Ezequiel 45:1-25
45 —Rü ngẽxguma sortéuãcü pegü peyanuxgu i naane nax wüxichigü i natücumü i Iraétanüxü̃ nüxü̃́ ngẽxmaxü̃ca̱x i norü naane, rü Cori ya Tupanaca̱x tá ípenaxüxüchi i wüxi i naane i 12 quirumétruarü ngãxü̃ i norü ma̱x rü 10 quirumétru i norü tatachinü. Rü ngẽma naane rü wüxi i naane i üünexü̃ tá nixĩ.
2 Rü ngẽma naanewa rü Tupanapataca̱x tá ípenaxüxüchi i wüxi i naane i norü ãgümücücüwawa 250 metrugu ixüxü̃. Rü naa̱xtü i ngẽma naanecüwagu ídaeguãchixü̃ rü 25 metru tá nixĩ i norü tatachinü.
3 Rü ngẽma naane ya Cori ya Tupanaca̱x ípexüxüchixü̃ rü 12 quirumétruarü ngãxü̃ tá nixĩ i norü ma̱x rü 5 quirumétru tá nixĩ i norü tatachinü. Rü ngẽma naane ya Cori ya Tupanaca̱x ípexüxüchixü̃ rü wüxi i naane i yexera üünexü̃ tá nixĩ. Rü ngẽxma tá nixĩ i naxüxü̃ ya Cori ya Tupanapata.
4 Rü ngẽma naanewa tá nangẽxmagü i ngẽma chacherdótegü i choxna ngaixcamagüxü̃ nax chopatawa napuracüexü̃ca̱x. Rü ngẽma naanewa tá nüxü̃́ nangẽxma i napatagü. Rü wüxi i naane i üünexü̃ tá nixĩ erü ngẽmawa tá nangẽxma ya chopata.
5 Rü ngẽxgumarüxü̃ tá ta nixĩ i ngẽma to i norü ngãxü̃ i ngẽma naane. Rü 12 i quirumétruarü ngãxü̃ tá nixĩ i norü ma̱x rü 5 quirumétru i norü tatachinü. Rü ngẽma naane rü ngẽma Lebítanüxü̃ i Tupanapatawa puracüexü̃arü tá nixĩ nax ngẽmaãcü i nümagü rü nüxü̃́ nangẽxmaxü̃ca̱x ya norü ĩanegü ya nawa namaxẽne.
6 Rü ngẽxgumarüxü̃ tá ta nacüwawa i ngẽma naane i üünexü̃ rü tá ípenaxüxüchi i to i naane i 12 quirumétruarü ngãxü̃ i norü ma̱x rü taxre i quirumétruarü ngãxü̃ i norü tatachinü. Rü ngẽma naane rü guxü̃ma i duü̃xü̃gü i Iraétanüxü̃ca̱x tá nixĩ.
Naane i Ãẽ̱xgacüca̱x ixĩxü̃
7 Rü ngẽxgumarüxü̃ tá ta nangẽxma i taxre i naane i ãẽ̱xgacüca̱x ixĩxü̃. Rü wüxi i ngẽma naane rü éstewa tá nangẽxma, rü ngẽma to i naane rü oéstewa tá nangẽxma. Rü ngẽma éstewa ngẽxmaxü̃ rü naane i üünexü̃cüwawa nangẽxma. Rü ngẽma éstecüwawaama rü tá Már i Mediteráneuwa nangu. Rü ngẽma naane i éstewaama rü tá natü i Yudáü̃wa nangu. Rü wüxichigü i ngẽma togü i Iraétücumüarü naanearü ma̱x rü tá nawüxigumare.
8 Rü ngẽmaãcü i ngẽma Iraétanüxü̃arü ãẽ̱xgacü rü tá nüxü̃́ nangẽxma i noxrütama naane. Rü ngẽmaãcü taxũtáma texéna naane nanapugü. Rü wüxitücumüchigü i ngẽma Iraétanüxü̃ rü tá nüxü̃́ nangẽxma i noxrütama naane —ñanagürü.
Mugü i ãẽ̱xgacügüca̱x ixĩxü̃
9 Rü chomax ya Cori ya Tupana rü ñacharügü: —¡Pa Iraétanüxü̃arü Ãẽ̱xgacügüx, marütama nax namaxã penuexü̃ rü nüxü̃́ pengĩ́xü̃ i duü̃xü̃gü! ¡Rü aixcüma mea namaxã ipecuá i chorü duü̃xü̃gü! Rü choma ya Cori ya Tupana nixĩ i pemaxã nüxü̃ chixuxü̃ i ngẽma.
10 Rü ngẽxguma ta̱xacü ipeyáxgu rü name i aixcüma yáruxü̃ ya mecüwa ipenayá. Rü ngẽxguma ta̱xacürü achiü̃xü̃ pengugügu rü name i naxpáxü̃ i aixcüma mea ngugüguxü̃wa penangugü.
11 Rü ngẽma ãte̱e̱xü̃arü ngugüruxü̃ rü name nax ãchiü̃xü̃arü ngugüruü̃maxã nawüxiguxü̃. Rü ngẽma ngugüruxü̃ i ómer i 220 litru naguxü̃ tá nixĩ i perü cua̱xruxü̃. Rü ngẽxguma ta̱xacü i ãchiü̃xü̃ pengugügu rü ngẽma ngugüruxü̃ i batú i 22 litru naguxü̃wa tá penangugü. Rü ngẽxguma ta̱xacü i ãte̱e̱xü̃ pengugügu rü ngẽma ngugüruxü̃ i efa i 22 litru naguxü̃wa tá penangugü.
12 Rü ngẽxguma ta̱xacü peyáxgu rü wüxi i minawa nangẽxma i 20 i chiclugü. Rü wüxi i chicluwa nangẽxma i 20 i géragü.
Ãmaregü i Tupanaca̱x ixĩxü̃
13 Rü ñaa nixĩ i ngẽma ãmare i choxna tá pexãxü̃. Rü ngẽxguma perü tríguarü o rüe̱xna perü chebádaarü o pibuxgügu rü 6 gu tá peyayauxyegü. Rü wüxi i ngẽma norü yauxye rü tá choxna penaxã.
14 Rü ngẽxgumarüxü̃ ta i ngẽma chíxü̃ i pexü̃́ ngẽxmaxü̃ rü 10 gu tá peyayauxyegü. Rü wüxi i ngẽma norü yauxye rü tá choxna penaxã.
15 Rü ngẽxgumarüxü̃ ta i perü carnérugütanüwa, rü wüxichigü i 200 gütanüwa rü tá choxna penamu i wüxi i carnéru i ngẽma Iraéanearü maxẽ i rümemaecüwa chibüxü̃. Rü ngẽma tríguarü o rü ngẽma chebádaarü o tá nixĩ i ãmare i tá choxna pexãgüxü̃. Rü ngẽma carnérugü tá nixĩ i cha̱u̱xca̱x pedaixü̃ rü ípeguxü̃ nax choxü̃ perüngüxmüxẽẽxü̃ca̱x rü pexü̃́ nüxü̃ icharüngümaxü̃ca̱x i perü pecadugü. Rü ngẽma nixĩ i choma ya Cori ya Tupana pexü̃ chamuxü̃.
16 Rü guxü̃ma i duü̃xü̃gü i Iraétanüxü̃ rü tá Iraéanearü ãẽ̱xgacüna nanaxãgü i ngẽma ãmaregü.
17 Rü nüma i ãẽ̱xgacü tá nixĩ i naxãxü̃ i ngẽma naxü̃nagü nax cha̱u̱xca̱x nada̱i̱xü̃ca̱x rü ínaguxü̃ca̱x. Rü ngẽxgumarüxü̃ tá ta inanana i ngẽma ãmaregü i tríguarü o rü chebádaarü o rü bínu i ngẽxguma nango̱xgu ya ngexwacaxü̃cü ya tauemacü rü ngẽxguma ngü̃chigaarü ngunexü̃wa nanguxgu rü ngẽxguma nawa nanguxgu i guxü̃ma i ngẽma petagü ga Iraétanüxü̃wa nüxü̃ chaxunetaxü̃. Rü ngẽxgumarüxü̃ tá ta inanaxã i ngẽma ãmaregü i pecaduarü ütanüruxü̃ ixĩgüxü̃, rü ãmaregü i tríguarü o rü chebádaarü o rü ãmaregü i cha̱u̱xca̱x ínaguxü̃ rü ãmaregü nax choxü̃ nangüxmüxẽẽxü̃ca̱x rü nüxü̃́ nüxü̃ icharüngümaxü̃ca̱x i Iraétanüxü̃arü pecadugü —ñanagürü.
Üpetüchigaarü petachiga
18 Rü choma ya Cori ya Tupana rü pemaxã nüxü̃ chixu rü ñacharügü: —Wüxichigü i taunecügu rü yimá nüxíraü̃cü ya tauemacüarü nuxíraxü̃xü̃ i ngunexü̃gu rü tá cha̱u̱xca̱x peyama̱x i wüxi i wocaxacü i yatüxü̃ i taxuwama chixexü̃, nax ngẽmamaxã peyanaxoxẽẽxü̃ca̱x i ngẽma norü ãũãchixü̃ ya yimá chopata.
19 Rü nüma i chacherdóte rü tá nanayaxu i íxracü ya nagü i ngẽma wocaxacü i pecaduarü ütanüca̱x imáxü̃. Rü yimá nagümaxã rü tá chopataarü ĩã̱xarü caxtagü nichagü. Rü yimá nagümaxã tá nayachagü i ngẽma ãmarearü guruü̃arü ãgümücüpe̱xewa rü ñu̱xũchi norü caxtagü i ngẽma ĩã̱xgü i naa̱xtü i aixepewa ngẽxmagüxü̃.
20 Rü ngẽxguma yima tauemacüarü 7 i ngunexü̃wa nanguxgu rü ngẽma tátama pexü naxca̱x i ngẽma duü̃xü̃ i naechita chixexü̃ üxü̃. Rü ngẽmaãcü tá peyanaxoxẽxẽ i ngẽma ãũãchixü̃ i chopatawa ngẽxmaxü̃.
21 Rü ngẽxguma yima tauemacüarü 14 i ngunexü̃wa nanguxgu rü tá penaxüchiga i Üpetüchigaarü peta. Rü ngẽma ngunexü̃gügu tá penangõ̱xgü i paũ i ngearü pu̱xẽẽruü̃ã́xü̃.
22 Rü ngẽma ngunexü̃gu rü nüma ya ãẽ̱xgacü rü wüxi i wocaxacü i yatüxü̃ tá cha̱u̱xca̱x nima̱x noxrütama pecaduarü ütanüruxü̃, rü ñu̱xũchi guxü̃ma i duü̃xü̃güarü pecaduarü ütanüruxü̃.
23 Rü ngẽma 7 i ngunexü̃gü i ngẽma peta nagu naxüchigagüxü̃gu rü 7 i wocaxacügü i iyatüxü̃ i taxuwama ichixexü̃ rü 7 i carnérugü i iyatüxü̃ i taxuwama ichixexü̃ tá nixĩ i cha̱u̱xca̱x ínagugüxü̃. Rü ñu̱xũchi wüxichigü i ngẽma ngunexü̃gu rü tá cha̱u̱xca̱x nayama̱x i wüxi i chíbu i yatüxü̃ i pecaduarü ütanüruxü̃.
24 Rü wüxichigü i wocaxacü i yatüxü̃maxã rü wüxichigü i carnérumaxã tá cha̱u̱xca̱x peyagu i 20 litru i trigute̱xe rü 3 litruarü ngãxü̃ i chíxü̃.
Düxenügüarü petachiga
25 Rü ngẽxguma yima 7 ya tauemacüarü 15 i ngunexü̃wa nanguxgu rü tá penaxüchiga i ngẽma düxenügüarü peta. Rü wüxichigü i ngẽma 7 i ngunexü̃gügu rü nüma ya ãẽ̱xgacü rü pecaduarü ütanüruxü̃ tá 7 i wocaxacügü rü 7 i carnérugü rü wüxi i chíbu cha̱u̱xca̱x ínagu namaxã i trigute̱xe rü chíxü̃ —ñanagürü.
