃, rü ngẽxguma puracü inaxügügu i ĩã̱xtü i aixepeguxü̃wa rüe̱xna Tupanapata ya taxü̃newa rü taxũtáma i tünaxca̱x i naxchirumaxã nixãxchiru.
18 Rü ngẽxguma chopatawa nangẽxmagügu rü ãtachinüxü̃ i línuchimaxã tá nügü ninaĩ̱xgüeru. Rü ngẽma naxchirupara i aixepewa nagu yacu̱xgüxü̃ rü nanaxwa̱xe nax línuchinaxca̱x nax yixĩgüxü̃. Rü taxũtáma i ta̱xacü i naxaiyaxẽẽxü̃maxã tá nigoyegü.
19 Rü ngẽma chacherdótegü rü naxü̃pa nax ngẽma ĩã̱xtü i düxétüwa ngẽxmaxü̃wa naxĩxü̃ i duü̃xü̃gü íngẽxmagüxü̃wa, rü name nax ínacuxü̃xü̃ i ngẽma naxchiru i namaxã Tupanaarü puracü naxügüxü̃. Rü Tupanapataarü ucapugügu tá nananucu i ngẽma naxchiru, rü to i naxchirugu tá nicu̱xgü nax ngẽmaãcü tama duü̃xü̃güna nanguxü̃ca̱x i ngẽma naxchiruarü üüne.
20 Rü tama name nax nügü yadüpü̱xerugüxü̃ i ngẽma chacherdótegü rü tama name nax nügü yama̱xyaexẽẽxü̃. Rü name nax mea nügü yayoerugüxü̃.
21 Rü ngẽxguma ĩã̱xtü i aixepeguxü̃gu nachocuxgu i ngẽma chacherdótegü rü tama name i bínu yaxaxgüãxü̃.
22 Rü ngẽma chacherdótegü rü tama name nax wüxi i nge i yutecümaxã naxãmaxü̃ rüe̱xna wüxi i íta̱xtecümaxã. Natürü marü name i wüxi i nge i Iraétanüxü̃ i taguma yatüxü̃ cua̱xcümaxã naxãma rüe̱xna wüxi i nge i chacherdóte ngĩxna yucümaxã naxãma.
23 Rü ngẽma chacherdótegü rü nanaxwa̱xe nax chorü duü̃xü̃güxü̃ nangúexẽẽxü̃ nax nüxü̃ nacua̱xgüxü̃ca̱x nax ngexü̃ yixĩxü̃ i ngẽma üünexü̃ rü ñu̱xũchi ngexü̃ yixĩxü̃ i ngẽma chixexü̃. Rü ngẽxgumarüxü̃ ta nanaxwa̱xe nax nangúexẽẽãxü̃ nax ngexü̃ yixĩxü̃ i ngẽma chope̱xewa mexü̃ rü ngexü̃ yixĩxü̃ i ngẽma chope̱xewa ãũãchixü̃.
24 Rü ngẽxguma duü̃xü̃gü nügümaxã nuegu rü ngẽma chacherdótegü tá nixĩ i chorü mugüwa nüxü̃ yaxuxü̃ãcü namexẽẽgüaxü̃́ i ngẽma guxchaxü̃gü. Rü nümagü rü tá nayanguxẽẽgü i chorü mugü rü chorü ucu̱xẽgü nachiga i chorü petagü. Rü mea tá nanaxaure i ngẽma chorü ngü̃xchigaarü ngunexü̃gü.
25 Rü ngẽma chacherdótegü rü tama name nax wüxi i yuetaxü̃ yangógügüxü̃, nax ngẽmaãcü tama chope̱xewa yaxãũxãchigüxü̃ca̱x. Natürü ngẽxguma chi nanatü rüe̱xna naé yixĩxgu, rüe̱xna nane, rüe̱xna naxacü, rüe̱xna wüxi ya naenexẽ, rüe̱xna wüxi ya naeya̱x ya ngetexe tixĩxgu ya yíxema yuxe, rü marü name nax tüxü̃ yangógügüxü̃.
26 Rü ngẽxguma yuetaxü̃ yangõgügügu rü name nixĩ i chope̱xewa nügü nimexẽẽgü. Rü ngẽmawena rü name i 7 i ngunexü̃ ínanangu̱xẽẽgü nax wena tá naxügüã̱xü̃ca̱x i chorü puracü.
27 Rü ngẽxguma wenaxarü chopataarü aixepewa ngẽxmaxü̃ i naã̱xtügu nachocuxgu nax chorü puracü naxügüxü̃ca̱x, rü pecaduarü ütanüca̱x tá wüxi i naxü̃na nima̱xgü rü nayagu. Rü ngẽma nixĩ i nüxü̃ chixuxü̃ i choma ya Cori ya Tupana.
28 Rü ngẽma chacherdótegü rü taxũtáma ngẽma togü i Iraétanüxü̃rüxü̃ nüxü̃́ nangẽxma i norü naane i Iraéanewa. Rü choma tá nixĩ i norü naanerüxü̃ chixĩxü̃ i Iraéanewa. Rü ngẽmaãcü i choma rü tá ngẽma chacherdótegüarü chixĩ.
29 Rü nümagü i ngẽma chacherdótegü tá nixĩ i namaxã naxãwemügüxü̃ i ngẽma trigu i Iraétanüxü̃ choxna ãmaregüxü̃ rü ñu̱xũchi ngẽma naxü̃nagü i pecaduarü ütanüca̱x choxna naxãmaregüxü̃ rü ñu̱xũchi ngẽma ãmaregü i duü̃xü̃gü ta̱xacürü guxchaxü̃ naxügüxü̃gagu inaxãmaregüxü̃. Rü ngẽxgumarüxü̃ ta i guxü̃ma i ngẽmaxü̃gü i Iraétanüxü̃ cha̱u̱xca̱x íxüxüchigüxü̃ rü ngẽma chacherdótegüarü tá nixĩgü.
30 Rü ngẽma chacherdótegüarü tá nixĩ i ngẽma rümemaexü̃ i nüxíraxü̃güxü̃ i nanetüarü o rü ñu̱xũchi guxü̃ma i ngẽma ãmaregü i duü̃xü̃gü choxna ãgüxü̃. Rü ngẽxguma perü triguchara pexü̱xgu, rü ngẽma rümemaexü̃ tá nixĩ i chacherdótegüna pexãxü̃. Rü ngẽxguma ngẽmaãcü penaxü̱xgu rü chorü ngü̃xẽxẽ rü guxü̃gutáma pepatawa nangẽxma.
31 Rü ngẽma chacherdótegü rü tama name nax nangõ̱xgüãxü̃ i ngẽma naeü̃ i ãxpe̱xatüxü̃ i nüechama yuxü̃ rüe̱xna ta̱xacürü to i naeü̃ i nüechama yuxü̃. Rü tama name nax nangõ̱xgüãxü̃ i ngẽma naeü̃ i wüxi i ai nagu wagüxü̃” —ñanagürü.
