Ezequiel 46:1-24
46 Rü choma ya Cori ya Tupana rü nüxü̃ chixu rü ñachagürü: —Rü ngẽma ĩã̱x i chopataarü ĩã̱xtü i aixepewa ngẽxmaxü̃ i éstewaama, rü name nax nawãxtaxü̃ i ngẽma 6 i ngunexü̃gü i nagu penaxügüxü̃ i perü puracü. Natürü tá peyawãxna i ngẽma ĩã̱x ngẽxguma ngü̃xchigaarü ngunexü̃wa nanguxgu rü ñu̱xũchi ngẽxguma ngexwacaxü̃cü ya tauemacü ngo̱xgu.
2 Rü nüma ya ãẽ̱xgacü rü naa̱xtü i düxétüwa ngẽxmaxü̃wa tá ne naxũ nax nagu naxücuxü̃ca̱x i ngẽma ucapu i ngu̱xẽxẽchica i naa̱xtü i aixepewa ngẽxmaxü̃. Rü wüxi ya yima ĩã̱xarü caxtaxü̃tagu tá nixĩ i yachixü̃. Rü nüma i chacherdótegü rü yoxni tá cha̱u̱xca̱x ínanagu i ngẽma naxü̃nagü i ãẽ̱xgacü ngéma gagüxü̃ nax ngẽmaãcü duü̃xü̃gümaxã choxü̃ nangüxmüxẽẽxü̃ca̱x rü nüxü̃́ nüxü̃ icharüngümaxü̃ca̱x i norü pecadugü. Rü nüma i ãẽ̱xgacü rü tá ĩã̱xü̃tagu nayangücuchi, rü ngẽmawena tá ínaxũxũ. Rü ngẽxguma i ngẽma ĩã̱x rü taxũtáma narüwãxta naxü̃pa nax nayáuanexü̃.
3 Rü ngü̃xchigaarü ngunexü̃gu rü ngẽxguma nango̱xgu ya ngexwacaxü̃cü ya tauemacü rü nüma i duü̃xü̃gü rü ngẽmatama ĩã̱xpe̱xewa tá choxü̃ nicua̱xüü̃gü.
4 Rü ngẽma naxü̃nagü i ãẽ̱xgacü ngü̃xchigaarü ngunexü̃ca̱x ixãxü̃ nax cha̱u̱xca̱x nadaiaxü̃ca̱x rü ínaguaxü̃ca̱x, rü 6 i carnéruxacügü rü ñu̱xũchi wüxi i carnéru i yatüxü̃ tá nixĩ. Rü guxü̃ma i ngẽma naxü̃nagü rü taxuwatáma ichixexü̃ nixĩ.
5 Rü wüxichigü i carnéruca̱x rü tá inanaxã i 20 quíru i trigute̱xe. Rü wüxichigü i carnéruxacüca̱x tá inanaxã i ngẽma trigute̱xe i norü ngúchaü̃maxã inaxãxchaü̃xü̃. Rü wüxichigü i ngẽma 20 quíru i trigute̱xeca̱x tá inanaxã i tomaepü̱x i litruarü ngãxü̃ i chíxü̃.
6 Rü ngẽma ngunexü̃ i ngexwacaxü̃cü ya tauemacü nagu ngóxü̃gu rü tá inanaxã i wüxi i wocaxacü i yatüxü̃ rü 6 i carnéruxacügü rü wüxi i carnéru i yatüxü̃. Rü guxü̃ma i ngẽma naxü̃nagü rü taxuwama ichixexü̃ tá nixĩ.
7 Rü wüxichigü i wocaxacüca̱x rü tá inanaxã i 20 quíru i trigute̱xe. Rü wüxichigü i carnéruca̱x rü ngẽxgumaepü̱x tá ta inaxã i trigute̱xe. Rü wüxichigü i carnéruxacüca̱x tá inanaxã i ngẽma trigute̱xe i norü ngúchaü̃maxã inaxãxchaü̃xü̃. Rü wüxichigü i ngẽma 20 quíru i trigute̱xeca̱x tá inanaxã i tomaepü̱x i litruarü ngãxü̃ i chíxü̃.
8 Rü ngẽxguma ãẽ̱xgacü naa̱xtü i düxétüwa ngẽxmaxü̃wa ne naxũxgu, rü name i ngẽma ucapu i ngu̱xẽẽchicaarü ĩã̱xwa nixücu. Rü ñu̱xũchi ngẽxguma ínaxũxũxgu rü name i ngẽmatama ĩã̱xwa ínaxũxũ.
9 Rü ngẽxguma ngẽma petachigagügu duü̃xü̃gü Tupanapataa̱xtügu chocugu nax Cori ya Tupanaxü̃ yacua̱xüü̃güxü̃ca̱x, rü ngẽma duü̃xü̃gü i ĩã̱x i nórtewa ngẽxmaxü̃wa ichocuxü̃ rü ngẽxguma ínachoxü̃gu rü ĩã̱x i súrwa ngẽxmaxü̃wa tá ínachoxü̃. Rü ngẽma duü̃xü̃gü i ĩã̱x i súrwa ngẽxmaxü̃wa ichocuxü̃ rü ngẽma ĩã̱x i nórtewa ngẽxmaxü̃wa tá ínachoxü̃. Rü taxũtáma ngẽma ĩã̱x i nawa yachocuxü̃wa ínachoxü̃. Rü ngẽma ĩã̱x i yachocuxü̃pe̱xewa ngẽxmaxü̃ i ĩã̱xwa tá nixĩ i ínachoxü̃xü̃.
10 Rü nüma ya ãẽ̱xgacü rü wüxigu duü̃xü̃gümaxã tá nixücu. Rü ñu̱xũchi wüxigu tá duü̃xü̃gümaxã ínaxũxũ.
11 Rü ngẽxguma wüxichigü i peta naxüchigagügu i duü̃xü̃gü rü wüxichigü i wocaxacü i yatüxü̃ca̱x tá inanaxãgü i 20 quíru i trigute̱xe. Rü ngẽxgumarüxü̃ ta wüxichigü i carnéruca̱x tá inanaxãgü i 20 quíru i trigute̱xe. Rü wüxichigü i carnéruxacüca̱x tá inanaxãgü i ngẽma norü ngúchaü̃maxã inaxãgüxü̃. Rü wüxichigü i 20 quíru i trigute̱xemaxã tá inanaxã i 3 litruarü ngãxü̃ i chíxü̃.
12 Rü ngẽxguma nüma ya ãẽ̱xgacü norü ngúchaü̃maxã Cori ya Tupanana naxããgu i wüxi i naxü̃na i ãmareruxü̃ nax Tupanaca̱x yamáaxü̃ca̱x rü yaguãxü̃ca̱x rüe̱xna wüxi i naxü̃na nax Tupanaxü̃ nangüxmüxẽẽxü̃ca̱x, rü ngẽxguma tá ãẽ̱xgacüca̱x nayawãxna i ngẽma ĩã̱x i éstewaama üxü̃. Rü ngẽma ngü̃chigaarü ngunexü̃gu naxüxü̃ãcü tá inanaxã i norü ãmare nax Tupanaca̱x yamáaxü̃ rü yaguãxü̃. Rü ngẽxguma ínaxũxũxgu ya ãẽ̱xgacü rü tá narüwãxta i ngẽma ĩã̱x.
Ãmare i wüxichigü i ngunexü̃gu ixãxü̃chiga
13 Rü wüxichigü i ngunexü̃arü pa̱xmama rü tá Tupanana cunaxã i wüxi i carnéru i yatüxü̃ i wüxi ya taunecü nüxü̃́ ngẽxmaxü̃ i taxuwama chixexü̃ nax ãmare i Cori ya Tupanaca̱x iguxü̃ yixĩxü̃ca̱x.
14 Rü ngẽxgumarüxü̃ tá ta i wüxichigü i pa̱xmama rü Cori ya Tupanana tá penaxã i 7 quíru i trigute̱xe rü ñu̱xũchi wüxi i litru i chíxü̃. Rü ngẽma chíxü̃ rü trigute̱xearü üexü̃ruxü̃ tá nixĩ. Rü ngẽma nacüma rü guxü̃gutáma peyanguxẽxẽ.
15 Rü ngẽma nax Tupanaca̱x wüxi i carnéruxacü iguxü̃ rü ngẽma nax ãmare i trigute̱xe rü chíxü̃ ixãxü̃ rü guxü̃gutáma wüxichigü i pa̱xmama tá penaxü —ñanagürü.
Mugü i ãẽ̱xgacü tá inguxẽxẽxü̃
16 Rü choma ya Cori ya Tupana nüxü̃ chixu rü ñacharügü: —Ngẽxguma ãẽ̱xgacü rü norü naanewa wüxi i nanena tanaxãxgu i naane rü ngẽma naane i yixcama rü nataagüarü tá nixĩ.
17 Natürü ngẽxguma ãẽ̱xgacü rü norü naanewa wüxi i norü puracütanüxü̃na naxããgu i naane, rü ngẽma naane rü norü puracütanüxü̃arü tá nixĩ. Natürü ngẽxguma nawa nanguxgu ya yimá Taunecü ya Nagu Natáeguxẽẽãcü i Naane rü wena táxarü ãẽ̱xgacüarü naane nixĩ. Rü ngẽxguma i ngẽma naane rü nanegüarü tá nixĩ.
18 Rü nüma i ãẽ̱xgacü rü taxucürüwama texéxü̃ ínata̱xüchi nawa i tümaarü naane. Rü ngẽxguma ãẽ̱xgacü nanegüna naxãxgu i naane rü nanaxwa̱xe i norü naanewa nanegüna nanaxã. Rü ngẽmaãcü taxúema tangearü naaneã̱x rü chorü duü̃xü̃gü rü taxũtáma nawoonemare —ñanagürü.
Tupanapataarü cuchinagü
19 Rü yemawena ga gumá yatü rü yema ĩã̱xcüwawa yexmaxü̃ ga ücuchicawa choxü̃ naga nax nüxü̃ chadauxü̃ca̱x ga yema ucapugü ga nórtewaama ügüxü̃. Rü yema nixĩ ga ucapugü ga chacherdótegüca̱xicatama ixĩgüxü̃. Rü choxü̃ nanawe̱x ga wüxi ga nachica ga guma ĩpata iyacuáxü̃wa yexmaxü̃ ga oéstewaama.
20 Rü yexguma ga gumá yatü rü chomaxã nidexa rü ñanagürü: —Ñaa nachicawa tá nixĩ i chacherdótegü namuxragüãxü̃ i namachi i ngẽma naxü̃nagü i pecaduarü ütanüca̱x nada̱i̱xü̃, rü ngẽma naxü̃nagü i duü̃xü̃gü ta̱xacürü guxchaxü̃ naxügüxü̃gagu inaxãmaregüxü̃. Rü ñaa nachicawa tá nixĩ i chacherdótegü namuxragüãxü̃ i ngẽma trigute̱xe i ãmare ixĩxü̃. Rü ngẽmaãcü i chacherdótegü rü taxũtáma ĩã̱xtüwa nanangegü i ngẽma ãmaregü, rü nüma i duü̃xü̃gü rü taxũtáma nüxna nangaicamagü i ngẽma õnagü i üünexü̃ —ñanagürü.
21 46:21-22 Rü gumá yatü rü ñu̱xũchi yema naa̱xtü ga düxétüwa yexmaxü̃wa chomaxã naxũ. Rü yema naã̱xtüarü ãgümücüpe̱xewa choxü̃ naga. Rü nüxü̃ chadau nax wüxichigü ga yema naã̱xtüpe̱xewa nayexmaxü̃ ga naa̱xtü. Rü guxü̃ma ya yema naã̱xtüpexegü rü nawüxigu, rü 20 metru nixĩ ga norü ma̱x rü 15 metru nixĩ i norü tatachinü.
22 Nüü̃ nadau 46:21
23 Rü wüxichigü ga yema ãgümücü ga naa̱xtü rü nutamaxã ínapoegu. Rü yema poxeguxü̃arü ñaxtüwa nayexma ga gueta̱xmüü̃gü.
24 Rü yexguma ga gumá yatü rü choxü̃ ñanagürü: —Ngẽma Lebítanüxü̃ i Tupanapata ya taxü̃newa puracüexü̃ rü ñaagü nixĩ i ngẽma gueta̱xmüü̃gü i nawa tá namuxragüãxü̃ i ngẽma naxü̃nagü i duü̃xü̃gü Tupanana ãgüxü̃ —ñanagürü.
